Luka 24
24
Okusu:ruka kwa Yesu
(Mt. 28:1-10; Mk. 16:1-8; Yo. 20:1-10)
1Mbe ku rusiku rwo kwamba orwo bwoyo, mu macereresya katondo, niba:ja ku:fwa, nibare:ta ebirange binu bariga be:ra:bire. 2Nibarora ribui risiringisisye kuso:ka ku:fwa. 3Nibengiramo, batasangiremo ecitundu ca Ratabugenyi Yesu. 4Mbe anu bariga bacataŋaŋae eco, rora, ba:nu babiri nibabe:mere-guruko, bafwae myenda nijirabangirya. 5Obu:ba mbubengiramo, mbe:namya obusu a:si. Nibababu:sya ati, ?Niki cinu omukora nimuyenja omuanga mu bafu:ye? 6Atari anu, nawe asu:kire. Mwicuke kutyo a:ikire nemwe acari mu Galilaya. 7A:ikire ati, Kumwiire Omwana wo mu:nu okutu:rwa mu maboko ba ba:nu be bibi:bi, no kubambwa ku musaraba, no kusu:ka ku rusiku rwa kasatu. 8Mbe nibe:cuka emisango jae.
9Nibaso:ka ku:fwa nibainduka, nibabwira abo rikumi no umwi na bandi bo:ne emisango ejo. 10Banu bababwiriye emisango ejo bariga ba Maryamu Magadalene, na Joanna, na Maryamu nyira Yakobo, na bagasi abandi. 11Emisango ejo ndisusana mu me:so gebwe ati ni ja butamutamu, nibaremo:kwikirisya. 12Nawe Petero ne:muka, nabirima ku:fwa, ne:nama naroramo emyenda ja bafuta biri byenyere. Nasuba ewae, narugu:ra ejo jabao.
Okuboneka kwa Yesu
(Mk. 16:9-14; Yo. 20:1-29)
13Mbe rora, ku rusiku urwo, babiri ku be:ne bariga nibagenda mu musi ngutogwa Emau, kariga katafi na Yerusalemi, uti rugendo rwa saa ebiri. 14Nibasimura abe:ne:ra ejo jo:ne jagu:yeo. 15Mbe anu bariga bacasimura nibabu:syanya, Yesu omwene nabafugerako nagenda aamwi nabo. 16Nawe ame:so gebwe nige:garwa basige kumumenya. 17Nababu:sya ati, ?Ni misango ki jinu omubu:syanya nimuribata ?Nibe:mereguru be:gunamiriye. 18Oumwi kwabo, risi:na ryae Keleopa naindura namubu: sya ati, ?Awe uri mugenyi wenyere mu Yerusalemi, ka utamenyere jinu jama:gwamo mu siku jinu?
19Nababu:sya ati, ?Misango ki? Nibamubwira ati, eja Yesu Omunajareti unu ariga:ri muragi wa managa mu jinu ariga nakora na mu jinu ariga na:ika imbere ya Nyamuanga na imbere ya ba:nu bo:ne. 20Na bagabisi abakuru na bakuru beswe kutyo bamugwatire nibamutemera eci:na co kumwita, nibamubamba ku musaraba. 21Nawe eswe, niwe cariga nici:ikanya ati, niwe unu kajo:cungura Israeli. Ka na kwijo jo:ne, rero ni rusiku rwa kasatu amagambo ganu gagu:ye. 22Abagasi abandi abe:weswe bacitaŋaŋasya banu bari bamwejere okuja ku:fwa. 23Bata:sanga ecitundu cae, niba:ja niba:ika ati, carora ebiroro bya bamaraika banu bagwekwaika ati, ni muanga. 24Na bandi ku banu bariri neswe nibaja ku:fwa, nibasanga rwa kutyo abagasi bari ba:ikire, nawe omwene batamurorere.
25Mbe omwene nababwira ati, Abatamutamu emwe, banu murengaae mu mitima okwikirisya jo:ne jinu abaragi ba:ikaga. 26?Kwariga kute:ire Kristo okunya:sibwa ejo, niwo engire mwikusyo ryae? 27Nambira ku Musa na ku baragi bo:ne, nabatondera jo:ne jinu ariga andikiywe omwene mu binu byandikirwe byone.
28Nibafugera yei no musi gunu bajagamo. Omwene naba uti aca:fugerayo imbere. 29Nibamusinyirisya niba:ika ati, Ba aamwi neswe, okuba risu:ba ryajo:kugwa, wori kwajo:kwirabura. Nengira okuba nabo. 30Mbe anu ariga acenyanjire nabo ku biryo, nagega omukate, nasi:ma, nagubeganya, nabayana. 31Ame:so gebwe nige:guka nibamumenya. Nanywerera mu me:so gebwe. 32Nibabu:syanya ati, ?Emitima jeswe jite:tikura munda jeswe anu agwekwaika ne:swe mu njira naciswerurira binu byandikirwe? 33Nibe:muka mu mwanya ogwo nibasuba Yerusalemi, nibasanga abo rikumi no umwi, na banu bariga be:kofyanyisye nabo. 34Abo niba:ika ati, Ni cimari Ratabugenyi asu:kire, asoromokee Simoni. 35Nabo nibabasimurira eja ku njira, na kutyo e:bu:risya ku be:ne kurwo kubeganya omukate.
36Mbe abo anu baca:ika ejo, Omwene nemereguru agati yebwe, nababwira ati, Omurembe gube kwimwe. 37Nawe nibe:tima:ta nibo:baya, nibe:ganirisya ati barora eungisi. 38Nababu:sya ati, ?Kubaki omuwa omwoyo? Omwitima:tira ki mu myoyo jemwe? 39Murore amaboko gani na maguru gani, ati na:nye omwene. Mumbabate murore, okuba omwoyo gutana mubiri na mawa rwa kutyo omundora anye ndi nabyo. 40Wejire amara okwaika ejo, nabe:resya amaboko gae na maguru gae. 41Mbe anu bariga baca:rema okwikirisya kurwo kukonderwa, nibarugu:ra, nababu:sya ati, ?Murio anu ne co kurya? 42Nibamuyana esinja rya swi nyoce. 43Narigega nariri:ra imbere yebwe.
Okutumwa kwa be:igisibwa
(Mt. 28:16-20; Mk. 16:15-18; Ebikorwa 1:8)
44Nababwira ati, Jinu nijo emisango jani jinu nababwiriye nicari nemwe, kutyo kwiire jiku:mire jo:ne jinu nandikiywe anye mu biragiro bya Musa, na mu baragi, na mu Jaburi. 45Niwo ne:gura obwenge bwebwe korereki basombo:kerwe binu byandikirwe. 46Nababwira ati, Nikwo kutyo jandikirwe ati, Kristo arinya:si-bwa, nasu:ka mu bafu:ye ku rusiku rwa kasatu. 47Na ba maanga go:ne barira:sibwa okuta no kwiswaririrwa kwe bibi:bi mwisi:na ryani, okwambira mu Yerusalemi. 48Nemwe nibo abo kwima ku misango ejo. 49Mbe murore, enibatumira omurago gwa Rata, nawe nimube mu musi munu kukinga runu murifwafibwa amanaga ganu agaso:ka mu rwire.
Yesu narinya mu rwire
(Mk. 16:19; Ebikorwa 1:6-11)
50Nabaurusya ku mwira nabasomekanya na Betania. Ne:musya amaboko gae nabayana ribando. 51Mbe anu ariga aca:bayana ribando, naba:ukako, nasirwa mu rwire. 52Abe:ne nibamuramya, nibasuba Yerusalemi no kukonderwa kwafu. 53Nibabaga mu yekaru kusiku, nibakusya Nyamuanga.
اکنون انتخاب شده:
Luka 24: KIJ1960
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Kijita New Testament © The British and Foreign Bible Society and The Bible Society of Tanzania, 1960.
