मत्तायोस 6
6
चि'अना ही पत्त नू सिखाब'अना
1चिहुंक र'आ का आलर ही जियन निम्है तरा नतगा गे निम्है दौ नलखन अमा ऎद'आ। नीम अन्ने ननोर होले मेर्ख़ा नू र'ऊ निम्है धर्मे बंगस ती नीम इनाम मल ख़क्खोर।#मत्ता 23:5 2औंगे नीम कीड़र गे चि'ओर आ बारी इदही हाँक अमा चि'आ, एकासे उतुरमाड़ुर गोड़हा एड़पा अरा गली कुची गुट्ठी नू नन्नर, होले आलर आरिन सहरार'ओर। ऎन निमन मानिमन ब'अदन का आर तम्है इनाम ख़क्खा ख़च्चिका र'अनर। 3औंगे एकाबारी नीम कीड़ा आलर गे चि'अदर, अदिन नन्ना आलर अम्बोर अख़'आ। 4निम्है चि'अना अम्बो ऎथ्र'आ अरा निम्है बंगस मल ऎथ्रना नू हूँ निम्है नलखन ऎरदस, आस निमा बग्गे आसीस ननोस।
गोहरारना ही पत्त नू सिखाब'अना
(लूक 11:2-4)
5एकाबारी नीम गोहरारदर, उतुरमाड़ुर लेक्खा अमके गोहरार'आ। आर गा गोड़हा एड़पा नू अरा दोप्फा डहरे नू इजनर ती गोहरार'आ गे पत्तारनर, होले आलर आरिन ऎरोर। ऎन निमन मानिमन ब'अदन, आर गे तम्है इनाम ख़क्ख्र'आ ख़च्चिया।#लूक 18:10-14 6नीम गा गोहरारना बारी, निम्है कुठली नू कला अरा बलिन मुच्चा ती मल ऎथ्रना नू निम्है बगंस ती गोहरार'आ। निम्है बंगस मल ऎथ्रना नू निम्है नलखन हूँ ऎरदस, आस निमन आसीस ननोस।
7अरा नीम गोहरारना बारी, नॆ धर्मेसिन बलनर आर ही लेक्खा अनभनियाँ कत्था गे धैना अमा नना। आर सोचनर का घड़ही गोहरारना ती एम्है गोहरारना मेन्तार'ओ। 8आर ही लेक्खा अमा मना, एन्देरगेका निम्है ने'अना ती मुन्द तिम निम्है बंगस अख़दस का निमा एन्देर एन्देर जिनिस ही चाड़ र'ई। 9औंगे नीम एन्ने गोहरारके:
‘अना एम्है मेर्ख़ा नू र'ऊ बबा,
निंग्है नामे नेम्हा मनन नेकअन।
10निंग्है राजी बर'अन नेकअन।
निंग्है मने एकासे मेर्ख़ा नू मनी
अन्नेम ख़ॆख़ेल नू हूँ मनन नेकअन।
11एम्है उल्ला उल्लन्ता ओन्ना-मॊख़नन इन्ना एमा गे चि'आ।
12अरा एकासे ऎम एम्है उर्मी अक्का-बलकारिन अम्बदम चि'अदम
अन्नेम एम्है अक्का-बलकन हूँ अम्बा चि'आ।
13अरा एमन पाप नन्ना ही चिबाख़ारना नू खतर'आ अमा चि'आ,
लिकिन मलदौ ती एमन नाड़ा। [एन्देरगेका राजी दरा सवंग दरा ओहमा हुल्लो गुटी निंग्है दिम र'ई। आमेन।]’#6:13 जोक्को ख़ेक्खा ता लिख्रका पच्चा पुथी गुट्ठी नू ईद जोड़रकी र'ई।
14नीम नन्नर ही अक्का-बलकन छमा ननोर होले मेर्ख़ा ता बगंस हूँ निमन छमा ननोस। 15लिकीन नीम नन्नारिन छमा मल ननोर होले निम्है बगंस हूँ निम्है अक्का-बलकन छमा मल ननोस।#मर 11:25,26
उपास नना ही पत्त नू सिखाब'अना
16नीम उपास ननो बारी उतुरमाड़ुर लेक्खा मुहिन हेन्दव'अके ती उपास अमके नना। आर तम्है मुहिन मड़ख़नर चि'अनर, एकत्रु आलर अख़'ओर का आर उपास र'अनर। ऎन निमन मानिमन ब'अदन का आर तम्है आसीस ख़क्खा ख़च्चियर। 17नीन गा उपास ननो बारी निंग्है मुहिन मुझुरके अरा कुक्कु नू इसुंग नलभ्रके। 18एकत्रु आलर गे मला निंग्है बंगस गे लेका एकास मल ऎथ्रना नू र'अदस ईद ऎथ्र'ओ का नीन उपास र'अदय। अरा निंग्है बंगस मल ऎथ्रना नू हूँ ऎरदस निंगा इनाम चि'ओस।
मानिम खुर्जी ही पत्त नू सिखाब'अना
(लूक 12:33,34; 11:34-36; 16:13)
19ख़ॆख़ेल नू निमा गे खुर्जी अमा बेंद'आ, एक्सन मुरछा मूख़ी पोचगो गुट्ठी मूख़ी अरा ख़लबर उम्पनर ती ख़ड़नर हो'अनर।#याकॊ 5:2,3 20लिकिन मेर्ख़ा नू निमा गे खुर्जी बेंद'आ, एक्सन मुरछा मल मूख़ी अरा पोचगो गुट्ठी मल मूख़ी अरा ख़लबर उम्पनर ती मल ख़ड़नर हो'अनर। 21एन्देरगेका एक्सन निम्है खुर्जी र'ई असन निम्है जिया हूँ टंग्रकी र'ओ।
22मॆद ही बिल्ली ख़न्न। औंगे ख़न्न फरी र'ई होले निंग्है सौंसे मॆद हूँ बिल्ली र'ओ। 23लिकिन निंग्है ख़न्न बगड़ारकी र'ई होले निंग्है सौंसे मॆद ऊख़ा र'ओ। अरा निंग्है भितरी ता बिल्ली दिम मल रफ'ओ होले नीन मानिम नू कोड़हे ऊख़ा नू र'अदय।
24नॆ हूँ ऎंड़ उर्बर ही सुसर नना पोलदस। आस गा ओर्तासिन हींड़'ओस अरा नन्नासिन चोन्हा ननोस, महले ओर्तस गने मेस्रका र'ओस अरा नन्नासिन ख़ाँड़'ओस। ई लेक्खम नीम धर्मेसी अरा ख़ॆख़ेल ता खुर्जी ही सुसर नना पोलदर।
धर्मेस नू असरा नना
(लूक 12:22-31)
25इदगे ऎन निमन ब'अदन, निम्है उज्जा गे अरा निम्है मॆद गे घोख अमा नना, एन्दरन ओनोम महले मॊख़ोन अरा एन्दरन अत्तोम। एन्देरगेका उज्जना मंडी ती अरा मॆद किचरी ती कोहाँ र'ई। 26ऒड़ा गुट्ठिन ऎरा, अबडा चाँख़'ई मला, ख़ु'ई मला, अरा कुट्ठी नू बीन्द'ई मला, अन्नु हूँ निम्है मेर्ख़ा बंगस अबड़न पॊसदस। नीम गा अबड़ा ती कोड़हे मूल्ली ही र'अदर। 27नीम घोख नन्ना ती निम्है उज्जनन ओन घड़ी हूँ बग्गे नना पोल्लोर।
28अरा किचरी डोड्डो ही पत्त नू अमा घोख'आ। ख़ल्ल ही पूंप गुट्ठी ही पत्त नू सोच'आ, अबड़ा एकासे परदी। अबड़ा नलख मल ननी अरा तमा गे किचरी मल कम'ई। 29अन्नु हूँ ऎन निमन ब'अदन, सालोमॊन बॆलस एका कोहाँ उरुब आलस रहचस, लिकिन आस इबड़ा पूंप ती ओन्टा बेसे हूँ फबना मल अत्तका रहचस।#1बॆल 10:4-7; 2इति 9:3-6 30इन्ना टोंका नू र'ऊ अरा नॆला चिच्ची नू च'ऊ लट्टी गे धर्मेस फबना ऎथ्रना चि'अदस होले, अना पत्त'अना नू पयहा आलारो, धर्मेस निमन मानिम नू ऎरोस ख़ॊजोस दने। 31औंगे नीम अमा घोख'आ का एन्द्रन मॊख़ोम अरा एन्द्रन ओनोम अरा एन्द्रन कूरोम झप्र'ओम? 32धर्मेसिन बल्लुर इबड़ा ओर्मा ही तिहा नू र'अनर, लिकिन निम्है मेर्ख़ा बंगस अख़दस का निमा गे इबड़ा उर्मी आलॊ ही चाड़ र'ई। 33लिकिन मुन्द धर्मेस निम्है उज्जना नू राजी नन्ना ही पत्त सोच नू र'आ अरा आसी मने लेक्खा नना, होले इबड़ा उर्मी आलॊ निमा चितार'ओ। 34औंगे नॆला ही पत्त नू अमा घोख'आ, नॆला गा नॆला ही घोख आबोन घोख'ओ। इन्ना ता तिहा इन्ना गे मनो क'ओ।
اکنون انتخاب شده:
मत्तायोस 6: KURUXBSI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
