Atu 9
9
Saulu hã tihâimanazém na te te isaprĩzé wasu'u
Atu 22.6-16; 26.12-18
1Taha ré, te zahadu Saulu hã te te tãma 're amhâzépa za'ra, Zezusi zazei'wa norĩ ma. Wanhib'apito Zezusihi nhirã zarina 're nomro mono 'ru te, te te tãma 're amhâzépa za'ra, te te uprosi da. Tawamhã nimahã bâtâ na sasedoti tisiré norĩ nhipai u ipire uptabi u ma tô mo, 'Re ihâimana u'âsi mono ma, da'ãma romhuri'wai u, rob'ui'éré hã te te tiwi waptẽrẽ da. 2Ta hã rob'ui'éré Damascu na 'ri nho'õmo nhisi u te te âri da, ma tô tiwi waptẽ, tame zudeu norĩ te, rowahutu'wa norĩ ma, te te sõmri za'ra da, sasedoti ipire zadawa para itẽme imorĩ za'ra na rob'ui'éré hã. Tawamhã Wanhib'apito 're ihâimana mono zém na 're inomro mono norĩ hã, rob'ui'éré'wa zadawa para te za Saulu hã we te te simro, Zeruzalẽ u pawasisi ré, aibâ norĩ hã, pi'õ norĩ zama.
3Tawamhã Damascu u te te rosahutu wamhã, waptu na ma tô hâiwa hawi rowa'a za'ẽne hã tãma ai'ubuzi, Sauluhu ma. Ihâiba nho'õmo, ma ãhã wamhã rob'uiwẽ. 4Tahawa, ma tô waptãrã, ti'ai wa. Ni'wai mreme hã ma tô duré wapa. Ãne te ãhã wamhã 'mahâ:
— Saulu. Saulu. E marĩ wa, te ĩwi 're irowasutu u'âsi mo.
5Tawamhã Saulu hã te asa 'mahâ:
— Apito, e 'wa hã, a hã.
Asa te duré ãhã wamhã tãma tinha:
— Wa hã Zezusi, wa ai'mahâ, ĩwi 're iro'wa'rutu u'âsi mono. 6Ma'ãpé ãhã na aiwahutu, 'ri nho'õmo u aimorĩ da. Tame te za ni'wa hã aima tinha za, marĩ 'manharĩ da hã.
7Tawamhã aibâ isiré isi'aba'ré norĩ hã õne haré ma mazahâri za'ra. Ari'iwi te aimasa. Sadaihu'u ãna ma tô ni'wa hã ãma mreme wapari za'ra. Tane nherẽ, ni'wa hã te te ãma sãmri za'ra õ di, ta norĩ hã. 8Tawamhã Saulu, ma tô oto wahudu. Wahutu wamhã, ma tô oto duré toporo. Tane nherẽ, te te rob'madâ'â waihu'u õ di, tob a wa. Tahawa, isiré isi'aba'ré norĩ hã ma tô te te siwi patété, te te siwi saprõni da, Damascu u. 9Tame bâdâ hã si'ubdatõ te ãma ne, te te rob'madâ'â waihu'u ãna hâimana ré hã. Marĩ na si'upari õ di. Sai ãna te nasi duré da'wa. Te te hâ'rẽne õ di duré.
10Tawamhã Damascu ãma aibâ hã te 're sãmra, Zezusihi nhirã zarina 're imorĩ hã, Anania na aibâ nhisi hã. Tawamhã sõtõ 'rowim ne, ma tô Wanhib'apito hã tãma sihâi'ré. Ãne te taha wamhã 'mahâ:
— Anania.
Tawamhã asa ma sada'â, ãne:
— E marĩ, Ĩnhib'apito.
Tawamhã Wanhib'apito te tãma tinha, duré ãne:
11— Aiwahutu, Zudaha nhorõwa u aimorĩ da, “Awa'awi” 'ri nho'õmo nhi'riti nhisi ãma isõrõwa u. Tame te za aibâ zô asinha, Saulu na aibâ nhisi zô, Tasu na 'ri nho'õmo nhisi ãma ipoto zô. Ãhã na te we ĩma mre. 12Sõtõ 'rowim ne, ma tô aiwaihu'u, itẽme aiwisi õ ré. Te te rob'madâ'â hâ. Asib'rada i'rãi ãma hiri da, tõmo wẽ da, itẽme i'aimorĩzém na hã ma tô waihu'u siro.
13Tawamhã Anania te asa tãma tinha, ãne:
— Ĩnhib'apito, da'ahâ na ma tô ĩma wasu'u za'ra ni. Õ hã, u, Zeruzalẽ ãma ma tô iwasédé hã te te ãma 're ab'manharĩ, asazei'wa norĩ ãma. 14Ãme te za oto, u, sasedoti ipire norĩ zadawa para dapawasisi za'ra, ai'ãma 're idawata za'ra mono norĩ hã apâ te te simroi mono da.
15Tawamhã Wanhib'apito te asa tãma tinha, ãne:
— Mo oto itẽme aimorĩ. Õ hã, Saulu hã wa tô ĩsima pisutu, ĩzadawa wasu'u'wa da. Zudeu'õ norĩ ma, te za te te 're ĩzadawa wasu'u, duré dama roti'wa norĩ ma, duré Izaraéu nhihudu norĩ ma zama. 16Tawamhã te te dama 're ĩzadawa wasu'u mono wamhã, te za oto te te 're robzépata. Uburé za te te 're irobzépata mono zém na wa za tãma awaihu'u siro, Sauluhu ma.
17Taha pari, ma tô mo Anania hã, Zudaha nhorõwa u. Tawamhã ma tô 'ri para u ãzé. Sébré wamhã, ma tô tinhib'rada hã tino, i'rã nhisiwi, Saruhu 'rãi ãma. Ãne te tãma tinha:
— Ĩsisãnawã Saulu, Wanhib'apito hã ma tô we atẽme ĩzatõ, tô õ hã Zezusi hã, Damascu u we aimorĩ ré, bâdâdi wa, aima isihâi'ré hã. Ta hã ma tô we atẽme ĩzatõ, atõmo wẽ da, apâ rob'madâ'â hâ, duré Ipẽ'ẽzani ré si 're aihâimana mono da, aipẽ'ẽ wẽ na si.
18Tawamhã awa'awi pe'a hâ ne hã ma tô tizarõtõ zahuré, itõmo hawi. Ãhã wamhã, ma tô apâ tãma tiromnho'a. Tõmo wẽ di oto. Tawamhã ma tô wahudu. Wahutu wamhã, â dawabzuri ma tô tãma 'manharĩ ni awa'awi. 19Â dawabzuri te te 'manharĩ parip si, ma tô ai'upa. Tahawa, apâ ma tô aptete oto.
Saulu hã Damascu ãma isãmrazé wasu'u
Tawamhã bâdâ umro na ma tô ãma ne, Damascu ãma isazei'wa norĩ 'rata sãmra ré, Saulu hã. 20Tawamhã awa'awi ma tô iwasu'uwẽ na dama ãma sãna'rata oto, rowahutuzé mono bâ, Zezusi hã 'Re ihâimana u'âsi mono 'ra, 're ihâimana mono na hã. 21Da te wapari za'ra wamhã, aihĩni, ma tô ãma tatob'uzu za'ra ni. Tahawa, te ãne dasima nharĩ za'ra ni:
— Oro õ hã Zezusihi zazei'wa te te 're 'mapãrĩ mono za, Zeruzalẽ ãma hã. Oro we wisi za duré ãwa, Zezusihi zazei'wa norĩ zô, pawasisi ré apâ te te simroi mono da, sasedoti ipire norĩ u.
22Saulu hã te te rowasu'u waihu'u pese di. Simirowasu'u pire di duré. Tawamhã tinhimirowasu'u pire na ma tô te te ãma rosa'ré. Zezusi hã Danho'reptui'wa da, 'Re ihâimana u'âsi mono te te ipisutu wasu'u na ma tô mreme pire na tãma rowasu'u za'ra, zudeu norĩ ma. Tawamhã te te rowasu'u pire wa, zudeu norĩ hã te te sada'âbâ waihu'u za'ra õ di.
23-24Tawamhã Damascu ãma hâimana ré, bâdâ ahâ na ãma ne pari, ma tô zudeu norĩ hã sada si'rã'õtõ, Sauluhu da. Tawamhã ma tô dama ãma rowairébé za'ra, te te siwi dama hâiba 'ru za'ra da, da te dasiwi wĩrĩ da. Tahawa, bâtâ bâre ma tô sô tinhopré, 'ri nho'õmo 'wawi wa'ra 'ridawa ãma, te te siwi wĩrĩ da. Bara na zama, te duré sô rob'madâ'â za'ra. Tawamhã da te dasima i'ru za'ra zé wasu'u hã ma tô sina wapa, Saulu hã. 25Tahawa, nimahã mara na Sauluhu siré 're inomro mono norĩ hã ma tô Saulu hã si'õtõ 're siwi ãma si'ra zanela 'ri zadazâri hawi, 'ri nho'õmo uirĩzém na'rata ãma 'ri mana u te te siwi hiri da, dawi.
Saulu hã Zeruzalẽ ãma isãmrazé wasu'u
26Tawamhã Zeruzalẽ u te oto mo, Saulu hã. Tamomo oto wisi wamhã, Zezusihi nhirã zarina 're inomro mono norĩ siré 're hâimana mono da hã nherẽ, ta norĩ hã te te pipa za'ra di. Saulu hã isazei uptabi 'wa na tãma siwasu'u za'ra wamhã, te te ãma saze za'ra õ di, isiwasu'uzém na hã. 27Tawamhã Banabé hã ma tô Sauluhu ãma aime. Zezusihi zadawa wasu'u'wa norĩ u ma tô saprõ, te te tãma wasu'u za'ra da, bâdâdi wa Wanhib'apito te te i'madâ'âzém na hã. Duré Sauluhu ma, Wanhib'apito te te irowasu'uzém na ma tô tãma wasu'u za'ra. Damascu ãma pahi ãna Zezusi te te dama iwasu'uzém na, te duré tãma rowasu'u za'ra. 28Taha parip si, ma tô dasiré 're mo oto Saulu hã, Zeruzalẽ ãma isazei'wa norĩ siré. Pahi ãna, ma tô Wanhib'apito hã te te dama 're sadawa wasu'u, Zeruzalẽ 're, 'ri wa'õno 're ihâimana za'ra mono 'remhã. 29Zudeu norĩ, gregu norĩ mreme na 're imreme zusi mono norĩ ma, ma tô duré te te 're rowasu'u. Ta norĩ hã ma tô nasi asa tãma nharĩ za'ra, isimirowasu'u wa'rãmi. Tawamhã ta norĩ hã te sima 'ru za'ra, te te siwi wĩrĩ da. 30Tawamhã isazei'wa norĩ hã da te dasima i'ru za'ra zé hã te te waihu'u za'ra wamhã, ma tô Saulu hã siwi saprõ, Sézaréa u. Ta hawi ma tô duré siwi satõ, Tasu u hã morĩ da.
31Tawamhã isazei'wa norĩ ma, rowẽ di oto, Zudéa ãma, duré Galiléa ãma, duré Samaria ãma zama. Uburé tãma rowẽ za'ra di oto, siré 're isi'rã'õtõ mono norĩ ma hã daro mono bâ. 'Re ihâimana u'âsi mono pẽ'ẽzani nhimipawaptobzém na ma tô isazei'wa norĩ hã 're hâimana nhiptete za'ra. Taha zarina, ma tô duré isazei'wa norĩ za'rada hã sina hâimo. Ta norĩ hã ma tô Wanhib'apito Zezusi hã te te 're wazé pese za'ra.
Pedru hã Rida ãma ihi'ré te te ipesezé wasu'u
32Tawamhã Pedru hã ma tô 're mo, daza'rui mono bâ. 'Re morĩ wamhã, nimahã bâtâ na ma tô wi, Rida na 'ri nho'õmo nhisi u, 'Re ihâimana u'âsi mono nhib'a'uwẽ, tame 're ihâimana za'ra mono norĩ hã te te awaimrami mono da. 33Tame ma tô aibâ hã sõpẽtẽ imorĩ'õ hã, Enéia na isisi hã. 8 na ma tô ãma tiwahu, waptâp si 're sa'wari mono ré hã. 34Tawamhã Pedru te tãma tinha, ãne:
— Enéia, Zezu Cristu ma tô aipese. Aiwahutu. Asa'warizé hã sa'ra pese.
Tawamhã awa'awi ma tô wahudu, Enéia hã. 35Tawamhã uburé Rida ãma 're idahâimana za'ra mono hã, duré Sarõ na romhâpâ nhisi ãma 're idahâimana za'ra mono hã te 'madâ'â za'ra ni, ihi'ré pesezé hã. Tahawa, ma tô aipizari za'ra ni, Wanhib'apito niwĩ oto 're danomro mono da.
Pedru hã Zopi ãma pi'õ te te ihâiwa'utuzé wasu'u
36Tawamhã pi'õ hã Zezusihi nhirã zarina 're imorĩ hã te 're hâimana, Zopi na 'ri nho'õmo nhisi ãma. Tabita na pi'õ nhisi hã. Gregu norĩ nhiminhisizém na Docasi na isisi amo hã. Isibrob'õ norĩ ãma te 're siwãrĩ u'âsi, Docasi hã. Marĩ iwẽ si te te dama 're ab'manharĩ u'âsi.
37Tawamhã Rida ãma Pedru hã zahadu sãmra ré, ma tô tihâzé, Docasi hã. Hâzé pire wa, ma tô dârâ. Tahawa, ma tô dasiwi hâiba upsõ ni. Da te dasiwi hâiba upsõi pari, ma tô dasiwi hiri ni, 'ri 're wa'wa u hâimo. 38Tawamhã Pedru hã Rida ãma zahadu ihâimana na ma tô iwasu'u hã wapari za'ra, Zezusihi nhirã zarina 're inomro mono norĩ hã. Rida u hã, romhuture di, Zopi hawimhã. Tahawa, iwasu'u te te wapari za'ra wamhã, ma tô aibâ norĩ hã 'mazatõrĩ zahuré ni sô, te te tãma dazadawa wasu'u za'ra da, ãne:
— Ma'ãpé, we aimorĩ su'u watẽme, asô rowaptâ'â ãna!
39Tawamhã Pedru te sima wẽ, ime morĩ zahuré da. Tawamhã tamomo wisi wi, ma tô siwi saprõ hâimo, 'ri 're wa'wa u. Tame, uburé pi'õi mrotõ norĩ hã ma tô siwi uirĩ Pedru hã, siwa'õ za'ra sina. 'Ru'ru sina, te nasi zazahâ hã tãma wẽ za'ra, te te 'madâ'â za'ra da, hâiba ré Docasi te te dama 're i'ab'manharĩ mono hã. 40Tahawa, ma tô Pedru hã tãma rob'ru za'ra, aihĩni wairébé da. Wairébé za'u si, ma tô hi'rãtitõ nhamra, 'Re ihâimana u'âsi mono ma, mreme da. Tawamhã ma tô aipi'ra, pi'õ idâ'â u. Te tãma tinha, ãne:
— Tabita, ai'utu.
Tawamhã pi'õ hã ma tô toporo. Pedru te te 'madâ'â wamhã, ma tô udu.
41Tahawa, Pedru hã ma tô pa'â, te te iwahutu na hã ãma sime da, hâiwi para na sab da. Tawamhã wahutu wamhã, Pedru ma tô dazô hâ, uburé Zezusihi zazei'wa norĩ zô, duré imrotõ norĩ zô zama, ihâiwa'udu hã te te siwi 'madâ'â da. Tahawa, ma tô oto siwi 'madâ ihâiwa'udu hã, tihâibazém na apâ hâimana wa.
42Tawamhã 'ri pâ ma tô pi'õi wasu'u hã te te ropé, Zopi ãma hã. Iwasu'u da te wapari za'ra wamhã, da'ahâ na ma tô saze za'ra ni, Wanhib'apito hã. 43Tawamhã Pedru hã bâtâ ahâ na ma tô tame tihâiba a'â, Zopi ãma. Sima na romhâ su'u'wa nhisi nhorõwa ãma te nhamra.
Currently Selected:
Atu 9: xavBP
Tõsta esile
Share
Kopeeri
Want to have your highlights saved across all your devices? Sign up or sign in
© 2011, Wycliffe Bible Translators, Inc.All rights reserved.