Luka 19
19
Okuinduka kwa Jakayo
1Nengira mu Yeriko naitiŋanamo aagati. 2Mbe rora, ariga:rio mu:nu unu atogwaga risi:na ryae Jakayo. Omwene ariga mukuru wa batobesya na ka ari muni:bi. 3Oyo nayenja okurora Yesu kutyo ari, natamibwa kurwe cise, okuba ariga:ri mufui. 4Natangata nabirima narinya kwikuyu korereki amurore, okuba ariga naja okuitiŋana ku njira eyo. 5Mbe Yesu wejire akinga anu ariga:ri, nararamira inguru, namubwira ati, Jakayo, ika bwangu, okuba rero kunyiire okuoya ike:wao. 6Ne:ka bwangu, namuramira akondeywe. 7Wejire barora, nibe:toŋanira bo:ne, niba:ika ati, Asumbiye ewo mu:nu we bibi:bi. 8Jakayo nemereguru, namubwira Ratabugenyi ati, Rora, Ratabugenyi, enigabira abataka nusu ye bi:nu byani. Ka:raba nasa:kuraga mu:nu wo:ne ci:nu cae, enimusubisya kwiya kana. 9Yesu namubwira ati, Rero omweruro gwejire mu nyumba inu, okuba unu one ni mwana wa Iburaimu. 10Okuba Omwana wo mu:nu e:jire okuyenja cinu caburire no kucionya.
Ecijekekanyo ca jiratiri ja jimpirya
11Mbe wejire bongwa ejo, neyongesya okubabwira ecijekekanyo, okuba ariga:ri yei na Yerusalemi, okuba bariga nibe:ganirisya ati, obukama bwa Nyamuanga obujo:boneka bwangu. 12Kwakorere na:ika ati, Ariga:rio mu:nu mukuru unu ajiye mu:si ya kura, korereki arye iŋoma niwo asubo:suba. 13Nabirikira abagaya bae ekumi, nabayana ratiri ekumi ja jimpirya na:ika ati, Mwibusyegamo kukinga anu ndijira. 14Nawe aba:nu bae nibamusinirirwa, nibatuma jintumwa inyuma yae, niba:ika ati, Citakwenda oyo acitunge.
15Mbe wejire amara okurya iŋoma, nasuba naragirira babirikirwe abagaya abo ayae jimpirya, korereki amenye omuri:ro gunu be:busisyemo. 16Owo kwamba na:ja na:ika ati, Ratabugenyi, iratiri yao ye:buyemo ejindi ikumi. 17Namubwira ati, Wakondya, awe mugaya wo bwana. Okuba wabee mwiikanyibwa ku ci:nu ecito:to, Mbe utungega misi ikumi. 18Na:ja owa kabiri na:ika ati, Ratabugenyi, iratiri yao ye:buyemo ejindi ita:nu. 19No:yo namubwira ati, Awe one utunge misi ita:nu. 20No undi na:ja na:ika ati, Ratabugenyi, rora njii iratiri yao, naibi:kire niiboyere mu kenda. 21Okuba naku:baire okuba uri mu:nu mukome:e. Ouboja cinu utateeo, nu:gesa cinu utabibire.
22Namubwira ati, Enijo:kutemera eci:na mu kanwa kao, awe mugaya omubi:bi. Wariga umenyere ati anye ndi mu:nu mukome:e, unu eniboja cinu nitateeo, ningesa cinu ntabibire. 23?Kambe niki cinu cakuingiriye okuyana jimpirya jani banu be:busyagamo, anye nake:jire nakagegere omuri:ro gwendemo? 24Nabwira banu bemereguyu ao ati, Mumutesye iratiri iyo, muyane owa jiratiri ikumi. 25Nibamubwira ati, Ratabugenyi, ari na ratiri ikumi. 26Enibabwira ati, Unu anaco ariyabwa, nawe unu atanaco, arite:sibwa na cinu arinaco. 27Nawe abo abaremo bani banu batakwenda anye nibatunge, mubare:te anu, mube:tire imbere yani.
Yesu nengira Yerusalemi arinyire ku sikiri
(Zak. 9:9; Mt. 21:1-11; Mk. 11:1-10)
28Wejire amara okwaika ejo, natangata nagenda Yerusalemi. 29Mbe anu ariga ajo:kinga Betifage na Betania, ku ci:ma cinu ecitogwa Ca mijeituni, natuma babiri ku be:igisibwa bae, 30na:ika ati, Mugende mu musi gunu guri imbere yemwe. Mbe araba mwengira omwo omujo:rora ecinyara ca isikiri cisibikire, cicariga kurinywako mu:nu. Mucisibure mucire:te. 31Mbe omu:nu akababu:sya ati, ?omucisiburira ki? mwaike ati, Ratabugenyi niwe acikenere. 32Banu batumirwe nibagenda, nibasanga rwa kutyo ababwiriye. 33Mbe anu bariga nibasibura ecinyara ca isikiri, abe:neco nibabu:sya ati, ?Omusiburira ki ecinyara ca isikiri? 34Nibababwira ati, Ratabugenyi niwe acikenere. 35Nibacire:ta ku Yesu. Nibanja emyenda jebwe ku cinyara ca isikiri, nibamwiyanja Yesu inguru yayo.
36Anu ariga aca:genda nibanja emyenda jebwe mu njira. 37Mbe anu ariga ajo:fugera okukinga mu co:romoko ce Ci:ma ce Mijeituni, ecise co:ne eca be:igisibwa bae nibamba okukonderwa no kukusya Nyamuanga na buraka bunene, kurwe birugu:ro byone binu barorere. 38Niba:ika ati, Ari na ribando mukama unu a:ja mwisi:na rya Ratabugenyi. Omurembe mu rwire na rikusyo inguru muno. 39Abafarisayo abandi aba mu cise nibamubwira ati, Omwiigisya, ganya abe:igisibwa bao. 40Naindura nababwira ati, Banu bakajibira, amabui agajo:kwanikirisya.
Yesu naririra Yerusalemi (Lk. 13:34-35)
41Wejire afugera yei, narora omusi naguririra, 42na:ika ati, Kumba umenyere ku rusiku runu emisango jo murembe gwao! Nawe woryanu jibisirwe mu me:so gao. 43Okuba jisiku jirikwijira, anu abaremo bao barikumbakako jingo, nibakusingira, nibakuingirira mbara jo:ne. 44Barikugwisya a:si na ba:na bao banu bari mwawe. Batarikusigira ebui kwibui ryeja:bo, okuba utamenyere jisiku jo kugosorerwa kwao.
Yesu ne:sya iyekaru
(Mt. 21:12-13; Mk. 11:15-17; Yo. 2:13-16)
45Nengira mu yekaru, namba okuirisyamo banu bariga nibaka:na. 46Nababwira ati, Gwandikirwe ati, Inyumba yani irabaga nyumba ya kusabirwamo, ke:mwe mwaikorere nsenga ya basa:kusi. 47Mbe e:igisyaga mu yekaru kusiku, nawe abagabisi abakuru na bandiki na bakuru ba ba:nu nibayenja amenge go kumwita. 48Nibaburwa cinu barakora, okuba aba:nu bo:ne bariga nibagwatirirana nage okumutegeresya.
اکنون انتخاب شده:
Luka 19: KIJ1960
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Kijita New Testament © The British and Foreign Bible Society and The Bible Society of Tanzania, 1960.
