San Mateo 6
6
Nat nas̈yacwa'n limosna
1’Nicuidá̱tcʉjʉ. Campensa̱tca is̈watcawa'n oy jayau-awa'tsam pa je'jat is̈-e'pcáj. Ni'c te inwatcap we'n, is̈camoygáj nejʉmay premiu Dios Nate̱jat tsajpni'cway. 2Mit is̈yajcawa'n limosna pa pro̱wjwájat, camactujawiga nu'pʉjʉn jayajwat lo que inwatcapay, ni'c we̱tpajyat we'n iguiwatca mam i-adora̱tca judíujat mit calleni'c. Je'jat niwatcʉjʉpu as̈am oyjayajwat pa jayajwat ma nʉmga ni'c iwatcap oy. Iyacs̈ta'cway tʉnʉmgʉs̈ap ni'c je'jat ipʉctsougaway ayé fama iwangapay. 3Mit is̈yajcawa'n limosna pa pro̱wijat, camactujawiga ne in-amigujat. 4Pa we'n anu'mu is̈yajcawa'n inlimosna mit Dios Nate̱jat jeme i-e'pay lo que inwatpay anu'mu is̈moygáj premiu.
Nat na-ora̱tcawa'n
5’Mit in-ora̱tcawa'n, camwatcawit as̈am we̱tpajyat ni'c je'jat iwangap i-ora̱tcawa'n tena mam i-adora̱tca judíujat mit calle esquinani'jcat. Iwatcap we'n pa ma igui-e'pcac jayajwat. Iyacs̈ta'cway tʉnʉmgʉs̈ap ni'c je'jat ipʉctsougaway ayé fama iwangapay. 6Po in-ora̱tcawa'n tʉ́gʉyga intujugujmat mit atújca tʉc-ájw, mit in-ora̱tcajáj Dios Nate̱jat intu'gujmatu, mit Dios Nate̱jat jeme i-e'pay lo que inwatpay anu'mu is̈moygáj premiu.
7’Mit in-ora̱tcawa'n, camtʉ'ts-ora̱tcayu as̈am iguiwatca ayé jayajwat iga-is̈capcapay Dios, ni'c je'jat inʉmgap ni'c Dios iguimaraugáj te cotscap mayo'c. 8Camwatca as̈am je'jat ni'c Dios Nate̱jat ijawip lo que inyesita̱tcapay antes is̈yo'tcajawa'n. 9Mijchat orá̱tca yename:
Nate̱jat, mi̱ mitsʉ̱nap yucm,
ʉjtsat yam tʉ-oyninʉ́mga mi̱.
10Mi̱ yam manda̱t.
Tʉwátca lo que mi̱ inwa'námpay.
As̈am yucm iguiwatca, wename-ey ʉjtsat yam tʉwátca na̱s̈ni'c.
11Moygac mi̱ tʉncaygámpay pa cada s̈ʉjw,
12Mit perdoná̱tcajac lo que tʉpʉjquijatway, as̈am ʉjtsat yam tʉmperdona̱tcap jeme tʉs̈pʉjquijatway.
13Mit cammoygac laj tʉs̈tenta̱tcáj, po libra̱tcac de nu'pʉjʉn mal.
Ni'c mi̱ ayé mimanda̱tpay, mit inaguep nu'pʉjʉn poder, mit mi̱ mi-oyninʉmic pa nu'pʉjʉn tiempu. Amén.
14’Ni'c te imperdona̱tcap jayajwat jeme is̈watcajapay mal, we'ney Dios Nate̱jat tsajpni'cway is̈perdona̱tcámpey, 15po te ingaperdona̱tcap jayajwat jeme is̈watcajapay mal, we'ney Dios Nate̱jat is̈caperdona̱tcámpey ayé mal inwatcapay.
Nat na-ayuna̱twa'n
16’Mit inayuna̱tcawa'n, camniwatcʉjʉ triste as̈am ayé we̱tpajyat. Je'jat niwatcʉjʉp triste pa jayajwat ma igui-e'pcac ni'c ayuna̱tcap. Iyacs̈ta'cway tʉnʉmgʉs̈ap ni'c je'jat ipʉctsougaway ayé fama iwangapay. 17Po inayuna̱tcawa'n, pi yo'yga bien oyáguic, ma ji'jca injo̱tat, 18pa jayajwat maga-e'pca ni'c mi-ayuna̱tcap, solo ma is̈-e'pcac Dios Nate̱jat jeme tsʉ̱napay mit mijchat, mit je' is̈moygáj premiu.
Riqueza tsajpni'cway
19’Camapʉcmujca may tumi̱n yam na̱s̈ni'c mam igui-actogoygáj wech mit chijtit, mit mam nu'mpajyat itʉctʉ́gʉyga mit inu'mga. 20Pensá̱tca más pa intsʉ̱ngawa'n oy tsajpni'c, mit ayé as̈am tu'c riqueza jeme catogoypay, mit wech ne chijtit iga-actogoygáj, ne nu'mpajyat cacoygap jem. 21Jeme iwangapay may tumi̱n yam na̱s̈ni'c, ayé iguijo̱tju'pcap. Mit jeme iwangapay itsʉ̱ngawa'n oy tsajpni'c, solo pensa̱tcáj pa tsajpni'c.
Tu'c luz pa navida
22’Dios nas̈yajcajau nawijn. Je' iwamp na-e'pca puru cosa oyway pa natsʉ̱nga oy. Mit we'n natsʉ̱ngáj oy as̈am jeme yo'ygapay mam i-it luz. 23Po te nawijnat natu-e'pcap puru cosa ma̱lway, natsʉ̱ngáj mal as̈am jeme yo'ygapay chitimicni'c, mit we'n Dios iluz nas̈caservia̱tcajap ni'c nawangap puru mal.
Dios mit riquezajat
24’Tu'c jayau ca-oyap i-ijtʉ mechc ijayc ni'c i-anáj tu'c mit iwa'náj jatu'c, o i-oyninʉmáj tu'c mit imalninʉmáj jatu'c. We'ney ca-oyap is̈wánga Dios te inwangap más intumi̱jnat.
Nagapensá̱tca
25’Jemni'c tʉnʉmgʉs̈ap: Campensa̱tí̱jca ti incaygámpay o ti in-u̱jcámpay. Ne campensa̱tca pa jamuc, ti incomgámpay. Como Dios nas̈moygap vida, ayé más valia̱tp, mit je' nas̈moygámpey nacaygámpay mit nacomgámpay. 26E'pca jonwájat jeme que̱jcapay yucm. Je'jat cani̱pcap ne cachijcap ne ca-itcʉjʉp mam iguiguarda̱tcawa'n cayan, po Dios Nate̱jat tsajpni'cway i-ajcaygʉs̈p. Mijchat más mivalia̱tcap que jonwájat. 27Mit te pensa̱to'cp tu'c jayau, ¿is̈jawiga oyáj iye'c jatu'c pulgada más?
28’¿Mit tini'c impensa̱to'jca pa injamujcat? E'pca ayé liriupíjijcat cuyjugumay, nat iye'jca. Je'jat cayos̈watcap ne igapi'tcap jamuc. 29Ʉ̱ tʉnʉmgʉs̈ap ni'c ne rey Salomón mit nu'pʉjʉn i-oymanagui ca-oyawu itsʉ̱na cutigatsic as̈am ayé pijicwájat. 30Po te Dios icuida̱tp ma'tswájat cuyjugumay, mit te ayé ma'jts ye'jcap majat mit jatu'c s̈ʉjw nacomgap jʉngʉtʉm, ¿is̈jawiga Dios is̈cacuida̱tcáj más mijchat? Mijchat migacupʉjcap may. 31Jemni'c campensa̱tí̱jca. Camnʉmga: ¿ti nacaygáj? ¿Ti na-u̱jcáj? o ¿Ti nacomgáj? 32Ni'c ayé jayajwat iga-is̈capcapay Dios ipensa̱to'jcap igui-aguepcawa'n ayé cosajat, po pa mijchat Dios Nate̱jat tsajpni'cway ijawip ni'c inyesita̱tcap nu'pʉjʉn ayé cosajat. 33Che'jnʉ'jca pa is̈manda̱tcáj Dios mit pi watca yacs̈ic nu'pʉjʉn as̈am je' iguiwa'n, mit nu'pʉjʉn ayé cosajat inaguepcámpey. 34Jemni'c campensa̱tí̱jca ti jatámpay jobom, ni'c cadas̈ʉjw tigatsp lo que jatámpay. Más oy napensá̱tca pa jinapay s̈ʉjw mit ayé mal imumimpay.
اکنون انتخاب شده:
San Mateo 6: PSNT
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Nuevo Testamento en Popoluca de Sayula © Sociedad Bíblica de México, [1969].
