Luka 9

Yesu natuma abe:igisibwa bae

(Mt. 10:1-42; Mk. 6:7-13)

1Nabirikira abe:igisibwa bae ekumi na babiri aamwi, nabayana amanaga no buinga ku misambwa jo:ne, no kuosya amarwara. 2Nabatuma okura:sya obukama bwa Nyamuanga, no kuosya abarwae. 3Nababwira ati, Mutagega ci:nu ca mu njira, amwi simbo, amwi rukoba, amwi biryo, amwi mpirya, amwi mutaba na kanju ebiri. 4Na inyumba yone inu murengiragamo, mubega omwo, muso:kega omwo. 5Na bo:ne banu bararemaga okubakuma, mbe wora mwaso:ka mu musi ugwo, muba-ku:kumurirega oruteri rwa mu bigere byemwe, rube rusingiro ku be:ne. 6Mbe nibagenda nibe:singa mu misi jo:ne, nibasimura Ebigambo byo bwana, nibaosya ba:nu wo:ne wo:ne.

Okwitwa kwa Yoana Omubatija

(Mt. 14:1-14; Mk. 6:14-29)

7Mbe omukama Erode nongwa jo:ne jinu jakorerwe. Ne:tima:ta okuba abandi bariga niba:ika ati, Yoana asu:kire mu bafu:ye. 8Abandi ati, Eliya abonekere, na bandi ati, Oumwi ku baragi ba kara asu:kire. 9Erode na:ika ati, Yoana anye namutemereko mutwe, ?nawe ka niga oyo unu enungwako emisango jiri kutya? Nayenja okumurora.

Aba:nu 5,000 nibari:sibwa

(Mt. 14:15-21; Mk. 6:33-44; Yo. 6:1-14)

10Mbe jintumwa wejire jasuba, nibamutondera byone binu bakorere. Nabagega nagenda nabo bwitebe mu musi gunu gwatogwaga Betesaida. 11Nawe ebise wejire byamenya nibimuru:ba. Nabaramira akondeywe, na:ika nabo emisango jo bukama bwa Nyamuanga, nabaosya banu bariga bakenere okuosibwa. 12Risu:ba wejire ryarengesa, abo rikumi na babiri nibamutako, nibamubwira ati, Ku:ra ebise bagende mu misi na mu nguyo ja ayei bama:me, babone ebiryo, okuba ciri mwibara anu. 13Nababwira ati, Emwe mubayane ebiryo. Niba:ika ati, Citari na ci:nu tari mikate eta:nu na swi ibiri, tari cigende cibagurire aba:nu banu bo:ne ebiryo. 14Okuba abarume bariga uti bisira bita:nu. Nabwira abe:igisibwa bae ati, Mubenyanje ngobo uti makumi gata:nuta:nu. 15Nibakora kutyo nibabenyanja bo:ne. 16Nagega emikate eta:nu na swi ibiri, narora inguru mu rwire, nasi:ma najibeganya, nayana abe:igisibwa bae okujitu:ra imbere ye bise. 17Nibarya nibe:guta bo:ne. Nibaboja ebiba:ra binu byasigae nibe:jusya bi:bo ekumi na bibiri.

Petero natogora ati Yesu niwe Kristo

(Mt. 16:13-20; Mk. 8:27-30)

18Mbe anu ariga acasabwa enyere, abe:igisibwa bae bari aamwi nage. Nababu:sya ati, ?Ebise ebintogaga? 19Nibaindura ati, Yoana Omubatija, nawe abandi aba:ika ati, Eliya, na bandi ati, Oumwi ku baragi ba kara asu:kire. 20Nababu:sya ati, ?Nemwe omuntogaga? Petero naindura ati, Na:we Kristo wa Nyamuanga. 21Omwene nabakomeresya nabaragirira ati, mwasiga kubwirako mu:nu omusango ogwo. 22Na:ika ati, Kumwiire Omwana wo mu:nu okunya:sibwa byafu no kuremwa abakaruka na bagabisi abakuru na bandiki, no kwitwa, no kusu:ka ku rusiku rwa kasatu.

Ebyo kwitwika omusaraba

(Mt. 16:24-28; Mk. 8:34–9:1)

23Nabwira bo:ne ati, Omu:nu akenda okundu:ba, e:ganye omwene, e:twike omusaraba gwae ku:siku, andu:be. 24Okuba unu kenda okukisya obuanga bwae aribubusya, na unu wo:ne aribusya obuanga bwae kubwani, oyo aribukisya. 25?Okuba omu:nu aribona muri:ro ki, akarya ca:ro co:ne ke:nu nafwirwamo omwoyo gwae? 26Okuba unu wo:ne kanjirira jinswaro anye ne misango jani, oyo no Mwana wo mu:nu arimujirira jinswaro, ariba:ja mwikusyo ryae, ne rya Esemwene, ne rya bamaraika abe:ru. 27Nawe enibabwira ati, Ni cimari bario banu bemereguyu anu, banu batariraba rufu, kukinga runu barirora obukama bwa Nyamuanga.

Okuinduka kwa Yesu

(Mt. 17:1-13; Mk. 9:2-13)

28Emisango ejo wejire jawa, nijiturao siku ita:nu ne:satu, nagega Petero na Yoana na Yakobo, narinya mu ci:ma okusabwa. 29Mbe anu ariga aca:sabwa, orususo rwo busu bwae niruinduka, ne cifwaro cae niciba ce:ru nice:ŋengeta. 30Mbe rora, ba:nu babiri niba:ika nage, nibo Musa na Eliya. 31Nibaboneka mwikusyo, niba:ika ejo kufwa kwae kunu ariga najo:ku:misya mu Yerusalemi. 32Mbe Petero na banu ariga:ri nabo bariga be:tirwe jintiro. Nawe wejire barafya, nibarora rikusyo ryae na ba:nu abo babiri bemereguyu aamwi nage. 33Mbe anu abo bariga nibajo:kwaukana nage, Petero nabwira Yesu ati, Ratabugenyi, ni kwa bwana eswe okuba anu. Cikore biuna bisatu, ecimwi cao, ne cimwi ca Musa, ne cimwi ca Eliya. Ariga atakumenya cinu ka:ika. 34Mbe anu ariga aca:ika ejo, eri:re niri:ja niribasirigisya. Wejire baburira mu ri:re nibo:baya. 35Riraka niriso:ka mu ri:re niryaika ati, Oyo niwe Omwana wani omusorwa, nimumungwe. 36Oburaka wejire bwamara okwaika, Yesu naboneka enyere:ra. Abe:ne nibajibira mu siku ijo, batabwiriye mu:nu musango na gumwi ku jinu barorere.

Yesu naosya omumura wo rusaro

(Mt. 17:14-21; Mk. 9:14-29)

37Mbe mwejo wejire baso:ka ku ci:ma, ecise cinene nicibonana nage. 38Mbe omu:nu wa mu cise na:ikirira inguru ati, Omwiigisya, enikuremberesya urore Omwana wani, okuba namwibuye umwi era. 39Rora omusambwa ogumugwata, narira aonao, nigumugaragasya nafukumba rifiro, nigumuso:kerako mamba, nigumukaraburakarabura. 40Anye namaremberesya abe:igisibwa bao okuguirisya, nibatamibwa. 41Yesu naindura na:ika ati, Emwe aba riimbo rinyate:kirisya ne ri:ki:ke, ?ndikingya a:ki okuba nemwe no kube:gumirisya? Re:ta anu Omwana wao. 42Anu ariga aca:ja, omusambwa nigumwesa a:si nigumugaragasya muno. Nawe Yesu nagonya omusambwa omujabi, naonya akamura, namusubya kwisemwene. 43Bo:ne nibataŋaŋara kurwo buinga bwa Nyamuanga. Nawe bo:ne anu bariga bacarugu:ra byone binu akorere, nabwira abe:igisibwa bae ati, 44Emisango jinu mujitu:re mu matwi gemwe, okuba Omwana wo mu:nu kajo:tu:rwa mu maboko ga ba:nu. 45Nawe abe:ne batasombo:keywe omusango ogwo, gwariga gubabisire bareme okugumenyegesya. Nibo:baya okubu:sya omusango ogwo kutyo guri.

Omukuru mu bukama bwa mu rwire

(Mt. 18:1-6; Mk. 9:33-37, 42)

46Mbe nijibao jimamba mu be:ne ati, ?Niga ariba mukuru weswe? 47Yesu narora ame:ganirisyo ga mu mitima jebwe, nagega Omwana omuto:to, namuta mu rubafu rwae, 48nababwira ati, Unu wo:ne arafugesyaga Omwana omuto:to unu mwisi:na ryani, niwe kafugesya anye. Na unu wo:ne arafugesyaga anye, oyo kafugesya unu antumire, okuba omuto:to mwimwe bo:ne, oyo niwe Omukuru. 49Yoana naindura na:ika ati, Ratabugenyi, cabwene omu:nu nairisya emisambwa mwisi:na ryao, nicimuga:nya okuba atakuciru:ba eswe. 50Yesu namubwira ati, Mutamuga:nya, okuba unu atari muremo wemwe, oyo ni wa ku rubara rwemwe.

51Mbe jisiku jae ejo kusirwa inguru jejire jafugera, narore:resya obusu bwae okugenda Yerusalemi. 52Natuma jintumwa imbere yae, nibagenda mu musi gumwi gwa Basamaria okumwira:bira. 53Nibarema okumukuma okuba ariga arore:resisye obusu bwae okugenda Yerusalemi. 54Abe:igisibwa bae Yakobo na Yoana wejire barora ejo, niba:ika ati, Ratabugenyi, ?owenda ciragirire omuriro guso:ke mu rwire gubasimagisye, rwa kutyo Eliya akorere? 55Omwene nainduka, nabagonya na:ika ati, Mutakumenya omwoyo gunu muri nagwo kutyo guri. 56Okuba omwana wo mu:nu ate:jire kusimagisya buanga bwa ba:nu tari kubukisya. Mbe:muka nibagenda mu musi gundi.

Okuru:ba Yesu

(Mt. 8:18-22)

57Mbe anu bariga bacagenda mu njira, omu:nu umwi namubwira ati, Ratabugenyi, enikuru:ba enu urajaga wo:ne wo:ne. 58Yesu namubwira ati, Banyamubwe bari na mo:bo, na jinyonyi ja mu rutumba jiri na mo:swi, nawe Omwana wo mu:nu atari na wa kuta mutwe gwae. 59Nabwira oundi ati, Ndu:ba. Nawe omwene na:ika ati, Ratabugenyi, siga mbere nijo:kwesa rata. 60Omwene namubwira ati, Siga abafu:ye be:sane abafu:ye bebwe, nawe awe genda, ura:syega obukama bwa Nyamuanga. 61No undi na:ika ati, Ndakuru:baga, Ratabugenyi, nawe nunsige nambe nirage aba ike:wa:su. 62Nawe Yesu namubwira ati, Omu:nu wo:ne akagwata isuka okurima, ne:kebukira inyuma, oyo ate:ire bukama bwa Nyamuanga.

انتخاب شده:

Luka 9: KIJ1960

های‌لایت

به اشتراک گذاشتن

کپی