LU:KKC 18
18
Tumbo Nc:doklang Kcbang Ba:ncdok Kvkanbila Kvnam Do:ying
1Odokkc Bv bulum kvkanbinam do:yvngko kvbito, bulujen lo:dvscm kumdopc odokkc asinc adji:pc mc:suma:ycpc cmna. 2Bv luto, “Nogor akolo kcba: ba:ncko dungai sc:kobv Ru:ncpvncmcsin pcsomangai odokkc cdcmanggom tani:ycmsin pcsomangai; 3odokkc tumbonc:ngko dungai odo nogordo sc:kobv bvkkolo:pc gva:tvla dungge:la, ‘ngom imur inc mirudokkcm mopvttei cmna lutvto,’ 4Bv asudowko lupaksuto; ckvdaggom lcdupc bv avdc avdcm lusuto, ‘Ngo Ru:ncpvncmc manggom tani:lok lukamdcmpc tadmang, ckvdaggom sc tumbo nc:sc ngom lutvga:lok, 5ngo bvm motuyc, ckvma:mvlo bv gvtv-gvtvla ngom kvgpckc.’” 6Odokkc Ru:tumbv luto, “Tattok dormokama:nc kcba: ba:ncdc kapc ludagji. 7Odokkc Ru:ncpvncbv Bvk malennam kvdv:dcm, sc:kobulu Bvm longc-yumcpc kumna gognc kvdv:dcm motuma:yclang? Bv buluk lcgangc bojcpakko toya:la du:ma:yclang? 8Ngo nolum lubidung Bv bulum imurnclokkcm mcna:pc moturyc. Ckvdaggom, cdvlo tani:kc awodc gviyckunc, Bv mo:pvso mc:jvgcm pa:yckusong?”
Parisi: Migom Murkong Urkumncdok Kvkanna Kvnam Do:ying
9Bv sc kvkanbinam do:yv:scmsin kvbito sc:kobulu akedc avc avycm dormokannc cmna mc:sudagai odokkc ammem yodpakdungai: 10“Tani: anyikonc kumko okumpc kumkapc gvkangai, akonc Parisi:kai odokkc akondc migom murkong urkumnnckkai. 11Parisi:dc dagrobge:la avdc scmpc kumsuto, ‘Ru:ncpvnna, ngo nom aipai cmdung jc ngo amitani:ycmpc imang, yadla attar lango:binckvdv:dcmpc, kaboma:pc kcba:ba:nc, aminc:ng langgo:nc, odokkc sc migom murkong urkumsunc scmpcsinci imang. 12Ngo longc kvnvddo lcnyikopc apin doma:pc yoddo, ngok pa:nam appvng attarrokkcm vyvngcm pa:namcm bido.’ 13Cmpige:la migom murkong urnckvdv:dc, mo:tc:pc dagge:la, taycng amo:pci amigcm nge:sa:ma:pc, cmpige:la bvk angkc:dcm kvgsu kvgsula, scmpc lula: lula:, Ru:ncpvnc, ngo papi:scm ayang-abotei cmto. 14Ngo lubidung, sc amisc aidag cmna lunampc ila akondcmyam aiya:la gvkangku; kapila:nc sc:kobvi avyc bottapc lubonsuycnc bvm adji:moyc, cmpige:la sc:kobvi adji:ycnc bvm bottcmoyc.”
Jisub Kowawkvdv:dcm Akirba:d Binam
(Met 19.13-15; Mark 10.13-16)
15Cdcmpidodo bulu kowaw kvdv:dcmsinci Bvkkolo:pc gvangamboto Bv:jen bulum ri:yidbiycpc cmna; cmpige:la cdvlo agom tadjvgla gvmvnnc tani:kvdv:dc cdcm ka:toji, bulum bulu ge:rvdto. 16Cmpige:la Jisubv bulum Bvkkolo:pc, scmpc lula goga:to, “Kowawkvdv:dcm ngokkolo:pc gva:motok, odokkc bulum lutumyok; kapila:nc bulu:kkcmpinc kvdv:dokkcpc Ru:ncpvnckc migom doko mo:pvdc idag. 17Aropakpc, ngo nolum lubidung, sc:kobvi Ru:ncpvnckc migom doko mo:pvdcm kowawkoncmpc torvgsuma:ycnc odo gva:ma:yc.”
Mircmnc Tani:dc
(Met 19.16-30; Mark 10.17-31)
18Odokkc ya:me:opc migom donckonc Bvm tawuto, “Airu:nc Luyirna, turyarla turnamdcm pa:pc ngo o:ko ipcnammcn?” 19Odokkc Jisubv bvm luto, “No kapila ngom airu:nc cmna gogdon? 20Sc:kosin Ru:ncpvnckc atcrma:mvlo aincmang. No lujvgluro kvdv:dcmbulum kindag: ‘aminc:ng la:biyoka, tani:ycm mokeyok, dopso:yoka, lume:pc amikc agomcm kcba:lo lukanbiyoka, nok ba:bomna: owycm mcnggclangka.’ ”
21Odokkc bv luto “cdc appv:dcm ngo ya:me:dokkcbong lukamdcmpci ila dung.”
22Odokkc cdvlo Jisubv cdcm tattoji, Bv bvm luto, “Ager abangko su:paggom no pv:ramdu:da, nokkc oko okko du:nc appv:dcm kopaktok odokkc opankvdv:dcm ortok, odokkc taycng amo:to nokkc murkongc du:yc; odokkc gvtok, ngok lcdu lcdulo.” 23Cmpige:la cdvlo bv cdcm tattoji bv mc:dvrrobbomkang, kapila:nc bv airu:pc mircmdagai.
24Jisubv bvm kangge:la luto, “Cddvkojc tordagnc sc:kobulu:kkc mitcmircmc du:ji Ru:ncpvnckc migom dokodo gva:pc! 25Kapila:nc mircmnc tani:akonc Ru:ncpvnckc migom doko do gvangkunam dcmyam u:tgure: adorkonc pcsiarungkolo gvkurnam dci gvkur poya:ycpc.”
26Cdcm sc:kobulu tattoji luto, “cmpcmvlo sc:ko moturcm pa:la:dan?” Cmpige:la Bv luto, 27“Okodc tani:kcpc ila:ma:nampc idagnc Ru:ncpvnckcpc ila:nampc idag.”
28Odokkc Pitorbv luto, “Ka:toka, ngoluk okumcm ngolu mcngapge:la nok lcdu lcdulo gvmvndu:bong.”
29Odo Bv bulum lubito, “Aropakpc, ngo nolum ludung, oko tani:ycsin kamang sc:ko okumcm, cdcmanggom ancabbom cdcmanggom ommangcm mcge:la, Ru:ncpvnckc migom doko mo:pvdok lcgangc, 30aipc bojcrungko su:pakkc ayirso, odokkc angkupcnc du:yarnc ayirdo sc:kobv turyarla turnamdcm pangkuma:ycji.”
Jisubv Lcumkopc Bvk Sinamcm Lusunam
(Met 20.17-19; Mark 10.32-34)
31Odokkc vyvngkolang anyi agom tadjvgla gvmvnnc tani:kvdv:dcm gvbola, Bv bulum luto, “Ka:tok, ngolu Jerusalempc gvdag, odokkc Tani:kc awodok agomcm lukam appv:dcmpc lungor lunckvdv:dok lunamkvdv:dc aroamyc. 32Kapila:nc Bvm Ru:ncmc kinma:nc opvnkvdv:do togc:lvgyc, odokkc takircm sugrumyc; 33bulu Bvm sabukkokki dcmyc; odokkc Bvm mokeyc, odokkc lowum longcdo darobycku.”
34Cmpige:la bulu odok apirkosin tadkintomang; cdc agomdcm bulukkolokkcm lc:sula lc:tagai, odokkc okkom lutoji bulu tadgabla:tomang.
Jisubv Miglunc Kogo:nc Tani:ko Csa:mokunam
(Met 20.29-34; Mark 10.46-52)
35Bv Jeriko aninpc pvnga:nammc, miglunc tani:konc ali: lambc ru:yi kolo tedge:la kogo:la dungai; 36odokkc odok yadkumsunc tani: kcrcngkonc gvpatdopc tadla, kapila gvdagji cmna bv tadto. 37Bulu bvm lubito, “Najaretolok Jisubv gvpatdag,” 38Odo bv jc:sangkang, “Jisua, Dawidkc Aowa, ngom ayaitei!”
39Odokkc buluk kcra:pc cdc dagnckvdv:dc bvm ge:rvdto, aso:pc du:toka cmna lula; cmpige:la bv jc:barra gvkang, “Dawidkc Aowa, ngom aya:tei!”
40Odo Jisubv du:tedto, odokkc Bvkkolo:pc bvm goga:dopc lulvgto; odokkc bvm cdvlo aninpc gva:toji, Bv bvm tawuto, 41“Ngo nom okkom ibiteika cmna mc:dang?” Bv luto, “Ru:tuma, ngok ka:begma:namcm ngom ka:begmoteikuk.”
42Odo Jisubv bvm luto, “No ka:pangkangkulangka; nok mc:jvgnamdc nom aimotoku.” 43Odokkc vgcmpc bv ka:begkangku odokkc Bvk lcdu lcdulo gvmvnkang, Ru:ncpvncmc ainc cmnang cmna; odokkc tani:appv:dc cdcm kangge:la, Ru:ncpvncmc aipai cmto.
اکنون انتخاب شده:
LU:KKC 18: MISIBSI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Mising New Testament - ANU LUGOD
Copyright © 2001 by The Bible Society of India
Used by permission. All rights reserved worldwide.
