JOHAN 18
18
Isu mana a um thu
(Mt 26.47-56; Mk 14.43-50; Lk 22.47-53)
1Isûn chuong thu chu a hril zoin, a închûktirhai leh an suok a, Kidron vadung an kai a. Chutaka chun huon a um a, chutaka chun an lût a, ama le a închûktirhai leh.
2Chun, ân mantirtu ding Juda khawm chun chu hmun chu a hriet; Isu a închûktirhai leh chutaka chun a lêng rawp leiin.
3Chuongchun, Juda chun sipai pâwl leh, thiempu lalhai le Pharisaihai kuoma um manmihai leh a ṭhuoi a, khâwnvarhai, meiserhai, hriemhai chawiin chutaka chun an hung a.
4Isûn a chunga thil tlung ding po po chu a hriet zing a, a va suok a, an kuomah, “Tu am in zawng a?” a ta.
5Anni chun a kuomah, “Nazareth Isu,” an ta, an dawn a. Isûn an kuomah, “Kei hi ka nih,” a ta. Chun, ân mantirtu Juda khawm chu anni lai a ngîr a.
6Isûn, “Kei hi ka nih,” a ti phingleh, hnungtieng an intâwl a, hnuoiah an tlu tâwl a.
7Isu chun an kuomah, “Tu am in zawng a?” a ti nâwk a. Anni chun, “Nazareth Isu,” an ta.
8Chun, Isûn, “Kei hi ka nih ti ka hril cheu annâwm, nangnîn kei in mi zawng chun, hienghai hi inthla ṭha ro,” a ta, a dawn a.
9(A thu hril, “Nangin kei i mi pêkhai pakhat khawm kân hmang nawh,” a ti kha a tlungna dingin.)
10Chun, Simon Peterin kâwlhnâm a kawl a, a phawi a, Thiempu Laltak suok a sât a, a nakâwr changtieng a sât thlâkpêk a. Suokpa hming chu Malka a nih.
11 #
Mt 26.39; Mk 14.36; Lk 22.42 Chuongchun, Isûn Peter kuomah, “Kâwlhnâm kha a bâwmah thun rawh; Pain no, kei a mi pêk hi ka dâwn naw ding am a nih?” a ta.
Isu Thiempu lal hmaa a ngir
(Mt 26.57-58; Mk 14.53-54; Lk 22.54)
12Chuongchun, sipai pâwl leh, an hotu laltak leh, Judahai manmihai le chun Isu an man a, an khuop a,
13Ana kuomah an ṭhuoi hmasa a, Kaiapha tarpupa a ni leiin, Kaiapha chu, chu kum chun Thiempu Laltak a nih.
14 #
Jn 11.49-50
Kaiapha chu, “Mi po po aia mi pakhat thi a ṭha,” tia Judahai rawtpuitu kha a nih.
Peterin Isu ân phat
(Mt 26.69-70; Mk 14.66-68; Lk 22.55-57)
15Chun, Simon Peterin Isu a zui a, a închûktir dang pakhat leh. Chu inchûktir chu Thiempu Laltak hmêlhriet a na, Thiempu Laltak in inhuon sûng tuolah Isu kuomah a lût ve a,
16nisienlakhawm, Peter chu tuolah kawtkhâr bulah a ngir zing a. Chuongchun, inchûktir dang, Thiempu Laltak hmêlhriet chu, a va suok a, kawtkhâr vêngtu a biek a, Peter a ṭhuoi lût a.
17Chun, kawtkhâr vêngtu nunghâk chun Peter kuomah, “Nang khawm hi mipa inchûktir laia ṭhang ve i ni maw?” a ta. Ama chun, “Ka ni nawh,” a ta.
18Chun, suokhai le manmihai chu chutaka chun an ngîr tâwl a, a dei leiin meihawlin mei an sêm a, a lum an awi a, Peter khawm anni lai a ṭhang a, ngîr pumin mei lum a awi ve a.
Thiempu Laltakin Isu thu ân dawn
(Mt 26.59-66; Mk 14.55-64; Lk 22.66-71)
19Chun, Thiempu Laltak chun Isu chu a inchûktirhai chanchin le a închûktirzie chanchin ân dawn a.
20Isûn a dawn a, a kuomah, “Khawvêl kuomah, tlâng hrietah thu ka hril hlak kha; inkhâwmna in le, Pathien biekin, Juda po po um khâwmnaahai chun, kân chûktir rawp hlak kha, iengkhawm arûkin ka hril nawh.
21Iengdinga kei i mîn dawn am? An kuomah ka thu hrilzie chu ka thu hretuhai indawn rawh; ngai rawh, chuonghai chun ka thu hril chu an hriet annâwm,” a ta.
22Chu chu a hril phingleh, a kâwla ngîr manmi pakhatin Isu a ben a, “Thiempu Laltak hieng ang hin i dawn maw?” a ta.
23Isûn a kuomah, “Thu suol ka hril leh, ka suolna mîn hriettir rawh, nisienlakhawm, thu ṭha ka hril khawmin iengdinga i mi ben am?” a ta, a dawn a.
24Chun, Ana chun khuop pumin Thiempu Laltak Kaiapha kuomah a tir a.
Peterin Isu ân phat nâwk
(Mt 26.71-75; Mk 14.69-72; Lk 22.58-62)
25Chun, Simon Peterin ngîrin mei lum a awi a. Chun, “Nang khawm a inchûktir laia ṭhang ve i ni maw?” an ta. Ama chun, “Ka ni nawh,” tiin ân pha a.
26Chun, Thiempu Laltak suok pakhat, Peterin a nakâwr a sât thlâk pêkpa laibungpa chun, “A kuomah huona khan ka hmu naw che am a nih?” a ta.
27Chuongchun, Peter ân pha nâwk a, âr a khuong ta a.
Isu Pilat hmaah a ngîr
(Mt 27.1-2,11-14; Mk 15.1-5; Lk 23.1-5)
28Chun, Isu chu Kaiapha ina inthawk chun lal inah an ṭhuoi nâwk a. Zingkâr a na; chun anni chu lal inah an lût nawh, chuong naw chun, inthieng naw nîng an ta, Fekân Ruoiṭhe fa thei naw ni hai.
29Chun, Pilat an kuomah a va suok a, an kuomah, “Hi mipa chunga hin thupawi ieng am in nei a?” a ta.
30Anni chun a kuomah, “Hi mipa hi mi suol ni naw sien chu i kuomah hung ṭhuoi naw ning ungah,” an ta, an dawn a.
31Pilat chun an kuomah, “Nangnîn ṭhuoi unla, in dân angin a thu rêl ro,” a ta. Judahai chun a kuomah, “Keini thu chun tukhawm sukhlum dân a ni nawh,” an ta.
32 #
Jn 3.14; 12.32 (A thizie ding thu, Isûn a hril anga, a tlungna dingin).
33Chuongchun, Pilat chu a inah a lût nâwk a. Isu a ko a, a kuomah, “Judahai lal i ni maw?” a ta.
34Isûn “Hihi nanga lungril puoksuoka i hril am a ni, mi dangin an hril che, ka chunga thu hi?” a ta, a dawn a.
35Pilatin, “Kei Juda am ka nih? nangma chihai le thiempu lalhaiin ka kuomah an hung ṭhuoi che a ni hi, thil ieng am i thaw hrim leh?” a ta, a dawn a.
36Isûn, “Ka ram chu hi khawvêla mi hi a ni nawh; ka ram chu hi khawvêla mi hi ni sienla, ka rawihaiin thâwng an tih, Judahai laia pêka ka um nawna dingin; nisienlakhawm, ka ram chu hitaka mi hi a ni nawh,” a ta, a dawn a.
37Chun, Pilatin a kuomah, “Chu lal i ni am a nih?” a ta. Isûn, “Lal ka nizie i hril zing chu. Thutak inhriettir hi ka pieng san le khawvêla ka hung san a nih. Tukhawm thutaka mi taphawt chun ka thu an pawm hlak,” a ta.
38Pilatin a kuomah, “Thutak chu ieng am a na?” a ta. Chun, chu thu chu a hril phingleh, Judahai kuomah a va suok nâwk a, an kuomah, “Iengkhawm a suol ka hmu nawh.
Isu thi ding thu an rêl
(Mt 27.15-31; Mk 15.6-20; Lk 23.13-25)
39Nisienlakhawm, Fekân Ruoiṭheah mi pakhat kân suopêk ding cheuin dân in nei; chuongchun, Judahai lal hi insuopêk lang cheu in nuom am?” a ta.
40Chun, anni chu an khêk nâwk a, “Hi mipa hi chu ni naw raw se, Barabba kha ni lem raw se,” an ta. Barabba chu suomhmang a nih.
انتخاب شده:
JOHAN 18: HMOVBSI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
