Simuluho 35
35
Mulimu u tohonolofaza Jakobo kwa Betele
1 #
Sim 28.11-17
Mulimu a li ku Jakobo, “U itukiseze ku ya kwa Betele, mi u y'o yaha kwateñi. U y'o yahela Mulimu katala, yena Mulimu ya n'a iponahalize ku wena ha n'o saba muhulwan'a hao Isau.”
2Jakobo kiha s'a bulelela lubasi lwa hae ni ba ba ne ba inzi ni bona kaufela, a li, “Mu zwise milimu ya bazwahule ye mwa mandu a mina. Mu ikenise, mi mu apale liapalo ze kenile. 3Lwa tuta mo, lu ya kwa Betele, ko ni ka y'o yahela Mulimu katala, yena Mulimu ya ni tusize mwa liziezi, mi ya ni babalezi kai ni kai ko ne ni ile.” 4Kiha ba se ba fa Jakobo milimu kamukana ya bazwahule ye ne ba na ni yona, ni macoco a ba ne ba apezi. Zeo a li pumbeka kwatas'a kota ya oke ye n'e li fakaufi ni Sikemi.
5Jakobo ni bana ba hae ha ba se ba funduka, batu ba mwa minzi ye fakaufi ba kenelwa ki sabo ye tuna hahulu, mi ha ba si ka ba lelekisa. 6Jakobo ni batu ba hae kamukana ba t'o fita mwa Luzi, ili ona Betele, mwa naha ya Kanana. 7A yaha mwateñi katala, mi sibaka seo a si biza El Betele, kakuli Mulimu n'a iponahalisize ku yena hona foo ha n'a saba muhulwan'a hae. 8Debora ya n'a uta Rebeka a shwa, mi a bulukwa kwa kota ya oke kwatuko a Betele. Cwale kota ye ya bizwa Oke ya Sililo.
9Jakobo h'a zwa kwa Mesopotamia, Mulimu a iponahaza ku yena hape, mi a mu fuyaula. 10#Sim 32.28 Mulimu a li ku yena, “Libizo la hao ki Jakobo, kono ku zwa nako ye, u ta bizwa Isilaele kuya kuile.” Cwale a bizwa Isilaele. 11#Sim 17.4-8 Mulimu kih'a li ku yena, “Ki na Mulimu ya Maata Kaufela. U be ni bana ba bañata. Ku wena ku ta zwa macaba a mañata, mane ni malena ba ta fumaneha ku ona. 12Ni ta ku fa naha ye ne ni file Abrahama ni Isaka, mi ki yona ye ni ka fa ni lusika lwa hao mwamulaho a hao.” 13Cwale Mulimu a mu siya hona fo f'a n'a bulelela ni yena, mi a kutela kwa lihalimu. 14#Sim 28.18-19 Jakobo a yemisa licwe la kupuzo mwa sibaka seo. A sela ku lona mpo ya ze nwiwa. Kihona a sela ni oli. 15Sibaka seo a si biza Betele, kakuli Mulumu n'a bulezi ku yena moo.
Lifu la Rahele
16Ba zwa mwa Betele, mi ha ku se ku siyezi sibakanyana sa ku y'o fita kwa Eferata, mulwalo wa Rahele wa zuha, mi a pepa ka tata. 17Mba ha i se i zuhile ka maata, ya n'a mu pepisa a li, “U si ke wa saba. I sa li mushimani hape.” 18N'a s'a shwa, mi ha s'a felelwa ki moya, a li, “Ki yena Benoni,” kono ndat'ahe a mu beya la Benjamine.
19Rahele ha s'a shwile, a bulukwa mwa nzila ye ya kwa Eferata, ona Betelehema kacenu. 20Jakobo a yemisa licwe la kupuzo fa libita la hae, mi lona Licwe la Rahele leo li sa li teñi ni kacenu. 21Isilaele a zwelapili, mi a y'o tibelela kwabuse bwa tawa ya Edere.
Bana ba Jakobo
(1 Lita 2.1-2)
22 #
Sim 49.4
Isilaele ha n'a sa pila mwa naha yeo, Rubeni a kopana ni Biliha, yo muñwi wa basali ba ndat'ahe. Isilaele a utwa taba yeo, mi a nyema hahulu.
Jakobo n'a na ni bana ba lishumi ka ba babeli. 23Bana ba Lea n'e li Rubeni, mweli wa Jakobo, Simioni, Livi, Juda, Isakare ni Zebuloni. 24Bana ba Rahele n'e li Josefa ni Benjamine. 25Bana ba Biliha, mutang'a Rahele, n'e li Dani ni Nafetali. 26Bana ba Zilipa, mutang'a Lea, n'e li Gadi ni Asere. Ba, i n'e li bona bana ba Jakobo b'a n'a pepile ha n'a li mwa Mesopotamia.
Lifu la Isaka
27 #
Sim 13.18
Jakobo a taha ku ndat'ahe mwa Mamare, o bizwa Kiryati-Ariba kamba Heberoni, ko ne ba yahile bo Abrahama ni Isaka. 28Isaka n'a s'a na ni lilimo ze mwanda ka mashumi a supile ni li li liñwi h'a shwa. 29A y'o kopana ni bahabo ba ba shwile ha n'a s'a li mucembele luli, mi bana ba hae bo Isau ni Jakobo ba mu buluka.
Currently Selected:
Simuluho 35: Lozi09
Tõsta esile
Share
Kopeeri
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.