JOHN 9
9
1A kal pah in Jesuh nih a chuahka in mincaw pakhat a hmuh. 2A lamkaltu hna nih, “Rabbi, mitcaw cia in hrin hi, a ho sual ruangah, amah maw a nu le pa dah?” tiah an hal. 3Jesuh nih, “Amah le anu le pa sual ruangah a si lo, a cungah Pathian rianṭuan a langhnâk ding tu ah a si. 4Chûn a si lio ah aka thlahtu rian ka ṭuan awk a si; zan a rak phân lai. cu cân ah cun ahohmanh nih rian an ṭuan kho ti lai lo. 5Vawlei i ka um lio ah, vawlei ceunâk ka si,” tiah a leh hna. 6Cu bia a chim hnu ah vawlei ah a cil a châk i tlak a ser i a mitah a benh. 7Cun a sinah, “Siloam tidil ah vâ ṭawl, tiah a ti. (Siloam sullam cu “Thlah” tinâk a si) Cuticun a kal i â ṭawl hnu ah mitdei in a rak kir. 8Cucaah an innpa hna le cuhlan i kutdawh i a hmutu hna nih, “Hi pa hi ṭhut bu i kut a dawhmi kha a si lo maw?” tiah an ti. 9Cheukhat nih, “Amah kha a si ko” an ti. Midang nih, “Amah he â lomi a si,” tiah an ti. Anih nih, “Amah kha ka si ko,” tiah a ti. 10Cucaah mi nih, “Zeitindah na mit a dei ṭhân” tiah an ti. 11Anih nih, “Mi pakhat Jesuh an timi nih tlak a ser i ka mit ah a benh, ‘Siloam tidil ah va kal law, va ṭawl’ a ka ti. Ka va kal i kâ ṭawl tikah, ka mit a dei i khua ka hmu kho,” tiah a ti. 12Annih nih, “Amah cu khuazeiahdah a um?” tiah an ti i “Ka hngal lo,” tiah a ti. 13Mitcaw pa cu Farasih hna sinah an kalpi. 14Jesuh nih tlak ser in a mit a deiter ni kha sabbath ni a rak si ngel cel. 15Cuticun Farasih hna nih a mit a dei `hannâk kong kha an hal ṭhân. Anih nih, “Ka mit ah tlak a benh i ka ṭawl tikah khua ka hmu kho ko” tiah a ti. 16Farasih cheukhat nih, “Hi mipa hi Sabbath a ulh lo ruangah Pathian sin in a rami a si lai lo,” tiah an ti. Cheukhat nih, “Mi sual nih zeitindah hi bantuk hmelchuanhnâk a tuah khawh lai?” tiah an ti ve i an lakah i ṭhennâk a chuak. 17Mitcaw sinah, na mit an deiternâk kongah nang zeitindah na ruah? tiah an ti. Anih nih, “Profet a si,” tiah a ti. 18Asinain Judah mi hna nih mitdei pa i nu le pa an kawh hlan cu mitcaw a rak si i atu ah khua a hmu ṭhân ti kha an zum duh lo. 19A nu le pa sinah, “Hi hi nan fapa mitcaw cia in a chuak nan timi kha a si maw? zeitindah atu khua a hmuh ṭhân? tiah an hal hna. 20A nu le pa nih an leh hna i, “Hi hi kan fapa a si i mitcaw cia in a chuak ti kha kan hngalh. 21Asinain atu ah zeiruangahdah a rak hmuh khawh ṭhân, kan hngal lo, a mit dei tertu zong kan hngal lo. Patling a si cang; amah hal ulaw, amah nih amah kong cu chim ko seh,” tiah an ti. 22Cubangin bia an chim cu Judah mi hotu an ṭih ruangah a si. Zeitintiah Judah hotu hna nih, “Amah cu Krih a si” titu pauh cu Sinagog in ṭhawl ding an si tiah biakhiahnâk an rak tuah cang. 23Cucaah a nu le a pa nih, ‘Patling a si cang, a mah hal u,’ tiah, an rak tinâk kha a si. 24Cuticun mitcawpa cu an kawh ṭhân i “Pathian thangṭhat ko, Hipa hi cu misual a si kha kan hngalh,” tiah an ti. 25Anih nih, “Misual a si le si lo ka hngal lo. Pakhat te ka hngalh, ka mit a rak caw i atu khua ka hmu,” tiah a ti. 26Annih nih, “Zeitindah an tuah, zeitindah na mit a deiter?” tiah an ti. 27Anih nih, “Kan chimh cang hna kha ta, nan ngai duh fawn lo. Zeiruangahdah theih cu nan duh ṭhân kun? Nannih zong a zultu si nan duh ve hlah maw?” tiah a leh hna. 28Annih nih, “Nang hi Amah zultu na si, kan nih cu Moses zultu kan si. 29Pathian nih Moses a chawnh tiah kan hngalh, hi pa hi khawzei leimi dah a si kan hngal lo,” tiah fakpi in an sîk. 30Anih nih, “Cucu dah kaw khuaruahhar a sinâk cu. Khuazeimi dah a si tiah nan hngalh lomi nih ka mit a deiter fawn. 31Pathian nih misual bia a ngai ballo tiah kan theih. Mizei pauh nih Pathian a tlaih chan i a duhmi a tuah ahcun Pathian nih a bia a ngaih tawn. 32Vawlei semka in mitcaw cia in a chuakmi mitdeinâk kong kan thei bal rih lo. 33Hi pa hi Pathian sinin a rami a si lo ahcun zeihmanh a tuah kho lai lo” tiah a leh hna. 34Annih nih, “Nang sual tlingte he a chuakmi nih nakan cawnpiak lai maw?” tiah an ti i an ṭhawl. 35An ṭhawl ti kha Jesuh nih a hngalh tikah a kawl i, “Pathian Fapa na zum maw?” tiah a ti. 36Anih nih, “Bawipa, ka zumh khawh nâkhnga, Amah cu ahodah a si?” tiah a ti. 37Jesuh nih, “Amah cu na hmuhmi, nangmah an chawntu hi a si,” tiah a ti. 38Anih nih, Bawipa, ka zumh ko, tiah a ti i a biak. 39Jesuh nih, “Hi vawlei ah hin biaceih dingah ka ra, mitcaw hna an mit a deinâk hnga le, mit deimi hna, an mit a cawt nâkhnga,” tiah a ti. 40Cuticun a pawngkam i Farasih hna nih cucu an theih i, “Kannih zong mit caw kan si ve maw?” tiah an ti. 41Jesuh nih, “Mit caw rak si ulaw, sualnâk nan ngei hnga lo; asinain atu ah, kan hmuh khawh ko, tiah nan ti fawn. Cucaah nan sualnâk cu a um peng ko,” tiah a ti hna.
اکنون انتخاب شده:
JOHN 9: HAKABSI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
