Luk 20
20
1Na ɣɔn ne kol toŋ weet en kɔc ne yekaluic, weet ke ne welpiath, go bany ke ka ke Nhialic bɛn kene dugɛɛr ku roordit; 2ku jamki, yookki, Yii lɛke wɔ: Ye keekake loi ne riɛro? yeŋa yin yin yeriɛre? 3Go ke gam ku yook ke, Ye we ba thiec eya; ku gamka ɣa: 4Ye baptinh de Jɔn ye ke e bɔ nhial, ka ne bɔ enɔŋ kɔc? 5Goki kenhiim ciɛt ne roth, jamki, Yii na luelku yen, Wuu kee bɔ nhial; e kabi luel, Ye a yeŋo cii we ye gam? 6Ku na luelku yen, Wuu kee bɔ enɔŋ kɔc, ke wɔ bi biɔɔk ne raan ebɛn: ne ke cik ke ye gam ke Jɔn ye nebi. 7Goki dhuk, yii kucki te e bii yen thin. 8Go Yecu ke yɔɔk, Ye ke we caa bi lɛk yeriɛr yan keekake loi.
9Go yeparabole gɔɔc ne lek kɔc; Ye raan ee com dom de abiɛi, ku nyiɛŋ awuut ke dom, ku jiɛl lee ceŋ wei piny dɛ. 10Na ɣɔn ye ruer ye bii, ke tooc aluak enɔŋ kɔc ke dom bik lɔ miɔɔc ne kaciluɔk ke dom de abiɛi; go kɔc ke dom goki lɔ dui, ku ciecki wei ne yecin. 11Go aluaŋ dɛ bɛɛr tooc: goki lɔ dui eya ku yɔŋki, ku ciecki wei ne yecin. 12Go aluaŋ de diak bɛɛr tooc: goki yiɛn ɣɔnetook, ku ciecki biyic. 13Go bɛny de dom go jam, Ye ba ŋo loi? Ɣan bi wendien nhiar tuɔc, lan bik kek ye lɔ riɛu edewe. 14Ana ye kɔc ke dom yii ŋemki ye, e ke yook roth jamki, Yii dit eke kene: nakku, ku bi dom ya adonyda. 15Goki ciɛc biyic domic, ku nɛkki. Yen yeŋo bii bɛny de dom luɔi keek? 16Abi bɛn ku nɛk keek keekɔc ke domka, ku kabi dom gam yin kɔc kɔk. Na cik ye piŋ, e ke jam, Yii diɛre te peen Nhialic. 17Go ke ɣoi, ku jiɛm, Ye yee ke yeŋo yeke ci gɔɔre,
Ya kuur ci jai ne mebuuth,
Yenekee bɛɛr cɔk ye ŋem de pany nom?
18Raan eben ye loony ne yekuure nom abi rɔt ya thoor; ku ran bi ya mat, abi ya mot ci liɛt.
19Go dugɛɛr kene bany ke ka ke Nhialic piɔth naŋ bik dɔm ne yethaane; e ke riɔc e kɔc; ne kee cik kek ye nyic ke luel yeparabole ne keek. 20Goki ya tiit, ku toocki aneem ci roth loi e ke ye kɔc piath, bik naŋ ke dɔm ke ye ne welke, bik kek ye gam yine riɛr de gabana. 21Goki thiec, Yii Dupioc, yin nyicku ke yin e jam ku ye weet apiath, ku cii kɔc e kuanyic, ku ye cok weet neyic ne dhol de Nhialic: 22Yen piɛth buk Kaithar ya juɛr weu, ka rɛɛc? 23Go koonyden nyic, ku jiɛm yook ke, 24Ye yeŋo thɛmka ɣɛn? Nyuɔthka ɣa denariɔn. Yeŋa ku rinke tɔ ne yekɔu? Goki jam, Yii kee Kaithar. 25Go ke yɔɔk, Ye ke we yaka Kaithar yiɛn ka ye kake, ku yaka Nhialic yiɛn ka ye kake. 26Goki ciɛn ke loiki ne kɔc nhiim ne yejame: goki gai ne beerde, ku ropki kethook.
27Go kɔc kɔk ke Thadokai bɛn enɔŋ en, kɔc ye jam yii cin jon de rɔt; ku thiecki, 28jamki, Yii Dupioc, Mothe ee wɔ gaar, jiɛm, ye na ci manhe e raan thou, ku ne nɔŋ tiik, ku cin mith, ke manhe bi tiik loom, ku bi manhe kɔɔc. 29Yen wat ake tɔ keedherou mith ke mony tok: go wen tueŋ go thieek; ku thou ke cin mith; 30ku lɔ wen de rou; 31ku leer ke wen de diak; ku yene ye cɔɔk de wat kedhia, ku thouki. 32Ɣɔn ke tiik jɔl thou. 33Yen bi jal ya tiŋ de ŋa miak ne kol de jon de rɔt? ne ke cen ya tiŋden keedherou. 34Go Yecu ke yɔɔk, Ye wɛɛt ke yeceŋe aye thieek, ku ye ke thiaak, 35ku kek keek, keekɔc ye luɔk piath ne ɣet yeceŋtike, ku jon de rɔt ne thouic, aaci bi ya thieek, ku ce ke beere thiaak: 36ne ke cik kek kɔn bɛɛr thou: aabi ya ciɛt malaikai: ku yiki ya wɛɛt ke Nhialic, yiki wɛɛt ke jon de rɔt. 37Ku ke de kɔc ci thou ye kek bɛɛr piir, ee ci Mothe nyuɔɔth te de But, ɣɔn yen Bɛnydit cɔɔl Nhialiny de Abraɣam, ku ye Nhialiny de Yithak, ku ye Nhialiny de Jakob. 38Yen acie Nhialiny de kɔc ci thou, ee ke de kɔc ye piir: ne ke ye kek piir kedhia enɔŋ en. 39Go kɔc kɔk ke dugɛɛr gam yookki, Yii Dupioc, yin ci jam apiath. 40Ku riɔcki ne thiɛc bik kek ye bɛɛr thiec.
41Go ke thiec, Ye yeŋo ye kek ye luel yii ye Kritho ye wen de Dabid? 42Ne kee cii Dabid jam ne guɔpde ne kitam de Diɛtic,
Ye Bɛnydit ee Bɛnydiitdie yɔɔk,
Ye nyuɔce ne ciɛn cuenydie,
43Agut te ban yin cɔk kɛc kɔc nɔŋ ater kene yin kɔth.
44Ee ye Dabid cɔk ye Bɛnydit, ne ye wende yede?
45Go jam ke piŋ ne raan ebɛn yook kɔcpiocke, 46Ye yaka roth ŋem ne dugɛɛr, kɔc ye kok ne cath e ke ceŋ alɛth bar, ku yiki muɔth yene ke muɔth ne ɣan ke ɣɔc nhiar, ku ɣɔn ke nyuc ke bany ne luek ke gueer yic, ku ne ɣɔn ke bany te de miɛth dit; 47kɔc ye ɣoot ke diarjɔɔk cam yic, ku yiki lɔŋ cɔk baar ne adhuɔm: keekɔcka aabi naŋ lukwei gok.
اکنون انتخاب شده:
Luk 20: LEKJOT
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© British and Foreign Bible Society 1940, 2017
در مورد Lek Jot de Jecu Kritho 1940 اطلاعات بیشتر کسب کنید
