wandījo 9
9
Mulungu kūbeeja Ilagane na Noa
1Hūna ū Mulungu ūmfuuha ū Noa na a bitūnja bakwe; ūbawīla gīkī, “Ibyalagi mukwīle muyokaje ī sī.” 2Pyī ī shiinū ja mu sī nī noni ja higūlya, nī ja kwigweesa ha sī, nī ndīlo; jikūng'ogoha na kūdetema. Jose pye jatūūlagwa mu makono ging'we. 3Būlī shiseeng'wa shipanga īsho ng'anda ng'anda, shikūbiza shilīwa shing'we. Ūmo nakang'winhīla sha kūzwa shose, nī haha nang'winha pyī ī shose. 4Alīyo ī nyama yaya ū kwīlya na mininga gayo, nguno ū wenūbo būpanga wayo. 5Ī mihayo ya mininga ga banhū kwitwa ū mu bing'we, ībize ya kwenhelejiwa na shiinū ījo jikabūlagaga banhū, nūūlū ya kwītwa na banhū a babūlagi ba bichaabo, nakwīdīlīla nene. Munhū ose ose ūlū ūkenaagūla būpanga bo ng'wiye, nene ng'wenekīlī nakūntonda afunye būsomboji kūlwa mhayo gwenūyo. 6Ose ose ūyo wita mininga ga munhū, nang'hwe a mininga gakwe gakwitwa na munhū; nguno ū Mulungu akameeja ū munhū mu suso ya ng'wa Mulungu. 7Alīyo a bing'we ibyalagi gete, mukwīle no no no; ng'okale ū mu sī mubize bingī mo. 8Ū Mulungu ūng'wīla ū Noa na a bitūnja bakwe gīkī, 9“Ī haha nalībeeja ilagane ha gatī yane na a bing'we, hamò nī shibyalīlwe shing'we īsho shikwiza ha numa ying'we; 10pye nī shiseeng'wa shipanga īsho shilī hamò ning'we, noni, ndimu, shiinū; ī shose īsho ng'wafumile nasho mu ngalaba; pyī ī shiseeng'wa shipanga īsho shilī mu sī. 11Ī lilagane lyane īlo nalībeeja ning'we nalīlyīta lībize lya kūshinga ho, Gūtaliigela hangī gwa kūyagaja būpanga bose mu nzīla y'ihūūma lya minzī; lītalabiza ho hangī ihūūma lya kwīkenaagūla ī sī.” 12Hūna ū Mulungu ūhaya gīkī, “Ūlū h'ū lūmeng'ho lw'ilagane īlo nalībeeja ha gatī yane na a bing'we, nī shiseeng'wa pyī īsho shilī hamò ning'we; īlo līkūbiza kūlwa shibyalīlwe shose ū mu shikū ījo jiliza. 13Naatūūlaga ità lya baashi lyane ū mu malunde, īlo līkūbiza lūmeng'ho lw'ilagane ha gatī yane nī sī. 14Būl'ikanza ūlū nūyenhela ī sī malunde ga mbula, hūna lichaamīka ità lya baashi ū mu malunde, 15nakūlizūkwa ī lilagane lyane a ha gatī yane na a bing'we, nī shiseeng'wa shipanga sha būlī mbika. A minzī gatīko kūshika mu mbika y'ihūūma lya kūkenaagūla shose pyī ī sha mibīlī. 16Būl'ikanza ūlū lichaamīka ità lya bashi ū mu malunde, nakūlībona nalizūkwe ī lilagane lya welelo bose, īlo līlīho ha gatī ya ng'wa Mulungu na shiseeng'wa shose sha būlī mbika.” 17Ū Mulungu ūng'wīla ū Noa gīkī, “Ū lwenūlū hū lūmeng'ho lw'ilagane īlo nabeejaga ha gatī yane na a bose a ba mibīlī abo balī mu sī.”
Bitūnja ba ng'wa Noa
18A bitūnja ba ng'wa Noa abo bakafuma ū mu ngalaba baalī ba Shemu, Hamu na Yafeti. (Ū Hamu walī ise wa ng'wa Kanaani). 19A benaba h'a bitūnja ba ng'wa Noa, abo kūfuma mubo bakigela banhū ba kūsambaala hose pyī ū mu sī. 20Ali lūūlū īkī ū Noa walī nīmi, akalīma ngūnda ūgūhamba mizabibu. 21Lūshikū lūmò aho wang'wa divai ya mu ngūnda gwakwe ūleewa, ūkalaala ng'wiheema lyakwe alī dūūhū. 22Ū Hamu, ū ise wa ng'wa Kanaani wībona ī minala ya dūūhū ya ng'wa ise, ūfuma hanze kūjūbawīla a baana ba ng'wawe būbīlī wabo. 23Hūna a boi, ū Shemu nū Yafeti, būsola nguto gwa ng'wenda, bagūbūūcha kū mabega gabo bagūgoloolile, būja nago shigongwa numa, būūkashika būnkudīkīja ū saabo ī minala ya dūūhū yakwe. Ū būshū wabo batikībūkile kū numa kūnola ū saabo aho alī dūūhū. 24Wa kanoga ūmisha nose ū Noa, nū būleewa būbiza bong'wīngaga. Aho wadeeba īyo akang'wītīla ū ng'wtūnja wakwe ū ndo, 25Ūhaya gīkī,
“N'azumagwe ū Kanaani!
Akūbiza nsese wa basese ū kū baana
ba ng'wawe.”
26Ūhaya na gīkī,
“Akumīlīijwe ū SEEBA,
ū Mulungu wa ng'wa Shemu!
Ū Kanaani abize nsese wa ng'wa Shemu.
27Ū Mulungu n'ayīgalīhyage ī sī ya
ng'wa Yafeti;
nīyo apandīke ha kwikala ū mu
maheema ga ng'wa Shemu.
Ū Kanaani abize nsese wakwe.”
28Kwīngīīla h'ikanza lya kūbīta ī lihūūma, ū Noa akikala ho myaka magana adatū na makūmi atanò (350), 29Ī myaka ya būlamu bo ng'wa Noa ī yose, yalī magana kenda na makūmi atanò (950), hūna ūcha.
اکنون انتخاب شده:
wandījo 9: SUKBI15
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Sukuma Bible © Bible Society of Tanzania, 2019.