INLAHEN 9
9
Invöötö ellōn Sôl
(Act 22.6-16; 26.12-18)
1Ṙòngmö uhômnyö pinnë-eṅlkūö ane inrē finëlngö yik mahaköp aṅ im Mā, ang Sôl, 2Chuh ik mākūö kūönṙô anga-aṅ, ngaich ve-ekūö ò tö līpöre; nö chuh Tāmöskös i yik kamhôṅka Yahūti; pòn hōtu, yē ò nö kanôtukūö tö Kristīön, kikōnyö, kikānö, nö kēten cha nö nyëkö nö i Yerūsalem.
3Ngaich hē ò nö kiröönngöre, ngaich röhta nö i Tāmöskös; ngaich hönglūk ök töyang aṅ el halīöngö nö havīlen ò. 4Fukngö anga-aṅ ngaich nö el tumlat; ngaich hang ök ṙô anga-aṅ, tö ngö ṙô tö ò, Sôl, Sôl! Kūöyòh öm öthakôlò chu? 5Ngaich ngö ṙô anga-aṅ, Mā Achīö Öm Me-eṅ? Ngaich ngö ṙô Anga-aṅ, Yēsū Chin Chu-ö, Öich töthakôlöngṙô tö meh. Chök man, öm röönngökūö ngam töchökhukūö. 6Ngaich kichëyöre anga-aṅ, pingangkūö inrē; ngaich ngö ṙô tö Ò, Mā! Asuh ap lōn Meh, la-en chu? Ngaich ngö ṙô ngam Mā tö ò, Choholre man; kuhēthötre im panam; vënyu nang man min töp la-enre.
7Ngaich yik tarik, hol ò nö kiröönngöre nöng sökhaka, nöng öt ṙô-òv; höng hang pööiny ṙô; öt maheūṅkuvö pöri. 8Choholre ngaich Sôl, nö ṙā-ang el tumlat; ngaich hē ò nö milaklö matre, öt maheūṅkuvö anga-aṅ. Ngaich cha-a nö sarōk kël ò; ngaich kēten ò nö i Tāmöskös. 9Lūöi sumkam anga-aṅ nö öt meuk, öt nyā, öt òk,
10Hĕng taka ök umuh mahaköp i Tāmöskös, Ananī minënyö. Ngö ṙô ngam Mā tö ò, nö i heūvö, Ananī. Ngaich ngö ṙô anga-aṅ, Mā; ihih chini. 11Ngaich ngö ṙô ngam Mā tö ò, Choholre man; kuṙòh, kiröönngöre ip talöökö, Töchip minënyö. Hatönken öp tö hĕng tak pömchö tarik aṅ Tārsös, i patī Yūtā, Sôl öp minënyö ò. 12Ṙònghöichṙen ap nö ve-ekūötēv; ngaich anga-aṅ nö meuk öp tarik, nö yihtöre, Ananī minënyö, ngaich ṙātö eltīre nö in ò pòn hōtu anga-aṅ nö meuk.
13Ngaich ngö ṙô Ananī, Mā! Maṙôngö ahang chin tö inlaha ap tarik, tö ṙôken chanökhu tī ò tö yip töhet i Yerūsalem. 14Ngaich yih anga-aṅ nö chönguvö nö ihih, tö aṅ i yip mākūö kūönṙô nö nyëk yip taṙòkhöre mahavëkö Minënyö Meh.
15Ngö ṙô pöri ngam Mā tö ò, Kuṙòh, kiröönngöre man, tön aṅtī Chu ap nö katöllöngö, nö mahaköp Mine-eny Chu i kūö yip tahëng mihëṅṙö, rācha inrē, i kūö yip kūön Israĕl inrē. 16Hameukhömat ò Chin min tö ṙôken kanihngen ò tö kūö Minë-eny Chu.
17Kiröönngöre ngaich Ananī; kuhēthötre ngaich nö el ök patī; ngaich ṙātö eltīre nö in ò, nö ngö ṙô, Hol chu, Sôl; tīntu chin tö ngam Mā, ang Yēsū, ngam tömeūkö tö meh, el talöökö tök yanihih meh; hòṅ meh öm meuk īnu inrē tö ngam Töhet Fanöinylö. 18Ngaich ilööṙen nö sukngöre nö ṙā-ang i mat ò, ök tö sā kunlöhö, ngaich meuk anga-aṅ. 19A Choholre ngaich nö vōkö. Nyā anga-aṅ ngaich; ngaich ngëḵelre alaha.
Mikāhten Sôl Nö I Tamāskös
b Rĕh rô-òten anga-aṅ nö i yik mahaköp nö i Tāmöskös. 20Iṙūö ahangken Yēsū anga-aṅ, nö el chūök vine-eṅkūötēv, tö Ò nö Kūön ngam Tēv. 21Ngaich ṙòkhöre yik hamang ṙô ò nö uṙeh; ngaich ngö ṙô, Röh ang nö ngòh tötmahakôlò cha yip mahavëkö ngih Mine-eny, i Yerūsalem; ngaich yih anga-aṅ nö ihih, pò ò nö hòṅ nyëkö cha, nö kēten cha nö i kūö yip mākūö kūönṙô?
22Ṙuhöl alahare pöri Sôl; ngaich kitöngngö lōn yik Yahūti aṅ Tamāskös; hameukten Ò nö Anga-aṅ Kristū. 23Ṙōlhang sumkam ngaich, ngaich yik Yahūti nö ve-ekūöre nö hòṅ fëlngen ò. 24Ngaich pöri ang Sôl nö akahalōn tö e, Höngkūö inkūp cha-a, tö sakāmö, hatööm inrē, nö hòṅ fëlan. 25Ngaich pöri yik haköp tö ò nö kēḵ an tö hatööm; ngaich hatūöiten ò nö löktökui ök kinlōngö nö el kuvôkö.
I Yerusalem Ang Sôl
26Chalô anga-aṅ nö i Yerūsalem, ngaich hameuktenre nö hamūltöre nö i yik mahaköp; ṙòkhöre pöri cha-a nö pa-ekūö, pòn öt nyātölōn tö ò nö mahaköp. 27Sarōkten ò pöri Parnapas nö i yik tanīnöṙô, ngaich ve-eny nang cha tö inlahen ò nö meuk kūö ngam Mā nö el talöökö; tö Ò inrē nö ve-ekūö ò; nö i Tamāskös anga-aṅ inrē nö öt pinheṅ-eṅvkūö nö mumkahten nö i Mine-eny Yēsū. 28Ngaich in cha anga-aṅ nö havötköre nö i Yerūsalem, mumkahten nö i Mine-eny ngam Mā. 29Ngaich anga-aṅ nö ve-ekūö, ane inrē lā-al ṙô yik aṅ tahëng Yahūti. Ngaich hòṅ fëlngen ò cha-a. 30Ngaich hē yik hol ò nö akahalōn tö e, ngaich söömten ò cha-a nö i Kaisarī; ngaich tīnngen ò nö chuh Tārsös.
31Keuheūtngöre chūök ngaich ngam māṅ, i Yūtā, Kelelī, Samariā inrē, nö kuchīken; sīöplöre, lök i pinheṅ-eṅkūöre inrē tö ngam Töhet Fanöinylö, nö ṙuhölre ṙôngö.
I Littā Tö Yôppā Ang Pītör
32Ngaich hē Pītör nö keuheūt chahūhure, yihtöre anga-aṅ inrē nö i yik töhet, yik mī-iyöng Littā. 33Ngaich hĕng tak ök tarik kanôtökūö ò, Ainīös ök mine-enyò ök töhëvhör samyeūheu nö el chamamre, pò ò nö tö lum. 34Ngaich ngö ṙô Pītör tö ò, Ainīös; lööken man ngaich tö tī Yēsū Kristū. Choholre lömlö ngam chamamre. Iṙūö choholre ngaich anga-aṅ. 35Ṙòkhöre yik aṅ Littā, aṅ Sārön inrē nö meūkö ò; ngaich havöötökūöre nö im Mā.
36Ngaich hĕng taka ök umuh mahaköp, i Yòppā, Tapīta ök mine-eny ò, ök tö ngö manah Tòrkas. Töpōyen la-en ök tö tölöök, inlōnhöti inrē. 37Ngaich vahavö anga-aṅ; ngaich kapah. Keuheūthë tī cha-a nö vōkan; ngaich haṙōlngen ò nö el ök lātulöng urôhò. 38Öt marôvat ap Littā tö Yòppā. Ngaich yik mahaköp nö hāngö Pītör nö umuh; ngaich nët tak nak tötīni, nö havëken ò; nö ngö ṙô, Uh man ahāṅtö yanihihre in ih. 39Choholre ngaich Pītör, ngaich kiröönngöre nö in cha. Chalô anga-aṅ, ngaich ngôṅlöngö nö el ök lātulöng urôhò. Ngaich ṙòkhöre yik tafīösi kikānö nö peunyhökūö ò; ngaich hameuktö nuk inyut, kinṙum inrē, chahōk ò hē ò nö ṙòngmö in cha. 40Kumnyīnyu pöri cha-a tö Pītör, nö ngö ṙô, Tapīta; choholre man. Milaklö matre ngaich anga-aṅ; ngaich ūichlöre, hē ò nö meukkūö Pītör. 41Kētö këlre ngaich anga-aṅ nö in ò, ngaich hachohlen ò. Ngaich havëtö yik töhet, yik tafīösi inrē kikānö; kēten ò anga-aṅ ngaich nö aṅ, nö in cha. 42Akahalōn ngaich nö ṙòkhöre yik aṅ Yôppa tö e, ngaich maṙôngö yik ṙamātö ellōnre nö im Mā. 43Ṙōl sumkum ang Pītör nö i patī Sīmōn, ök yōm uk.
انتخاب شده:
INLAHEN 9: CANIBSI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
