JENESIS 21
21
Isaakbe je Lungbe
1Zai pa ne sagailube luigum ze Tingwang ne Sarale je ’ngkiâmie de lei, zai Tingwang ne pa hetkailube luigum ze Sarale dage tâtew gai de lei. 2Zai Sarale ’mpung di de lei, zai Abrahambe chîng di chaine pe dagene ’mpeumi napoine lungkeu de lei, pechu lungkeu ra Hera ne ranggai’ndibe ting sing ge chi ’mpeumi napoine ze lung de lei. 3Abrahambe ne pe ji hang Isaakbe ze ’ntak kai de lei, 4zai Isaakbe hezie desatne chang dege pechu Abrahambe ne rumgeten gai de lei, Hera ne diegaibeibe luigum zeu. 5Isaakbe je lungbe ting ge Abrahambe â kum haî kat chang di de lei. 6Sarale ne sa ze, “Hera ne achu hesuiyibe benai ka’nnuibe pei gai bei de lei. Mi-mige de aipau rasam seume leine â achu ngua’nnui gai gu de lei,” ze kacheu de lei. 7Zai pa ne sa dai ze, “Châu gene Abrahambe je Sarale hena’mpâmtei gu lei, ze acheu ra lau? Acheusedu pa chîng di chaine pe hangge pe na ’mpeumi I ne lungkeu gai de lei,” ze kacheu de lei.
8Zai napoine chîngchu de lei; zai Isaakbe je tak peigairaibe mai ge Abrahambe ne luube-teseu kedibe teleu gai de lei.
Hagarle benai Ishmaelbe je Kelituabe
9Mai kat â Ijip’mpui Hagarle ne Abrahambe dagene lungkeugaibe na Ishmaelbe zai Sarale na Isaakbe benai ngua’nta bam de lei. 10Sarale ne Abrahambe je, “Ai kebangpui benai pe na je kelitua ne lau. Ai kebangpui na ne a na Isaakbe dage ning heu ze nguaheu ra mak daseu,” ze kacheu de lei. 11Dadege Abrahambe pe na di dadege pe suiyi mak luisui bam di de lei. 12Kane Abrahambe je Hera ne, “’Mpeumi napoine benai ning bangpui Hagarle deu gene ning lung hereu ze bam se lau; Sarale ne ningchu kerang-rangbe tew lau; ning chaname misongga bam ra I samhetkaibe ze â Isaakbe dagene chang gu daseu. 13Zai kebangpui na je du pe chaname misongga bam ra I pei gu lei; chidezai penui pezat kedibe chang gu lei. Pa du ning na daseu,” ze rang gai bei lei. 14Bechaibe mai hechuasûn dege, Abrahambe ne pe gu hetak hang benai hemeigeibung ge hedui ’nni-puigit kai lu pei bei de lei; napoine je pe ching ge tua gai lu langtua ’ndi de lei. Chigene pa zuapat ze Beer-sheba hênam ge kezitrua ze bam di de lei.
15Hedui ga’nzâuchiak kai di dadege â hereupuîtum kangge pe na je ’njei gai lu, 16tat’ndeutau ze pat lu ’ntau gai di de lei, “A na chaibe ngau ra hang â a lunggailak-desang lei,” ze pe runne pechu kacheu de lei. Chige pa ’ntaubambe luage pe na hap chu di de lei, zai pa du hap te lei. 17Hera ne ’mpeumi napoine hap bambe kuâ seu lu de lei, zai tinggîm ’mbene Hera gu Tinggîm angel’mpeu ne Hagarle je ’mpau ze, “Hagarle gau, ’ndaikau ne ning lung tewkahereu lau? Hing se lau, Hera ne ’mpeumi napoine hapbe kuâ seu lu de lei. 18Chu zu lau, ning na je tat ze pua le lau, zai pechu tum gai lau. Pe chaname gene pezat kedibe chang ra I ne tew gai gu lei,” ze kacheu de lei. 19Dadege Hera ne pe mik lat kai bei de lei, zai dekuaki pa ngau de lei. Pa tat ze hemeigeibung ge hedui kaipuigit kai lu, pe na je du sak ra pei de lei. 20Chi ’mpeumi napoine dage Hera ne nguabam ze pa chîngchu de lei; Paran gu hênam ge pa â bam ze bai’mpi kapchibe kau chang di de lei. Zai Paran hênam ge pa lung di de lei. 21Zai pe nâu hangge Ijipme leu ze pe pui ne peu gai bei de lei.
Abrahambe benai Abimelekbe kakge Samriabe
22Chipauting ge Abimelekbe benai pe gu hereikangme ruage besuitewpeu, Phikolbe je ngua lu tat ze Abrahambe je, “Nang tâtewbe leine ge Hera â ning dage nguabam lei. 23Chidaze I benai a name zai a chaname leine je nang chuo ra mak lei be aige Hera masua gene nang deseu gai lau, I â ning kuâpheu ze bam bei de lei, chidaze I benai aipau ram nang lunggaileube heram kuâ nang du pheu ze bam gu lei be deseu gai lau,” ze kacheu de lei. 24Abrahambe ne, “I kadeseu lei,” kacheu de lei.
25Abimelekbe guâ ka’ngguame bau ne dekuaki sut’ndibe deu ge Abrahambe ne Abimelekbe je pauchang gai de lei. 26Abimelekbe ne, “Aigumbe tâ châu ne tew mei be I â chî mak te lei. Aipau rasam â nang leize achu salia mak zeu, nemai ne I â aize seuraî rei de lei,” ze kacheu de lei. 27Dadege Abrahambe ne meli ramme benai getumsei ramme teiwang lu Abimelekbe je pei gai de lei, zai penai hangna samhat kai de lei. 28Abrahambe ne pe gu melidung ruagene melipoine sena kelângpatchâm gai de lei, 29dadege Abimelekbe ne “Aize ’ndaikau rimba gene nang tâtew lau?” ze ka’nneu de lei. 30Abrahambe ne kak ze, “Ai melipoine sena nang tei le lau. Aigumbe tâ tewgaibe gene aipau dekuaki ze I ne kuigaibe kau lei be nang ne achu sakkitewbe chang ra de lei,” ze kacheu de lei. 31Aipau ziegene chipau bâm ji ze Beer-sheba ze kû di de lei, chipau bâm gene penai hangna kadeseube ziegeneu. 32Chigum ze penai hangna Beer-sheba gene samhetbe bam de lei. Dadege Abimelekbe benai Phikolbe â Philistinram ’mbe helat dai di de lei. 33Abrahambe ne Beer-sheba ge tamariskbang tau gai lu, Tingwang betunmakbe Rapeu je kakellum de lei. 34Abrahambe beting misongga ze Philistinram ge lung gai lêu ze bam de lei.
اکنون انتخاب شده:
JENESIS 21: ZEMEBSI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.