JO:N 4
4
Jisubv:lang Samariang Nc:dc
1Cdcmpidodcm Jisubv agom tadjvgncm Jo:nmcyang abayangko baptismo bila dung cmnamdcm Parisi:kvdv:dc tadto cmna cdvlo Ru:tumbv kintoji. 2(Jisubv avdc baptismo bisumangagom, cmpige:la bvk agom tadjvgla gvmvnnc tani:kvdv:dc,) 3Bv Judia:dcm mcge:la Galilpc gvkang. 4Bv Samaria:dok gvko:la gvpcnampc ikang. 5Cdcmpila Samaria:dok nogorkolo:pc, Sikor cmnamdo:pc gva:to, Jakobbv bvk awo Josepmmc binam amo:dok anindo:pc. 6Jakkobkc siru:dc odo dungai, odokkc cdcmpila. Jisubv, lambc gvla bvpek-bvyekla siru: ru:yido teda:to. Odo ayir akkcng kvramko idagaboi.
7Odo Samaria:dok nc:ng akonc asi gckapc gvdo. Jisubv bvm luto, “Ngom tv:pc asiko bi:pcn.” 8Kapila:nc Bvk agom tadjvgla gvmvnnc tani:kvdv:dc nogorpc donam rckapc gvkang:
9Samaria: nc:dc Bvm luto, “No kapc cdcmpc, Jiwudi:ge:la, ngokkolok tv:pc cmna koka:n, Samaria:dokkcm?” Kapila:nc Jiwudi:kvdv:dc Samaria: kvdv:dokki okkomsin gvmvndomvnsumangai.
10Jisubv bvm luto, “No Ru:ncpvnckc amanpc binamdcm kinya:mvlo, odokkc sc:kobvi nom, Asiko tv:pc bi:pcn cmna kodu:song, no Bvm tawuya:pc, odokkc Bv nom turyarla du:nc asidcm biya:pc.” 11Cdc nc:dc Bvm luto, “Miganga, nokkc suksa:nannc okkosin kamang, odokkc siru:sc orv:dag; okolok no cdc turyala du:nc asidcm pa:ycn? 12No ngoluk Abu Jakobmc bottcya:dagnci, sc:kobv ngolum sidc siru:scm bitagji, odokkc bvk avdc tvngkaji, odokkc bv awokvdv:dc, odokkc bvk simvnkvdv:dc?”
13Jisubv bvm lubito, “Sc:kobvi sc asiscm tv:ycnc lckoda tv:lv:ycku, 14cmpige:la sc:kobvi ngok binam asidcm tv:ycnc, cdvlosin tv:lvngkuma:ycbong; ngok bvm binam asidc bvkkolo jili:pc iyc turyarla turnamdok appv:dc bidlentvla du:yc.”
15Cdc nc:dc luto Bvm, “Miganga ngom cdc asidcm bi:pcn, ngo:jen tv:lvng kama:ycpc, cdcmanggom so:pc gvla gckuma:dopc.”
16Jisubv bvm luto, “Gvkangkuk, nok milbo:dcm gogta:kuk, odokkc so:pc gvlangkuk.” 17Nc:dc Bvm lubito, “Ngokkc milbongc kamang.” Jisubv bvm luto, “Nok lunamdcm lugabdung, ‘ngokkc milbongc kamang,’ 18Kapila:nc no milbong anggokolo gvkabong, odokkc su:pak sckkolo du:mvndu:nc cdc nok milbo:mang; cdcm aroru:pc no luto.”
19Nc:dc Bvm lubito, “Miganga ngo kindung jc no lungor luncko. 20Ngoluk lekekc abukvdv:dc so adi:so kumka; odokkc nolu ludag Jerusalemdc:na mo:di:dc okolo tani:kvdv:dc kumpcnammcji.”
21Jisubv bvm luto, “Nc:nga, ngom mc:jvgtoka, ayirdc pvnga:du:bong cdvlo so adi:so:daggom Jerusalemdo:daggom nolu Abumc kumycpc. 22Nolu okodcm kinma:ji cdcm ngolu kumdag; ngolu okodcm kindagji cdcm ngolu kumdo, kapila:nc mopvtnamdc Jiwudi:kvdv:dokkc lenyc. 23Cmpige:la ayirdc pvnga:du:bong, odokkc su:pakna, kumnckvdv:dc cdvlo Abudcm yalokokki odokkc arokokki kumycpc, kapila:nc cdcmpcna Abudc Bvm kumtoka cmna madagnc. 24Ru:ncpvnbv Yallo, odokkc bvm kumnc takamc yalokokkilang arokokki kumpa:yc.”
25Nc:dc Bvm luto, “Ngo kindag Messia:bv gvdung (sc:kobvm Kristo cmdagji;) cdvlo Bv gvycji, Bv ngolum appvngcm lcngkanyc.” 26Jisubv bvm luto, “Ngowv:na sc:kobv nom ludu:ji Bv.” 27Oddar Bvk agom tadjvgla gvmvnnc kvdv:dc gvangamdoku. Bulu Bvm nc:ng akokokki luposula du:namdcm ka:la mc:la mcngabla:tomang, ckvdaggom okkomsin lutomang. “Nolu okkomna mc:dag?” Cdcmpcmanggom, “No kapila bvkkokki luposudu:n?” cmna.
28Cdcmpila cdc nc:dc bvk asi gcnancdcm mcto, odokkc nogorpc gvpakkangku, odokkc tani:kvdv:dcm lubitoku, 29“kajc gvla ka:ta:ka tani: akoncjc ngok ager gernam appv:dcm lungapbitonc. Bvwvng Kristobv:nci?” 30Bulu nogordokkc gvlenamto odokkc bvkkolo:pc gvngapto.
31Cdcmarpc idodcm agom tadjvgla gvmvnnc tani:kvdv:dc scmpc lula, Bvm mato, “Rabbi, dopo:tok.” 32Cmpige:la Bv bulum luto, “Okodcm nolu kinma:nc ngokkc cdcmpinc donamc dung.” 33Odo agom tadjvgla gvmvnnc tani:kvdv:dc akoncm akonc luka:mvnsuto, “Sc:koiyc Bvm donamcm boma:bitaganci?”
34Jisubv bulum luto, “Ngok apindc Bvk mcngkampc ager gernamdc sc:kobv ngom mclvgtagji, odokkc Bvk agerdcm ingapdopc. 35Nolu luma:lang, ‘Po:lo pvnyiko iycmvlo a:mcm gaddvka:bong?’ Ngo nolum lubidung, nolug amigcm bcrsa:la ka:toka, odokkc ka:tok arvgc minna gadkanka:bo:nc. 36Sc:kobv gadycnc bv garrcm pa:dag, odokkc turyarla turnamdok a:ycm pvrdag, odomvlo a:m pidncdc:la gadncdc lckko:pc mc:poyc. 37Kapila:nc sc lunamsc lugabru:dag, ‘Akonc piddag odokkc akondc gadkumdag.’ 38Ngo nolum gadta:ka cmna mclvgtojc okodok lcgangc nolu agercm germa:ji; akke ager gerto, odokkc nolu buluk ager gernamdo gva:to.”
39Samaria:dokkc bojcrungc Samariangc Bvm mc:jvgto cdc nc:dok lukanbinamdokki, “Bv ngok gernam appv:dcm lungapto cmnamdcm tadla.” 40Cdcmpila cdvlo cdc Samariang kvdv:dc Bvkkolo:pc gva:doji, bulu Bvm buluk lcdulo du:mvndopc luto; odokkc odo Bv lo:nyikopc du:to.
41Odokkc bvk agomdokki bojcru:yangc mc:jvgto. 42Bulu cdc nc:dcm luto, “cdc nok agom dokkima:bong ngoluk mc:jvgnamdc, kapila:nc ngolu avyc avkcpc tadbegsutobong, odokkc sc:ru:bong mo:pvsok mopvtkuncdc.”
Jisubv Migom Ager Gernclok Awoko Csa:mokunam
43Lo:nyi lcdudokkc Bv Galilpc gvpakkang. 44Kapila:nc Jisubv avdc lukansubito jc lungor luncdokkc avkc amo:do mcnggc kamang. 45Cdcmpidag cdvlo Bv Galilpc gvlattokuji, Galildok tani:kvdv:dc Bvm mc:popc tomrvgsutoku, Jerusalemdok appv:do dodo-tv:dodcm inamdcm kangge:la, kapila:nc bulusin donam tv:namdo:pc gvka.
46Cdcmpila lckoda bv Galildok Kanna:do:pc gvtoku, okolo bv asscm angur ala:pc imokaji. Odokkc Kapernaumdo migom ager gernckolok awokonc ramdungai. 47Jisubv Judia:dokkc Galildo:pc gvdoku cmna cdvlo bv tattoji, bv gvla bvk awodcm csa:moteikuk cmna kumna lurobbomkang, kapila:nc bv sipcmna idungabong. 48Jisubv cdcmpila bvm luto, “Nolu kanggodkolang mcngapla:ma:nam agerko ka:ma:sisscm mc:jvgma:yc.”
49Migom amidc Bvm luto, “Miganga ngok awodc sima:dapc no gvtok.”
50Jisubv bvm luto, “Gvkangkuk, odokkc nok awodc turyckupc.” Cdc tani:dc Jisukc bvm lunam agomdcm mc:jvgto odokkc bvk gvkupcko lambcdok gvkangku. 51Bv gvkunammc, bvk ager gerya:nc tani:kvdv:dc rvgsula ko:dc:jc csangkangku bvm lubito.
52Cdcmpila bv bulum cdv ayirdokkc bv csangrobbomkangkuji: tawuto, odokkc bulu bvm lubito, “Mclo kvnvd ayirdo ramnamdc aikangku.” 53Cdc ayirardowai cdvlo Jisubv bvm lukaji abudc kindagai. “Nok awodc turyckupc.” Odokkc bvk cra:pagc.
54Cdcmpc cdc lckondcai Jisubv:jc Judia:dokkc Galilpc gvdodokkc kanggod lcngkannamdc.
اکنون انتخاب شده:
JO:N 4: MISIBSI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Mising New Testament - ANU LUGOD
Copyright © 2001 by The Bible Society of India
Used by permission. All rights reserved worldwide.
