LUKA 22
22
Isu chunga thu phier rûk
(Mt 26.1-5,14-16; Mk 14.1-2,10-12; Jn 11.45-53)
1 #
Ex 12.1-27
Chun, Chawlṭhanglo Bei Ruoiṭhe, Fekân Ruoiṭhe an ti chu a hnai tah a.
2Chun, thiempu lal le Dân inchûktirtuhai chun a sukhlumnazie an zawng a, vântlâng an ṭi sih a.
3Chun, sâwm le pahnihai laia ṭhang, Juda Iskariot an iti sûnga chun Setan a lût a.
4Chuongchun, ama chu a va feh a, an kuomah ân mantir theina dingzie thiempu lalhai le hotuhai chu a va râwn a.
5Anni chu an lâwm hleh a, tangka pêk an tiem tah a.
6Ama chun a remtih a, mipui umnaw kâra inmantirna remchâng a zawng tah a.
A inchûktirhai leh Fekân ruoi an fâk
(Mt 26.17-25; Mk 14.12-21; Jn 13.21-30)
7Chun, Chawlṭhanglo Bei ruoiṭhe ni, Fekân Ruoiṭhena berâmte thatna ding ni chu a hung tlung tah a.
8Chuongchun, Isûn Peter le Johan chu, “Fekân Ruoi bu ei fâk dingin va buotsai ro,” a ta.
9Anni chun a kuomah, “Khâwlai am va buotsai inlang i nuom a?” an ta.
10Chun, ama chun an kuomah, “Ngai ta u, khawpuia in lûtin, pasal bêla tui putin intuokpui a ti cheu a, a lûtna inah zui lût el ro.
11Chun, in neitupa kuoma chun, ‘Inchûktirtuin, ka închûktirhai le Fekân Ruoi bu kan fâkna ding mikhuol pindan chu khâwlai am a na? a ti che,’ ti ro.
12Chuongchun, ama chun pindan chunghnung lientak, thuomhnaw umsa inentir a ti cheu a; chutaka chun buotsai ro,” a ta.
13Chun, an fe tah a, an kuoma a hril ang takin an hmuh a; chun, Fekân Ruoi chu an buotsai tah a.
14Chun, a fâk a hung hun chun, ama chun thlêng a awt a, a tirkohai chun an awtpui veh a.
Lalpa Zânbu phunna
(Mt 26.26-30; Mk 14.22-26; 1 Kor 11.23-26)
15Chun, an kuomah, “Ka thil tuor hma hin hi Fekân Ruoi hi fâkpui cheu ka nuom bêk bêk a nih.
16Ka hril cheu hi, hi hi Pathien rama sukfamkim a ni hmakhat chu ka fâk nâwk ta naw ding a nih,” a ta.
17Chun, no a lâk a, lâwmthu a hril zoin, “Hi hi la unla, insem ro,
18ka hril cheu hi, tuta inthawk Pathien ram a hung tlung hmakhat chu grêp hrui raa hi ka dâwn nâwk ta naw ding a nih,” a ta.
19Chun, bei a lâk a, lâwmthu a hril zoin, a khawi a, an kuomah a pêk a, “Hi hi ka taksa [in aia pêk chu a nih; in mi hriet zingna dingin hi hi thaw hlak ro,” a ta.
20 #
Jer 31.31-34
Chun, zân bu fâk zoin chuong ang bawkin no chu a lâk a, “Hi no hi ka thisena thuthlung thar chu a nih, in aia suok ding chu.]#Ziekna ṭhena chu Ch.19 zatnaa inthawka Ch.20na hi a um nawh
21“Nisienlakhawm, ngai ta u, a mîn mantirtu ding kut chu ka kuom- ah dawkân chungah a um zing a nih.
22Mihriem Naupa hi ruot ang ngeiin a fe ding a nih; nisienla- khawm, ân mantirtu ding mihriem chung chu a rik ie!” a ta.
23Chun, annin, “Eini laia thil chuong ang thaw ding chu tû am nîng ei ta le?” an ta, anni le anni an indawn a.
A ropuitak ni nuom leia insêlna
24 #
Mt 18.1; Mk 9.34; Lk 9.46 Chun, anni laia tû tak am ropui taka ngai ding ti thuah insêlna a suok a.
25 #
Mt 20.25-27; Mk 10.42-44 Chun, ama chun an kuomah, “Jentailhai lalhai chu an chungah an inlal hlak a; an chunga thuneituhai chu, ‘Thilṭha thawtu’ tia ko an ni hlak.
26 #
Mt 23.11; Mk 9.35 Nisienlakhawm, nangni chu chuong ang chu ni naw ti niu; in laia ropui tak chu a chîn lem angin um sienla, ân lal tak chu rawngbâwltu angin um lem raw se.
27 #
Jn 13.12-15
Tû am a ropui lem a? Bu fatu am, rawngbâwltu? Bu fatu chu a ni naw am a nih? Nisienlakhawm, kei chu nangni laia rawngbâwltu angin ka um hi.
28“Rinum ka tuok sûng po nangni a mi umpuituhai in na;
29ka Pain ram a mi ruotpêk angin ram ka ruotpêk cheu hi,
30 #
Mt 19.28
chuongchun, ka rama ka daw- kâna in fâka in dâwn theina dingin; chuongchun, Israel hnam sâwmpa- hnihai ro rêlpêkin lalṭhungphaah la ṭhung in tih.
Peterin ân phat ding thu hrillâwkna
(Mt 26.31-35; Mk 14.27-31; Jn 13.36-38)
31“Simon, Simon, ngai ta, Setan- in, bu rel anga a rel theina ding cheuin, nangni rawi hi a hni cheu annaw;
32nisienlakhawm, i ringna a bo nawna dingin ka ṭawngṭaipêk che a nih, i ngha kîr nâwk pha nangin i unauhai sukdet rawh,” a ta.
33Ama chun a kuomah, “Lalpa, intângna ina le thinaa khawm i kuoma fe ve ka huom a nih,” a ta.
34Ama chun, “Peter, ka hril che hi, i mi hrietnaa hin vawi thum i mîn phat hmakhat chu vawisûn hin âr khuong naw ni,” a ta.
Tangka ip, mansa, kekawk le kâwlhnâm
35 #
Mt 10.9-10; Mk 6.8-9; Lk 9.3; 10.4 Chun, an kuomah, “Tangka ip boa, mansa boa, kekawk boa ka tir suok cheu khan thil hrim hrim in tlasam am?” a ta. Anni chun, “Tlasam lo,” an ta.
36Chun, ama chun an kuomah, “Tu ruok hin chu tûkhawm tangka ip nei chun chawi raw se, mansa leh; tûkhawm kâwlhnâm nei naw chun a puon zawr sienla inchaw raw se.
37 #
Is 53.12
Ka hril cheu hi, ‘Ama chu mi suol lai an tiem sa tah,’ ti ziek kha ka chungah a hung tlung ding a nih; ka chungchâng thuhai kha a tlung zo ding a ni tah,” a ta.
38Chun, anni chun, “Lalpa, en ta, hi kâwlhnâm pahni a um,” an ta. Ama chun an kuomah, “A hun chu,” a ta.
Oliv tlânga Isu ṭawngṭaina
(Mt 26.36-46; Mk 14.32-42)
39Chun, ama chu a suok a, a dân pângngaiin Oliv tlânga chun a fe tah a; inchûktirhai khawmin an zui a.
40Chun, a hmun chu a va tlung chun an kuomah, “Thlêmnaa in lût nawna dingin ṭawngṭai ro,” a ta.
41Chun, lung dêng phâk chenah a tumin a va feh a; chun, a dingṭha- ṭhuon a, a ṭawngṭai a,
42“Pa, rem i ti chun, hi no hi ka kuoma inthawkin la hmang rawh; nisienlakhawm, keia thu ni loin, nangma thu thu ni lem raw se,” a ta.
43[Chun, vâna inthawkin vântir- ko pakhat a sukhar dingin a hung inlâr a.
44Chun, a lung ân rim bêk bêk leiin ṭhahnemngai nâwk zuolin a ṭawngṭai a, a thlan chu thi far lientak angin, hnuoiah a zuk far a.]
45Chun, a ṭawngṭai zoa a thoin, inchûktirhai kuomah a hung a, an lungngai leiin an lo in a hmuh a;
46chun, an kuomah, “Iengdinga in in am? Thlêmnaa in lût nâwna dingin tho unla, ṭawngṭai ro,” a ta.
Isu mana a um thu
(Mt 26.47-56; Mk 14.43-50; Jn 18.2-11)
47Chun, a la hril zing laiin, ngai ta, mipui an hung a, sâwm le pahni laia ṭhang Juda an iti khan an hma a hung ṭhuoi a; chun, fâwp tumin Isu a hung pan a.
48Nisienlakhawm, Isu chun a kuomah, “Juda, Mihriem Naupa hi fâwpin în mantir ding a ni maw?” a ta.
49Chun, a vêla mihai chun thil hung tlung ding chu an hrietin, “Lalpa kâwlhnâmin sât kan ti?” an ta.
50Chun, anni laia tûin amanih Thiempu Laltak suok chu a sât a, a nakâwr chang tieng a sât thlâkpêk a.
51Chun, Isûn a biek a, “Hi po hi ni raw se,” a ta, a nakâwr chu a them a, a sukdam tah a.
52Chun, Isûn a kuoma hung thiempu lalhai, Pathien biekin hotu- hai le, upahai kuoma chun, “Kâwl- hnâmhai, hembâwkhai chawiin, suomhmang man ding ang elin in hung a ni maw?
53 #
Lk 19.47; 21.37 Pathien biekina in kuoma ni tin ka um laihai khan mi man tumin in mi ban si nawh a; nisienlakhawm, tuhi nangni hun a nih, inthim thuneina leh,” a ta.
Peterin Isu ân phat
(Mt 26.57-58,69-75; Mk 14.53-54,66-72; Jn 18.12-18,25-27)
54Chun, an man a, an ṭhuoi a, Thiempu Laltak ina chun an ṭhuoi lût tah a.
55Chun, Peterin hlataka inthawk- in a zui a. Chun, in inhuon sûng tuollai chun mei an sêm a, an ṭhung khâwm a, Peter chu anni lai a va ṭhung veh a.
56Chun, mei vara a ṭhung laiin, nunghâk tûin amanih a hmuh a, a en zing a, “Hi mipa khawm hi a kuoma um kha a ni hi,” a tih a.
57Ama ruok chun, “Nuhmei, ama chu ka hriet nawh,” tiin ân phat a.
58Chun, anakie deu chun mi dangin a hung hmu nâwk a, “Nang khawm anni laia mi i ni hi,” a ta. Peter ruok chun, “Mihriem, ka ni nawh ie,” a ta.
59Chun, dâr kâr khat lai hnunga chun, mi dangin, “Hi mipa khawm hi a kuoma um kha a ni ngei el; Galili ram mi a nih annâwm,” a ti tlat a.
60Chun, Peterin, “Mihriem, i thu hril chu ka hriet nawh,” a ta. Chun, kârloin, a ṭawng laitak chun âr a khuong nghâl tah a.
61Chun, Lalpa chu a nghah a, Peter chu a en a. Peter chun Lalpain, “Vawisûn hin âr a khuong hmain vawi thum mîn phat i tih,” a kuoma a ti thu kha a hung hriet dawk nâwk tah a.
62Chun, a suok a, a ṭap ta ngawi ngawi a.
Isu nuiza siemnaa an hmang thu le an vuok thu
(Mt 26.67-68; Mk 14.65)
63Chun, Isu cheltuhai chun nuiza siemnân an hmang a, an vuok a.
64Chun, a mit an tuom a, “Hril rawh, tûin am a vuok cheh a?” tiin an indawn hlak a.
65Thu dang tamtak khawmin an hrilsietin an hal a.
Isu rorêlna hmaa a ngîr
(Mt 26.59-66; Mk 14.55-64; Jn 18.19-24)
66Chun, khawvar phingleh, vântlâng upahai, thiempu lalhai le Dân inchûktirtuhai chu an inrâwn khâwm a, an rorêlnaa chun an ṭhuoi a;
67“Krista i ni tak zet chun mi hril rawh,” an tih a. Chun, ama chun an kuomah, “Hril lang cheu khawm awi naw ti niu;
68indawn lang cheu khawm dawn naw ti niu.
69Nisienlakhawm, tuta inthawk chu Mihriem Naupa hi Pathien thil- thawtheina changtieng ṭhung tâng a tih,” a ta.
70Chun, an rêngin, “Nang hi Pathien Naupa chu i ni am a nih?” an ta. Chun, ama chun an kuomah, “Ka nih ti in hril zing chu teh,” a ta.
71Chun, anni chun, “Ieng hrietna dang am ngai tâng ei ta? Eini ngeiin ama bau suok ei hriet tah annâwm,” an ta.
اکنون انتخاب شده:
LUKA 22: HMARCLBSI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
