JENESIS 19
19
Sodom Kahemuibe
1Hegî dege Sodom ge Tinggîm angelme hangna wangbe luage Lotbe â namdi keriekemui ge ’ntau bam de lei. Penai je Lotbe ngau dege, pa zuachu lu penai je hedau ra pat te lei, zai penai suage kedei ge kei’ngkumkeu lu, 2pa ne, “A pau kena gau, ningnai guâ ka’ngguapeu ki ge tat kai ze rêu gai ra I ningnai je kiâm lei, zai ningnai pî hui le lau; hechua dezai chuzisi lu ningnai ’mpuî ra ’mbe tat dai dui lei,” ze kacheu de lei. Penai ne, “Acheu me lei; anai â puidi ge bamtingba du lei,” ze acheu bei de lei. 3Kane pa ne pa teleichi ze, gang-desangbeibe ziegene Lotbe ki ’mbe penai tat ti de lei; zai pa ne penai hangge luube-teseu teleu gai de lei, zai ’nduihîkaimakbe tingku lang lu penui teu de lei. 4Kane penai jeikeu gai makge Sodom namdi ge bamme gechîng-hena zai ziemmena kebam leine wang ze heki tuaguâ ’ndi de lei; 5dadege penui ne Lotbe je kû ze, “Ning ki ge nemai muî ziemmena zuagutkaidime ’ndaige la lau? Anui tailam penai je nguapat kai lau, penai je anui nguajei ra hangge zeu,” ze ka’nrung de lei. 6Lotbe pe chaige ’ngkam kainam gai nan ze penui tailam zuapat lu, 7penui je, “A puiname gau, ningnui je I kiam lei, mi ngaudaulakbe tâ tew gai se lau. 8Pie le lau, aige a na heleume hangna ’mpeumi je ’nnagaimakbe kau lamui lei; I ne ningnui dage penai je nguapat kai be che lei, dezai ningnui ne tewnei-neibe tak penai peireige tew zu lau; kane aibe kena peireige â mâ de tew gai se lau, penai â a ki ge hesang chang ze rêube kau daseu,” ze kacheu de lei. 9Kane penui ne kak ze, “’Mbia de lau,” ze kacheu de lei. Zai penui ne sa dai ze, “Aipau peu ze hesang chang ze lunggaileube kau, pa ne samram ra mei! Chunage penai peireige suadu ningchu tew’mmihâm gai bu lei,” ze kacheu de lei. Chidadege Lotbe je penui ne chuinup-getiegut ze ’ngkam sîmbagut ra gum bam di de lei, 10kane chi ziemmena hangna zene penai ba getuapat lu Lotbe je kilûng ’mbe teigut lu, ’ngkam kainam gai ’ndi de lei. 11Zai penai ne chi ziemmena ramme kedi-kechei sa makze ’nteumena hela ge bamme leine je penui mik tewchit kam ’ndi de lei, chidadege â kemuiki peu ze kemitrua leisei bam kam di de lei.
Sodom gene Lotbe ’Mbiadibe
12Chidadege chi ziemmena hangna ne Lotbe je, “Aige ning gu ziemmena mige â larei mei? Ning chame, zai ning name, ’mpuimi ramme benai ’mpeumi ramme, zai mige ning gu ziemmena namdi lungge bamme, chime leine je namdi lung gene hela ’mbe ngua’mbia tat te lau; 13aipau bâm ze anai tew’nsia gai gu daseu, aige lungme bau peireige saka’nsiabe ramme misongga ze Tingwang masuage wangchangdibe ziegene, Tingwang ne aipau bâm ze tew’ngga gai ra anai je lang gai de lei,” ze kacheu de lei. 14Chidadege Lotbe ne tatpat lu pe chame, pe na heleume je nguakelaktewrame hangna je, “Zuachu kelua zu lau, aipau bâm gene ’mbia de lau; Tingwang ne aipau namdi ze tew’ngga zi gu de lei,” ze acheu bei de lei. Kane hepâ-henuitew ze kakeliangbe hang pechu ’nning gai ’ndi de lei.
15Hechua bapat dege â tinggîm angel’mpeu hangna ne Lotbe je gecheu kelua ze, “Chu zu lau, namdi je tewsabe gene ningnui je du rû’ngga mak ra hangge ning nâu zai ning na heleu’mpui hangna aige bamme je ngua le lau,” ze acheu bei de lei. 16Kane Lotbe â gîngtie di de lei; chidadege tinggîm angel’mpeu hangna ne pechu zai pe nâu zai pe na ’mpuimi hangna ba ’nzapgap lu Tingwang ne pechu ka’nggiabe ziegene namdi gene hela ’mbe penai ne nguapat kai bei de lei. 17Zai penai ne penui je hela nguapat kai lu dege, “Ring le ra hangge pak chu lau; ’nchai ’nriakpie se lau, zai bekâm ramme ge sau gai se lau; peloa ramme ge pak kai de lau, ningnui je rû’ngga mak ra hangge zeu,” ze rang gai bei de lei. 18Kane Lotbe ne penai je, “Hei a pau kena gau, chize â mak te lei; 19pie le lau, ning guâ ka’ngguapeu je nang ne ’nchâ bei, zai achu tew’nringgaibe ge ning ’nggiadi-desang ze teilia bei de lei; kane peloaram ’mbe â I paktatchi lak te lei, mâ-geze ’ndaikau wangchang mei dizai â I chai gu daseu. 20Pie le lau, wîbe keloa ge â paktat kai ra na de lei, zai chize â keloa kecheibe kau lei. Chige I pak’mbia gai ra pei lau—chize keloa poine mak ti lau?—dezai I ringpat tu de lei!” ze kacheu de lei. 21Pa ne pechu, “Pie le lau, aipau nang ne kiebe deu ge du I lun bei de lei, nang rangbe keloa ze I tew’ngga ra mak lei. 22Kelua ze chilia ’mbia pak kai de zu lau; chipau bâm nang chang de mak tâne mâ de I tewchi lak daseu,” ze acheu bei de lei. Chipauziegene chipau keloa ji ze Zoar ze ku de lei.
Sodom benai Gomorra Tewka’nsiabe
23Zoar keloa ge Lotbe gutchanggaibe luage naimik pat ti de lei.
24Chidadege tinggîm ge Tingwang dagene Sodom benai Gomorra peireige tingchu getaube benai hemi ruikeu ra Tingwang ne tew gai bei de lei; 25zai pa ne chi namdi ramme, bekâm ramme leine, zai namdi ge ziemmena bamme leine zai mâ-hîmra ramme leine tew’nsia kam ’ndi de lei. 26Kane Lotbe nâu ze pe napeu chai ’mbene pie gai bei de lei, dadege pa ’nchaîchutum mi gai di de lei. 27Zai Abrahambe â pa Tingwang suage sapkailube bâm ’mbe hechuasûn ze tat ti de lei; 28zai Sodom benai Gomorra zai bekâm ramme leine pa pie’nsukkeu gai dege, pie le lau, hemang kuiki gene mika patbe gum ze chipau heram gu mika kalui ze bambe ngau de lei.
29Kane Hera ne bekâm ge namdi ramme tewka’nsiabe luage, Hera ne Abrahambe je ’nningdau de lei, zai pa ne Lotbe bambe namdi ramme tewka’nsiabe bâm gene Lotbe je pak’mbia de ra lang gai bei de lei.
Moabme benai Ammonme zat Pîbang
30Chunage Lotbe â Zoar ge bamhingdibe ziegene pe na heleume hangna je ngua lu chigene zuapat ze peloaram ’mbe tat ze hekâuki ge bam di de lei. 31Pe na heleu’mpui chîngpui ne pe kinapui je, “Anai peu â chîng de da zai aipau dei ge anai je kelaktew ze ngualungrabe kau ’mpeumi hangkatte ’ngga de lei. 32Kei lei, anai peu je wain guîmeneu gai be kei lei, dezai anai pe dage jei gai lu anai name hang ngau le ra hangge zeu,” ze kacheu de lei. 33Chidadege chipau mai tingmuî ge wain guî de lei; chîngpui ne gut lu pe peu dage jei gai de lei; pa â pe na heleu’mpui jeikaugaibe du zai zuachudaidibe du chî mak lei. 34Zai bechaibe mai ge, pe sipui ne pe kinapui je, “Pie le lau, ’nzimai tingmuî ge I anai peu dage jei de lei; nemai muî ge du pechu wain guî dai kei lei; zai nang du gut ze pe dage jei gai le lau, dezai anai peu dagene anai hena bam le ra hangge zeu,” ze kacheu de lei. 35Chipau mai muî ge du penai ne pechu wain guî de lei; zai pe kinapui ne chu lu pe peu dage jei gai de lei; zai pa â pe na heleu’mpui jeikaugaibe benai chudaidibe mâ de chî mak lei. 36Aigum ze Lotbe na heleume hangna ze penai peu dagene napoine bam di de lei. 37Chîngpui ne ’mpeumi napoine lungkeu de lei, zai pe ji Moab ’ntak kai de lei; nemai riâ chang ze pa ze Moabme zat leine peu chang ze la lei. 38Pe kinapui du ’mpeumi napoine lungkeu ze pe ji hang Benammi ze ’ntak kai de lei; nemai riâ chang ze pa ze Ammonme zat leine peu chang ze la lei.
اکنون انتخاب شده:
JENESIS 19: ZEMEBSI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.