Ranehlö 14
14
Hayööken Lòt Ang Aprāham
1Chalô tö e hē nuk sakāmö Amrafēl, rācha aṅ Sīnar, Arīòk rācha aṅ Ilasā, Kītörlōmör rācha aṅ Ēlam, Taitöl inrē rācha aṅ Kò-im. 2Kiyung cha-a nö lā-al Pēra rācha aṅ Sòtöm, lā-al Pirsā rācha aṅ Kòmòrā, Sinap rācha aṅ Atmā, Sēmipör inrē rācha Pēla (angū-ö ön Sōār). 3Ṙòkhöre vē nö hamūlöre nö el achāṙö Sittim (angū-ö ön Maisāl). 4Nët sīön samyeūheu chā-a nö kūön alaha Kītörlōmör, ngaich im linūöisīön samyeūheu cha-a nö ahôngen. 5Ngaich im finënsīön samyeūheu Kitörlōmör nö yih, töyik rācha hol ò inrē, ngaich fëlö Rifēm i Astòròtkarnem, Susim inrē i Ham, Emim inrē i Sāvēkiriatem. 6Yik aṅ Hôr inrē ip rôngö cha Sēir, söl Elpëran öp elinchōn. 7Havantöre chā-a ngaich, ngaich yih nö i Enmispat (angū-ö ön Kātes), ngaich keuheūtngörevahti tö panam aṅ Amelek Amôr inrē, yik mi-iyöng Hasasantēmār. 8Kunyī-inyre ngaich ök rācha Atmā, rācha Sēpò-im, rācha aṅ Pēlā (angū-ö ön Sōar); haṙāköre chā-a ngaich nö im kinyūngö nö lā-al cha el achāṙö Sittim; 9Lā-al Kitörlōmör rācha aṅ Ēlam, Taitöl rācha aṅ Kò-im, Amrafēl rācha aṅ Sḭnār, Arīòk inrē rācha aṅ Ilasār; fën tak rācha lā-al tö taneui tak. 10Tö tööḵlö ök achāṙö Sittim tö anūlö inpan ihong; ngaich yik rācha aṅ Sòtöm, aṅ Kômòrā inrē nö falngöre, ngaich chā-a nö fukngö nö umuh, ngaich chā-a yik tö ōtre nö falngöre nö ikui rôngö. 11Ngaich chā-a nö ṙòklöre tī tö nuk chehen aṅ Sòtòm, Kômòrā inrē, ṙòkhöre nuk nyā-aṅkūö cha, ngaich kiröönngöre chā-a. 12Kēḵĕ Lòt chā-a inrē, ök kikōnyö kūön hanöngkisānö Aprām, ök mī-iyöng Sôtòm, tö nuk chehen ò inrē, kiröönngöre ngaich.
13Ngaich umuh nö yihtöre ök hĕngtak tötkô-òngvah, ngaich vë-enynang Aprām ök Heprāi: iyöng inuk chōn tarpin angā-aṅ nuk chōn Mamrī aṅ Amôr, hanöngkisānö Askòl, hanöngkisānö Aner inrē; ngaich chā-a vē nö hol Aprām. 14Ngaich hē Aprām nö hang tö ök hanöng kisānö ò nö kēḵĕ, hachōnyö yik töharūnö angā-aṅ tarikre tökayôḵnyu nö i patī ò, lūöyòng hëvhörsīön tak, ngaich tölngö Tën nö lūḵ. 15Harēvngöre angā-aṅ ngaich tö hatööm nö lā-al cha, angā-aṅ, töyik kūön alaha ò, ngaich fëlö cha, lūḵu cha ngaich nö söl Hôpā, öp lā tavē tö Tamöskös. 16Kumtö nuk chehen angā-aṅ nö ṙòkhöre, kumtö ök hanöngkisānöre inrē, ang Lòt, nuk chehen ò inrē, töyik kikānö inrē, yik tarik inrē.
Hakòlò Āpraham Ang Melkisitĕk
17Ngaich ök rācha aṅ Sòtöm nö kunyī-inyre nö höngkūö ò, unôichrit invantö ò nö i finëlngen Kītörlōmör töyik hol ò rācha inrē, ik achāṙö Sāvē (angū-ö ön achāṙö rācha). 18Ngaich Melkisitĕk rācha aṅ Sēlöm nö kēḵtö rôtī vain inrē: kūönṙô ngam Tēv ök angā-aṅ lamātulöng. 19Ngaich hakôlò ò anga-aṅ nö ngöṙô, Tökôlò an yēḵ Aprām aṅ im Tēv lamātulöng, yōm halīöngö tumlat inrē: 20Tökôlò an yēḵ ngam Tēv lamātulöng, ngam kamëtö më tökunyaha elmat tömeh nö eltī meh. Ngaich angā-aṅ nö kēḵĕkūö ò hĕng hata i tösöm inuk taṙòkhöre. 21Ngaich ngöṙô ök rācha aṅ Sôtöm tö Aprām, Kēḵtö yip tarik inchu, kēḵ minë chehenre më-eṅ. 22Ngaich ngöṙô Aprām tök rācha aṅ Sôtöm, Hachônglö këlre chin im Mā Tēv, Tēv lamātulöng, yōm halīöngö tumlat inrē. 23Öt hòṅ hēngö kahë chin tö ta-īö ötrēhĕn yanòhkūö kunröpö, ötrēhĕn nup töng më-eṅ meh, hòṅ meh öt ngöṙô Vīlen Aprām chin nö kôlò: 24Höng kôḵngen nuk töng nyahāṅngö vē ṙāl tarik, ane inrē minchöḵö vē tarik vē hol chu; Aner, Askòl, Mamrī inrē, hökngen cha nö kēḵ nup minchöḵöre.
اکنون انتخاب شده:
Ranehlö 14: CANIBSI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.