JENESIS 12
12
Abrambe je Hera ne Kube
1Tingwang ne Abrambe je, “Ning ram ning dei, ning kiduîme, zai ning peu ki sâu ze I ne ningchu ngualiarabe heram ’mbe tatchu lau. 2Ning chaname misongga bam ra I ne ningchu pei gu, zai penui â hezat kedibe kau chang gu lei. Nang zene ’nnamgaibe kau chang ra I ne ningchu ’nnam gai gu, zai ning ji tew’ndi gai gu lei. 3Ningchu ’nnamgaime je I ne ’nnam gai gu, kane ningchu desetkaime je I ne deset kai gu lei. Zai nang gene pezat leine je I ne ’nnam gai gu lei,” ze kacheu de lei.
4Abrambe pe tingkum riaksena ze mengeu chang dege, Tingwang ne pechu ranggaibeibe luigum ze Haran gene pa zuapat ti de lei; zai Lotbe du pe pamtew tat ti de lei. 5Abrambe pe nâu Saraile benai pe kinapeu na Lotbe, zai pe heurâ ramme benai Haran gene ngaume pe guâ ka’ngguame je ngua lu Kanaanram tat ra zuapat ti de lei. Kanaanram ge penui chang dege, 6Abrambe heram tatpelatat ze Shekem ge More gu ’mpubang riâ tatchang di de lei. Chipauting ge Kanaanme chipau dei ge lung bam rei de lei. 7Abrambe suage Tingwang ne liâ ze, zai acheu sa ze, “Ning chaname je peirabe ram ze aipau heram ze de lei,” ze kacheu de lei. Chidadege Tingwang pechu liâpeu je kellum ra Abrambe ne herâtewbe bâmra tew gai de lei. 8Chipau chângge Bethel gene naimikpat ’mbia pa tat’nduâtat ze peloa’ntûm ge pe gu hetiamki liâm gai de lei, naimik kêu ’mbia Bethel bam zai naimik pat ’mbia namdi bambe kakge bam de lei. Chige du pa ne herâtewbe-kaira tew gai lu, Tingwang je kakellum de lei. 9Zai pa tebeîtew-’nduâtat ze Negebram ’mbia tat kai de lei.
Ijip ge Abrambe Bambe
10Kanaan ge â herakûm wang di de lei; chidadege â herakûm ranbi-bidibe ziegene Ijip ’mbia tingkat bam gai ra Abrambe tat ti de lei. 11Ijipram zuagut ra heramrai tatka tena dege, pe nâu Saraile je pa ne, “Nang â ’mpuimi heleuyi kau de lei. 12Ijipme ningchu ngau dezai nang â a nâu lei, ze ’nning gai gu, zai achu penui ne tewchat ku de lei, kane ningchu â ring ra pei bu de lei. 13Nang â a kinapui lei, ze penui je acheu be lau; dezai ning ziegene achu du ring ra pei bu, zai achu du hereiheka bu lei,” ze rang gai bei de lei. 14Ijipram lung zuagut gap dege â pe nâu â heleu yi lei be Ijipme ne ngau de ngaupat ti de lei. 15Zai heguangsinpeu ramme Saraile je ngau lu dadege â Pharaobe je pe rasam satoa gai bei de lei; zai pechu Pharaobe ki ge teigut kai bei de lei. 16Pe ziegene Abrambe je du hereiheka zun bei, zai pe hangge melidung, getumsei ramme, hekunmerângsei ramme, pe guâ ’ngguarame ’mpuimi benai ’mpeumi ramme, hekunmerângpui ramme zai put-hu ramme pei bei de lei.
17Kane Abrambe nâu Saraile ziegene Tingwang ne Pharaobe benai pe kiduîme je herarît keteube ramme ne tewsâ bei de lei. 18Dadege Pharaobe ne Abrambe je kû lu pechu, “Achu nang ’ndaikau tâ tew gai bei lau? ’Ndaitew ze pa ze â ning nâu lei be ranglia mak lau? 19’Ndaitew ze ‘Pa â a kinapui lei,’ ze kacheu lau, chipauziegene I pechu a nâu hang lube zeu? Chidaze acheuzai aige ni, pechu ngua lu tat te zu lau,” ze pechu kacheu de lei. 20Dadege Pharaobe ne pe gu ziemmena je lang gai bei ze Abrambe benai pe nâu zai pe gu bambe ramme leine tei lu ze heram gene hela ’mbe gepâutua gai bei de lei.
اکنون انتخاب شده:
JENESIS 12: ZEMEBSI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.