Sam 32
32
Devitda kau aaknga matakut.
1Sike aminu tapatu Anututa gutongana kake wai waakngana sandekngamanu
aminu waapata apbakngayok.
Ngan, Anututa waiaknga waakwau pasiwan sopuwan dua siknga natapikge apbakngayok
2Siwan aminu tapatu waiaknga tasinggau
Buyambam tapata yawan aminu waapatane gutongana apmanu wena siwanu aminu waapata apbakngayok.
Musiaatangu kem taknga aknga dua natake tawanggak kapanin.
3Nata wamu takngatusimu dua yayuuk
zikaane gatu gunzit tapane ngangu kwanamu kumzang sikum.
Unzing siwawa natane gupma apatdekut.
4Dasingge, gunzit tapane gatu zikaane
gata meya takngatu takngatu namuwawi
natane kekekngana kuupbam wena sikut.
Unzing gunzitda kepdaka isiwan wawaakgak binga sikum.
5Masande nata waiakngana gae yakapbum.
Nata waiakngana dua takusopukum.
Sike nata anzing yakum, “Nata waiakangana kuupbam Buyambam tapae yakapit,” ngang yake nata yakapa
gata waiakngana kuupbam asandekngamukuyak.
6Unzingge aminu kuupbamu ga gawakaingu
apmanu waaminda tumuk wam ganinong.
Sike meya aknga buyambam ba siwik, unzing yanggata buyambam paptake amin kaitake kunggak binga siwanu,
meya akngata waaminu dua pasiwan maining. Wena Siknga!
7Ga natane akusopunggat tapana siknga. Nata undang kusopuwa gata na kakuya tasiwi meya akngata na dua tasiwan pimapit.
Gata na meya akngane pimambanu gata na atanggayak.
Anzing tasinggayakge nata apbakngake kau kumzang tainggat.
8Buyambam tapata anzing yanggak, “Nata ga katak siknga ganindamuke
nata kepiapa yeikgama waapane asiknga kuyo. Siwan nata ganindamuke natdetdetda tapa kakaawan nata ga kakuya tasiwit.
9Gata ikwawa gamanu hos ba dongki binga dua dakngawim.
Sike ikwawa wa gweayau natdetdetna wena. Unzingge gata ainu napna mamaya dakau genane peyo.
Peke nap takngaat peke panomanuwawi wanggwak kuson.
Sike gata unzing dua tasiwinu gata natapiak kaknga dua tawasan.”
10Siwan meya takngatu takngatu wai aminde asaapik.
Siwan ngana aminu Buyambam tapae banip siknga sikaing aminde
kakuya noman tasinggak.
11Ginu aminu noman yuaing amin, ginda Buyambam tapae musip gwaang natangamuke sanga kuupbamu noman ita tasinggak kakngae inimbaknganong.
Ginu aminu kuupbam Anutue kaine noman gan natake yuaingga, apbakngake umana yatangenatnong.
اکنون انتخاب شده:
Sam 32: wncB
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2001, Wycliffe Bible Translators, Inc. All rights reserved.