MARK 10
10
Jesu’n Sanghram Inṭhen Chungchânga Amanthei
(Mt 19.1–12; Lk 16.18)
1Khava sōa Jesu’n khava hmun kha adahlon jo, Judea ramting kase jo, khana Jordan tuidung arakan jo. Mipuihei ahnenga hong intûp nôk jo hei, ama’n angaia atlori kapōa anmani aleimanthei hei.
2Pharisee ṭhahrep ahnenga kahong hei khana anchâng kam a man-ôkna sik anleimantluk. Ahnenga ander, “Mi inkhat in anuhmei ada sik hi nidân in aphe mo, amanthei roh?”
3Jesu’n ṭongder leh inṭhōia amasôn hei, “Moses’n heikhong khova dân mo apek chei?”
4Anmani ṭong masôn chu, “Pase inkhat in inṭhenna lekha inkhat amazet a anuhmei kha a’nṭhen puina sik Moses’n ṭong aleipek.”#Dân 24.1-4; Mt 5.31
5Jesu’n anmani hneng ahri, “Nangni hi manse nan-intakrei jâra hiva dân hi Moses’n aleimazetpek chei kae. 6Tâk anphutbia syem manphut-lai khan chu, ṭong intheng in ahri kapōa, ‘Pathen in pase inkhat leh nuhmei inkhat asyem.#Aph 1.27; 5.2 7Khava jâra khan pase’n anu leh apa adahlona, anuhmei leh a’nchun sik hei kae,#Aph 2.24 8khana 2 hei kha inkhat akachang sik hei kae.’ Khava jâra anmani kha 2 changmak jo hei, inkhat rōk kachang jo hei. 9Khan chu Pathen tamanchun jo hei kha mihring tûte inkhat in ṭhenmak hei rasoh.”
10Anmani innshunga an-inle pha, sonle he’n Jesu hneng khava ṭong chungchânga anleider. 11Jesu’n anhnenga ahri pek hei, “Anuhmei kada a nuhmei lak ka-ompui mipa khan anuhmei kadōia akajông kae.#Mt 5.32; 1 Cor 7.10-11 12Kha leh in-angtlinga apuise kada a pase-lak ka-ompui minu kha’m apuise kadōia akajông kae.”
Jesu’n Naipanghei Mahâmṭhat Apek hei
(Mt 19.13–15; Lk 18.15–27)
13Mi ṭhahrep in naipanghei kha anchunga Jesu’n akut ada pekna sik hei ahnenga anheiṭhōi hei, tâk sonlehei khan mihei kha anleirasei hei. 14Jesu’n kha amanhret pha, ahnuk kana a, asonlehei hneng ati, “Naipanghei kha kahnenga heimanhong hei ruh, khâm mak hei ruh, ajârchu Pathen Rengram kha anmani kapō hei ta kae. 15Ke’n kadiktak a kahri pek chei kae tu achang inum Pathen Rengram kha hiva naipang inkhat kapōa a’nhlângmak mi kha khana khan hlut hêrmak ning.”#Mt 18.3 16Khava sōa Jesu’n naipanghei kha akakō heia, anmani inkha-khat chunga akut ada a, mahâmṭhat aleipek heia kae.
Mikahaopa
(Mt 19.16–30; Lk 18.18–30)
17Jesu’n ahlam hro aphut nôk pha, mi inkhat hong katlâna ahmai kunga hong-inkuna, ahnenga ader, “Akaṭha Oja, kumsôt hringna kachen theina sik ke’n heimo katlo nger sik?”
18Jesu’n ahnenga ader, “Heisa mo akaṭha nati eng? Pathen tei loa akaṭha tûte om mak. 19Nang in Ṭongpek kha namanhret: Mi that mak roh; jông mak roh; inru mak roh; dikmak a mi maher mak roh; mi hōnmak roh; nanu napa kaja roh.”#Sōk 20.13; Dân 5.17; Sōk 20.14; Dân 5.18; Sōk 20.15; Dân 5.19; Sōk 20.16; Dân 5.20; Sōk 20.12; Dân 5.16
20Mipa khan amasôn, “Oja, hiva ṭongpek senghei hichu kasinlaia inphut kahei jui jo hei kae.”
21Jesu’n ama lungset pum a a-en kanga, ahnenga ati, “Nang napui tlukmakna inkhat rōk ka-om. Se roh, nanei rakip vajōr roh, khana sara khōdeng katheihei pek hei roh, khana nang in marvâna karōi nanei sik; khava sōa hong ina kakahnung ajui roh.” 22Mipa khan hivahi athei pha, ahmaisō kamōk jo, malung inrima kasesōt jo, ajârchu ama hi mikahaotak kae.
23Jesu’n asonlehei a-en manve bit heia anhnenga ati, “Mikahaohei Pathen Rengram hlut sik hi heituk-hrep a a’ntak jo mo!”
24Sonlehei kha khava ṭong khan anmalung atôn jo, tâk Jesu’n ahri manjōm a, “Kasa kanai hei, Pathen Rengram hlut sik hi heituk-hrep a’ntak jo mo! 25Ṭimphōi kōr a sharîngsei ahlut sik kanek a mikahao inkhat Pathen Rengram hlut sik kha intakdet a kae,” ati.
26Ṭong kha anthei pha sonle he’n andet-hla hêr jo khana khat leh khat indertō hei, “Khan chu tu hmen a’nhuk tor sik?” anti.
27Jesu’n anmani a-enkang heia amasôn hei, “Hivahi mihring sik a chu e-tor mak, tâk Pathen sik a chu akaehla om mak; Pathen sik a chu heirakip kaethei.”
28Khava sōa Peter in ahong hri, “Enroh, keini’n heirakip kandahlona nakahnung kanjuia kae.”
29Jesu’n anhnenga ati, “Kadik, khana ke’n hi kahri pek chei kae, kei sik a leh ṭong kaṭha sik jâra a-inn, asōpui, anu-apa, asa-anai khana ahlei abe kadahlon mi kha, 30tuna khanga hin kakhe chet a arahlâng sik. Ama’n araja kakhea inn, sōpui, sêr leh sa, nu leh pa, sha leh hleihei achen sik, khana suk manrim na’m ahmu sik; khana akahong sik khanga ama’n kumsôt hringna kha achen sik a kae. 31Tâk tuna hmakakei katamtak hnung ankhôr sik, khana tûna hnung kakhôr katamtak hma ankei sik.”#Mt 20.16; Lk 13.30
Jesu’n Athi sik ṭong Vōi 3 tlukna Ahri
(Mt 20.17–19; Lk 18.31–34)
32Tûn Jesu leh asonlehei Jerusalem kajōna hlamtunga kase jo hei. Jesu’n asonlehei, lung dongna akasip jo hei kha avakhe heia anhmating asonga leikase; khana akahnung kajui mihei kha kaṭi jo hei. Vōi khat nôk Jesu’n asonle 12 hei kha hmunhlop a aṭhōi hei, khana achunga ahong kasōk sik omchen aleimanthei hei. 33“Rangei ruh, eini Jerusalem kajōna kase sik me; sova hmun a Mihring Sapa kha thempu kalenhei leh Dân ojahei kut chunga inpek sōt sik. Anmani’n thatna sik a anmaset sik, khana Jât-hlop hei kut chunga anpek sōt sik, 34anmanuisō sik, anmachi thlōn sik, khana anvōk sik, khana antathat sik kae; tâk ni 3 sō leh kahringa akathōisōt sik kae.”
James leh John Ngekna
(Mt 20.20–28)
35Khava sōa Zebedi sahei James leh John Jesu hneng kahong hei. Anmani’n anti, “Oja, keini sik natlopek sik unga kantamadu ṭhahrep ka-om jo.”
36“Chuvachu heimo kae?” Jesu’n ader hei.
37Anmasôna, “Narengram kalûra khan nareng in-ongna chunga na’n-ong pha, keini inkhat nachangting inkhat naveiting na’n-ong pui sik unga kanmadu,” anti.
38Jesu’n anhneng ati, “Nangni’n nantader kha heimo kae manhret mak chei. Ke’n ka-in nger sik inrengna kōklei kha nanta intor sik mo? Kei tuihlut nger sik kapōa nangni akahlut tor sik chei mo?”#Lk 12.50
39“Kantor sik,” tia anmasôn.
Jesu’n anhnenga ati, “Nangni’n kei ta-in nger sik kōklei kha nan-in sik khana katuihlut nger sik kapōa kahlut sik chei. 40Tâk kachangting leh kaveitinga a’n-ong sik kadeina ratha khachu ke’n neimak eng. Amantluk pek hei hnenga khava hmun kapek sik khachu Pathen kae.”
41Alak sonle 10 hei khan khava ṭong kha anthei pha, James leh John chunga khan anhnuk kana jo. 42Achang jâra Jesu’n ankhenga ahnenga abek heia ahri, “Jât-hlop vaikarôn ung kati hei khan anmihei chunga ratha annei, khana hlamkakeihei khan pui katluk ratha annei.#Lk 22.25-26 43Achang ravâng nangni kâra chu kha changmak. Nankâra inkhat in akalen achanghnōm inchu, alakseng hei sōk akachang sik kae;#Mt 23.11; Mk 9.35; Lk 22.26 44khana nankâra inkhat in hma kakeipen achanghnōm inchu, mi rakip sōk akachang sik kae. 45Ajârchu Mihring Sapa kha hmen razen sik a akajōng changmak; a’njen sik leh mi katamtak hei katlensōtna sik ahringkhō kapek a akajōng kae.”
Jesu’n Hmitkacho Bartimaeus Amandam
(Mt 20.29–34; Lk 18.35–43)
46Anmani Jerichoa kahong jo hei; khana Jesu’n asonlehei leh mipuihei leh inṭhōia anselai, Timaeus sapa Bartimaeus, hmitkacho, sâk kader kha hlampanga le’n onga kae. 47Ama’n khavakha Nazareth Jesu kae tia athei pha, ama ka-ông inphut jo, “Jesu! David Sapa! Alungset roh!” ati.
48Mi katamtak in anrasei, sip atina sik anmanthei. Tâk ama’n inhnakchet a a-ôna, “David Sapa, alungset roh!” ati.
49Jesu kangira, “Heibe ruh,” ati.
Khava jâra anmani’n hmitkachopa kha anheibek. “Inpâk roh! Inding roh, ama’n abek che,” antipek.
50Ama’n apōn ahlon sōt a he’nthok a Jesu hneng kahong jo.
51“Nang sik a heimo namantlo hnōm eng?” Jesu’n ader.
Hmitkachopa khan amasôn, “Oja, hmit hmu nôk sik kamadu.”
52Jesu’n ahnenga, “Se jo roh, nataksen in amandam jo che,” atipek.
Khavatak a khan ama’n khō ahmu thei jo khana hlam a khan Jesu kahnung ajui jo.
انتخاب شده:
MARK 10: KOMRBSI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.
