Atu 8
8
Saulu hã isazei'wa norĩ ãma te te irowasutu na'rata zé wasu'u
1-3Estewã da te iwĩrĩzém na hã ma tô Saulu tawamhã dapa'uze.
Tawamhã aibâ norĩ hã ma tô Estewã siwi tisẽ, 'Re ihâimana u'âsi mono zadawa 'madâ'â pese 'wa norĩ hã. Te te siwi sẽrẽ wamhã, te ãma ti'ru'ru, wawai 'rãihâ na. Tawamhã Estewã dâ'â parimhã, bâtâ na ma tô awa'awi sada tazahi za'ra ni, isazei'wa norĩ zada. Tahawa, isazei'wa norĩ hã Zeruzalẽ ãma 're isi'ubumroi mono zô, ma tô rowasédé hã sô tiwatobro na'rata za'ra, sada danhiti'ru za'ra wa. Saulu hã Zezusihi zazei'wa norĩ ãma ma tô rowasutu, isazei'wa hâimanazé hã si'utõrĩ da. 'Ri baba te nasi zasi, isazei'wa norĩ zô. Tawamhã rob u te te nasi da'anhamra, aibâ hã duré pi'õ norĩ hã. Taha pari, te nasi te te da'ãma arobâdâ, te te nasi da'a'maza da, dazazéb 're. Tahawa, isazei'wa norĩ hã ma tô te te siwi ropé, Zeruzalẽ hawi. Ta hawimhã Zudéa u ma tô te te ropé, duré Samaria na danhipti'a nho'õmo nhisi u zama, daza'rui mono bâ. Zezusihi zadawa wasu'u'wa norĩ si te zahadu 're si'ubumro, Zeruzalẽ ãma hã.
Samaria ãma, Filipi hã iwasu'uwẽ na te te dama irowasu'u za'ra zé wasu'u
4Tawamhã daro mono bâ, isazei'wa norĩ te te iropéi mono hã ma tô te te dama 're rowasu'u za'ra, Cristuhu wasu'uwẽ na hã. 5Tawamhã Filipi hã Samaria na danhipti'a nho'õmo nhisi u, ma tô mo. Tame ma tô Cristu hã te te dama 're wasu'u, 'Re ihâimana u'âsi mono te te ipisudu hã, Danho'reptui'wa da. 6Marĩ iwẽ hã dama i'manharĩ waihu'u'õ hã ma tô te te dama 're ab'manharĩ. Filipihi mreme hã da te wapari za'ra wamhã, aihĩni ma tô imreme na 're danhopré, marĩ iwẽ hã te te 're i'ab'manharĩ mono hã da te 're 'madâ'â za'ra mono wa. 7Wa'uburé ré 're ihâimana za'ra mono norĩ hã ahâ na ma tô te te 're apese. Sadari sina te nasi wairé, wa'uburé hã. Imorĩ waihu'u'õ hã ahâ na ma duré pese za'ra, Filipi hã. Ihi'ré zama ma tô ahâ na apese. 8Tahawa, datoi uptabi za'ra di, 'ri nho'õmo ãma 're idahâimana za'ra mono norĩ hã.
9Tame te aibâ hã 're sãmra, Sima na isisi hã. Romhõsi pese 'wa, ta hã. Taha ãma ma tô aré 're tob'uzu za'ra, samaritanu norĩ hã. Sima hã iwaihu'u pese newa, te dama 're siwasu'u u'âsi, dama ipire na. 10Aihĩni ma tô Simahã mreme na 're danhopré aré. Ãne te da te dasima 're rowasu'u za'ra, õ hã 'Re ihâimana u'âsi mono newa:
— “Õhõ aibâ ma hã, iwaihu'upe te tãma tihâiba. 'Re ihâimana u'âsi mono waihu'u pe hã sa'ẽtẽ na te tãma tihâiba.”
11Wahub ahâ na ma tô ãma 're datob'uzu za'ra, te te dama 're i'aromhõsi mono zém na hã. Tahawa, te ãma 're danhopré u'âsi. 12Tane nherẽ, 'Re ihâimana u'âsi mono, da'ãma 're isib'a'uwẽ mono zé wasu'u na, duré Zezu Cristuhu wasu'u na, Filipi hã te te dama rowasu'u wamhã, ma tô saze za'ra ni. Isimirowasu'u hã da te saze za'ra wamhã, â dawabzuri ma tô 'manharĩ za'ra ni, aibâ norĩ hã, duré pi'õ norĩ zama. 13Simahã zama ma tô saze. Â dawabzuri ma duré dame 'manha. Te te 'manharĩ parimhã, te oto Filipihi siré 're mo. Tawamhã te nasi ãma titob'uzu, dama i'manharĩ waihu'u'õ hã te te nasi dama ab'manharĩ wa, Filipi hã.
14Tawamhã Zezusihi zadawa wasu'u'wa norĩ hã zahadu Zeruzalẽ ãma hâimana za'ra ré, ma tô samaritanu norĩ wasu'u hã wapari za'ra, 'Re ihâimana u'âsi mono zadawa wasu'u, da te isaze za'ra zém na rowasu'u hã. Tahawa, ma tô Pedru norĩ hã siwi satõrĩ zahuré, Zuwãhã me. Samaria u datẽme neb zahuré da, ma tô satõrĩ zahuré ni. 15Tawamhã ma tô datẽme aimasisi. Simasisi wi, ma tô 'Re ihâimana u'âsi mono ma timreme zahuré, da'ãma, Tipẽ'ẽzani hã te te dama sõmri da. 16'Re ihâimana u'âsi mono pẽ'ẽzani hã zahadu datẽme wisi õ di, tamomomhã. Wanhib'apito Zezusihi nhisi na si ma tô â dawabzuri hã 'manharĩ za'ra ni. 17Tawamhã Pedru norĩ hã ma tô tinhib'rata na da'a'rã upi zahuré. Te te ãma da'a'rã upi zahuré mono wamhã, 'Re ihâimana u'âsi mono, ma tô Tipẽ'ẽzani hã dama tisõ.
18Tawamhã Sima hã ma tô 'madâ, Zezusihi zadawa wasu'u'wa norĩ, da'rã nhisiwi tinhib'rada hã te te nomri zahuré mono ré hã, 'Re ihâimana u'âsi mono, Tipẽ'ẽzani te te dama i'anhomri mono zé hã. Tahawa, ma tô sima wẽ, rob'uiprazé hã te te tãma sõmri zahuré da. 19Ãne te tãma nharĩ zahuré:
— Ã. Rob'uiprazé, wa za aima sõmri 'wa, asine wa'aba, ĩnhib'rada hã da'rã nhisiwi te 're aza'ra mono da, aiwaihu'u pese 'wa hã we ĩma sõmri aba da, asine wa'aba te 're da'a'rã upi mono wamhã, 'Re ihâimana u'âsi mono, Tipẽ'ẽzani te te dama 're anhomri mono da.
20Tawamhã Pedru te asa tãma tinha, ãne:
— E niha ma tô irosa'rata wasé, rob'uiprazém na asima uipra da, 'Re ihâimana u'âsi mono hã tiwaihu'u pe te te wama isõmri hã. Mo oto aimorĩ ropipa u, ate rob'uiprazéb ré. 21'Re ihâimana u'âsi mono, ma tô aiwaihu'u, asima asimirosa'rata wasété na. Tahawa, a hã wanhimiromhuri zarina, romhuri waihu'u õ di za, ta hã atei õ wa. 22Aiwasété wi aipi'ra na. Wanhib'apito ma, aimreme. Tãma asiwasu'u na asimirosa'rata wasédé hã te te aima pari da. 23Marĩ na asiminho'ru te sa'ẽtẽ na aima tihâiba. Zahadu te Satanasi hã atété, aiwasété hawi aiwatobro tõ da.
24Tawamhã Sima te asa tãma tinha, ãne:
— A norĩ wa'wa hã te za ĩ'ãma aimreme 'wa, 'Re ihâimana u'âsi mono ma, ropipa hã uburé ĩma irowasu'u na te te ĩma ãma uwaimrami tõ da.
25Tawamhã Pedru norĩ hã Wanhib'apito mreme na te te dama rowahutu zahuré pari, ma tô apâ tineb zahuré, Zeruzalẽ u. Neb zahuré wamhã, te sipa zahuré, daza'rui mono bâ, Samaria ãma, Zezusihi wasu'uwẽ na te te dama rowasu'u zahuré mono da.
Filipi hã aibâ te te isõpẽtẽzé wasu'u, Etiopiaha nhihudu hã
26-28Tawamhã aibâ hã ma tô mo, Zeruzalẽ u. Etiopia na darom nhisi ãma Cãdasi na pi'õ siroti'wa nhisi ma, rob'madâ'â'wa hã. Etiopia ãma dama pire di, ta hã. 'Re ihâimana u'âsi mono ãma wata da, ma tô mo. Ãma wata pari, te oto mo apâ tirob u, awaru na wedewara zapore na. Morĩ sina te te romnhoré, 'Re ihâimana u'âsi mono zadawa 'mahârâ 'rata 'wa nhimi'ui'éré na, Izaiaha nhimi'ui'éré na.
Tawamhã hâiwa ãma Wanhib'apito ma, romhuri'wa hã ma tô Filipihi ma rob'ru, ãne:
— Aiwahutu, pi'reba aimorĩ da, Gaza na 'ri nho'õmo nhisi u bâdâdi tum na aimorĩ da, Zeruzalẽ hawi.
Tahawa, te Samaria hawi oto mo Filipi hã, Gaza u bâdâdi na morĩ da. Tawamhã morĩ ré, ma tô tisã aibâ hã, Zeruzalẽ hawi apâ imorĩ hã. 29Tawamhã 'Re ihâimana u'âsi mono pẽ'ẽzani hã ma tô tãma tinha Filipihi ma, itẽme si'ré da, isababa morĩ da, awaru na wedewara zapore zababa.
30Tawamhã ma tô itẽme sina rotété, Filipi hã. Tawamhã ma tô te te wapari, te te romnhoré mono ré, aibâ hã. 'Re ihâimana u'âsi mono zadawa 'mahârâ 'rata 'wa nhimi'ui'éré hã te te sõré, Izaiaha nhimi'ui'éré hã. Tawamhã Filipi te ãma 'mahâ, aibâ hã, ãne:
— E iwasu'u hã ma tô iwaihu, i'ui'éré, isõré mono hã.
31Tawamhã asa te tãma tinha, ãne:
— E 'wa te te ĩma waihu'u bâ, wa za waihu'u.
Tawamhã ma tô 'mahâ, itẽme sarõtõ da, awaru na wedewara zapore 're, siré neb da. 32Rob'ui'éré te te isõré mono hã ãne:
“Pone'ẽrebâ, da te wĩrĩ da, da te dasiwi isaprõni ne, ma tô dasiwi saprõni ni, da te dasiwi wĩrĩ da. Tawamhã dawi sisawi ãna ma tô dama mo. Duré pone'ẽrebâ 'ra hã da te séré nhihâri wamhã, isadari õ ne, ari'iwi ma tô tihâiba.
33Wẽ nherẽ, ma tô dasiwi wĩrĩ ni, wasété newa. Ni'wa hã te te dawi sawi õ di, da te dasiwi wĩrĩ tõ da. Ti'ai ãma 're morĩ õ di oto. 'Ra ãna ma tô dârâ. Sihudu õ di. Sihudu õ wamhã, da te wasu'u waihu'u õ di, isihudu wasu'u hã.”
34Tawamhã aibâ te oto sadanha, Filipi hã, ãne:
— Isadawa 'mahârâ'wa hã e 'wa hã te wasu'u. E te siwasu'u. E aimawi hã te wasu'u. Ma'ãpé, ĩma wasu'u na.
35Tawamhã Filipi, rob'ui'éré te te isõré mono zém na ma tô tãma rowasu'u na'rata. Zezusihi wasu'uwẽ hã ma tô tãma waihu'u, aibâ ma.
36Tawamhã bâdâdi na neb zahuré ré, ma tô â u aimasisi zahuré. Tawamhã aibâ hã ma tô â hã tãma 'mahâ, Filipihi ma:
— Ãhãta â. E wanhimizahâri õ di za a'â, â dawabzuri hã ĩma 'manharĩ da.
37Tahawa, te Filipi hã asa sadanharĩ pese:
— E tô sena, ma tô isazei pe. Sazei pese wamhã, â dawabzuri te za tô i'manha.
Tawamhã aibâ, te duré tãma tinha, ãne:
— Tô sena wa saze, Zezu Cristu, 'Re ihâimana u'âsi mono 'ra hã.
38Tahawa, aibâ hã ma tô tãma iromhuri'wai ma tinha, awaru na wedewara zapore hã a'â simizazâri da. Tahawa, ma tô iré mazazâri za'ra. Âi ba, ma tô oto si'ra zahuré. Tawamhã â dawabzuri, ma tô Filipi hã tãma 'manha, aibâ ma. Tawamhã apâ ma tô pu. 39Â hawi pusi wamhã, Wanhib'apito pẽ'ẽzani hã awa'awi ma tô Filipihi ãma aimani. Te te sãmri õ di oto, aibâ hã. Tane nherẽ, ma tô rowẽ na tirob u hã wara apâ, to sina. 40Tawamhã Filipi hã sisa'rese ãna ma tô wi, Azotu na 'ri nho'õmo nhisi u hã. Siwaihu'u õ di. Tawamhã ta hawi te oto mo, Sézaréa na 'ri nho'õmo nhisi u. Tamomo morĩ ré, 'ri nho'u hã te te anhopẽtẽ mono sidâpâsi ma tô sipa, Zezusihi wasu'uwẽ hã te te dama wasu'u mono da. Tawamhã ma tô oto wi, Sézaréa u.
Currently Selected:
Atu 8: xavBP
Tõsta esile
Share
Kopeeri
Want to have your highlights saved across all your devices? Sign up or sign in
© 2011, Wycliffe Bible Translators, Inc.All rights reserved.