Genesis 13
13
Abram nge Lot nra weargow
1Me yan Abram nga wuru’ yu Egypt ni be sor i yan ko nug nu Negeb ni bay nga lel’och u Egypt, ni yow e bpin rok nge urngin ban’en ni bay rok, nge Lot. 2Mi Abram e be’ ni pire’ ban’en rok, ni aram e saf, nge kaming, nge garbaw, ma ku er rogon e silber nge gol. 3Ma aram me chuw u rom u Negeb nge yan u bang nga bang, ni be sor i yan nga Bethel. I yan i taw ko fagi n’en u thilin yu Bethel ngu Ai ni aram e gin’en ni i par riy ni som’on 4nu rom e ubung fare altar riy ko som’on. Ma fa’ani taw ngay me liyor ngak SOMOL me meybil ngak.
5Mi Lot, ni be un ngak Abram ko milekag i yan, e ku er rogon ni bay e saf ni fak, nge kaming, nge garbaw, ma ku bay e girdi’ ni be un ngak yad be par u tent i yan. 6Binaw ni bay e pan riy ni tagil’ e abich rok e gamanman e dabi gaman e gamanman rorow riy ni fa’ani yow ra par u ta’bang; ya ra bagayow ma ke yo’or i yo’or e tirok e gamanman. 7Ere i malu’ag thin e pi’in yad ma gafaliy e gamanman rok Abram nge pi’in yad ma gafaliy e gamanman rok Lot. (Re ngiyal’ i n’em e ka be par e girdi’ ko gi nam nem ni kanog e Kanaanite nge Perizzite ngorad.)
8Me ga’ar Abram ngak Lot, “Gadow tabnaw, ere tirom e girdi’ nge tirog e girdi’ e susun e dab ur malu’ag thingad. 9Ere ngad weargow. Gur e ngamog e gin ni gab adag e binaw ni ngam man ngay mag pageg. Ngam sor ngabang mu gu sor ngabang.” 10Me chachangar Lot me guy nre loway ni ba’aram ni bay e lul’ ni Jordan riy nge yan nge mada’ nga Zoar, e bpire’ e ran ni bay riy ni bod fa gi woldug rok SOMOL, fa bod e nam nu Egypt. (Fa ngiyal’nem ndawori kirebnag SOMOL fa gali binaw nu Sodom ngu Gomorrah.) 11Me duwgiliy Lot ni nge milfan e loway nu Jordan ngak ni ga’ngin, ma aram me chuw rok Abram nge yan ko ngek. Ara’ rogon ni wear e gali cha’nem. 12Me par Abram u lan e nam nu Kanaan, me yan i par Lot nga thilin fapi binaw ni bay u lan fare loway me n’uf e pi tent rok nib chugur ko binaw nu Sodom, 13ma girdi’ ni yad ma par u lan yu Sodom e ba kireb e ngongol rorad, ni aram e yad ma denen nib togopluw ngak SOMOL.
Abram ni yan i par nga Hebron
14Tomuren nike chuw Lot me ga’ar SOMOL ngak Abram, “Ngam par uwur ngam fal’eg i yaliy urngin yang; 15ya ga’angin e binaw ni ga be guy e bay gu pi’ ngom nge pi’in ni bay ra bad ni owchem, ma bayi par ni tafnam ndariy n’umngin nap’an.#Act 7:5 16Ma bay gu pi’ e pi’in owchem ni pire’ nib pire’, ndariy be’ nrayag rok ni the’egrad ni yad gubin, ni ta’reb rogon ko nge the’eg be’ urngin e fiyath ni bay u daken e fayleng. 17Ere mu fal’eg rogom ngam lekag daken e re nam ney, ya aram e nggu pi’ ngom ni ga’ngin.” 18Ma aram me pug Abram e pi tent rok nge yan i par nga bang nib chugur ko fa yu ke gek’iy ni oak ni bay u Mamre ni bangi n’en ni bay u Hebron, mu rom e ubung ba altar riy ni fan ngak SOMOL.
انتخاب شده:
Genesis 13: YAP
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2007 Bible Society of Micronesia. Released under the Creative Commons CC-BY-SA license 4.0.