INLAHEN 5
5
Nā Ananī Nāṅ Sappīrā
1Hĕng taka ök umuh tarik, Ananī ök mine-eny ò, tök pihö ò inrē, Sappīra; i nyihngö inlānenre cha-a; 2Ngaich ròngti hayunngö tö nuk ṙāi; (ök pihö ò, ök tö-akahalōn tö e;) ngaich kētö nup töròngti cha-a; ṙātö u ngaich nö i röön yik tanīnöṙô. 3Ngaich ngö ṙô Pītör tö ò, Ananī; Sitih ang ngam Sātān nö hatööklö ellōn meh, öm hōtu minyôinyaṅ i ngam Töhet Fanöinylö, ngaich ròngti hayunngö tö ṙāi ök taṙeū? 4Hē e nöngngöh, öt inlānen meh hòng angū-ö? Keuheūthë tī me-eṅ inyihngö e öt kanahanglōn meh hòng? Sītih ömeh ngatī lōn ellōnre? 5Rö-ö man minyôinyaṅ i tarik, tön im Tēv. Höng hangtöre Ananī tö minë ṙô, fukngö ngaich nö kapah. Ngaich pa-ekūö cha-a nö ṙòkhöre, yik hamāngö e. 6Ngaich yik ṙāl tarik nö haṙungngen ò; keūnan ngaich, nö ulngen ò.
7Lūöi köṅny ṙô rô-angen, hē ök pihö ò nö kuhēthötre, öt akahalōn tök töngaichngen. 8Ngaich ngö ṙô Pītör tö ò, Ve-eny nang chu man, yē nāṅ höng ngatī ṙôken ṙāitī inyihngö ök taṙeū. Ngaich ngö ṙô anga-aṅ, Hôṅ; höng ngatī. 9Ngaich ngö ṙô Pītör tö ò, Kūöyòh an hĕngrelōn kalah ngam Töhet Fanöinylö ngam Mā Tēv? Yĕh meuk röön yip amulngö ök pihö meh, nö i kūö inkūp. Keunnyu man min tö cha. 10Fukngö ngaich anga-aṅ nö ilööṙen, nö i röön Pītör; ngaich kapah. Kuhēthötre yik ṙāl tarik; ngaich kôtökūö tö ò nö kapah. Keunnyen ò cha-a ngaich, ngaich ulngen ò nö ranghö ök pihö ò. 11Ngaich pōi pinheṅ-eṅkūö ngam māṅ; yik taṙòkhöre inrē hamāngö u.
La-en Minkahngö Pinngang Kūö Inrē
12Löktö eltī yik tanīnöṙô, nuk töpōyen minkahngö, pinngangkūö inrē, tī cha nö i yik tarik. Ngaich cha-a nö ṙòkhöre nö hēng mūl nö el ök rittūi Sòlòmön. 13Öt hĕng tak pöri i yik tahëng tö hòṅ kalah nö hamūltöre nö in cha; eū-eu cha pöri yik tarik. 14Ṙūötöre ṙôngö inrē yik ṙamātö ellōnre nö im Mā, hĕnghöre kikōnyö, kikānö inrē. 15Ngaich uroh cha-a nö keunnyö yik tövahavö nö el talöökö, ngaich ṙāten cha nö el chamamre, chatrāi inrē pòn hōtu öp nyat Pītör nö hanyattökui yip rēvre tö cha, yĕn chööḵöng. 16Maṙôngö yik inrē tarik yamihtöre, ṙā-ang i nup panam i chīṙö Yerūsalem, kumtö yik tövahav, yik tötkôlò inrē tötī tötlöök sī-ö. Ngaich ṙòkhöre cha-a nö lööken.
Hakihtuṙen Yik Tanīnöṙô
17Chohol alahare ngaich ök mākūö kūönṙô, ṙòkhöre inrē yik hol ò; yik töng Satukī; ngaich cha-a nö pōi kumnyahlōn. 18Kēḵ yik tanīnöṙô cha-a ngaich; ngaich öpngökūö cha nö el kinlōngö. 19Hĕng tak pöri ök ma-aṅhānga aṅ im Mā Tēv, lamöpnyökūö inkūp ök kinlōngö, tö hatööm; ngaich kēḵnyen cha; nö ngö ṙô, 20Kuṙòh; söklöre yin, ṙô-òv el ngam töhet chūök yip tarik tö nup ṙô ngih nômö. 21Ngaich hē cha nö hāngö e, kuhēthötre cha-a ngaich nö el ök töhet chūök, tö minlīlö peuheū; ngaich haköphöti. Yihtöre ngaich ök mākūö kūönṙô, yik hol ò inrē; ngaich havëtö yik kamhôṅka ṙòkhöre yik mākūö yik kūön Israĕl inrē; ngaich tīnngö kameḵeṅren cha nö el kinlōngö. 22Hē yik tösökhak pöri nö yih, ngaich öt kôtökūö tö cha nö el kinlōngö. Havantöre ngaich nö ve-eny nang cha; nö ngö ṙô. 23Löphakkūö ap kinlōngö, nö meūkö tö ih, nö ötpinlānguṙen; sökhak yip amahati nö i kūö inkūp. Hē ih pöri löpnyökūö e, ngaich öt hĕng tak maheuṅk īhö tö tarik, lātuhēt. 24Ngaich hē ök yōm ngam töhet chūök, tö yik mākūö kūönṙô inrē, nö hang minë ṙô; pōihangen öt mikahlōn cha-a ngaich tö cha, töp lökngö e. 25Ngaich hĕng tak ök yamihtöre, nö ve-eny nang cha, nö ngö ṙô, Sökhak yip tarik yīö nö el kinlōngö. 26Ngaich kiröönngöre ök yōm ök töhet chūök, nö holtö yik tösökhak, nö kē-ĕren cha; öt chökhutī pöri, pòn pa-ekūö tö yik tarik; pòn sōḵ nö kulëhe.
27Ngaich hē cha nö kēten cha, ngaich asöklen cha nö i kūö yik kamhôṅka. Ngaich hatönö cha ök mākūö kūönṙô, nö ngö ṙô. 28Samôten yīö in haköphöti i ngih Mine-eny. Yĕh meuk; ngaich yin yih tööḵöl tī tö Yerūsalem, tö ngam ṙô yīö haköphöti; öi hòṅ kētö kui ih tö mahām ngam tarik. 29Ngaich ngö ṙô Pītör, yik tanīnöṙô inrē, nö sapṙô cha, Hòṅ hang chöngö ngam Tēv in, mööḵlö tö chöngö tarik. 30Hachohlen Yēsū an ngam Tēv yik muvöhngö hī; ngam töfëli tö yīö, ngaich kilöllöngö nö i rōi chōn. 31Anga-aṅ hapōilö ngam Tēv nö lāhāmö Ò, nö Rācha, Mahayööken inrē; hòn kētö invöötö ellōn nö in Israĕl, inṙē-ĕl tökööl inrē. 32Ihö in ameūkö u; ngatī inrē ngam Töhet Fanöinylö, ngam kahëtö ngam Tēv nö i yip hamang chöngö Ò.
33Hē cha pöri nö hāngö e, ngaich cha-a nö ṙatngöre ellōn, ngaich hòṅ fëlngen cha. 34Hĕng tak pöri, ök aṅ i yik kamhôṅka, samöklöre, Feresī ök, Kamliĕl ök mine-eny ò, mahaköptö chöngö, tömilēḵaṙen tö yik taṙòkhöre tarik; hōtö kine-eny yik tarik sin anga-aṅ, nö elkahôyö. 35Ngaich ngö ṙô anga-aṅ tö cha, Yī-ö tarik aṅ Israĕl; haṙēmngenre yin i vē tarik, tö nup tī yīö tö cha. 36Tön marô-angen ök Teūtas nö ngaich ök vamī-iṅlre nö mā. Maṙôngö yik tarik mahamūltöre nö in ò, lohten nö fënòng; yik tö fëli; ṙòkhöre inrē yik hamang ṙô ò nö pirāti, ngaich nöng tö rö-ö. 37Unôichrit ò, ang Yūtā, ök aṅ Kelelī; hē kinṙeuk tum taka; maṙôngö ngahôṅ anga-aṅ tö holre. Kapah inrē anga-aṅ; ṙòkhöre inrē yik hamang ṙô ò, nö pirāti. 38Ngö ṙô chin tö yīö töngamuh, Ṙa-angre yin i vē tarik; hökngen cha. Pò ngam lōn cha, la-en cha inrē, nö aṅ i tarik öre; ngaich kô-òren nö öt kôḵòlkui. 39Yē e pöri nö aṅ im Tēv; öt kô yī-ö tiṙōlngen cha, höng lamā-al kūö ngam Tēv yin min. 40Ngaich ṙòkhöre cha-a nö hōḵo ṙô ò; ngaich hē cha nö havëhöt yik tanīnöṙô nö in cha; fōho cha ngaich, ngaich sōten cha nö ṙô-òv nö i Mine-eny Yēsū, ngaich hökngen cha nö kiröönngöre. 41Kiröönngöre yik tanīnöṙô nö ṙā-ang i kūö yik kamhôṅka; ṙāmölōn töre nö halöngtuṙen nö sumrōngikūö tökūö ngam Mine-eny; 42Ngaich örhĕnghang sumkam cha-a nö ël ngam töhet chūök, i patī inrē, öt ṙākenre nö haköphöti, mumkahten inrē, tö Yēsū nö Kristū.
انتخاب شده:
INLAHEN 5: CANIBSI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
