JOHAN 5
5
Bethesda dîla na sukdam
1Chuong thil hnunga chun Judahai ruoiṭhe pakhat a um a; Isu Jerusalemah a hang fe a.
2Chun, Jerusalema chun berâm kawtkhâr kâwlah dîl a um a, chu chu Hebrai ṭawngin Bethesda#Ziekna ṭhena chun, “Bethzatha,” annawleh “Bethsaida” an tih an ti a, tuolpûk panga a nei a.
3Chuonga chun damnawhai, mitdelhai, ke inbaihai, zenghai tamtak an zâl tâwl a, [tui infâwn hun an nghâk a.
4Akâr po leh dîla chun vântirko a zu fe a, tui chu a sukfâwn hlak a; mi tukhawm ieng ang natna nei khawm ni hai sien, tuifâwn zu pal hmasatak taphawt chu an dam pei hlak si a.]#Ziekna ṭhena chu Ch.4na hi a um nawh
5Chutaka chun, kum sâwm thum pariet natna nei mi tu amanih a um a.
6Isûn a zâl chu a hmu a, chuong ang chun sâwttak a um tah ti a hriet a, a kuomah, “Sukdam i nuom am?” a ta.
7Chun, damnaw chun, “Pu, tui a hung fâwn pha dîla mi sietu ding ka nei naw a, ka fe sûngin mi dangin an mi fe khêl nâwk hlak,” a ta, a dawn a.
8Chun, Isûn a kuomah, “Tho la, i puonpha la la, kein lâwn ta rawh,” a ta.
9Chun, kârlovin ama chu a dam nghâl ta a, a puonpha a lâk a, a fe ta a. Chu ni chu Châwlni a nih.
10 #
Neh 13.19; Jer 17.21 Chuongchun, Judahaiin sukdama um kuoma chun, “Châwlni a ni hi, i puonpha i lâk a thieng nawh,” an ta.
11Ama chun an kuomah, “A mi sukdamtu ngeiin ka kuomah, ‘I puonpha la la, kein lâwn ta rawh,’ a mi ti a nih,” a ta, a dawn a.
12Anni chun a kuomah, “ ‘I puon- pha la la, kein lâwn ta rawh,’ titu che chu tu am a na?” an ta, an indawn a.
13Nisienlakhawm, sukdama um chun tû a ni a hriet naw a, chutaka chun mipui an um leiin Isu a fe hmang ta si a.
14A nakie chun ama chu Isûn Pathien biekinah a hmu a, a kuomah, “Ngai rawh, i dam ta hi, thil suksuol nâwk ta naw rawh, chuongnaw chun, thil ṭha naw nâwk zuol i chungah hung um rawi a tih,” a ta.
15Chun, ama chu a va fe a, Judahai kuoma chun, ama sukdamtu chu Isu a nih ti a hril a.
16Chuongchun, Châwlnia chuong thilhai chu a thaw leiin Judahaiin Isu an suknawmna ta a.
17Nisienlakhawm, Isûn anni chu a biek a, an kuomah, “Ka Pain tu chen khawmin sin a thaw hlak, kei khawmin ka thaw hlak,” a ta.
18Chun, Judahaiin sukhlum an tum nâwk zuol a, Châwlni a bawsiet lei chau khawm a ni naw a, Pathien ama paah ân bûk a, Pathien tluka ân siem lei khawmin a nih.
Naupa thuneina chu
19Chun, Isûn an kuomah, “Titakzetin, titakzetin ka hril cheu hi, Naupa hin a khâtin iengkhawm a thaw thei nawh, Pa thilthaw a hmu chau naw chu; thil a thaw ang taphawt chu Naupa khawmin a thaw ve hlak.
20Pain Naupa a hmangai a, a thilthaw taphawt a kuomah ân entir hlak; hieng nêka thil ropui lem hi a kuomah lân entir a tih, mak in ti dingin.
21Pain mithihai a keithoa a sukhring hlak angin, Naupa khawm- in a nuom nuom a sukhring hlak.
22Pain tû thu khawm a rêlpêk ngai nawh, thu po po Naupa ân rêltir lem a;
23mi po poin Pa an inza angin Naupa khawm an inzana dingin. Tûkhawm Naupa inza naw chu Pa, ama tirtu inza naw a nih.
24“Titakzetin, titakzetin ka hril cheu hi, tûkhawm ka thu hrea a mi tirtu ring chun chatuona hringna a nei tah, inthiemlovin a um naw a, thinaa inthawkin a suok a, hringnaah a lût lem ta a nih.
25Titakzetin, titakzetin ka hril cheu hi, a hun a tlung ding a ni tah, tu khawm hin a tlung zing tah, chu pha chun mithihaiin Pathien Naupa râwl hrieng an ta, a hre taphawt hring an tih.
26Pa chun mânia hringna a nei ang bawkin, Naupa mânia hringna neiin a siem;
27chun, Mihriem Naupa a ni leiin a kuomah rorêl ding thu a pêk.
28Hieng hi mak ti naw ro, a hun a tlung ding a ni tah, chu pha chun thlâna um po poin a râwl hrieng an ta,
29 #
Dan 12.2
suok vawng an tih; thil ṭha thawtuhai chu hringna changin tho nâwk an ta, thil suol thawtuhai chu inthiemnawna changin tho nâwk an tih.
Isu thu inhriettirna chu
30“Keia khâtin iengkhawm ka thaw thei nawh; naa ka hriet ang peiin ro ka rêl hlak; ka rorêl chu indiktak a nih, keia thu thuin um ka tum naw a, a mi tirtu thu thua um ka tum lem hlak leiin.
31Mâni chanchin inhriettir lang, ka thu inhriettir indik naw ni.
32Ka chanchin inhriettirtu chu mi dang a nih; ama chun ka chanchin ân hriettir chu ân dik ti ka hriet.
33 #
Jn 1.19-27; 3.27-30 “Nangnîn Johan kuomah mi in tir a, ama chun, thutak chanchin a lo inhriettir kha;
34Thu inhriettir ka ipawm ruok chu mihriem thu a ni nawh, nisienlakhawm, in damna dingin hieng thu hi ka hril a ni hi.
35Chu Johan chu khâwnvar chawktak le var tak a nih, a varah lân sukhlim in nuom kha.
36“Nisienlakhawm, inhriettirna ka nei hi Johan inhriettirna nêk khan a ropui lem a nih; Pain thil thaw zo dinga a mi pêk, ka thilthaw ngei hin Pain a mi tir a ni ti ka chanchin ân hriettir a nih.
37 #
Mt 3.17; Mk 1.11; Lk 3.22 Pa a mi tirtu khawm chun ka chanchin ân hriettir tah. Nangnîn iengtik khawm a râwl in hriet ngai nawh, a hmêl khawm in hmu ngai nawh.
38A thu khawm in lungrilah in pai zing ngai nawh; a itir hi in ring naw leiin.
39Pathien Lekha in tiem ngun hlak a, a sûnga chatuona hringna um dinga in ring leiin; chuong Lekha chu ka chanchin inhriettirna chu a ni si a.
40Nisienlakhawm, hringna nei dingin ka kuomah in hung nuom si nawh.
41“Mihriem ichawimawina ka pawm nawh.
42Nangni ka hriet cheu, Pathien hmangaina in lungrilah in nei nawh ie.
43Ka Pa hmingin ka hung a, nangnîn in mi lâwm si nawh; mi dang mâni hmingin hung sienla, ama chu lâwm in tih.
44“Nangni inchawimawituo lâwmhai, iengtin am ring thei in ta? Pathien tak chaua suok chawimawina chu in zawng si nawh.
45Keiin Pa kuoma ka hêk cheu ring naw ro, nangni hêktu cheu chu pakhat a um, in iring Mosie hi.
46Mosie in ring chun, kei khawm mi ring ve ding in nih; ama chun keia chanchin in sawnnaw a ziek.
47Nisienlakhawm, a thu ziek chu in ring si naw chun, iengtin am ka thu ring in ta?” a ta.
اکنون انتخاب شده:
JOHAN 5: HMOVBSI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
