Gɔwɔ tɔɔi 4
4
Kain da Abɛlə di mąą mɛ̨nį
1Adamə da nɛ̨ą Ɛvə di too di kee ɓa, Ɛvə ə koo həɠə. Ə naayɛɛ a lon ɉulɔnu, ə naa hee a: Kain; nąąlɔwai, Ɛvə yɛ diɛ: «Ŋą́ą́ nu pɛli Yai-Laa nwɔ lúwɔ́ haalai.» 2Yili pulu, ə pənə ə lon ɉulɔnu takpɛli hɔlɔɓo a Kain nəɠə, ə naa hee a Abɛlə.
Abɛlə ə kɛ a taatɛlɛɛ tɔɔmun, Kain yɛ ɓo a tíi kɛ mun. 3Kwɛlan damąą tɛɛ pulu, Kain ə pa a ɲəi ɲɛa hihɛn daɠaa ɓa, ə dɛɛ Yai-Laa pɔ a gɔ́ hɛn. 4Abɛlə yaan, ə pa a nwɔ ɓɛlaaɠaai non dɔlɔɔɠaa kəlee ə gulɔ Yai-Laa ɓa a haláá. Yai-Laa ə ɲɛ̨i lɛlɛɛ hee Abɛlə nwɔ kɔ́ɓo hɛn ma, 5kɛlaa, hvo ɲɛ̨i lɛlɛɛ hee Kain nwɛi ɓa. Yili ə nwąną kpɔ Kain ɓa, ə níiholi. 6Yai-Laa yɛ Kain ɓa: «Lə mɛ̨nį ɓa, ə́ ə́ ɲɛ̨i ɲɔ̨n, ə́ ə́ lii ŋąnwąną? 7Akɛ ya túwɔ́ a nɛlɛɛ, ə́ ɲɛ̨i a pɔ̨nɔ̨, kɛlaa, ya túwɔ́ a ɲɔ̨nwɔ̨ɔ̨, ə́ kɛ nɛ̨ŋɛ̨n a kɛ laani ə́ yəi bɛlɛ́ laaləi yɛ haɠa kɛnɛ̨. Nɛ̨ŋɛ̨n tii a kɛ bɔ, ə tɔɔlaa kɛ ə́ mɛ̨i, kɛlaa, mąąnɛ̨ɛ̨ ə́ yee ə tɛɛ mą.»
8Ə kɛ lɔ a yələ ta, Kain yɛ nəɠə Abɛlə ɓa: «Pa gwəli ə́ náálɛ.»
Lii kɛa di moi, Kain ə wolo nəɠə Abɛlə ɓa, ə baa.
9Yai-Laa ə Kain mąąnikɛ, yɛ mą: «Ə́ ləɠə Abɛlə kaa mį?»
Kain yɛ mą: «Və́ gɛi kɔ́lɔn! Akɛtii, ɲą́ą́ ɓə a nə́ɠə mɛ̨i kaa mun?»
10Yai-Laa yɛ Kain ɓa: «Lə mɛ̨nį ɓə ŋɛ̨i ə́ gɛi? Ə́ ləɠə ɲąmą woo kaa tɔɔi lɔi mɛ̨i, gɛ́ mɛ̨n, yɛ kɛ diɛ: ‹Hvo kɛli di nwɔ́ɔ́ kwələ kulɔ.› 11Ə həɠə kɛa yiihu ɓa, nɔi ŋɛ̨i ə́ ə́ ləɠə ɲąmą pu mą, gaa ə́ nɛ̨ŋɛ̨n naai. 12Yili ɓə gaa mą, ə mą kɛ yaa kóló kɛ lɔi ɓa, hvo kɛa pai hɛn da tɛɛi ə́ pɔ. Ə́ kaa pai lɛɛi a nu kpoloon, yɛ́ gilɛ həɠə lɔi mɛ̨i.»
13Kain yɛ Yai-Laa ɓa: «Gahoi ŋɛ̨i yaa naa mą́ą́, nwiai, vá pɛli mu. 14Háákələi, ə́ kaa gbɛ́i, yɛ́ ɉə́ɠə tíi kɛ lɔi lɛlɛɛ ɓa, ɛlɛɛ, hvo kɛa pai mɛ̨́i kaai, gáá pai kɛi a nu kpoloon, gɛ́ gilɛ həɠə lɔi mɛ̨i. Gbəli hu, nu ta a kwiɛn a ɲą́ą́, gaa pai báái.»
15Yai-Laa yɛ Kain ɓa: «Kpaa-oo! Nu ta a ə́ paa, ə́ wɔ kwələ a kulɔ gee mɛ̨i mɛ̨ihveelɛ.»
Yai-Laa ə nɛɛ mą, ə kɔ́lɔn ɉɛn da kɛ Kain ɓa, əgɛ, nu ta a kwiɛn na hvo baa. 16Kain ə həɠə Yai-Laa ɲɛ̨ilaai, ə li, ə hee Nodə lɔi hu, Edɛn voló həɠəi pələ.
Kain huwuhu nuą laa ka
17Kain ə nɛ̨ą həɠə, da nɛ̨ą di too di kee ɓa, nɛ̨ą ə lon ɉulɔnu hɔlɔɓo, ə naa hee a Henɔkə. Kain ə nɛɛ mą, ə taalee ta tɔɔ, ə non naa hee daa tii ɓa. 18Henɔkə tii ɓə a Iradə nąn; Iradə yɛ ɓo a Mehuyaɛlə nąn. Mehuyaɛlə yɛ ɓo a Metusaɛlə nąn. Metusaɛlə yɛ ɓo a Lamɛkə nąn.
19Lamɛkə ə nɛ̨ą hveelɛ həɠə, diɛ kɛ dɔ̨nɔ̨ laa ɓaa: Ada. Diɛ kɛ dɔ̨nɔ̨ laa ɓaa: Sila. 20Ada ə lon ɉulɔnu hɔlɔɓo, ə naa hee a Yabalə. Yabalə tii ɓə kɛ a, nuąi da di taa tɔɔ a həɠə pɛlɛ, ɛlɛɛ, diɛ taatɛlɛɛ tɔɔ di kalaɓɔlɔ. 21Yabalə nəɠə hulɔnu laa ɓaa a Yubalə. Yubalə ɓə kɛ a nuąi da gwɛnįn ɲɔw, diɛ túlú hvɛɛ, di kalaɓɔlɔ. 22Lamɛkə nɛ̨ą veelɛnąą Sila yaa kpɛli, ə lon ɉulɔnu hɔlɔɓo, ə naa hee a Tubalə-Kain. Tubalə-Kain tii ɓə kɛ a kwɛli yɔw mun, yɛ kwɛlikɔw ŋąąliɛɠaa pɛli a ɓala-kwɛli da kwɛli kpəlee. Tubalə-Kain mąąhala laa ɓaa a Naama.
23Lamɛkə yɛ nɛ̨ąni diɛ:
Ada da Sila, ka ka wəli tɔɔ!
Lamɛkə nɛ̨ąni ka ka wəli tɔɔ!
Di mą́ą́nwąną, ŋį́ nu tɔ̨nɔ̨ paa!
Ɉáɠai tii di mo, ŋį́ lokolo tɔ̨nɔ̨ paa.
24Akɛ da Kain nwɔ kwələ kulɔ gee mɛ̨i mɛ̨ihveelɛ,
da nwɔ́ kwələ kulɔ gee mɛ̨i pow mɛ̨ihveelɛ.
25Adamə da nɛ̨ą di pənə di lon ɉulɔnu takpɛli hɔlɔɓo, di naa hee a Sɛtə. Ɛvə yɛ diɛ: «Yálá aa hvaa mą, Abɛlə ŋɛ̨i Kain ə baai, aa bɔɔi tɛɛ bɔ́.»
26Sɛtə yaa kpɛli ə lon ɉulɔnu hɔlɔɓo, ə naa hee a Enɔsə. Nąąlɔwai ɓə kɛa, nuą di gɔwɔ tɔɔ la, diɛ Yálá təli la a naa, a Yai-Laa.
اکنون انتخاب شده:
Gɔwɔ tɔɔi 4: BKPDCG
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید