Mateo 23
23
So Jesús ividaxattega na fariseopi qataq nam dapaxaguenataxaatapeguec nam nqataxacpi
(Marcos 12.38-40; Lucas 11.37-54; 20.45-47)
1Nachi so Jesús 'enapega na shiÿaxauapi qataq soua lapaxaguenataqa, 'eeta':
2–Nam dapaxaguenataxaatapeguec na nqataxacpi qataq nam fariseopi, namayipi qoÿanagui da nachina na i'axategue da llic na lqataxacpi so Moisés. 3Qaq ÿoqo'oyi qami' ÿataqta qaualaqailec qome namayipi, qataq qau'ochi 'enauac nam qami' ÿapaxaguenque. Qalaxayi sa ishit qome da qoquiigue da lataxac, cha'ayi namayipi da huo'o da 'enapec, qalaq sa ishit da i'ot. 4Cha'ayi namayipi icoñiyiñi na ñi'ac qapa'atta mayi sa ishit da huo'o ca ÿañoxot da ÿachi, nachi ÿachilec naq'en na shiÿaxauapi. Qalaxayi namayipi sa ishit da chochi 'oonole llaxaata aca ÿaconeu'a naq'en. 5Qaq 'enauac ne'ena i'ot, cha'ayi nshitaique da na shiÿaxauapi imeteetac namayipi. Cha'ayi namayipi nqopita da ÿachitalec na latap qataq da ÿaxattagui na lhuaq naua ñiyigui'shi l'aqtaqa ñi Dios, da qoÿittalec na logodaic hualoq laÿi, qataq da ÿataqta logodaiqa naq'en naua lauoxol naua lapo'te, saq 'en'am na laÿipi shiÿaxauapi. 6Qataq nqopita nam so'onqa' mayi ÿataqta ÿi'oxodaq da huo'o na nqui'axac, qataq nam so'onqa' mayi huo'o da lli'oxoyic nam laponaxaquipi na judiopi. 7Qataq nshitaique da qaiyaata da qaiquin da huangui na nqa'aic, qataq da qaÿamata'ac napaxaguenataxanaqpi.
8Qalaxayi qami' sa ishit qome da qami' ÿamata'aque napaxaguenataxanaxayi na shiÿaxauapi. Cha'ayi 'enauac da qoñiita qami' nqaÿañicpi, qaq 'oonolec na qanapaxaguenaxala'ai, mayi nachina na nta'a nca'alaxaqui. 9Qataq sa ishit qome da huo'o ca qauamachiÿa'ac qadta'ai ana 'alhua, cha'ayi 'oonolec ñi qadta'ai mayi neta'ague da piguem. 10Qataq sa ishit qome da qami' qaÿamata'aque da qami' nataxala'te, cha'ayi 'oonolec na qadataxala'ai, mayi nachina na nta'a nca'alaxaqui. 11Qaq cam huetapegue' na laÿipi, qaq nachica cam ÿataqta 'amaqtaqaic da qoñiita. 12Cha'ayi cam maichi n'amaqteetac, qaq nachica qome ca qaica ca l'amaqchic qanqoÿin. Cha'ayi cam sa n'amaqten, qaq nachica qome ca 'amaqtaq qanqoÿin.
13¡Ÿataqta choxodaxasodo' qami' mayi qauapaxaguenataxañiitapeguec na nqataxacpi qataq qami' fariseopi mayi qoñiitega da qami' 'eesoda! Cha'ayi qami' qauapoigui ñi lasom dam l'onataxanaxac ñi Dios mayi neta'ague da piguem, da yaqto' sa ishit da huo'o ca inoxoneuo. Qalaxayi qami' sa ishit da qaunoxoñiiuo, qataq sa ishit da qauashiñiim da inoxoneuo nam nshitaique da inoxoneuo.
14¡Ÿataqta choxodaxasodo' qami' mayi qauapaxaguenataxañiitac qataq qami' fariseopi mayi qoñiitega da qami' 'eesoda! Cha'ayi qami' ÿataqta qauqui'itaxachiite' naua lma'te ana pa'aipi, nachi qami' chochi qanqañoxochiÿoigui da qau'ochi da logodaic qanatamnaxaqui. Qaq ÿoqo'oyi qami' ÿataqta lta'adaic qome da qanhuaxanaguiiqui.
15¡Ÿataqta choxodaxasodo' qami' mayi qauapaxaguenataxañiitac qataq qami' fariseopi! Cha'ayi qami' ÿataqta qaumachiÿa ana 'alhua qataq aso auaxai, da yaqto' ca shiÿaxaua i'amaqten qanqashiñi da qad'amqajnataxanaxaqui. Qaq da qaushichi que'eca shiÿaxaua, nachi camayi ÿataqta qau'ochiic da ÿataqta ÿacteec da nhuaxanaguec qom qaÿasaxaña ca nhuaxanqa' na 'itaxaloxoicpi, qaq saq 'en'am qome da qoñiita.
16¡Ÿataqta choxodaxasodo' qami', nataxala'te qanamaiqa! Mayi qoñiita': “Da huo'o ca ÿan ca l'aqtac da iÿaxaatega ca nhuaxanaguec da chigaqaigui añi n'onaxanaxaqui, qalaq camayi ishit da sa ipaguelec. Qalaxayi da huo'otaq ÿan ca l'aqtac da iÿaxaatega ca nhuaxanaguec da chigaqaigui na oro mayi lalamaxatpi añi'añi n'onaxanaxaqui, qalaq camayi ÿataqta ipacchigui qome ca l'aqtac.” 17¡Qaq ÿataqta saqco' ca qauaÿajñiÿapec qataq qami' qanamaiqa! Cha'ayi ¿négue't ca ÿoqta ÿacteec da huo'o naq 'enec, peta'a ca oro, huo'otaq añi n'onaxanaxaqui mayi i'ot da sa qaishitapec que'eca oro? 18Nataq'en qami' qoñiita': “Da huo'o ca ÿan ca l'aqtac da iÿaxaatega ca nhuaxanaguec da chigaqlec añi nca'atoxonaxalate, qalaq camayi ishit da sa ipaguelec ca l'aqtac. Qalaxayi da huo'otaq ÿan ca l'aqtac da iÿaxaatega ca nhuaxanaguec da chigaqaigui cam huetalec aca'aca nca'atoxonaxalate, qalaq camayi ÿataqta ipacchigui qome ca l'aqtac.” 19¡Ÿataqta saqco' ca qauaÿajñiÿapec, qataq qami' qanamaiqa! Cha'ayi ¿négue't cam ÿoqta ÿacteec da huo'o naq 'enec, peta'a aca nachitaqtaxanaqte, huo'otaq añi nca'atoxonaxalate mayi i'ot da sa qaishitapec naq'en aca nachitaqtaxanaqte? 20Cha'ayi ca ÿanot ca l'aqtac aca nca'atoxonaxalate da yaqto' ipacchigui, qalaq camayi sa ishit da chaqacata aca nca'atoxonaxalate da ÿanot ca l'aqtac, cha'ayi nataq'en cam huetalec acamayi. 21Qataq cam ÿanot ca l'aqtac aca n'onaxanaxaqui, da yaqto' ipacchigui, qalaq camayi nataq'en sa ishit da chaqacata aca n'onaxanaxaqui da ÿanot ca l'aqtac, cha'ayi nataq'en ñim Dios mayi netaigui que'eca noÿic. 22Nataq'en cam iÿaxaatega ca nhuaxanaguec da chigoqo'ot na piguem da huo'otaq sa ishit da ipaguelec ca l'aqtac, camayi 'eeta'am da ÿanot da l'aqtac nam nso'onqa' ñi Dios, qataq ñim Dios mayi nso'ootalec.
23¡Ÿataqta choxodaxasodo' qami' mayi qauapaxaguenataxañiitac qataq qami' fariseopi mayi qoñiitega da qami' 'eesoda! Qami' qai'añiitacot ñi Dios añi 'oonole laue ana diez ana nalecnaxanaqte mayi l'enaxat menta, qataq anís, qataq ana comino, qalaxayi qami' sa ishit da qaualaqaileguete naua lapaxaguenataxanaxaco nam nqataxacpi mayi ÿoqta iue'n da qaÿalaxalguete, mayi 'eeta': da no'on nataxac, qataq da nchoxonnataxanaxac, qataq da npi'iÿaxac. Qaq 'enauáctaxa naua qau'ochi', qataq sa ishit da qan'onaxachiÿañi na laÿipi. 24¡Qami' mayi qami' nataxala'te qanamaiqa, qami' 'ico' qanapishiñiita ana chitole, qalaxayi 'eeta'am da qauoxoñiÿañi ana shiguiÿac l'enaxat camello!
25¡Ÿataqta choxodaxasodo' qami' mayi qauapaxaguenataxañiitac qataq qami' fariseopi mayi qoñiitega da qami' 'eesoda! Cha'ayi qami' ndoteec na pa'auec ana ÿomaxaqui qataq na nqui'axaqui da qauÿoitac, qalaxayi na pa'auo namayipi ÿataqta da'aichigui na qauachigoxochiÿaigui da qadcachaxaqui qataq da qadqopitaxanaqtaiqui. 26Qami' fariseopi qanamaicpi, qauamataxañiiñi qome da qauÿoi na pa'auo ana qanÿomaxaquii qataq naua qadqui'axaquilli', yaqto' qui'itta nataq'en na pa'auec.
27¡Ÿataqta choxodaxasodo' qami' mayi qauapaxaguenataxañiitac qataq qami' fariseopi mayi qoñiitega da qami' 'eesoda! Cha'ayi qami' qoñiita'am ana huachiqui mayi ndoteec na pa'auec da ÿapagaq qanqoÿin, qalaxayi na pa'auo ÿataqta da'aichigui na lpi'inec na leuaxaicpi qataq 'enauac nam qauemsat. 28Qaq 'eda da 'eetec da qoñiita: Da ndoteec na pa'auec 'eeta'am da no'on da imeteetac na shiÿaxauapi, qalaxayi na pa'auo ÿataqta da'aichigui da ñi'oxonnaxac qataq nam qauemsat.
29¡Ÿataqta choxodaxasodo' qami' mayi qauapaxaguenataxañiitac qataq qami' fariseopi mayi qoñiitega da qami' 'eesoda! Cha'ayi qami' qan'oxoñiitapiguishiguem ana nhuachiquipi som l'aqtaxanaxanecpi co'ollaxa ñi Dios, qataq qavi'oxoyiñiita nam coma'pi mayi l'anaxat som no'on shiÿaxauapi mayi hua'au. 30Ime, nachi qoñiita': “Da mashi qomi' huo'óictaxa se'eso na'a'q mayi huetaigui som hua'au qadta'alpi, nachi sa ishíttaxa da setauanaq somayipi da ÿalauat se'eso l'aqtaxanaxanecpi ñi Dios.” 31Qaq de'eda qoñiitec, damayi ichoxot da qami' maichi qami' llalaqpi som ÿalauat co'ollaxa som l'aqtaxanaxanecpi ñi Dios. 32¡Qaq no'on qome da qami' ÿataqta qaumachiita dam i'ot co'ollaxa som hua'au qadta'aipi!
33¡Qami' n'adaxanaqpi! ¡Qami' llalaqpi na n'adaxanaq! ¿Huá'ago' ca 'eetec da qami' ÿi't ca qanhuaxanaguiiqui da qami' qaÿasaxañalo ca nhuaxanqa' na 'itaxaloxoicpi? 34Qaq ÿoqo'oyi aÿim ñamaq qome ca i'aqtaxanaxanecpi qataq ca ÿajnaxanaxaicpi qataq ca napaxaguenataxanaqpi. Qalaxayi qami' qome huo'o na qaualauachi qataq qauaxañiiguet ca npe'enaxaqui, qataq huo'o qome na qauaxañiitac da huaigui ana qalaponaxaquiipi, qataq huo'o na qaucañiÿa'alo naua lÿa't puebloyi. 35Qaq ÿoqo'oyi qami' qome qami' qaipataxalguete da nalaataguec 'enauac som no'on da lataxac shiÿaxauapi mayi qaÿalauat co'ollaxa, chigoqchiguiña so Abel mayi no'on da lataxac, chochi ivitta'a qanqoÿin so Zacarías som llalec so Berequías mayi qaualauachi co'ollaq huaña yi netaña aso nca'atoxonaxalate mayi naloteuga so naponqa'. 36Qaq ÿataqta 'eesa de'eda qami' sa'axatema da 'enauac qome ne'ena nasouaxashitpi qaipataxalec qome qanqoÿin na shiÿaxauapi mayi huetaiguilo ne'enaua na'axa'te mayi souaqtaiguilo.
So Jesús noÿiilec so Jerusalén
(Lucas 13.34-35)
37¡'Am Jerusalén, 'am Jerusalén mayi 'aualauat co'ollaxa so n'aqtaxanaxanecpi qataq 'auasaq na coma' so 'am namaxapi co'ollaxa ñi Dios! ¡Aÿim ÿataqta qalota co'ollaxa da sauotaique da saqapaloigui na 'ai'alaqpi da shiita'am aca 'olgaxa da nqapal catai' llalaqpiolec, qalaxayi sa ishit da 'auashin! 38Qaq ña qauloÿa qome na qadmayi da huo'o ca na'a'q, qaq tojlec. 39Cha'ayi aÿim qami' shinapegalo da nachi tachiguiña nagui da aÿim sa qanauañi', to' qom ivita ca laloqo' da qami' qoñiita': “Ÿataqta no'on da lliquiaxac nam nactaigui da l'enaxat ñi qadataxala'.”
انتخاب شده:
Mateo 23: TBSNT
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.
