Kucangtsi 12
12
Itikunn na Ibram
1Yaweh ri te Ibram baa, “Nwunn, ya uten-fu, ti ande-fu, ti ishikusog itse-fu ta, ti fu ru yi uten ti ame u tso fu.
2Ame u nda fu kafe mbukwen ande,
ame u nde fu itinyang,
ame u nda rinyi-fu pu iten,
ikyaen ti,
afu u si fengo itinyang uwog ariki.
3Unde ti a ri titinyang risu-fu,
ame u nde wu itinyang,
ame u ri mbeb unde ti a ri mbeb fu.
Meme ishikununn ti utense,
u tu itinyang ruye uwog-fu.”
4Ibram nwunn pangma ti Yaweh ri te wu. Ama Loti nwunn putsa wu. Ibram site asang mae ita mbe rijwe asu itsong (75) kiye ti awu nwunn Haran. 5Awu pu uwa-wu Saraya ti umbae inja-wu, Loti, ti meme rifunn-ba ti apyi-ba ti aba tu uten Haran, ama u ye ikyin nwunn Ur ru yi uten Kanana. Ti aba ka sang pu ba Kanana atang,
6Ibram kyang ru ka sang uten Shekem, u ka kyatsi imbyi kutuku tiyang na More. Kiye wu, ande ti Kanana nae riben atang. 7Atang, Yaweh tso risu-wu uwog Ibram, u ri baa, “Riben wune, ame u nda rishi-fu.” Ikyaen yine, Ibram mbye kuta na Yaweh ti tso risu-wu uwog-wu atang. 8Isim ayine, awu nwunn u ru yi rikwen ti ta uwe usir ti kiskinn Betel, u ka sur afug-wu atang. Betel ta uwe usir ti ureb, uten Ai ama ta uwe usir ti kiskinn. Uwog wune, awu mbye kuta, u fen Yaweh atang. 9Isim ayine, Ibram nwunn u kyang kyang kyang ru yi uwe ti Negeb ti ta fer Kanana.
Ibram ti Saraya Ru yi Ejib
10Kiye wune rimenn pu uten ti Kanana, ama Ibram nwunn u si yi Ejib ti awu kaa som atang, ikyaen ti, rimenn ti pu uten wu byag timambe. 11Ti awu ka ku ye ti awu u sang yi Ejib, awu ri te uwa-wu Saraya baa, “Ame nung, afu waen unda timambe. 12Kiye ti ande ti uten Ejib a sae fu, aba u ri baa, afu na si uwa-m. Ama aba u wen ra m, u ya fu ta. 13Ri te ba baa, afu na si mbiya-m, ikyaen ti, a wen-ba ame be, u nde m nyinyang.” 14Ti Ibram ka sang Ejib, ande ba sae baa, uwa-wu na waen unda timambe. 15Ama ti afaen Ukwe nungye baa, unda wu na waen timambe, a teb wu te ukwe, ama u pu ra wu ka na Ukwe. 16Ukwe nde Ibram nyinyang ikyaen unda wune. Awu nda Ibram iwentam ti indag ti ikyinnsu tiyae ti tishir, ti ikyinnsu ti kumunn isim fa ti apyi ti arom ti ti anda.
17Amaa, Yaweh yaen acaeb ti beb timambe si Ukwe fa ti ande ti ta ishikununn-wu meme ikyaen Saraya, uwa Ibram ti Ukwe ye pu mbe. 18Ikyaen ayine, Ukwe tsa kutsa kunn Ibram, u rang wu baa, “Ikyaen imi ti afu nde m ahan? Imi ti nde afu ri te-fu ame kubenti baa, unda wu na si uwa-fu be? 19Imi ti nde afu ri baa, awu na si mbiya-fu, ama ame pu ra wu mbe. Sae uwa-fu ta re, pu wu ti ni ru.” 20Tiri Ukwe nda unju na ande-wu. Aba pu ra Ibram ti uwa-wu fa ti meme iken ti awu site ru ye uten atang.
اکنون انتخاب شده:
Kucangtsi 12: kubNT
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Wycliffe Bible Translators, Inc. and
© The Nigeria Bible Translation Trust 1995, 2017