Ntandiliko 6
6
Kuyenjejeka kwa mambo lahakalenge
1Bahi vanu pavatandilike kuyenjejeka pachilambo na kuvaveleka vana vachimahe, 2viumbe fulani vinahaleke kulihunde#6:2 Lilove kwa lilove apano pàlembwije, “vana vachilume vanga Nnungu.” nkuvona anevo vana va chimahe kuva vànikatapala, bahi nkulitomolelanga avala uvachivatamwa, nkuvajuha kuva ajavao. 3Anepo Yahwe nkuchidoni, “Nikambeleka imumu yangu ya umi ììkale nkati mwanga munu maduva lammalele, kwa kuva nang'e nni munu chihi wa kuhwa. Bahi munu akámbelama vyaka vipûnda myamoja na ishilini.” 4Bahi mmahiku anelo, na lapapête, pachilambo pávele na vanu maluchi lalepîle namene, vanavelekwejije kuhalokana na ulombi wa avala viumbe na avala vana va chimahe. Anevo vanu maluchi váchemwa “Vanefili,” na nni vanu vanavele ang'ondo vavêle na dimongo namene vanapwawije anepo kala, na nni vanu vachimaikana namene.
5Yahwe pawene kuva mambo lahakalenge làvenkuhalija kuyenjejeka pachilambo, na kuva kila chinu chakudungila munu muisungu yake chììva chihi chibaya mmaduva lammalele, 6Yahwe nkulihamola namene kwa kummumba munu pachilambo, na muntima mwake nkuva na lihindambi. 7Bahi nkuchidoni, “Nìmbevaondonganga mwalehu vanu univaumbile, vanapwawe pachilambo. Uchocho, nìmbevaondonganga na anyama vammalele na vakoko na vyuni viulûka kumahunde. Kwa kuva, nahinginika kwa kuvaumba.” 8Henga Yahwe nkukatapaliwa nawi Nuhu.
Habali dyanga Nuhu
9Aino njo histoliya yanga Nuhu na vanu va nnukolo lwake. Nuhu ávele munu achilatenda àlalá lalalembela Nnungu, na ávele munu akánavele na likosa ching'ati vanu va mmaduva anelo, na ávele munu anavele pepi namene nawi Nnungu. 10Nuhu ávele na vana vatatu vachilume, Shemu, Yafeti nawi Hamu. 11Nnungu áchiwene chilambo kuva chìniondongeka na chìumbele chihi ukatili, 12yani áchiwene chìniondongeka mwalehu, kwa kuva kila munu àtenda chihi lahakalenge.
13Nnungu nkunnyaulila Nuhu kuchidoni, “Nìmbeviondonganga viumbe vyammalele kwa kuva, chilambo chammalele chìumbele ukatili ing'anya ya vanang'o. Muhiu, nìmbevaondonganga mwalehu pamo na chilambo! 14Bahi likatapajije safina ya mbao dya mvinje. Yavanya vyumba nkati mwake na uipakalange lami, nkati na pawelu uchinga medi lanainjile nkati. 15Ikatapaje safina ivêle na ulehu wa futi myanne na amsini, na upana wa futi sabini na tano na changa cha futi alubaini na tano. 16Aneyo safina ììve ya galofa tatu na ììve na nnango nnuvau. Tununa muha, na uleke mwanya wa ding'olokoto uvêle na ulehu malinga wa futi moja na nusu kati ya nakatene na likangala, mmipata yammalele ya safina. 17Nìmbekwida na livambwe uchinga nguondongange viumbe vyammalele vya pachilambo. Kila chiumbe chivêle na umi pachilambo chìmbekuhwa. 18Henga nìmbetenda lilailano lyangu na wako. Ùmbeinjila nsafina, wako pamo na n'jalo na vana vako pamo na ajavao. 19Na kila aina ya viumbe vivêle na umi viinjije nsafina vivili-vivili, yani nannume na mmahe, uchinga uvachunge vààve vomi chalumo na wako umwene. 20Kila aina ya chuni na nnyama na kila aina ya nkoko, vachivaide kwakuwe vavili-vavili, uchinga vachungwe, vanahwe. 21Uchocho, twala aina dyammalele dya vilyo, uvikondye uchinga vììve chakulya chenu na cha anevyo viumbe.”
22Bahi Nuhu nkutenda lammalele malinga chalaijijwe na Nnungu.
اکنون انتخاب شده:
Ntandiliko 6: Chimakonde
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2020 Pioneer Bible Translators