Luuk 19

Na Sekias A Namkai Se Yesus

1Na Yesus a laak la bina Jeriko e i taxa falet vuak lana. 2Saxa mataa piran aava paamua ina mu rabuna ina siak taakis, i taxa waan pave, isina na Sekias. 3Nane buk xalum na Yesus taasaxa nane ve a mataa xaxaalif e pife fexaxaas sena xalume sena malila. 4Nane texaas sena salan aava na Yesus i taa sangas et lana e voxo nane fala paamu e fe fani a wai sikamo xena xalumaana.

5Layaan na Yesus a savatmaan lapaana wai aave a kaalum xe laa'ui e a kuus xe sina, “Sekias, sivimaan monabe' mon. Ne taa waan xuvul pama tanin.” 6Nane sivimaan fataapus e a kas a lifu sina xe si Yesus pana faamamaasan.

7A mu rabuna xapiak ri xalum a vilaana si Yesus e ri ferawai lilimugai, “Nane fo laak xe lana lifu sina saxa ‘mataa fafasaal’.”

8Taasaxa na Sekias a tigina e a ferawai xe sina Memai, “Kaalum Memai, monabe' mon ne taa tavai a mu valagof pana xavil ina maana mo siak. E tamo ne fo suaxan a mataa e ne siak a maana mo sina, ne taa lisan fa'uli fatalafaatan a mo aave.”

9Na Yesus a xuuse, “Tanin, a mu rabuna lana lifu aanabe' ri fo fakaxupan senaso a mataa aanabe' vaxa a lak si Abrahem. 10A Natuna Mataa maa savat nabe' xena sengaana mu rabuna aava ri fo milung xena fakaxup nari.”

A Ferawaian Paap Pana Faat Sangafilu

Mt 25:14-30

11Na Yesus taxa savat faasilak xo la bina Jerusalem e a mu rabuna ri lamon o a fatataganan sina Piran i taa savat monabe' mon. E voxo layaan a malila ri taxa langai faagut lunai na Yesus a ferawai paap xe siri. 12Nane kuus, “A saxa mataa piran a falet lasuun xe la xasa bina talo i taa siak a ngavuk ina paamua king. E mui i taa ulaamaan. 13Paamuina paanan sina nane xel faxuvul a mu sisiak sangafilu sina e tavai nari saxa saxa pana K1000 e a xuus nari o ri taa faisok pana e falavaie fefexaxaas a yaan i taa ulaa.

14“Taasaxa mu rabuna la fatataganan sina ri baiane e ri feng a mu matalava siri o ri taa usie xe la bina lasuun xena kuus o ri baian nane i taa paamuian nari.

15“Taasaxa mataa piran aave a fa'isinan pana paamua king siri e a ulaa xe la bina sina. Layaan nane savat, a xel faxuvul a mu sisiak sina xena texaas o ri fo faisok malaafaa pana mu faat sina.

16Saxa maa xuuse, ‘Matalava, no tavaiau pana K1000 e naboxo ne fo siak a K10,000 xaanum.’

17“E a mataa piran aave a xuuse, ‘A faisok roxo paaliu! Nano, no sisiak roxo. No fo faxatang faroxoi a valafaat siak e voxo ne texaas o ne fexaxaas sena tavai tuunei nano pana faisok lava ina paamuian a bina sangafilu.’

18“A fataraguiaana sisiak maa savat e a xuuse, ‘Matalava, pana K1000 siim ne fo fasavat a K5000 xaanum.’

19“E a mataa piran aave a kuus, ‘Lavaxa nano, no taa paamuian a bina pama.’

20“E a xasa sisiak maa savat sina e a kuus, ‘Matalava, ne fo tao fatateak a K1000 siim. Ne fune lana marapi. 21Ne mataut sema senaso nano ve no mataa tateak. No siak tapin a mo aava pife siim e no siak faxuvul a mo no pife xapise.’

22“A mataa piran sina a suie, ‘Ne taa tiis nano pana ferawaian siim! Nano, no sisiak saat. No texaas o ne mataa tateak, bo? Ne fuuna siak tapin a maana mo aava pife siak e ne fuuna siak faxuvul a maana mo ne pife xapise, bo? 23Xenaso no pife fawaan a faat siak lana lifu ina faat talo layaan ne ulaamaan ne taa siaxe pana mamareiai ina?’

24“E nane ferawai xe siri aava ri taxa tigina faasilak, ‘Siak tapin a K1000 sina e tavai a sisiak aava toxan a K10,000 pana.’

25“E nari, ri kuus, ‘Taasaxa Matalava, a sisiak aave xo fo toxan a K10,000.’

26“E a mataa piran a kuus, ‘Ne xuus nami o nase' ta mataa a toxan a mo i taa siak a xasano mo fulaa. Taasaxa, nane aava piau ta mo, a mo modak aava nane toxane, i taa siak tapinan xasena. 27E naboxo, a mu xaiyaas siak aava ri bai o nenia, ne taa paamuian nari, lisanmaan nari e punuk nari la mataak.”

A Mu Rabuna Ri Faamamaas Pana Laaxan Si Yesus Xe Jerusalem

Mt 21:1-9; Mk 11:1-10; Jn 12:12-15

28Layaan na Yesus fo kuus xapiak malaan nane sangas laak paamua xe la bina Jerusalem. 29Layaan i taxa savatmaan xe la ro bina, Betfas nare Betani aava re waan la put modak ri xalie pana Put Olif, nane feng a ro fefeng sina e a kuus xe sire, 30“Falet fatak xe la bina aapave e layaan me laak lana me taa tingin a saxa ‘donki’ aava piau ta mataa fo nai xuluna. Muluse e lisanmaane xe nabe'. 31Tamo ta mataa i taa fin name, ‘Xenaso me taxa mulus tapine?’ Me taa xuuse, ‘A Memai a vubuxane.”

32Nare aava nane fo feng nare, re tingin a maana mo malaan sena kuusan sina. 33E layaan re taxa mulus a natuna ‘donki’, a mu mataa tafuna ‘donki’ aave ri fin nare, ‘Xenaso me taxa mulus a ‘donki’?’

34E re suie, ‘A Memai a vubuxane.’

35Re ulaamaan pana xe si Yesus e re xafut a mina natuna ‘donki’ pana marapi ina xakaafutan sire e re fanei na Yesus xuluna. 36Layaan i taxa falet, a mu rabuna ri sului a marapi siri la salan.

37Layaan nane maa savat faasilak la salan aava sivi xe la Put Olif, a malila ina mu fefeng sina ri tangpat pana kuus fati a isina Piran. Ri xukulai faagut pana faamamaasan sena maana mo fa'ipul ri fo xalume. 38Ri kuus,

“A Piran King aava savat lapaana isi Memai, a naian sina i taa roxo paaliu.” Yng 118:26

“A luaian taxa waan la xunavata e a suaian molava piis xe sina Piran aava waan la xunavata.”

39Saxano Ferasi la palou ina malila ri xuus na Yesus, “Mataa ina Fepitaa, baras a mu fefeng siim.”

40Taasaxa na Yesus a sui nari, “Ne xuus nami o tamo nari, ri taa kasam a mu faat la xavala ri taa xukulai pana faamamaasan.”

Na Yesus A Muluk Na Jerusalem

41Nane taxa sivi xe pe Jerusalem e layaan a xalume, nane tangiis soxote 42e a kuus, “Monabe' mon a luaian xe vulai fo savat la taam. Taasaxa nano, no pife texaas sena. No tisuie e naboxo fo liu nano. 43Lana yaan xe mui a mu xaiyaas siim ri taa xaf faxuvul a xavala la tana vaabat siim. E ri taa fakaliuan nano e ri taa tivotan a xakaavangan sina xasano rabuna xasema. 44Ri taa kawaasan nano e a mu rabuna aava ri taxa waan lana vaabat siim. Piau ta faat i taa waan xuluna xasa faat senaso no ngalngolan a yaan layaan a Piran a savat xena fakaxup nano.”

Na Yesus A Falet Xe La Tang Lifu Lotu

Mt 21:12-16; Mk 11:15-18; Jn 2:13-16

45E mui nane laak la tang lifu lotu e fe xup tapin a mu rabuna ina faasot lana. 46E a kuus, “Lana Xakalayan Taap a kuus, ‘A lifu siak ve a lifu ina fenungan.’ Ais 56:7

taasaxa ‘sena vilaana simi ri xalie pana nobina ina fufunai sina mu rabuna fafenau.’ Jer 7:11

47A maana yaan xapiak nane taxa fepitaa lana lifu lotu aave. Taasaxa mu paamua priis, mu rabuna ina fepitaa pana vuputkai e mu matalava, ri taxa lo seng ta salan xena punuxaana. 48Taasaxa ri pife fexaxaas sena vile senaso a mu rabuna ri buk langai vulan a ferawaian sina.

اکنون انتخاب شده:

Luuk 19: leu

های‌لایت

به اشتراک گذاشتن

کپی