Лука 23
23
Иса Пилатдин улихь
1Хъасин дурари, гъудужвну, Иса Пилатдихьна гъуху 2ва Дугъак гьамцдар тахсрар кирчуз хъюгъю:
– Мугъу, Чаз Месигь, паччагь кӀури, халкь рякъʼан адаура, Римдин паччагьдиз налук тувуб дюз дар кӀури, гьисаб апӀура.
3Пилатди Исайихьан гьерхру:
– Уву «жугьдарин Паччагь» вуна?
Исайи жаваб вуди дугъаз кӀуру:
– Уву гьаци ву кӀурава.
4Пилатди жугьдарин аьхюну маллйириз ва халкьдиз гъапи:
– Узуз Гьаму Касдик саб тахсирра бихъурадарзуз.
5Амма дурари гужниинди алаурайи:
– Дугъу Галилей уьлкейилан ккебгъну гьамина гъяйиз, вари Ягьудия уьлке вуйибси, аьгъювалар улупури, халкьарин арайиъ наразивал ипра.
6Галилейикан деебхьну, Пилатди гьерху:
– Му Галилейин агьали вуйинхъа?
7Хъа Иса Гьироддин вилаятдиан вуйиб аьгъю гъабшиган, Пилатди Иса гьадму йигъари Ерусалимдиъ айи Гьироддихьна гьаъру.
8Иса гъяркъиган, Гьирод гизаф шад шулу. Дугъаз ухдитӀан Думу рякъюз ккунди айи, гьаз гъапиш дугъаз Исайикан гизафдар деерхьнайи ва Дугъкан саб аьламат рябкъюз миж кади айир вуйи. 9Гьиродди Исайиз гизаф суалар туври гъахьну, амма Дугъу саб жавабра тувундар. 10Жугьдарин аьхюну маллйирина аьлимари, гъудужвну, гужниинди Иса тахсиркар апӀурайи. 11Гьиродна чан эскрар, Дугъʼина аьрвалар хури, кялхъру. Исайиин паччгьаринсдар палтар алахьну, Пилатдихьна кьяляхъ гьаъру. 12Ва гьадму йигъан Гьиродна Пилат дустар шулу; улихьди дурар чиб-чпихъди душманвалиъ ади гъахьнийи.
13Пилатди, аьхюну маллйиризна гьюкумдрариз ва халкьдиз дих дапӀну, 14гъапи:
– Учву гьаму Кас, халкь рякъʼан адаурайирси гьисаб дапӀну, узухьна гъахунчва. Хъа магьа, ичв улихь ахтармиш дапӀну, узуз гьаму Касдик учву кӀуру саб тахсирра гъибихъундарзуз. 15Ва Гьироддизра гъибихъундар, узу Му дугъахьна гьаунза ва Мугъак йикӀбаз лайикьлу вуйи саб тахсирра дибихънадар. 16Гьаддиз, жаза тувну, Му деетидиза. [17]#23:17 Грекарин саспи БикӀбариъ кӀура: «Гьюкумдин аьхюрин, гьар йисан Пасхайин машквраз дидиснайидарикан сар халкьдин тӀалабниинди деетру аьдат айи».
18Гьадмуган вардари сабси чӀигъар апӀуз хъюгъру:
– Дугъаз аьжал, хъа учухьна Варава деет.
19Варава, шагьриъ гъалабулугъ ипбаз ва адми йивну йикӀбаз лигну, дустагъдиъ итнайир вуйи.
20Пилатди хъанара, Иса деетуз ккунди, чан сес за апӀуру, 21хъа дурари: «Хачрак карс, хачрак карс Думу!» – кӀури, чӀигъар апӀуйи.
22Пилатди шубубпи ражари гьерхру:
– Исайи фу чӀурувал дапӀнахъа? Узуз Мугъак йикӀбаз лайикьлу вуйи саб тахсирра гъябкъюндарзуз, гьаци вуйиган, Мугъаз саб бицӀи жаза тувну, деетидиза.
23Амма мушвʼин уч духьнайидари зарбди чӀигъар апӀури, Иса хачрак карсуб ккун апӀурайи, ва дурарин чӀигъар гъалиб шулу. 24Пилатди гьадрари кӀуруси апӀуз гьял апӀуру: 25Шагьриъ гъалабулугъ ипбазна адми йикӀбаз лигну дустагъдиъ итнайи Варав деетуру, хъа Иса дурарин ихтиярназ тувру.
26Иса гъахуз хъюгъиган, рякъюъ чан хутӀлиан гъюрайи сар Симон кӀуру Киринеяйин агьали гьахъру. Дурари, Иса карсру хач дугъан кьялʼин иливну, думу гъабхуз гъитру.
27Исайин кьяляхъди гизаф адмийир ва Дугъахъ зарбди ишурайи дишагьлийир гъягъюру.
28Исайи, дурарихьинди илтӀикӀну, гъапи:
– Ерусалимдин дишагьлийир! Узухъ мишанай, хъа учвухъ ва ичв веледарихъ ишай. 29Гьамци кӀуру йигъар гъюра: «велед даршлудар, бицӀир дархьидар ва нана тутрувдар хушбахтаврар ву!» 30Гьадмуган дагълариз: «учʼина ахьай», хъа тепйириз: «учу элеркай» пуз хъюгъдичва, 31адмийири ужур касдиз гьамцдар чӀуру ляхнар апӀурайган, дурари чӀуру касариз фицдар ляхнар апӀуйкӀан?
32Исайихъди сатӀиди дариз зигбан бадали, кьюр гъачагъра хурайи. 33«Келле» кӀурушвʼина гъафиган, Иса ва гъачгъар, сар Исайин арччул, тмунур – гагул терефназди хачарик карсру. 34Хъа му арайиъ эскрари, тупут ипри, Дугъан палтар пай апӀурайи. 35Халкь лигури дийигънайи. Дурарин гьякимдрар Дугъʼин аьлхъюрайи:
– Жарадар уьрхюри гъахьну, гъит Чав Учв уьрхри, эгер Думу Аллагьди кадагънайи Месигь вуш.
36Эскрарира, Исайиз люкьнар апӀури, Дугъан багахьна гъюри, кӀвантӀарихьна сирке хуйи 37ва гьамци кӀуйи: «Эгер Уву жугьдарин паччагь вуш, Яв Уву уьрх». 38Дугъан кӀулихъ «Му жугьдарин паччагь ву» дибикӀнайиб кебхнийи.
39Исайихъди дариз дизигнайи гъачгъарикан сари Дугъаз чӀуру гафар апӀурайи:
– Эгер Уву Месигь вуш, Увура, учура уьрх.
40Тмунури чан юлдшиз кӀуру:
– Увуз Аллагьдихьан гучӀ шуладарнуз, увузра гьациб жаза тувнайиган? 41Ухьуз гьякьди жаза тувна, гьаз гъапиш ухьуз ихь тахсрариз лайикь вуйиб гъурубкьунхьуз, хъа Мугъу саб чӀуру ляхинра гъапӀундар.
42Хъа Исайиз кӀуру:
– Уву Яв Паччагьлугъдиз гъафиган, узу кӀваин апӀина, Иса!
43Исайи дугъаз гъапи:
– Гьякьди кӀуразавуз, гъи Узухъди женнетдиъ хьидива.
44Лисундин вахт вуйи. Сабпну вари уьлкейиин сяаьт шубубдизкьан мучӀушин улубчӀвнийи. 45Ригъдин акв хътабтӀу ва Аллагьдин хулаъ Гирамишвахь гьибхнайи чарч гьацӀкьялʼансина гъячӀябгъю.
46Исайи зарбди гьарай гъапӀу:
– Адаш! Йиз рюгь Яв ихтиярназ тувраза.
Ва гьамци дупну, Дугъан нефес хътубтӀу.
47Гьаму гъябкъю эскрарин юзбашийи, Аллагьдин ад за дапӀну, гъапи:
– Дугъриданна, гьаму Кас марццир вуйиштӀан!
48Гьаму тамашайиз лигуз уч духьнайидар, душвахь гъабшиб дябкъну, чпин мухрар убччвури, алдагъуру.
49Иса аьгъюкьандар вари ва Дугъахъди гъахьи Галилей уьлкейианмина гъафи дишагьлийир, ярхлаанси дийигъну, мидиз лигурайи.
50Гьадму арайиъ Юсуф кӀуру сар гъяни ва гьякьлу вуйи, заан диванханайин иштиракчи, 51дидин къарарихъди рази дарши кас гъюру. Думу Аллагьдин Паччагьвализ ккилигурайи Ягьудия уьлкейин Аримафей кӀуру шагьриан вуйи. 52Пилатдихьна душну, дугъу Исайин беден чахьна тувуб тӀалаб гъапӀнийи. 53Дугъу Исайин беден хачракан кадабгъну, иригъян гъибиржну, гъарзуъ дапӀнайи ва гьелелиг фужкӀа кивнадру накьвдиъ ивру.
54Жвуми йигъ вуйи, султ йигъ улубкьуз багахь шулайи. 55Исайихъди Галилей уьлкейиан гъафи дишагьлийирра, накьвдихьна дуфну, Исайин беден фици ивнаш, лигуру. 56Хъасин хулариз хътаку, дурари ицци ниъ хъайи аьтрарна ягъар гьязур гъапӀу, хъа султ йигъан, Къанундиъ улупнайиганси, дурар фаракьат гъахьи.
اکنون انتخاب شده:
Лука 23: ТабГК
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Институт перевода Библии, 2010, 2013, 2016, 2018, 2023
