MARK 1
1
Tui Inhlutpa John Ṭonghrile
(Mt 3.1–12; Lk 3.1–8; Jn 1.19–28)
1Hivahi Pathen Sapa Jesu Christa chungchânga Ṭong kaṭha kha kae. 2Sânkathem Isaiah lekha leimazet kapōa hing’hin inphut:#Mal 3.1
“Pathen in ati, ‘Nahlam inthengsōt sik a kaṭong karôn nahma a katir sik.’
3Nêrdiram a tu mo inkhat ka-ônga,#Is 40.3
‘Rōngpu sik a hlamlen mantluk ruh,
ahlam hro sik syem mantlun ruh,’” ati!
4Khava jâra Tui Inhlutpa John kha nêrdiram a kahonga, tui amanhlut hei khana Pathen ṭong ahrilea kae. “Nansetna inphut hong inhe ruh khana tui hlut ruh khan chu Pathen in nansetnahei arangei mandam sik chei,” tia mipui aleimanthei hei. 5Judea ramṭhen leh Jerusalem khōpuia mi katamtak he’n John ṭong inngei sik a leikasōk hei. Ansetnahei anleiphôngsōt, khana Jordan Tuidunga tui amanhlut heia kae.
6John in Sharîngsei sahme pōn a’nsia, shavun khōnkir vâng akhōn a’nkir, athlai sâkchu khōihning leh khâihei kae.#2 Rn 1.8 7Mipuihei hneng aphông, “Kei kahnunga akahong ama kha kei kanek a kalen hêr. A’nkun enga akekōk hrui kasôt sik kapha karahōi sōk mak. 8Ke’n nangni tuia kamanhlut chei, tâk ama’n chu Rathla Inthenga amanhlut sik chei.”
Jesu Tui hlutna leh Mathlemna
(Mt 3.13—4.11; Lk 3.21–22; 4.1–13)
9Khava kahnunga sôt lo jen a Galilee ramṭhen a Nazareth khōa inphut Jesu kahonga John in Jordan tuidunga tui aleimanhlut jo. 10Jesu’n tuia inphut ahei sōk lim leh marvân inhlânga khana vaṭhu kapō Rathla achunga ajōng kachu kha ama’n aleihmua kae. 11Khana marvâna inphut rasa inkhat in, “Nang kasapa marittak che kae, nachunga kamalung katlai,” ajōng ti.#Aph 22.2; Hl 2.7; Is 42.1; Mt 3.17; 12.18; Mk 9.7; Lk 3.22
12Khavatak a, Rathla khan ama nêrdiram a inrangtak a aleimansesōt jo, 13khana khan ni 40 ka-oma, Seitan in aleimathlema kae. Ramsha he’m khana khan ka-om hei tâk marvân ngevahei kahong heia ama anlei inthōpuia kae.
Jesu’n Nga kasur 4 Abek hei
(Mt 4.12–22; Lk 4.14–15; 5.1–11)
14John ansura kurkhum a ankhum jo kahnunga, Jesu kha Galileea leikasea khana Pathena inphut ṭong kaṭha aleihrile. 15Ama’n, “Aphatak kha katluk jo khana Pathen Rengram kha kahnai jo! Nansetna inphut inhe una Ṭong kaṭha hi taksen ruh,” ati.#Mt 3.2
16Galilee dîr panga Jesu alônlai Simon leh anaipa Andrew, nga kasur 2 hei, len vâng nga antasur kha aleihmu heia kae. 17Jesu’n anhnenga ati, “Kei ajui ruh, ke’n mi surje kamanthei sik chei.” 18Khava laitak a khan anmani’n anlenhei andahlona anjui jo.
19Ama’n ajing kahladet a ase pha unai 2 hei, Zebedi sa James leh anaipa John aleihmu hei. Anmani anrakōng shunga anlen anleimantluk a kae. 20Jesu’n ahmulim hei leh abek jo hei; anpa Zebedi leh anmi marōi hei kha rakōnga andahlon heia Jesu anjui jo.
Rathla Kaṭhamak Kahlut Mi Inkhat
(Lk 4.31–37)
21Jesu leh asonlehei Capernaum khōpuia kahong hei, khana anôk a Châmhngat kania Jesu’n Jehudihei intûpna innpuia leikase khana mantheina aleiphut a kae. 22Ami manthei dân kha akathei mipuihei khan anleidet-hla, ajârchu ama kha Dân ojahei kapō kha leichang mak a kae; khahei kanek a ratha kaneitak a aleimanthei hei.#Mt 7.28-29
23Khava sō lim leh intûpna innpui shunga khan rathla kaṭhamak kahlut mi inkhat hongkahlut a ka-ônga, 24“Nazareth Jesu, keini heimo namanlo hnōm ung? Kankasuk inhmang sik a hin akahong che mo? Nang tu nachang kamanhret che, nang Pathena inphut a’ntheng ṭongkarôn inkhat che kae!” aleiti.
25Jesu’n rathla kadikmak kha ṭong apek a, “Sip ti roh, khava mipa a inphut heisōk roh!” ati.
26Rathla kaṭhamak khan mipa kha akanok manhnak a, rasa inhnaktak a ka-ônga kasōk jo. 27Mipuihei khan andet-hla et a khat leh khat indertō hei, “Hivahi heijo mo? Hivahi mantheina ther ṭhahrep jo mo? Hiva mipa hin rathla kaṭhamak-hei hneng ṭongpekna ratha anei, khana anmani’n aṭong anjuia kae!” anti.
28Khang’khan inrangtak a Galilee ramṭhen hmuntina Jesu chungchânga ṭong inthangsō jo.
Jesu’n Mi katamtak Amandam
(Mt 8.14–17; Lk 4.38–41)
29Jesu leh asonlehei, James leh John inveina, intûpna innpui kha andahlona Simon leh Andreu inna intlunhrek a leikase hei. 30Simon terpi kha hritluna kana a jekhuma leikaje, khana Jesu kha ajōng tlunglim leh amanu chungchânga anleihri pek. 31Ama’n amanu hneng leikasea, akut amatua, akei mathōa kae. Ahritlun khan amasō jo, khana amanu’n anmani razenna aleiphut jo.
32Khana kani ahongtlâk joa, khōhlei ahongtluk jo pha, mihe’n akadam mak hei seng leh ṭai karôn rakip Jesu hnenga anheiṭhōi hei. 33Khōpuia mi rakip innpuia khan ho’ntûp jo hei. 34Jesu’n nat hlop-hlop a akana rakip mi katamtak amandam hei khana ṭai katamtak ahnong sōt hei. Ṭaihei khan heikhat anṭong sik kha phepek mak hei, ajârchu ama tu mo ti kha anmani’n anmanhret a kae.
Jesu’n Galileea ṭong Ahrile
(Lk 4.42–44)
35Abâna jîngkâr hmatak, khōvâr hma Jesu kathōia inn kha adahlon jo. Khōpuia inphut kasōksōt a adai hngerna hmun khat a derna aleinei. 36Tâk Simon leh a’nthōipui hei seng khan kasōksōt heia ama kha anleijong, 37khana ama anhmusōt pha, ahnenga, “Mi rakip in nang anjong che,” anti.
38Tâk Jesu’n amasôn hei, “Hiva kimvea aka-om khōheia eini akase nger sik me kae. Sohei hnenga’m ṭong kahri sik kae, ajârchu hiva sik a kei akajōng eng kae.”
39Khava jâra Galilee ram rakip a kaselea an-intûpna innpui heia ṭong ahrilea ṭaihei ahnong sōt heia kae.#Mt 4.23; 9.35
Jesu’n Mi Inkhat Amandam
(Mt 8.1–4; Lk 5.12–16)
40Vunnat inhnak karôn mi inkhat Jesu hneng kahong, inkuna, inthōpuina sik aleider. “Nang in namadu’n chu namantheng tor eng,” ati.
41Jesu’n alungsetna kasip a, akut azera asit, “Ke’num kamadu, intheng roh,” tia amasôn. 42Khava phatak a nat khan ama kha amasō jo, khana ama intheng jo. 43Jesu’n ahnenga inhnaktak a ṭong ahri pek a aleitir loi jo, 44hinga ahnenga ahrisōa, “Rangei roh, hivahi tûte hneng hrimak roh. Tâk thempu hneng vasehrek roh khana ama’n enmanchên che rasoh; khana natak dam kha mi rakip hneng malârna sik a Moses ṭongpek dungjuia inthoina kha vatlo roh.”#Lev 14.1-32
45Tâk mipa kha kasesōt a khava ṭong kha hmun rakip a ahri manthang joa kae. Takbak a, ama’n ahrile jo jâra Jesu kha khōpui inkhat a inlârtak a vase tor mak joa kae. Khava kanek a, hmun kadaineng heia kasea vaka-om jo, khana hmuntina mihei khan ahnenga kahong heia kae.
انتخاب شده:
MARK 1: KOMRBSI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.
