Simuluho 34
34
Dina u swalwa likalala
1Ka lizazi le liñwi Dina, mwan'a Jakobo ni Lea, a y'o potela basali ba bañwi ba mwa naha yeo. 2Sikemi, mwan'a Hamori wa Muhiti ya n'a li mulena wa sibaka seo, h'a bona musizana yo a mu swala likalala. 3Kono niha s'a mu sweli cwalo a ikutwa kuli u mu lata ka pilu ya hae kaufela. Kih'a lika ku mu omba-omba. 4Cwale kih'a kupa ndat'ahe, a li, “Ni batele musizana yo, ni mu nyale.”
5Jakobo a utwa kuli mwan'a hae n'a tompolozwi ki mutu kono, kakuli bana ba hae ba bashimani ne ba sa li mwa naheñi kwa ku lisa, h'a si ka eza se siñwi ku fitela ha ba kuta. 6Hamori ndat'ahe Sikemi a y'o bulela ni Jakobo. 7Bana ba hae ba sa fita feela ku zwa ku lisa mi ba utwa litaba zeo, ba utwa butuku. Ba halifiswa hahulu ki kezo ya Sikemi, ili nto ye maswe ye ne shwaula batu ba Isilaele ka ku swala mwan'a Jakobo likalala cwalo. 8Hamori a li ku bona, “Mwan'a ka, yena Sikemi, u lata hahulu mwan'a mina. Cwalehe, na mi kupa bahesu, mu mu lumelele a mu nyale. 9A lu kopanyiwe ki manyalo. Lu mi nyalele, mi ni mina mu lu nyalele. 10Fohe mu ta ina ni luna mo, mwa naha ya luna. Mu ka na mwa ikahela ko mu lata, mu itekiseze mu nze mu lukuluhile mi mu be ni liluwo.”
11Cwale Sikemi a li ku ndat'ahe Dina ni kwa likaizeli za hae, “Ni kupa kuli mu ni lumelele ka musa, mi ni ta mi fa se mu bata kaufela. 12Mu ni bulelele limpo ze mu bata, mi mu pahamise lionda mo mu latela. Ni ta mi fa se mu bata kamukana, haiba mu ni lumelela ku mu nyala.”
13Bana ba Jakobo ba alaba Sikemi, ni Hamori ndat'ahe, ka mukwa o n'o ka ba puma kakuli Sikemi n'a tompolozi Dina kaizel'a bona. 14Ba li, “Ha lu lumeleli kaizel'a luna ku nyalwa ki mutu ya si ka ya kwa mupato. Kezo yeo n'e ta ba tompololo ku luna. 15Lu ka lumela feela ha mu ka swana ni luna, ka ku isa banna kaufela kwa mupato. 16Fohe, lu ta mi lumelela ku nyala bana ba luna, ni luna lu nyale ba mina. Lu ta yaha mwahal'a mina. 17Kono ha mu sa lumeli kelezo yeo, mi mu sa yi kwa mupato, lu ta mu nga, lu ikele.”
18Manzwi ao a utwahala hande ku Hamori ni ku mwan'a hae Sikemi. 19Mutangana h'a si ka sinya nako, mi kapili a eza se ne si hupuzwi, kakuli n'a lata hahulu mwan'a Jakobo. I n'e li yena ya n'a kutekeha hahulu mwa mba ya bona kaufela.
20Hamori ni Sikemi, mwan'a hae, ba ya kwa munyako wa munzi ko ne ba kopanelanga batu, mi ba y'o bulela ni ba munzi wa bona. 21Ba li, “Batu ba ba twaeleha. Mu ba tuhele ba pile mwa naha ya luna, mi ba izamaele mo ba latela. Naha ki ye tuna. Ya lu likana luna ni bona cwalo. Lu inyalele bana ba bona, mi ni luna lu ba fe bana ba luna ba inyalelwe. 22Kono batu ba, ba ta lumela ku pila ni ku ba sicaba si li siñwi ni luna ha lu ka lumela feela ku isa banna kamukana kwa mupato, sina bona ha ba ile kwa mupato. 23Kana limunanu za bona, tutu ya bona ni likomu za bona ha li na ku ba za luna ha lu ka ba lumelela ku pila mwahal'a luna, nji?” 24Batu ba munzi kaufela ba lumela muhupulo wa Hamori ni mwan'a hae Sikemi, mi banna kaufela ba isiwa kwa mupato.
25Mwamulaho a mazazi a malalu, banna ba sa kuliswa ki ku ya kwa mupato, bana ba Jakobo ba babeli, bo Simioni ni Livi, likaizeli za Dina, ba nga mikwale ya bona, ba kena mwa hae ba si ka lemuhiwa, mi ba bulaya banna kamukana. 26Ba bulaya Hamori ni mwan'a hae Sikemi. Kihona ba nga Dina mwa ndu ya Sikemi, mi ba ikela. 27Bana ba Jakobo ba bañwi ba lwanisa ba ba holofezi, mi ba ikungela za butokwa kamukana mwa hae, kakuli kaizel'a bona n'a shwauzwi. 28Ba nga mitapi ya lingu ni lipuli. Ba nga likomu, limbongolo ni ze ñwi kamukana ze mwa hae ni mwa masimu. 29Ba nga bufumu kaufela, ba hapa basali ni bana, mi ba lwala lika kamukana ze ne li mwa mandu.
30Jakobo a li ku Simioni ni Livi, “Mwa bona, mu ni kenyize mwa ziezi. Ka nako ye, batu ba mwa naha ye kamukana, ili Makanana ni Maperizi, ba ni toile. Ha ni na batu ba bañata. Haiba ba ni kubukanela, mi ba ni lwanisa, ni ta bulaiwa hamoho ni lubasi lwa ka cwalo.”
31Kono bona ba alaba, ba li, “Ha lu na ku lumela kaizel'a luna ku eziwa inge lihule.”
Currently Selected:
Simuluho 34: Lozi09
Tõsta esile
Share
Kopeeri
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.