Genesis 17
17
Maad’ad ni pow ko M’ag
1Nap’an ni mereb i ragay nge merab e duw yangren Abram, me yib i m’ug SOMOL ngak me ga’ar ngak, “I gag Got ni Gubin ma Rayag Rog. Mu par ni ga be fol rog u n’umngin nap’an e yafos rom ngam par ni dariy thibngim. 2Bay gu ngongliy e m’ag u thildow mu gu pi’ owchem nge yib ni pire’.” 3Me ragbug Abram nge yan i yip’ owchen nga but’, me ga’ar Got, 4“Ba’aray fare m’ag ni bay gu tay u thildow: nggog ngom ni gur e bayi mmang chitamngin bo’or e nam. 5Ma fithingam e dabki par ni Abram, ya ke par ni Abraham,#17:5 ABRAHAM: Re ngachal ney ni Hebrew e gowa fare bugithin ni “chitamngin bo’or e nam.” ya bay gu tem ni gur chitamngin bo’or e nam.#Rom 4:17 6Bay gu pi’ owchem ni pire’ ma boch i yad e bay ra pilunggad. Bayib owchem ni pire’ ni pire’ ngar manged girdi’en boch e nam.
7“Bay gu tay u gil’ e tin kugog ni bay gu rin’ ngom nge pi’in bay rabad ni owchem ni bayi par nib m’ag ni dabi m’ay. Bay gu mang Got rom nge Got rok e pi’in owchem.#Luk 1:55 8Bay gu pi’ ngom nge ngak e pi’in owchem e re nam ney ni ga be par riy e chiney ni gab milekag. Ma nam nu Kanaan ni ga’ngin e bayi par ni tafnam ndariy n’umngin nap’an, ma bay gu par ni gag e Got rok e pi’in owchem.”#Act 7:5
9Me ga’ar Got ngak Abraham, “Ku er rogon gur nthingar mu turguy u wun’um ni ngam tay e re m’ag ney u thildow nga tagil’, ni gur nge pi’in bay rabad ni owchem ko tin bay yib e mfen. 10Ba’aray e n’en ni gur nge pi’in bay rabad ni owchem e thingar mu turguyed u wun’med ni ngam rin’ed ni aram e gubin e pumo’on u fithik’med nthingar ni maad’ad#17:10 MAAD’AD: Bayach u taban downgin e pumo’on e ngan th’ab nge chuw. nagrad.#Act 7:8; Rom 4:11 11-12Chiney i yan ngaram e thingar mu maad’adgad ngak urngin pifakmed ni pumo’on ko ngiyal’ ni meruk e rran yangren, nib mu’un e pi’in ni yibe gargeleg u lan e tabinaw romed ngay ni yad e sib nge pi’in ni sib nchuw’iyrad u reb e nam. Irera’ e ren’en ni bayi mang pow riy ni bay ba m’ag u thilmed nge gag. 13Ra be’ ma thingar ni maad’ad ngak, ren’ey e bayi mang ba pow u dowmed ni be dag ni m’ag u thilig nge gimed e dabi m’ay bi’id. 14Ma re pumo’on ndawor ni maad’ad ngak e ngan chuweg u fithik’ girdi’en e nam rok, ni bochan e m’ag u thildad nde tay nga tagil’.”
15Me ga’ar Got ngak Abraham, “Dab kum pining Sarai ngak le’engim; ya ke par fithingan e chiney ni Sarah.#17:15 SARAH: Re ngachal ney ni Hebrew e fan e “Bpin ni fak e pilung.” 16Bay gu fal’eg wa’athan nge gargeleg bochi pagel ni fakam. Bay gu fal’eg wa’athan nge mang chitiningin bo’or e nam, ma pi’in ni bayra bad ni owchen e bay boch i yad ni bayi mang pilung.” 17Me ragbug Abraham me yip’ owchen nga but’, machane me minmin ya fa’ani leamnag me ga’ar u wan’, “Gur ku rayag ni nge fakay be’ nib mo’on nike gaman 100 e duw yangren bbitir? Gur ku rayag ni nge gargeleg Sarah bbitir ni aram rogon nike mereb i ragag e duw yangren?” 18Me ga’ar Abraham ngak Got, “Wenig ngom, mu ayuweg Ishmael ndabi buch ban’en rok ma ga tay nib fos.” 19Machane me ga’ar Got, “Ga be oloboch; le’engim i Sarah e bayi gargeleg ba pagel ni fakam ma ngam tunguy fithingan ni Isak.#17:19 ISAK: Re ngachal ney ni Hebrew e fan e “be minmin.” Bay gu tay e m’ag rog u thilmow ngu thilin e pi’in owchen, ni bayi par nib m’ag ndabi math bi’id. 20Kam wenig ngog ni nggu yoror rok Ishmael, ba’aray e n’en ni bay gu rin’: bay gu ayuweg nggu pi’ e bitir ngak ni pire’ nge girdi’ ni owchen ni pire’. Bayi par ni ir e chitamngin ragag nge l’agruw i pilung, ma pi’in owchen e bay gu gagiyeg nagrad ngar manged girdi’en reb e nam ni ba ga’. 21Machane bay gu tay e m’ag rog u thilmow Isak ni fakam, ni bayi gargeleg Sarah ko re ngiyal’ i n’ey u lan e binem e duw.” 22Fa’ani mu’ Got ko welthin ngak Abraham me yan.
23Ka chirofen nem me maad’adnag Abraham i Ishmael ni bochi pagel ni fak nge urngin e pumo’on ni sib rok, ni pi’in nni gargelegrad u tabinaw rok nge pi’in ni chuw’iyrad, ni urngin e pumo’on ni bay u lan e tabinaw rok, ni bod rogon nike weliy Got ngak. 24Mi Abraham e mereb i ragag nge mereb e duw yangren ko ngiyal’nem nni maad’adnag, 25mi Ishmael ni bochi cha’ ni fak e ni maad’adnag nike gaman e ragag nge dalip e duw yangren. 26Yow l’agruw nta’reb e rran nni maad’ad nagrow, 27nib mu’un urngin e pumo’on ni sib rok ngay.
انتخاب شده:
Genesis 17: YAP
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2007 Bible Society of Micronesia. Released under the Creative Commons CC-BY-SA license 4.0.