Simuluho 33
33
Jakobo u kopana ni Isau
1Jakobo a bona Isau a taha ni batu ba hae ba mianda ye mine, mi cwale a kauhanya bana. Ba bañwi ba ya ku Lea, ba bañwi ku Rahele, mi ba bañwi a ba abela batanga ba basali ba babeli. 2Kwa etelela batanga bao ni bana ba bona, kihona ku tatama Lea ni bana ba hae, mi bao ba latelelwa ki Rahele ni Josefa kwamulaho. 3Jakobo, yena, a ba fitelela, mi a y'o kubama fafasi a nz'a inama ni ku zusa toho, inge ya showelela, hasupile ku fitela a t'o fita ku muhulwan'a hae. 4Kono Isau a mata ku y'o mu katanyeza, a mu swala, toho ya hae ili fa mulala wa Jakobo, mi a mu tubeta. Ba lila mwa bubeli bwa bona. 5Isau h'a talima-talima, a bona basali ni bana. Kih'a buza, a li, “Ki bo mañi ba, b'o zamaya ni bona?”
Jakobo a alaba, a li, “Muñ'a ka, ba ki bana b'a ni file Mulimu ka lilato la hae.” 6Cwale basali ba batanga ba taha ni bana ba bona, ba t'o kandelela. 7Ba tatamwa ki Lea ni bana ba hae mi kwa mafelelezo, kwa taha Josefa ni Rahele. Ni bona cwalo ba t'o kandelela.
8Isau a buza, a li, “Sitopa sani bo, se ni katani?”
Jakobo a alaba, a li, “I n'e li sa ku itapelela ku wena, muñ'a ka.”
9Kono Isau a li, “Munyan'a ka, ni na ni ze ñata ni na. U ipulukele s'o na ni sona.”
10Jakobo kih'a li, “Batili, haiba ni amuhezwi ka tabo, a ku amuhele ni wena mpo ye ni ku fa. Ha ni bona pata ya hao, mi sihulu ha u ni amuhezi ka tabo cwana, ku na, ku swana inge ni bona sifateho sa Mulimu kasibili. 11Muñ'a ka, amuhela mpo ye ni ku tiselize. Mulimu u ni shemubile ka ku ni fa ze ni tokwa kamukana.” A tundamena ku mu susueza cwalo ku fitela a i amuhela.
12Isau a li, “A lu itukise, lu funduke. Na, ni ta itangeta.”
13Jakobo a alaba, a li, “Muñ'a ka, wa ziba kuli banana ba fokola, mi hape ni hupula lingu ni likomu hamohocwalo ni manamani a zona. Haiba li ka zamaiswa ka tata niha i ka ba zazi li li liñwi feela, mutapi kaufela u ta shwa. 14Muñ'a ka, u itangete. Na, ni ka latelela ka bunya, kono ni nze ni lika mo ni konela kaufela ku akufa ni likomu ni banana, ku fitela ni y'o ku fumana kwa Seiri.”
15Isau a li, “Cwalehe, ni ku siyele ba bañwi kwa batu ba ka.”
Kono Jakobo a alaba, a li, “Batu ba ha ni ba tokwi. Se ni bata feela ki ku utwana ni wena.” 16Cwale, ka lona lizazi leo, Isau a funduka ku kutela kwa Seiri. 17Kono Jakobo a ya kwa Sukoti, kw'a il'o ikahela ndu ni litebule za likomu za hae. Kikabakaleo sibaka seo ha si bizwa Sukoti.
18Jakobo a y'o fita hande mwa munzi wa Sikemi, mwa naha ya Kanana, h'a kuta ku zwa kwa Mesopotamia. A yaha mafulo a hae mwa simu ye ne li fapil'a munzi. 19#Josh 24.32; Joa 4.5 A leka kalulo ya simu yeo ku ba lusika lwa Hamori, ndat'ahe Sikemi, ka mwanda wa muwaya-waya wa silivela. 20A yaha katala hona foo, mi a ka biza El-elohe.
Currently Selected:
Simuluho 33: Lozi09
Tõsta esile
Share
Kopeeri
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.