Marku 6
6
Yesu Yang yum-sing e mung hpyang je law e
1Hau hkun han mai Yang htaw byu law wi, Yang yum-sing e mung hpyang je law e. Yang e lagyaw wi le Yang jang lachang ni akaw.
2Yu-ban-ni je jang, tara jawng ma, Yang tyaw-maw ni e dang le waw gyaw bang myaw gyaw mit mau ni lwi, “Shi yu gë, shi gu le lika mai waw yu e la? Shi yu waw yu e apaji gë, hai jung ngut le li? Yang e law mai dut law e shi magam a-mu gë, hai wa agut taw le li.”
3“Yang gë, yum-tsu-su ngut le, a ngut gu? Mari e yang-zaw e, Yaku Yosep, Yuda, Simun pe e yang-mang le Yang ngut le, i ngut lu? Yang nam-maw pe le i-nung a ra-na shi ma ni taw akaw, a ngut lu?” ga law e ngut wi, Yang e hkyaw ma mit-ling-bat law kaw e.
4Yesu jau gë, “Mi-htoi gë, yum-sing e mung ma, yum sing e mung-maw e, yum-sing e yum ma a ngut jang she, hkung-ga la-ra waw le,” ga lwi, yang maw le tai e.
5A-na-a-hkya hwi e bang ra wam e htaw ma law ke lwi, law ge bi e, mai gaw-tu hau ma hai jung magam a-mu le Yang a waw kut.
6Yang maw a-lum-a-jing e i-mit yan-mai, Yang lamau ni le. Hau htang a wi a-yam hka ma wa pe ma Yang kum lam wun lwi, nyaw maw ni e.
Lagyaw ra htse i yu le nang kat e
7Hau hkun Yang e lagyaw ra htse i yu pe le wut yu lwi, i yu yep yep kut mu, nang-kat le e, a-joi-a-yung e nat pe le waw ung ra ahkang bi kat lwi.
8“Dam-bang mai gaw-ta, hkyaw ma ma-tu, muk le, htung-maw le, hpi-hët ma hting-chap le, a-wun-a-chung e za. Hki-zung zung lwi,
9Bu i dung le a wut e za e-law ke,” ga lwi, yang maw le tai bun kat e.
10“Hau htaw mai, hka yum ma ngut-kaw-lang, nung maw wang jang, hau mai htaw law e bwi-ni je shaw, hau ma ru ni ni ke.
11Hka jaw-waw ma ngut-kaw-lang, nung maw le a lawm yu lwi, nung maw le a gyaw bi jang gë, hau mai htaw law u-jang, yang maw shut hpyang sak-se dut shang ga; nung maw e hki-wa ma dap e hpwi-lup le kaw hkyaw taw ke,” ga lwi, yang maw le tai kat e.
12Hau hkun yang maw htaw law lwi, byu pe mit-lai waw-ra hkyaw nyaw-maw kyaw kaw e.
13Nat myaw myaw le yang maw hkat pyam le e, a-na-ahkya hwi e bang myaw myaw le htsu but bi lwi, law ge bi kaw e.
Baptisma bi e Yawhan le jup-yu e
14Han hkun Herod hkaw-hkam gë, hau hkyaw le waw gyaw e, hka-su-mu-ga-le Yesu e ming hung law lwi, byu pe gë, baptisma bi e Yawhan gë, shi bang jang mai dum dwi taw law be. Hau yan-mai hau magam a-mu pe gë, hau yu jang dan htaw law be.
15Gaw hang jau gë, “Yang gë Elia ngut le.” Gaw bang gë, “Anam le mi-htoi ra yu su mi-htoi dum htaw be,” ga bum kaw e.
16Herod lum yu hau waw gyaw jang, “Ngaw che pyam e Yawhan gë, dum dwi law be,” ga e.
17Ahkwi Herod yang gung yang, yang-gu Hpilip e yang-mi Herodia yan-mai, Yawhan le e jup-yu nang lwi, htawng ma lung kat taw le.
18Hka-su-mu-ga-le, hau mi-we le Herod hang yu be mu, Yawhan gë, “Nung gu yang-mi le a ge yu,” ga lwi, Herod le tan pyam e.
19Hau mu Herodia gë, yang le nik-yaw lwi, yang le sat pyam nau kaw-lang, yang a waw sat.
20Hka-su-mu-ga-le, Yawhan gë, ding-man le joi-yung su ngut e le, Herod se mu lwi, yang le gyu haw le e makawp-maga ni e. Yang e dang le waw gyaw jang, yang i-mit gyai mau aw akaw lang, yang e dang le ja waw gyaw nau ni le.
Herodia yang zaw-mi gë Yawhan e u-lum dung e
21Ahkwi Herod yang hku bwi-ni je lwi, yang gë, yang e zau su wun, gye zau pe e Galile mung agi pe le min-zang ji-tsaw ni le.
22Ge-ang e bwi ni je lwi, Herodia yang zaw-mi wang lwi, gaw ni le. Hau hkyaw le Herod e ra-ha zung e hang wu nau kaw e. Hau mu lwi, hau hkaw-hkam, “Nang aw-ma-aw ngaw le dung a! Ngaw bi ra,” ga lwi, hau zaw-mi le tai be.
23“Hau htaw akaw, nang ngaw le dung-ma-dung nga e mung-dan ra wi je-shaw, ngaw nang le bi ra,” ga lwi, yang le dagam be.
24Hau hkun yang htaw law lwi, yang nu le, “Ngaw hai dung ra lu?” ga lwi, mi jang. Yang gë, “Baptisma bi e Yawhan e u-lum dung a!” ga e.
25Hau hkun-jang, hkaw-hkam wa jang yang han han wang lwi, “Baptisma sara Yawhan u-lum e, baw ma naug ahkwi-jang bi kat ra, ngaw w le,” ga lwi, dung be.
26Hau hkaw-hkam jau gë, gyai mit-yawn kaw-lang, yang e dagam e dang e ra-ha zung mung ni e hang yan-mai, yang le he pyam nau e a ngut.
27Hau hkun-jang hkaw-hkam gë, gye-zaw ra yu le nang kat lwi, Yawhan e u-lum e yu ra, sang kat be.
28Hau hkun yang e-law lwi, htawng ma e, Yawhan u-lum le hpit yu mu, hau u-lum le baw ma yu-law lwi, hau zaw-mi le bi kat e. Hau zaw-mi le yang-nu le ap bi be.
29Yang e lagyaw wi hau waw gyaw jang, yang maw je le lwi, yang e mang le yu-law lwi, lup ma taw taw kaw e.
Byu ngaw tung le zang bi tsaw e
30Hau htang lagyaw wi gë, Yesu jang law zup lwi, yang maw kut e hkyaw ban shaw e, ji maw bi e hkyaw lung-lang, Yang le tai kyaw kat e.
31Hau mu lwi Yang gë, “Yaw-saw hkau ma, maji-shim e jaw-waw shut nung maw bau za law ke. Ngaw e e lwi, ra zwi naw-yu shang,” ga lwi, yang maw le tai be. Hka-su-mu-ga-le, e-e-law-law mu ni e bang gë, lum myaw lwi, yang maw zang zaw ra ahking lang a myang kaw.
32Hau mu lwi, Yang maw gë, lai ma saw mu, yaw-saw-man-bung maji-shim e jaw-waw shut e-law kaw e.
33Ngut-kaw-lang, byu pe gë, yang maw htaw law e le byu-myang lwi, myaw-myaw wa yang maw le se le e, wa hkang-maw mai dung-gung hkyaw mai din e-law lwi, yang maw e hë ma e je bum kaw e.
34Hau mu Yang htaw lwi, shi-wa byu jum maw le byu-myang le e, yang maw gë, zung su a baw e sau hpung e ra jung za mu e yan-mai, Yang yang maw le shaw-gyaw lwi, myaw myaw wa nyaw-maw bi e.
35Ahkwi bwi gyum law be le, Yang e lagyaw wi Yang jang je law lwi, “Shi ma yaw-saw ngut le e bwi gyum law ni a-be,
36Hau mu lwi byu pe gë, a wi a-yam wa e wa zaw pe ma, zaw shu hai hai e wi yu kaw shang ga, yang maw le pun kat a!” ga tai kaw e.
37Yang gë, “Nung maw yang, yang maw le zaw-jung bi ke,” ga lwi, tu e. Yang maw gë, “Nga maw e-law ra, ngun i shaw chap e muk wi bi ra lu?” ga lwi, Yang le mi kaw e.
38Yang jau gë yang maw le, “Nung maw muk hka myaw waw taw akaw lu?” “E wu ke,” ga e. Yang maw se jang, “Muk ngaw lum e ngaw-zaw i du za ngut taw ra,” ga kaw e.
39Hau mu lwi, lung-lang bang gë, ra hpawng e ra hpawng hau wa hu yaw ma zung taw kaw shang ga, Yesu yang maw le sang taw be.
40Yang maw le, ra shaw shaw e, ngaw htse htse kut lwi, ra yan e ra yan zung hum kaw e.
41Hau hkun, hau muk ngaw lum e ngaw-zaw i du le Yang yu lwi, mau-hkung shut byu-wu u-jang, shi-man bi ra. Hau muk le a-jap-jap kut lwi, byu pe e hë ma taw bi kaw shang ga, lagyaw wi le bi taw e. Hau ngaw-zaw i du le le, byu ngap shaw le gam bi kaw e.
42Yang maw lung-lang zaw lwi, gi bum kaw e.
43Hau htaw ma, mit e a-mit-a-htang le, yang maw chang hkyawm yu le, mung ra htse i lum bing dem ngut taw le. Ngaw-zaw le mit taw ashi.
44Muk zaw e bang gë, yu-ge-zaw ngaw tung ngut taw akaw.
Yesu gë nawng htaw ma saw e
45Hau hkun-jang, shi-wa byu pe le pun kat hen ni le, lagyaw pe lai ma wang lwi, Yang e hë ma nawng he tap Betsaida wa shut gu-dap law kaw shang ga, Yang yang maw le tai kate.
46Yang maw le pun kat yau jang, Yang a-kyu dung ra ma-tu hau bum shut daw law be.
47Min htang je jang, hau lai gë, nawng gung ma ngut be le. Yang ban za dung-gung ma gyaw ni taw e.
48Lai lum htung lwi, lai le gyai lu-kin ni kaw e le Yang myang lwi, hau min mi hking kaw ma, nawng htaw ma lam u-jang, Yang yang maw jang saw je e ngut mu, yang maw jang lai law nau e su dut le.
49Yang maw jau gë, Yang nawng htaw ma saw ni e le myang jang, hau gë saw-byaw ngut taw le, ga mit ngam lwi, puk garu kaw e.
50Hka-su-mu-ga-le, lung-lang bang gë, Yaug le byu-myang lwi, i-mit-sing-nan ni akaw. Hau hkun-jang, Yang yang maw e nyaw lum lwi, “Ngwi-ngawn shang ga. Ngaw she ru ngut le. Hka gyu kaw,” ga lwi, yang maw le tai e.
51Hau hkun lai shut Yang yang maw jang wang lwi, hau lai-dun gë, num byu law e, yang maw lum gë, gyai mau gyu ni kaw e.
52Hka-su-mu-ga-le, hau muk zaw e hkyaw le yang maw a se gyaw le e, yang maw i-mit htan byu kaw e.
A-na-a-hkya dap e le law ge bi e
53Ahkwi he-hpaw shut gu-dap yau jang, Genesaret mau shut yang maw je le lwi, nawng yam ma nge mu.
54Lai mai yang maw gyaw law e hkun, byu pe gë Yang le se le.
55Hau mung hkang-maw ma din-jawt lwi, naw-hpyaw hwi bang le, bu me e ra-ha, Yang ni jang shut wa je le bum kaw e.
56Hau htaw mai, hka mau ma ngut-kaw-lang, hka wa maw ma ngut-kaw-lang, hka wa tsaw ma ngut-kaw-lang, Yang wang law le, naw-hpyaw hwi e bang le gai ma yang maw taw taw kaw lwi, Yang e me-bu htang le za lang, zang sawp ra ahkang dung kaw e. Yang le waw sawp e bang lung-lang ge byu kaw e.
اکنون انتخاب شده:
Marku 6: ATB1951
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© British and Foreign Bible Society 1951
