MARK 14
14
Jesu Dōina Ṭōnmantluk
(Mt 26.1–5; Lk 22.1–2; Jn 11.45–53)
1Tûn hi Rakan Kût leh Che philo Buhlom revei tlona sik ni 2 mak hma kae. Thempu kalenhei leh Dân oja he’n Jesu kha marûk a surna sik khana thatna sik ahlam anleijong.#Sōk 12.1-27 2Anmani’n anti, “Hiva rehōi shunga hinchu tlohêr mak rih, akinchu mipui inhnokna hong ka-om khâk sik.”
Jesu Bethany a Thai Antamanthi
(Mt 26.6–13; Jn 12.1–8)
3Bethany khōa kaphâr karôn Simon inna Jesu kha leika-om. Jesu’n bu aleisâk lai, nuhmei inkhat nard reipâr-tui vânga insyem mankatamtak thai marim katui alabaster kōk kasip phet ahei choia kahong. Amanu’n thaibôm kha avōkkhōia marim katui kha Jesu luchunga aleisun pek.#Lk 7.37-38 4Khava hmun a mi ṭhahrep hei chu anhnuk kana joa khat leh khat inbektō heia anti, “Thai marim katui manhmang hi heimo ahnemna? 5Hivahi dangka 300 kakhea nijōr theia kae khana sêr kha sarahei hneng pek thei kae.”
6Tâk Jesu’n ati, “Amanu abinga dahlon ruh! Heisa mo ama nantamanrim? Nuhmeinu hin ṭōn kaṭhatak inkhat kei sik a atlo jo kae. 7Sarahei chu nan-ompuisap ṭhak sik hei, nangni’n nanmadu pha rakip a nan-inthōpui thei hei. Tâk kei chu ahei tik a nangnihei leh omsap mak min.#Dân 15.11 8Amanu hin atorhrep kha atlo kae; thai marim katui kataksa chunga akano hi ka’nvûm sik amak hma inrinna sik a atlodek jo kae. 9Tûnchu, kaman chênpek chei kae raleichung pumpuia ṭong kaṭha anhrina hmun rakip a, aṭōn tlo hi amanu mandonsōtna a’nhri sik jo kae.”
Judas in Jesu Pek sōt sik Akahnōm
(Mt 26.14–16; Lk 22.3–6)
10Khava sōa sonle 12 hei kâra Judas Iscariot intipa khan mikut a Jesu apek sōt theina sik thempu kalenhei hneng leikasea kae. 11Anmani’n aṭong kha anthei pha katlai jo hei, khana ahnenga sêr pek sik a intep jo hei. Khava jâra Judas khan Jesu kha pek sōt theina sik hlam inkot ajong joa kae.
Jesu’n Asonlehei Rakan Kût Thlai Asâkpui hei
(Mt 26.17–25; Lk 22.7–14,21–24; Jn 13.21–30)
12Che philo buhlom revei kani hma-inkei ning, Rakan Kût hme sik kemōngte that ning kania, Jesu sonle he’n ander, “Rakan Kût sâklôm tlona sik khon mo akase unga kantamantluk sik namadu?”
13Khava pha Jesu’n asonlehei kâra 2 atir heia hinga amanthei hei, “Nangni khōpuia son se ruh, khana tuibe indom mi inkhat in a’ntōpui sik chei. Ama kahnung kha 14ahlutna inn katlung jui ruh, inn kapupa hneng, ‘Oja khan kasonlehei leh kei Rakan Kût sâklôm tlona sik innden kha khomo?’ ti ruh. 15Khava pha ama’n inn chungden kalentak, manhlengsa leh mantluksa inkhat amanhmu sik chei, khana khan heirakip eini sik a nantamantluk sik kae.”
16Sonle he’n andahlona khōpuiting kase jo hei, khana Jesu’n amanthei hei kapōa heirakip anvahmu jo; khana Rakan Kût sâklôm tlona sik anmantluk jo.
17Khōhlei ahongtluk jo pha Jesu’n asonle 12 hei leh kahong jo hei. 18Anmani’n dokhâng chunga ansâklai, Jesu’n ati, “Kahri pek chei kae, kei leh akasâksap inkhat in mikut chunga apek sōt sik eng kae.”#Hl 41.9
19Sonlehei kha anmalung kadong jo, inkhat bânna inkhat in ahnenga der anphut jo, “Kei natina eng khet chu changmak nu, kachang mo?”
20Jesu’n amasôn hei, “Nangni 12 kâra inkhat kachang sik, thleng shunga kei leh buhlom inporsap inkhat hi kae. 21ṭong intheng in ahri kapōa, Mihring Sapa kha akathi sik kae; tâk Mihring Sapa kapesōt sikpa kha heituk a ṭitpek aka-om jo mo! Ama sik a chu ale’ntet hêrmak inchu kaṭha jôk sik a kae.”
Rōngpu Jân-thlaisâk
(Mt 26.26–30; Lk 22.14–20; 1 Cor 11.23–25)
22Anmani’n ansâklai, Jesu’n buhlom har kha aloa, manpâkna derna aneia, ahar akhōia asonlehei hneng apek hei, “Inlo ruh, hivahi kataksa kae,” ati.
23Khava sōa ama’n kōklei inkhat aloa, Pathen manpâkna aneia anhnenga apek hei; ankhenga khana inphut an-ina kae. 24Jesu’n ati, “Hivahi mi katamtak sik a akalōng kathisen, Pathen intepna chunga mêrchîkna katatna thisen kha kae.#Sōk 24.8; Jer 31.31-34 25Kahri pek chei kae, Pathen Rengram a juther kha ka-inmak kârseng hiva ju hi in nôk mak jo ning.”
26Khava sōa anmani’n hla inkhat ansak a, Olive Tlâng ting kase jo hei.
Jesu’n Peter Inphe sik Ahri sōt
(Mt 26.31–35; Lk 22.31–34; Jn 13.36–38)
27Jesu’n anhnenga ahri, “Nangni nankhenga katlânsōt sik chei khana nandahlon sik eng, ajârchu ṭong intheng in ati, ‘Pathen in kemōng kakhempa kha athat sik, khana kemōnghei kha inchekpet sik hei.’#Zec 13.7 28Tâk kei hi kahringa keimatho kachangsō leh Galileea nanhma a leikase sik eng.”#Mt 28.16
29Peter in amasôn, “Alak-hei seng in andahlon che’num ke’nchu dahlon hêrmak che ning.”
30Jesu’n Peter hneng ati, “Kahri pek che kae, tuning jân ârkhōng in vōi 2 akhōng mak hma vōithumtak kei hi manhret mak eng nati sik kae.”
31Tâk Peter in inhnakchet a amasôn, “Nang leh nithisap sik achang inum, khanga chu tihêr mak ning!”
Khana sonle ankhenga in-ang et a khanga anti et a kae.
Jesu’n Gethsemanea Derna anei
(Mt 26.36–46; Lk 22.39–46)
32Anmani Gethsemane inti hmun khan kahong jo hei; khana Jesu’n asonlehei hneng ahri, “Derna kaneilai hinahin le’n ong ruh.” 33Ama’n Peter, James leh John aleiṭhōi hei. Inrimna leh inrengna achunga jōng katlung jo, 34khana anhnenga ati, “Kamalung inrim reia thina khop kachang jo. Hinahin om-una inrin ṭhak ruh.”
35Ajingte kahladet a kasea, raleia inbok a, a-ethei sik inchu khava inrimna pha kha achunga asōk makna sik a ader. 36Ama’n ader, “Apa, Kapa! Nang sik a chu heirakip kae theipet. Hiva inrimna kōklei hi keia inphut alosōt pek roh. Kha’num kei lungdo changmak sona, nang lungdo chang rasoh.”
37Khava sōa ama hong inlea sonle 3 hei kha anleikaje kha avahmu hei, ama’n Peter hneng, “Simon, nang akaje che mo? Pung khatbek sik a’m kahara om torlo che mo? 38Khana anhnenga ati, “Inrin ṭhak ruh, mathlemna nantlâk makna sik der ruh. Rathla’n chu amadu, tâk taksa chu katlasama kae,” ati.
39Ama ave nôk a kasea ahri mama kha avader nôk a kae. 40Khava sōa asonlehei hneng hong inle nôk a anleikaje kha avahmu hei; anhmit leimahlângtor mak heia kae. Khana ahnenga heimo hri sik leimanhret mak hei.
41Vōithum tlukna ahong inle pha ama’n anhnenga ati, “Nangni tûn katlung alakaje cheia châm ala’nhnga chei mo? Katluk jo! Pha kha kahong jo! Enruh, mihring Sapa kha mikaset-hei ratha neina shunga inpek sōt jo. 42Thōi ruh, eini se jo rih. Enruh, anikapek sōt sikpa kha hin ka-om jo!”
Jesu Antasur
(Mt 26.47–56; Lk 22.47–53; Jn 18.3–12)
43Jesu’n khanga ṭong ahrilai, 12 hei kâra Judas kha hong katlung jo. Ama leh inṭhōia mipuihei kha chemjâm leh sung inthōa thempu kalenhei leh Dân ojahei khana upahe’n anhongtir jo hei. 44Akapek sōtpa khan mipuihei kha mêrchîkna inkhat apek hei: “Ke’n akabeng kamajôp sikpa kha nanta madupa kha kae. Sur ruh khana hrung kaṭha inna keisōt ruh.”
45Judas aheitlung lim leh Jesu hneng kasea, “Oja,” atia avamajôp jo. 46Khana anmani’n Jesu ansur jo khana ankhit tlit jo. 47Tâk ahnenga kangir mi inkhat in achemjâm aradok a, Thempu Kalen sōkpa kōr atuk mathlâk pek jo. 48Khana Jesu kaṭongsōt a anhnenga ati, “Nangni dân kajuimak kasur sik kapōa chemjâm leh sung inthōa kei kasur akahong chei mo? 49Ani tina nangni leh ka-omsap mea Bek-inna kamanthei chei, kei aleisur mak chei. Tâk Ṭong intheng kha akatlung nger sik kae.”#Lk 19.47; 21.37
50Khava sōa sonlehei seng in andahlona katlânsōt jo hei.
51Pōn innem rōk kasi rether inkhat in Jesu kha aleijui. Anmani’n ama kha sur sik a anleirei, 52tâk ahruipōn kha adahlona arōksaia katlânsōt jo.
Jesu Sehmang-pachonghei Hma Antakei
(Mt 26.57–68; Lk 22.54–55,63–71; Jn 18.13–14,19–24)
53Khava sōa anmani’n Jesu kha Thempu Kalen inna ankei jo; khana khan thempu kalenhei seng leh upahei khana Dân ojahei le’ntûp hei. 54Peter in inkârjap a ahei jui, Thempu Kalen lâmte shunga leikahlut a kae. Khana khan ama akahrunghei leh le’n-ongsap heia hmei anlei ô-a kae. 55Thempu kalenhei leh a’ntûp upahei seng in Jesu that theina sik ajâr anjōnga kae, tâk inkhatbek hmumak hei. 56Jesu dōina maleisei sâkhi katamtak anhri, tâk ansâkhi thuhming inkhatbek le’ntōk mak a kae.
57Khava sōa mi ṭhahrep kangirsōt heia Jesu dōina hiva maleisei sâkhi hi anleipek: 58“Hiva mipa hin, ‘Hiva mihring tasak bek-inn hi ke’n kaṭhōt sik, khana ni 3 sōa mihring tasakmak inkhat ke’n kasak sik,’ ati kha keini’n kanthei.”#Jn 2.19 59Kha achang ravâng anmani kha’m anthuhming hri mantōktor mak heia kae.
60Thempu Kalen kha anhma kangirsōt a Jesu ṭong ader, “Anmani’n nang dōina sâkhi antapek hi masôn mak tin mo?”
61Tâk Jesu’n sip aleitia ṭong inkhatbek leihri mak. Avea Thempu Kalen khan ader nôk, “Nang hi vângṭhat kachen Pathen sapa Messiah che mo?”
62Jesu’n amasôn, “Kae eng, khana Mihring Sapa kha Akahratpen changting in-onga khana marvân sumtuk leh inṭhōia ajōng ṭum kha nankhenga nanhmu sik.”#Dn 7.13
63Thempu Kalen khan apōn akei hlera ahri, “Eini’n sâkhilak rangei mak jo me! 64Pathen ahmu masina nangni’n nanthei jo. Heimo nantamandon?”#Lev 24.16
Ankhenga ama hnōm mak jo hei: anmanṭhe jo khana akathi sik kae anti jo.
65Ṭhahrep in Jesu machithlōn anphut jo, ahmai ankatōmpek a anvōk jo, “Sânsōt roh! Tu mo nakavō,” anti. Khana akahrung he’n anṭhōisōt a angambe ankabena kae.
Peter in Jesu Manhret mak eng Ati
(Mt 26.69-75; Lk 22.56–62; Jn 18.15–18,25–27)
66Sumpuk hnōia lâmtea Peter in-onga aleiomlai, Thempu Kalen sōk nuhmeihei kâra inkhat anhnenga kahonga kae; 67sōknu khan Peter hmei a-o kha ahmu pha, kasang kanga a-enna ati, “Nang um Nazareth Jesu leh le’nṭhōi chei.”
68Tâk ama le’nphe phira ati, “Manhret mak eng, heimo nahrina manhret theimak eng.” Khana Ama kekot vângting kasōk jo. Khava phatak a khan ârkhōng hong kakhōng jo.
69Sōknu khan ama ahmu nôk a ahnenga akangir hei hneng khan ahri nôk, “Hiva mipa hi anmani kâra inkhat kae.” 70Tâk ama kha inpha phir nôk a kae.
Bongkhat sōa ahnenga akangir hei khan Peter themmô anpek nôk a, “Nang anmani kâra inkhat che kae ti hi nang inlepsōt tor mak tin che; ajârchu nang Galilee mi inkhat che kae,” anti.
71Khan chu Peter in ati, “Kei akadik kahri kae, inhâksêr eng! Akadik kahrimak inchu Pathen in akarâk rasoh! Ke’n nanta hri mipa hi manhret mak eng!”
72Khava laitak a khan vōi 2 tlukna ârkhōng kakhōng joa Peter in Jesu taleihri, “Ârkhōng vōi 2 akhōng mak hma nang in vōi 3 manhret mak eng nati sik kae,” aleiti kha amandonsōt jo. Khana ama malung kana tak a kaṭap joa kae.
انتخاب شده:
MARK 14: KOMRBSI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.
