Matayo 7
7
Lifomu se lia bato basi
1Ofëke bato se lifela, mbo aɛ angɛnɛ otafomo se. 2Eoka ko la liataki elisoatak’aɛ loasɔ; aɛ angɛnɛ koatakomo imɔ la liao; la ikweelo esitokweel’ino la basi, ino bokweelomoko imɔ la shao. 3Monito ototichaka lofututi elole nda liso lia wina nde angolembeela bokangela ebole nda liso liaɛ angɛnɛ? 4¿Monito otoonga la wina laɛ mbo— Machaka’mi isokoleke lofututi nda liso liaɛ, ani aɛ angɛnɛ ole oko la bokangela nda liso liaɛ angɛnɛ? 5Aɛ bolimbakeli, taɔmɔlɔkɔ bokangela nda liso liaɛ; lamao aɛ kokɔkɔlɔ ɔɛnɛ sandelele ndɔɔmɔlɔ lofututi nda liso lia wina.
6Ofaefëke ebitanu ende ngwa, ɔwɛlɛ̈kɛ bieto ya loketi oso wa ndei,
Mbo ndei bitamatekela yao la batindi la mbo ngwa
bitakikwel’ino mbo bitaichak’ino bainyo.
Lisomboli
7Felaka, limɔ bitofomo ino; lukaka limɔ ino koosha eyetoluk’ino; titaka limɔ bome kolioelomo ino. 8Eoka boto la boto oyatofela, inde kɔɔlɔ; oyatoluka, inde koosha; end’inde oyatotita, wao koliolomo. 9¿Oni boto wanu oyasofelomo lituma ko la wana wande, atof’inde litalɛ? 10¿Ango ko eomba swi, sango kof’inde njɔ? 11Eokao, eyambo ino, bato abe oluwi ndofaefa bana banu bafi balau, nde simbi to Sango wanu oyayali nda Use, efaka yeka ilau ende ebasofel’Inde. 12Eokao ebisolɛmb’ino mbo bato bakeelek’ino, keelak’imɔ ko iyo ongoma, eoka Bikela la Baoi ba Batɔndɔli bengani nde ko la lioi-li.
13Ɔtɔkɔ hɔu nda bome ewamwanu, eoka bome bofalu la mboka efolali bitɔkɛ ko nda lɔsɛɛsɛlɔ, bende to wike ebatɔɔtɔkɔ nda wao. 14Kongo ko shomome shende siwamwanu la imbomboka shende la bokamu esitɔkɛ ko nda liwawi, la bato bende bamyɔ ebatoosha shao.
15Taenyelaka la wɛlï eoka ya batɔndɔli ebati la momongo ebatoya end’ino la wɛnɛlɔ wa bɛkɔkɔ nde wewe bende atiteni kwa ngɔi ya luno. 16Botolembeel’iyo ko la tuma twau. ¿Bato kotwa toyayöliki nda toyangiakau? ¿Kolukä sau nda toilaila? 17Ko ongoma, isandu silau sitota tuma tolau; nde isandu esisɔɔlɔ angota tuma tolau. 18Isandu silau siitokɔkɔlɔ ota tuma tobe la isandu esisɔɔlɔ angokɔkɔlɔ ota tuma tolau. 19Isandu l’isandu esiitota tuma tolau, shao sitotindomo kokumbolomo nda bösä. 20Eokao botolembeel’iyo ko la tuma twau.
21Bati to ebatotina ebatotangaka’mi mbo Ngɛnɛ, Ngɛnɛ ebatɔɔtɔ nda Bɔkɔta wa Use, mbayɔ; kangä ebatokelaka lisangi lia Sango wami oyayali nda Use. 22Nda lise lina lia liili, wike belaongaka lami mbo— ¿Ngɛnɛ, Ngɛnɛ, totiatɔndɔlɔ̈kɔ̈ nda lina liaɛ; totiakusoläkä belimo ibe nda lina liaɛ, totiakeläkä tokesa nda lina liaɛ? 23Limɔ Imi koonga lau mbo— Itialuwäkä ino ango sinyo, sokwaka ende’mi, ino eba Iotefola.
Besweli Imbale ya Ndakɔ
24Eokao oyatooka baoi-ba bami, inde kokɔcha bao, atokweelomo la boto wa wɛlï wotaenyela loasɔ loa liswi lia ndakɔ yande nda batälɛ, 25limɔ mbula lɔtɔnɔ tɔitɔi, betima losecha sondwäsondwä, lofofo lofofa fofoo, yao loomanakela ndakɔ ena, kongo ko ndakɔ angoukwa eoka yao loswama se suu nda batälɛ. 26Boto oyatooka baoi-ba bami, nde atikɔchɛ bao, inde kokweelomo la boto w’ebebe oyaswäkä ndakɔ yande nda nyɛlɛ yoke, 27limɔ mbula lɔtɔnɔ tɔitɔi, betima losecha sondwäsondwä, lofofo lofofa fofoo, yao loomanakela ndakɔ ena la yao loukwa kwuu, liukwi lifi fafo.
28Asiläkä Yesu ndoonga baoi-ba biindi ya bato lomwaala liekesi liande, eoka Inde loekekes’iyo la isosha inga kwa aekesäkä batikasa bau.
اکنون انتخاب شده:
Matayo 7: NTKE58
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Le Nouveau Testament in Kele (Lokele) © British and Foreign Bible Society, 1958, 2019.