Susumo 34
34
Ba dyɛng na Dina na retek
1Tuhak, Dina Yakɔp, hwong de a tɔ na hwā mɛ Leya, a wɔ́, na a bin tē show a behwông BeKanaan. 2Ko Shɛkɛm, de da mɛ à Hamor, WoHivi, á sè gwɔ̀m sevwel o, a di hwong o. A jut ɛ, a wɔ̀ dyɛng na yɛ na retek. 3Ko yey mɛ ya wɛrɛ na yɛ, a tɛ̀ yey na yɛ, ko a ye ngyɛ́k, na a hwɔtɔ nehywɛ mɛ vey na yɛ. 4A ha a da mɛ Hamor, a yang ɛ, “Me simo hwo vo a me hwong womo, na a se hwā hom.”
5Yakɔp a wok, ba ga lashe hwóng mɛ Dina. Ko remo de besɔ mɛ ba kana rɔngɔl e hey na yas, a sǎ yuu vɔk e jeng de ba toyo. 6Ko Hamor, dâ Shɛkɛm, a vey, na a bin ha na Yakɔp. 7Tyɛng e jeng o, nèy Yakɔp nè sè pomos yi e hey. Sede yɛn a wok pyɛ de ya ga té, yey mɛn ya beseng hɛ, ko yɛn a tɛ̀ shom sizɔng. Yaga pyɛ de Shɛkɛm a ra, ya sé pyɛ rekyen tyɔng wɛt e ji BeIsrayɛl, a dyɛng na hwông Yakɔp, pyɛ de ya jam na be ra wɛt.
8Ko Hamor a ha na yɛn, a ye, “Hwey hom Shɛkɛm ha ga tɛ̀ yey na hwóng min. Ka yin a simo a yɛ, ko yin a nɔng ɛ hɛ e weneng. 9Tik na wot ragas weneng e tē mot: yin e nɔng ot behwóng min, ko yin e vos bemot à behwong o arɔng. 10Yin e sangal tanga wot e ji sevwel o, yin e tɔk kasa kwɔn de yin e simo. Sangal hin ɛ, na yin kyě kyè washak, na yin sɛ̀ pyɛ̂ nedanelɔ e ji hɛ.”
11Shɛkɛm a yâng dâ Dina na begwa mɛ, “Tik na me sɛ̀ nerat e bayis min, ko mwa neyɛnɛ̂ pyɛ de yin a ha, ma rɔda tala hin yɛ. 12Ha a me hin nepyak yas, ka na ka sé ala ayi, tanga nenɔrɔ detidetu, ko ma rɔda tala tyɛng na pyɛ de yin a ha a me. Me zɔng, yin nɔng me hwong o, na a tɛ́ ɛ hwā hom.”
13Ko nèy Yakɔp na gwɔrɔ Shɛkɛm tanga da mɛ Hamor na ha, yaga a ga lashe gwà mɛn Dina. 14Yɛn a yang ɛn, “Wot e tɔk ra pyɛ yemo wɛt. Wot e nɔng gwà mot e weneng na mwat de ba ga yosom hɛ wɛt, yaga a sé pyɛ rekyen na wot. 15Pyɛ jining zɔng de yê tɛ̀, na wot simo a yin, yɛ à, yin simo, yin tɛ́ in sede wot, be wɔ a kawɛ rwas e ji min e cwɛl. 16Yi ano de wot e nɔngɔs hin behwong mot, ko wot e vos bemin arɔng. Ko wot e sangal e tē min, na wot tɛ́ ot yere jining na yin. 17Ko ka sede yin a sey pyɛ de wot a ha wɛt, na be wɔ a yin e cwɛl, ko wot e jut hwóng mot, wot kyè mɛ.”
18Neha mɛn o na pɛngɛ a Hamor tanga hwey mɛ yey. 19Wen o a lashe jeng na râ pyɛ de ba ha mo wɛt, yaga e simo hwông Yakɔp o. Shɛkɛm o yɛ wɛ de ba dal na nɔng ɛ nerey e ji belɔ mo.
20Ano de Hamor na hwey mɛ Shɛkɛm ba wɔ e dura e rwi yel e ji repomo, ba ha na bemât pomo mɛn, ba ye, 21“Bemat vemo ba wuna nesa na wot. Tik na yɛn a sangal e sevwel o, na yɛn a kyě kyè washak, yaga vwel o ha sé rey o, ha vey a wot tanga yɛn. Wot e vos behwóng mɛn, ko wot e nɔngɔs hɛn bemot e weneng arɔng. 22Ko pyɛ jining zɔng de bemat o bê simo yi na wot, yaga na be sangal e tē mot, na wot tɛ́ ot yere jining na yɛn: wot wɔ a kawɛ rwas e ji mot e cwɛl sede yɛn. 23Ano de wot e sɛ̀ berɔndɔng mɛn, na nerey mɛn, na mwa yas mɛn. Tik na wot simo a yɛn zɔng, na be sangal tanga wot.” 24Mwa bemât repomo mo ba sey pyɛ de Hamor na hwey mɛ Shɛkɛm ba ha, ko ba wɔ a kawɛ rwas e cwɛl.
25E pɔlɔ hê tat, jeng de bemat o ba sè rɔ̌ wokos nepêp beram o, nèy Yakɔp neba, nɛ à Simɛyɔn tanga Levi, begwa jîm Dina, ba jut bewal mɛn, ba hwo e ra repomo mo vit a tɔk, ko ba mɔbɔs beras o mwa. 26Hamor na hwey mɛ Shɛkɛm ba sè e ji mo. Ba jut gwà mɛn Dina yi e lɔ Shɛkɛm, ba pere kyè. 27Ko bwâng nèy Yakɔp na pom, nà sɛ̀ bevin shaam de ba ga mɔbɔs, yɛn a hashe pyɛ́ e ji repomo mo, yaga na be tala mɛ pyɛ rekyen de ba ra a gwa mɛn Dina. 28Yɛn a hashe karâ vyēl shi, na vyēl pyɛng, na berɔndɔng, na bemadung, na mwa pyɛ́ de ya sé e ji repomo tanga e hey. 29Mwa nerey mɛn, na beha mɛn tanga nèy mɛn, na kayɛ pyɛ de ya sé e nelɔ mɛn ba hashe e jugu.
30Yakɔp a yâng Simɛyɔn na Levi, “Yin a ga tɛ̀ me e ji yɔ́m! A remo mê vɔk nemi nesit e bayîs bedâvwel hemo! Vit a me na bemat hyɔt. Ka sede BeKanaan na BePɛrizi mo yɛn a wuna hɛn e ra me, na be hwo me na como, ko bê wey na me tanga belɔ hom.”
31Ko ba toyo a yɛ, ba yang ɛ, “Sɛ̌ be teshe na gwà mot sede devwes, kɛk a!”
اکنون انتخاب شده:
Susumo 34: bomBI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust