Yoana 9
9
Omu:nu unu e:buywe ari muofu naosibwa
1Anu ariga acaitiŋana, narora omu:nu unu e:buywe ari muofu. 2Abe:igisibwa bae nibamubu:sya, niba:ika ati, ?Rabbi, niga unu akaire, unu tere amwi abe:busi bae, kwakorere ne:burwa ari muofu? 3Yesu naindura ati, Unu ata:kaire nakabee bari be:busi bae, nawe emirimu ja Nyamuanga jimubonekeko. 4Eswe kuci:ire okukora emirimu ja unu antumire, gucari mwisi. Ingeta ei:ja, inu omu:nu atakutura kukoreramo emirimu. 5Wora ndi mu:si ndi bweru bwa i:si 6Wejire amara okwaika kutyo, nafubura a:si amafwefu, nakora rimoga namuwora rimoga ku me:so. 7Namubwira ati, Genda, woge mwitanga rya Siloamu, obugajuro bwagwo ati, Unu atumirwe. Mbe nagenda no:ga nasuba arorere.
8Mbe abe:kasyanya bae na banu bamuroraga kara nasabirisya, niba:ika ati, ?Atari unu enyanjaga nasabirisya? 9Abandi niba:ika ati, Niwe. Abandi niba:ika ati, Uri, kasusana nage era. Omwene na:ika ati, Nanye. 10Mbe nibamubu:sya ati, ?Kambe ame:so gao ge:guka kutiki? 11Omwene naindura ati, Omu:nu unu katogwa Yesu akora rimoga namora ku me:so, nambwira ati, Genda ku Siloamu, woge. Mbe ningenda nino:ga nindora. 12Nibamubu:sya ati, ?Oyo abee a:ki? Na:ika ati, Nitakumenya.
13Nibamusira ku Bafarisayo unu ariga:ri muofu kara. 14Nawe rwariga rusiku rwa isabato, orwo Yesu asasisisye:ko rimoga, namwigura ame:so. 15Mbe Abafarisayo nibamubu:sya rindi kutyo arorere. Nababwira ati, Amorere rimoga ku me:so, nino:ga nindora. 16Mbe Abafarisayo abandi niba:ika ati, Omu:nu uyo atari wa Nyamuanga, okuba atakugwata isabato. Nawe abandi niba:ika ati, ?Omu:nu we bibi:bi katura kutiki okukora ebibarikisyo rwa binu? Nikubao okwaukana mu bene. 17Mbe nibamubu:sya omuofu rindi ati, ?Awe oumutoga kutiki, okuba amakwigura me:so? Omwene na:ika ati, Ni muragi.
18Mbe Abayaudi nibarema okwikirisya emisango jae ati, ariga:ri muofu narora, kukinga anu babirikiye abe:busi ba unu arorere. 19Nibababu:sya niba:ika ati, ?Unu niwe Omwana wemwe unu omwaika ati, e:buywe ari muofu? ?Mbe ka wori karora kutiki? 20Abe:busi bae nibaindura niba:ika ati, Cimenyere ati, unu ni mwana weswe, na ka e:buywe ari muofu, 21Nawe cinu ecikora narora woryanu, citakumenya. Ka na unu amamwigura ame:so, citakumumenya. Mumubu:sye, ni mumura mukuru, ara:ika omwene. 22Abe:busi bae cinu caba:ikisye kutyo, kwo kuba bariga nibo:baya Bayaudi, okuba Abayaudi bariga bamarire okuragana ati, omu:nu wo:ne akamutogora okuba Kristo airisibwe mu rikofyanyisyo. 23Abe:busi bae nikwo bakorere niba:ika ati, Ni mumura mukuru, mumubu:sye omwene.
24Mbe nibabirikira unu ariga:ri muofu orwa kabiri, nibamubwira ati, Nukusye Nyamuanga. Eswe cimenyere ati, omu:nu uyo ni wa bibi:bi. 25Omwene naindura ati, Araba ni wa bibi:bi, nitakumenya. Nimenyere musango gumwi gunu ati, nariga muofu, nawe woryanu enirora. 26Mbe nibamubu:sya ati, ?Akukorere kutiki? ?Akwiguye kutiki ame:so gao? 27Naindura ati, Namarire okubabwira, nawe mutongwa. ?Ka niki cinu omukora nimwenda okungwa orwa kabiri? ?Si imwe one omwenda okuba be:igisibwa bae? 28Nibamufuma niba:ika ati, Awe na:we omwiigisibwa wae oyo. Nawe eswe ciri be:igisibwa ba Musa. 29Eswe cimenyere ati, Nyamuanga a:ikire na Musa, nawe omu:nu uyo citakumenya eyo aso:kere. 30Omu:nu uyo naindura nababwira ati, Cinu ni cirugu:ro! Araba mutakumenya eyo aso:kere, ke:nu anyiguye ame:so! 31Cimenyere ati, Nyamuanga abe bibi:bi atakubongwa, nawe omu:nu wo:ne unu ko:baya Nyamuanga, nakora binu kenda, oyo kamungwa. 32Kuso:kerera kari:ja na kari:ja cicariga kungwibwa ati ario mu:nu unu e:guye ame:so go mu:nu e:buywe ari muofu. 33Omu:nu uyo kumba ataso:kere ku Nyamuanga, atakaturire kukora ci:nu. 34Nibaindura nibamubwira ati, Awe we:buriywe mu bibi:bi era, ?Ka na:we uci:igisye eswe? Nibamuku:rira aanja. 35Yesu nongwa ati bamuku:riye a:nja, wejire amurora, na:ika ati, ?Awe owikirisya Omwana wa Nyamuanga? 36Omwene naindura na:ika ati, ?Niga, Ratabugenyi, korereki nimwikirisye? 37Yesu namubwira ati, Wamurorere, na unu ka:ika na:we niwe. 38Omwene na:ika ati, Ratabugenyi, ne:kirisya. Namuramya. 39Yesu na:ika ati, Okuramura nikwo kwande:tere mu ca:ro munu, korereki banu batakurora barore, na banu abarora baofure. 40Abafarisayo abandi banu bariga nage nibongwa ebyo, nibamubu:sya ati, ?Eswe one ciri baofu? 41Yesu nababwira ati, Kumba mwari muri baofu, mutakabee na cikayo. Nawe wori omwaika ati, Ecirora, mbe ecibi:bi cemwe eci:kara.
اکنون انتخاب شده:
Yoana 9: KIJ1960
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Kijita New Testament © The British and Foreign Bible Society and The Bible Society of Tanzania, 1960.
