Матфейица бицараб Рохалил хабар 7

7 бетӏер

Чияда гӏайиб чӏваге

1Нужеца чияда гӏайиб чӏваге, Аллагьас нужедаги гӏайиб чӏваларо. 2Кигӏанасеб гӏайиб нужеца гӏадамасда чӏваниги, гьедигӏанаб гӏайиб Аллагьас нужедаги чӏвазе буго. Кинаб сахӏалъ нужеца борцаниги, гьединабго сахӏалъ борцине буго нужееги. 3Дурго бадиб бугеб чӏалу бихьичӏого, дур вацасул бадиб бугеб сум щай дуда бихьулеб? 4Яги дуда кин кӏолеб: «Ворея, вац, дур бадиса сум бахъизе биччай», – ян гьесда абизе, дурго бадиб чӏалу букӏаго? 5Ле, ххвелал гьарун ругьунав чи, цин дуца дурго бадиса чӏалу бахъе, цинги бичӏчӏила дуда вацасул бадиса сум кин бахъилебали.

6Нужерго хирияб-мукъадасаб жо гьабзазе баге, жавгьар-якъут болъоназда цебе рехуге. Болъоназ гьеб малакь мерхьина, тӏаделъун нужги тӏутӏун рала.

Гьари-дугӏаялъул хӏакъалъулъ цоги нухалъ

7Гьаре нужеца – нужее кьечӏого толаро; балагье нужеца – батичӏого хутӏуларо, нужеца нуцӏа бухе – гьеб рагьичӏого толаро. 8Гьарарасе кьола, балагьарасда батула, бухарасе нуцӏаги рагьула. 9Нужеда гъорлъ вугищ цониги чи, васас чед гьарараб мехалъ, гьесухъе гамачӏ кьолев? 10Яги ччугӏа гьарани, гьесухъе борохь кьолев? 11Нужго квешал ругониги, нужеца лъималазе лъикӏабщинаб кьолеб мехалъ, жинда гьарарасе лъикӏабщинаб жо кигӏан цӏикӏкӏундай кьелеб зобалазда вугев нужер Инсуца!

Аллагьасул аслияб амру

12Гӏадамаз нужеего гьабизе бокьулеб жо, нужеца гӏадамазеги гьабе. Гьеле гьебин Мусал Къануналдаги аварагзабазул Тӏухьдуздаги бугебщиналъул аслу-кьучӏ.

Кӏиго нух

13Чӏедераб нуцӏихъан лъугьа нуж жанире, – гӏебал кавабазги гӏатӏидаб нухалъги гӏадамал хвалде рачунелъул. Халкъалъул руккелалги гьенисан унел ругелъул. 14Абадияб гӏумруялде гӏадамал рачуна чӏедераб нуцӏицаги къваридаб нухалъги, амма дагьазда батула гьеб.

Цӏодорго рукӏа!

15Гьересиаварагзабаздаса цӏуне! Гьел нужехъе рачӏуна чахъдал цӏокоги тӏад ххун. Хӏакъикъаталда гьел руго хъантӏарал бацӏал. 16Гьезул ишазда тӏад кинаб пихъ бижулеб бугебали халгьабун, лъала нужеда гьел. Зазил хъархъидаса цӏибил бетӏарабищ нужеца, тӏетӏелоялдаса инжирги бетӏарабищ? 17Лъикӏаб гъотӏоца лъикӏаб пихъ кьола, турараб гъотӏода бижараб пихъ квешаб букӏуна. 18Лъикӏаб гъотӏода квешаб пихъ бижизе рес гьечӏо, турараб гъотӏоца лъикӏаб пихъги кьоларо. 19Тӏад лъикӏаб пихъ бижулареб гъветӏ къотӏун цӏадабе рехула. 20Гьедин, гьезул ишазда тӏад кинаб пихъ бижулеб бугебали халгьабун, лъала нужеда гьел гьересиаварагзаби. 21«Я, Бетӏерчӏахъад! Я, Бетӏерчӏахъад!» – абун дида кӏалъанщинав чи гуро Зобалазул Парччахӏлъиялде ворчӏизе вугев. Гьениве ворчӏила зобалазда вугев дир Инсул амру тӏубазабурав чи. 22Доб къоялъ гӏемерав чияс абила дида: «Бетӏерчӏахъад! Бетӏерчӏахъад! Дур цӏаралдалъун гурищ нижеца Аллагьасул амру халкъалъе загьир гьабураб? Дур цӏаралдалъун гурищ шайтӏаби рачахъарал? Дур цӏаралдалъун гурищ нижеца гӏемерал хӏикматал ишал гьарурал?» 23Гьебмехалъ дица гьезда лъазабила: «Дида рихьарал чагӏицин гуро нуж. Тӏагӏа дида аскӏоса, квешлъиялда хьвадараб уммат!»

Кӏиго кьучӏ

24Гьединлъидал дир гьал рагӏабазухъ гӏенеккарав ва гьел тӏуразарулевщинав чи релълъуна, тӏалде щвезегӏан кьучӏги бухъун, мина барав цӏодорав чиясда. 25Цӏадал рана, иххал щвана, гьурал пуна, – доб минаялде тӏаделъана гьел. Амма мина биххичӏо, тӏалда тӏад букӏиндал гьелъул кьучӏ. 26Амма дир гьел рагӏабазухъ гӏенекканиги, гьел тӏуразаричӏевщинав чи релълъуна салуда тӏад мина барав ахӏмакъав чиясда. 27Цӏадал рана, иххал щвана, гьурал пуна, – доб минаялде тӏаделъана гьел. Мина биххана, щущан ана, чӏваднал хутӏана.

28Гьале Гӏисаца жиндирго вагӏза лъугӏизабуна. Халкъ гӏажаиблъун хутӏана, гьес вагӏза гьабулеб куц бихьун. 29Гьезул диниял гӏалимзабаз гӏадин гуреб, цо хӏалкӏолъи жиндилъ бугев чияс гӏадин малъулеб букӏана гьес.

اکنون انتخاب شده:

Матфейица бицараб Рохалил хабар 7: AvrNT

های‌لایت

به اشتراک گذاشتن

کپی