JOHAN 9
9
Isûn mitdelsaa pieng a sukdam
1Chun, Isûn a fe malamin a pieng tîra inthawka mitdel pakhat a hmu a.
2Chun, a închûktirhaiin a kuomah, “Rabbi, mitdel saa a pieng hi tuin am thil a suksuol, ama hin am, a nu le a pain?” an ta, an indawn a.
3Isûn, “Hi mipa hin a suksuol nawh, a nu le a pain an suksuol bawk nawh, Pathien sinthaw a chunga ân langna dingin a ni lem.
4Sûn a ni laiin a mi tirtu sin ei thaw ding a nih, zân a ni ding a ni ta hi, chu pha chun tukhawmin thaw thei naw ni hai.
5 #
Mt 5.14; Jn 8.12 Khawvêla ka um sûngin khawvêl êntu ka nih,” a ta, a dawn a.
6Chuong anga a hril zo chun, hnuoiah chil a sâk a, chil chun pilpawk a siema, pilpawk chu a mitah a nâl a,
7chun, a kuomah, “Siloam dîlah va sâwp rawh,” a ta. (Siloam chu, “Tir,” tina a nih.) Chun, a va fe a, a sâwp a, mit varin a hung ta a.
8Chuongchun, a vênghai le inhmaa a kutdaw hmu hlakhai chun, “Hi mipa hi ṭhung puma kut daw hlak kha a ni naw am a nih?” an ta.
9Ṭhenkhatin, “Ama kha a ni hi,” an ta. Mi dangin, “A ni nawh ie, ân angpui a ni lem hi,” an ta. Ama chun, “Kha kha ka nih,” a ta.
10Chun, anni chun a kuomah, “I mit iengtin am a hung var leh?” an ta.
11Ama chun, “Isu an ti khan pilpawk a siem a, ka mitah a nâl a, ‘Siloam dîlah va sâwp rawh,’ a mi ti a. Chuongchun, ka va fe a, ka sâwp a, mitvarna ka hmu tah a ni hi,” a ta.
12Chun, anni chun a kuomah, “Ama chu khâwlai am a um a?” an ta. Ama chun, “Ka hriet nawh,” a ta.
Pharisaihaiin mitdel sukdam kuomah thu an indawn
13Chun, chu hmaa mit indel chu Pharisaihai kuomah an ṭhuoi a.
14Chun, Isûn pilpawk a siem a, a mit a sukvar ni kha châwlni a na.
15Chuongchun, Pharisaihaiin mitvarna a hmu dân an indawn nâwk a. Ama chun an kuomah, “Ka mitah pilpawk a sie a, ka sâwp a, ka hmu thei el a nih,” a ta.
16Chun, Pharisai ṭhenkhatin, “Chu mipa chu châwlni a hlutsak naw leiin Pathien kuoma inthawka suok ni naw ni,” an ta. Ṭhenkhat ruok chun, “Mi suolin iengtin am hieng ang thilmak hi thaw thei a ta?” an ta. Anni lai inṭhena a hung um ta a.
17Chun, mitdel kuoma chun, “I mit a sukvar kha nang ieng angin am i ngai a?” an ti nâwk a. Ama chun, “Zâwlnei a nih,” a ta.
18Nisienlakhawm, Judahaiin mitvarna hmutu nu le pa chu an ko hmakhat chu mitdel a na, mitvarna a hmu ti, a chungchâng thu chu an awi naw a.
19Chun, a nu le pa kuoma chun, “Hi mipa hi in naupa, mitdel saa pieng a nih in ti kha a ni am a nih? Iengtin am tuhin a hmu thei ta a?” tiin an indawn a.
20A nu le pa chun, “Hi mipa hi kan naupa a nih ti kan hriet, mitdel sain a pieng ti khawm kan hriet,
21nisienlakhawm, iengtin am tuhin a hung hmu thei tah a na kan hriet nawh, a mit sukvartu khawm kan hriet bawk nawh; ama indawn ro; patling a nih annâwm, ama thu chu ama bawkin hril raw se,” an ta, an dawn a.
22Judahai an ṭi leiin a nu le pa chun chuong thu chu an hril a nih; Judahaiin, chu hma khawm chun tûkhawmin “Ama chu Krista a nih,” tia an ṭan chun, inkhâwmna inah hnawng an tih ti hi an remti sa a na.
23Chuleichun a nih, a nu le pa chun, “Patling a nih annâwm, ama indawn ro,” an ti chu.
24Chuongchun, mitdel chu an ko nâwk a, a kuomah, “Pathien inpâk rawh, ama kha chu mi suol a nih ti kan hriet,” an ta.
25Ama chun, “Mi suol a ni le ni naw ka hriet nawh, kawng khat ka hriet, kha hma khan ka mit ân del a, tuhin ka hmu thei ta hi,” a ta, a dawn a.
26Chun, anni chun a kuomah, “I chungah iengtin am a thaw a? I mit iengtin am a sukvar a?” an ta.
27Ama chun an kuomah, “Nakie khan ka hril ta cheu kha, in hriet nuom si nawh; iengdinga in hriet nuom nâwk ta am a ni leh? Nangni khawm ama inchûktirhai ni in nuom ve am a nih?” tiin a dawn a.
28Chun, anni chun an hal a, “Nang hi ama inchûktir i na, keini chu Mosie inchûktirhai kan ni hi teh.
29Pathienin Mosie a biek ti kan hriet, hi mipa hrep hi khâwlaia inthawka hung suok am a na, kan hriet hrep nawh,” an ta.
30Chun, ama chun an kuomah, “Chu chu a nih a makna chu, khâwlaia inthawka hung suok am a ni in hriet naw a, ka mit a sukvar tlat si hi.
31Pathienin mi suol thu a ngai ngai nawh ti ei hriet; nisienlakhawm, tukhawmin Pathien a ngaisak a, a dit zâwng a thaw chun, Pathienin ama chu a thu a ngai hlak.
32Khawvêl insieng tira inthawk tukhawmin mitdel saa pieng mit an sukvar nâwk ti an hriet ngai nawh.
33Hi mipa hi Pathien kuoma inthawka suok a ni naw chun, iengkhawm thaw thei naw ni,” a ta, a dawn a.
34Chun, anni chun a kuomah, “Nang suol letdêra pieng i nih annâwm, nangin i mi hril vei maw?” an ta, an dawn a. Chuongchun, ama chu an hnawt dawk ta a.
Thlarau mit indelna
35Chun, an hnawt dawk ti Isûn a lo hriet a; chun, a zawng dawk a, “Pathien Naupa i ring am?” a ta.
36Ama chun, “Pu, ama chu tu am a na, mi hril rawh, ka ring theina dingin?” a ta, a dawn a.
37Isûn a kuomah, “Ama chu i hmu zing tah, a be zingtu che hi a nih,” a ta.
38Ama chun, “Lalpa, ka ring ie,” a ta, chibai a bûk a.
39Chun, Isûn, “Rorêl dinga hi khawvêla hin hung ka nih, mitdelhai chu an mit a hung varna ding le, mitvarhai chu an mit a hung indelna dingin,” a ta.
40Chun, a kâwla Pharisai umhai chun chuong thu chu an hriet a, a kuomah, “Keini khawm hi mitdel kan ni ve am a nih?” an ta.
41Isûn an kuomah, “Mitdel in ni chun suol nei naw ti niu a, nisienlakhawm, ‘Kan hmu thei ie,’ tuhin in ti si a, chuleiin, in suol a um zing a nih.
اکنون انتخاب شده:
JOHAN 9: HMOVBSI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
