MARK 12
12
Vomhrui Rahōn Kasânhei Tekâk
(Mt 21.33–46; Lk 20.9–19)
1Khava sōa Jesu’n anmani hneng tekâk a aleihri pek hei: “Pha khat a vomhrui kung kaling mi inkhat leika-om, arahōn kimve akhâr, vomhrui ep-maherna khur acho, khana rahōn hngâkna berte asyem. Khava sōa arahōn kha akathlōhei hneng asân jo khana a-inn adahlona khōhmea kase jo.#Is 5.1-2 2Akarâ lōk pha kha ahong tlung jo pha, ama’n asōk inkhat avomhrui rahōn kasânhei hneng hleisân kalo sik a aleitir. 3Rahōn kasânhei khan sōk kha ansura anvōk, heite pek loa antir male jo. 4Khava sōa hlei kapu khan sōk hlop inkhat atir nôk, rahōn kasânhei khan alu anleivōk-khôk pek a, inzakpui katluk a anleipek. 5Akapu khan sōk hlop inkhat atir nôk, anmani’n anleithat jo, khana alak katamtak he’m khang’khan anleitlo jo hei, loikhat anleivōk hei, loikhat anleithat jo hei. 6Tir sik a inkhat rōk aka-om khachu, asapa marittak kha kae. Achaina pena asapa kha hlei kasânhei hneng atir jo. Ama’n ati, “Kasapa hichu anmani’n anleikaja sik tia inngam eng.” 7Tâk khava rahōn kasânhei khan khat leh khat inbektō heia, ‘Ama hi rahōn kapupa sapa kae, hong ruh, that rih, khana akarōi hei hi nita kachang sik jo!’ anti. 8Khava jâra anmani’n sapa kha ansura, anthat jo, khana akalōng kha rahōn vângting anhlonsōt jo.
9“Kha achang inchu rahōn kapupa khan heimo atlo sik jo?” tia Jesu’n ader hei. “Ama kahong sik a kha rahōn kasânhei kha athat sik hei khana rahōn kha mihlop hneng amansân sik jo hei. 10Kadiktak a hiva ṭong intheng hi nanleitei sik jo:#Hl 118.22-23
‘Inn kasak he’n ṭhamak tia antahlonsōt jo hlung kha,
ankâra apui karônpen kachang jo.
11Hivahi Rōngpu tatlo kae;
Hmit-hmua heituk a a’nlak jo mo!’”
12Jehudi hlamkakeihei khan Jesu sur sik a le’ntluk hei, ajârchu ama tekâk leitlo hei kha anmani kadōia ahri kae tia anmanhret. Tâk mipuihei kha anṭit hei jâra andahlona kase jo hei.
Ramsêrṭhei Pek Chungchânga Ṭongder
(Mt 22.15-22; Lk 20.20–26)
13Ṭongderna vânga ama surtheina sik, Pharisee ṭhahrep leh Herod mi ṭhahrep Jesu hnenga anleitir hei. 14Anmani ahnenga kahong heia ander, “Oja, nang in mihei mandonna heite khôk sakloa akadik nahri ti hi kanmanhret. Nang in tûte hmai enmak che, tâk mihei sik a Pathen lungdo kha kadik a namanthei hei. Khana Roman Rengkalen Caesar hnenga ramsêrṭhei pek sik hi nidân kadōi mo kae? Nipek sik mo? Nipek mak sik mo?”
15Tâk Jesu’n anmani inhlemsak kha amanhret a amasôn hei, “Heisa mo nanta-enmansin eng? dangka sêr inkhat kha heichoi ruh, enrong.”
16Anmani’n sêr inkhat anheichoi, ama’n ader hei, “Tu lim leh tu rahming mo a’nzet hei hi?”.
“Rengkalen Caesar ta kae,” tia anmasôn.
17Jesu’n anhnenga, “Caesar ta kha Caesar pek ruh, khana Pathen ta kha Pathen pek ruh,” ati.
Khana anmani’n Jesu chunga andet-hla hêr joa kae.
Thia Inphut Thōi nôk Chungchânga Ṭongder
(Mt 22.23–33; Lk 20.27–40)
18Khava sōa Sadducee ṭhahrep, mihring hi thia inphut thōi nôk mak ning kati loihei, Jesu hneng kahong hei khana anti,#Ṭōn 23.8 19“Oja, Moses’n hiva dân hi keini sik a aleimazet: ‘Mi inkhat athia sa neiloa anuhmei adahlon jo’nchu, asōpuipa khan renghmeinu kha a-ompui nger sik, ajârchu anmani 2 tamatet sahei kha akathipa sahei kae tia a’nlo theina sik a kae.#Dân 25.5 20Pha khat a sōpui unai 7 leika-om hei; upapenpa khan nuhmei anei jo, khana sa neiloa kathi jo. 21Khava sōa 2 tluknapa khan anuhmei kha a-ompui jo, ama kha’m sa neiloa kathi nôk jo, khana 3 tluknapa kha’m khang tlit a kathi jo; 22khana alak-hei seng kha’m khanga kati jo hei: unai 7 hei khan nuhmeinu kha an-ompui et khana sa neiloa kathipet jo hei. Khava sōa hnung kakhôrpena nuhmeinu kha’m kathi jo. 23Tûnchu, thōi nôk ning mihei anthōisōt pha khan amanu kha tupen nuhmei mo akachang sik jo? Anmani 7 he’n ankhenga anta leiompui et kae.”
24Jesu’n amasôn hei, “Heituk a nantaṭhe jo mo! Khana heijâra mo ti hi nanmanhret mo? Hivahi nangni’n ṭong intheng leh Pathen rathahrat kha nanmanhret mak jâra kae. 25Ajârchu akathihei khan anthōisōt pha, anmani marvâna ngevahei ka-ang sik jo hei, lu hôngmak jo hei ning. 26Tûnchu, akathi akathōisōt hei sik a: nangni’n Moses lekharabu thing bur hmeikâng ṭong inzet kha teiphung mak chei mo? Khava khan hinga inzet ti chu Pathen in Moses hneng, ‘Kei Abraham Pathen, Isaac Pathen, khana Jacob Pathen eng kae,’ ati.#Sōk 3.6 27Ama akahring hei Pathen kae, akathihei Pathen changmak. Nangni pui katluk a nanṭhe jo.”
Ṭongpek Kalen
(Mt 22.34–40; Lk 10.25–28)
28Anmani inkhena kha akathei dân oja inkhat khana khan leika-om. Jesu’n Sadduceehei kaṭhatak a amasôn hei kha ama’n aleihmu, khava jâra ahnenga kahonga ṭong inkhat ader, “Ṭongpek kâra khō kha mo akakhôk pen?”
29Jesu’n amasôn, “Akakhôk pen khachu hi kae: ‘Israel rangei roh! Rōngpu ni-Pathen hi Rōngpu inkhat rōk kha kae. 30Rōngpu ni-Pathen kha namalung, narathla, namandonna, khana naratha hratna akhenga vâng lungset roh.’#Dân 6.4,5 31Khana 2 tlukna akakhôk pen ṭongpek khachu hi kae: ‘Nang nabinga na’nlungset kapōa nakhō naven lungset roh.’ Hiva 2 hei kanek a ṭongpek kalen ralak om mak.”#Lev 19.18
32Dân oja khan Jesu hneng ati, “Kaṭhadek a nahri jo, Oja! Nang in nahri kapōa, akadik kae, ti chu Rōngpu rōk kha Pathen kae khana ama teilo Pathen alak om mak.#Dân 4.35 33Khana namalung, namandonna, khana naratha hratna akhenga Pathen nalungset sik, khana nabinga a’nlungset che kapōa nakhō naven nalungset sik kae tina hin ranhring inthoina leh ro mankhutna kanek a akarôn pen kae.”#Ho 6.6
34 #
Lk 10.25-28
Kasing tak a amasôna kha Jesu’n ahmu, khana ahnenga ahri pek, “Nang Pathen Rengram a inphut inhlamak jo che.”
Khava sōa chu tûte’n Jesu hneng ṭong der ngammak jo hei.
Messiah Chungchânga Ṭongder
(Mt 22.41–46; Lk 20.41–44)
35Jesu’n Bek-inn shunga amanthei lai hei, ṭong ader hei, “Dân oja he’n, huksōtpa Messiah kha David sōn akae sik tia heikhong mo antati tor? 36David kha Rathla Intheng in amathok a amanhri:#Hl 110.1
“Rōngpu khan ka-Rōngpu hneng ati:
Na’ndōipui hei nakethōia kadamak kârseng,
Kachangting hin in-ong roh.”
37David khet in ama kha ‘Rōngpu’ ati; kha achang inchu heikhong mo huksōtpa Messiah kha David sōn akachang thei sik?”
Jesu’n Dân Ojahei kadōia Ahri
(Mt 23.1–36; Lk 20.45–47)
Mipui katamtak in Jesu ṭonghri kha kahōia anleirangei. 38Khanga amanthei lai hei anhnenga ati, “Dân oja heia inphut insing thei ruh, zakkō inse sipuma akalôn hnōm hei, khana jōrna tetlânga kajana chibei antatlo sik a indu hei, 39khana intûpna inna leh revei hmun a in-ongna kalûrpen indei hei. 40Anmani’n renghmeinu heia inphut hnemna anjong khana innshung neinâk-hei anchom pek hei, mi tahmu sik a kasôt tatak a derna anneia kae. Anmani karâkna kha heirakip a akakhôkdet kachang sik!”
Renghmeinu Sêrtōk
(Lk 21.1–4)
41Jesu kha Bek-inna sêr manbukna hmatak a a’n-onglai, mihei sêrtōk mathlâk kha alei-enlea kae. Mikahao katamtak he’n sêr hingjaja anmathlâk a kae; 42khava sōa sara renghmei inkhat kahonga, khana sum-êng makhai 2, cheng khat leh in-ang, avamathlâk. 43Jesu’n asonle abek mantûp heia khana anhnenga ahri, “Ke’n kahri pek chei kae, hiva sara renghmeinu hin milak-hei kanek a sêrtōkna thingbôm shunga akatampen amathlâk. 44Ajârchu alak-hei seng in anneia inphut antaṭhensōt a antatōk kae, tâk amanu hin asara changa aneiseng, ahringna sik a amanbuk rakip kha apek kae.”
انتخاب شده:
MARK 12: KOMRBSI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.
