Piilimka 6
6
1Nuru bisaŋa a yaa le jam a piisi tɛŋka zuk alege a biak lieba la, 2Wen nidoabilisaŋa a yaa nya ba ale nala diila ba yaa lueri a faari baai ate ba a yaali la. 3Naawen yaa weeni ayen mi Chiik kan bo ale nurubiik taam wuu, diila wa ka waai ale a kpi. Wa daaŋa tɛŋzuk de ka bena kook le pisiye.
4Nefilim demma ale jam bo tɛŋka zuk da ŋala po. Ate ku ŋaaŋnyiŋ Wen nidoabilisaŋa yaa ga goa ale nuruba lieba ate ba biak bisa. Ba jam ka ganduata, baai ale ta yuei.
5Naawen yaa nya ayen nurubiik biem yaa zuak ka nna yegayega. Wa popolaŋa ale wa suinummu biem kasim sueri ba ka daaŋa meena. 6Ku kasim daani Naawen ate wa sui a dom wa le nye nurubiik a basi tɛŋka zuk la. 7Dila Naawen yaa weeni ayen, wa le ko nurubiik meena ate wa nye la, nuruba ale duŋsa, ŋan baai ale a cheŋ ba lɔga zuk, ale wenzuk nuinsa, diila m sui kaasi ka yegayega m le nye ba la.
8Alege Nowa nyeka jam nala Naawen nina po. 9Nowa ale jam ka diila ale nna. Nowa jam ka nuru maŋ, da ŋala po nuru an baga a dak wa kaasuŋŋoa, wa jam a cheŋ ale Wen kama. 10Nowa jam ta ka nidoabilisa bata. Ba yue jam ale Sɛm ale Yɛm ale Jafet.
11Nurubiik meena a yaa jam a tom ka biem, ate nyeka tuem zuak Wen nina po. 12Wen yaa nya tɛŋka kaasi nna yegayega diila nuruma nyeka an bola nala. 13Wen yaa weeni Nowa ayen, <<Mi za m kaasi nurubiik meena kama, diila ba nyiŋ ale soa ate nyeka tuem a sueri tɛŋka po. M le sum kaasi tɛŋka le ba meena. 14Be nye ŋaaruŋ ale daata a magsi nidek. Abe fi nye diina ku po a pai kotaali a lik paaŋa ŋaaŋ ale popo meena. 15Fi le fi nye ku diila ale nna. Ku woglimmu magsi anamagib kobsaneok, labsimu magsi anamagib kook ale pisinu, abe ku woŋŋa jueli ase anamagib pineok la. 16Abe fi pili ku ate pilika jueli ase anamagib buye. Nye tuok a basi kaukku kunyi. Nye ate ŋaaruŋku ta tɛŋ ale suŋsuŋ ale ŋmazuk.
17<<M le basi ate nyiam jam lik tɛŋka meena a ko javuk meena ale bo tɛŋka zuk la. Jaabuuri meena ale ta nyuvuri la. Jaab meena tɛŋka zuk ale kpi. 18Alege mi ale fi ale nye nɔiyeŋ ate fi ale fi nidoabilisa ale fi powa ale fi nidoabilisaŋa pooma a jo ŋaaruŋku po.
19<<Se fi ta ŋanvuta buuri meena baye baye ja duok ale ja sari a jo ŋaaruŋku po ate ba vua ale fu. 20Nuinsa buuri siye siye, ale duŋsa buuri siye siye, ale ŋan baai ale duiri tɛŋ a cheŋ baye baye, ale jam fi jigi ate fi ta ba ate ba vua. 21Pa ŋandiin tii buuri ale magsi dɛka a ta jo magsi fi ale ba.>>
22Nowa yaa nye dii meena ti Wen weeni wa la.
اکنون انتخاب شده:
Piilimka 6: BWU
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023, Ghana Institute of Linguistics, Literacy and Bible Translation