Atu 6
6
Aibâ norĩ hã 7 na ihâiba za'ra hã dapawapto'wa da, da te dasiwi ipisutu za'ra zé wasu'u
1Tawamhã ahâ uptabi na ma tô zudeu norĩ hã saze za'ra, gregu norĩ mreme na 're imreme zusi mono norĩ hã, duré hebreu norĩ mreme na 're imreme zusi mono norĩ zama. Tawamhã gregu norĩ mreme na 're imreme zusi mono norĩ hã ma tô aiwapsari za'ra, dazari'wa norĩ hã gregu norĩ imrotõ norĩ ãma 're po're simrami u'âsi za'ra mono wa. Awẽ sidâpâsi, isazei'wa norĩ hã ro te te sima 're waibui mono wamhã, te ãma 're po're simrami u'âsi za'ra. Tahawa, ma tô dama nharĩ za'ra, aibâ norĩ hã gregu norĩ mreme na 're imreme zusi mono norĩ hã. 2Tawamhã Zezusihi zadawa wasu'u'wa norĩ hã, 12 na ihâiba za'ra hã ma tô sô tihârâ za'ra, tisiré isazei'wa norĩ zô. Hâiba mono bâ itẽme si'aba'ré da, te sô tihârâ za'ra. Itẽme sihutu wamhã, te tãma nharĩ za'ra, ãne:
— I'uwaibaba õ di, 'Re ihâimana u'âsi mono wasu'uwẽ hã wa te dama 're wasu'u za'ra mono ãna, 're iwahâimana za'ra mono da hã, taha upana rob'uiprazé 'madâ'â na si wa te 're iromhuri za'ra mono da hã. 3Tahawa, ma'ãpé sô asõpré wa'aba mono, aibâ 7 na ihâiba norĩ zô. Aibâ norĩ hã da te iwẽsãmri za'ra zô, te za sô asõpré wa'wa, 'Re ihâimana u'âsi mono pẽ'ẽzani na si 're inomro mono norĩ zô, hâiwa hawi dahâimanazém na rowaihu'u ré 're ihâimana za'ra mono norĩ zô. Ta norĩ ma, wa za romhuri hã pisutu za'ra ni, awẽ sidâpâsi te te 're dazari za'ra mono da. 4Tawamhã wa norĩ hã 'Re ihâimana u'âsi mono ma, wa za 're wamreme zusi u'âsi. Imreme na wa za wa te 're dapawaptob u'âsi za'ra.
5Tawamhã isimiroti za'ra hã aihĩni ma tô saze za'ra, isazei'wa norĩ hã. Tahawa, ma tô aibâ norĩ zô rob'madâ'â za'ra. Tawamhã ma tô sãmri za'ra, Estewã hã. Ta hã, 'Re ihâimana u'âsi mono ãma te te isasõmri. Ipẽ'ẽzani na si te 're hâimana. Tawamhã ma tô duré sãmri za'ra Filipi hã, duré Procoru hã, duré Nicano hã, duré Timo hã, duré Pamenasi hã, duré Nicola hã. Ãtioquia ãma 're isãmra mono, Nicola hã. Zudeu'õ aré, ma tô sizudeu, 'Re ihâimana u'âsi mono ãma oto dame 're wata mono da. 6Tawamhã ã norĩ hã ma tô oto te te simro, Zezusihi zadawa wasu'u'wa norĩ u, tinhib'rada te te ãma sa'ra za'ra da, i'rã nhisiwi, ãma mreme zusi da. Ãne Zezusihi zadawa wasu'u'wa norĩ hã ma tô romhuri hã tãma pisutu za'ra.
7Tawamhã 'Re ihâimana u'âsi mono zadawa wasu'u hã ma tô duré te te ropé, 'ri baba. Zezusihi nhirã zarina 're inomro mono norĩ hã ma tô sina hâ, Zeruzalẽ ãma hã. Sasedoti norĩ hã ahâ na ma tô duré Zezusi hã saze za'ra oto.
Estewã, da te dasiwi i'ârizé wasu'u
8'Re ihâimana u'âsi mono hã ma tô Estewã hã te te 're pawapto pese, tiwaihu'u pese na. Tahawa, iwaihu'u pese na si te 're hâimana, Estewã hã. Taha zarina ma tô marĩ iwẽ hã te te dama 're ab'manharĩ, dama i'manharĩ waihu'u'õ hã, danho'a. 9Tane nherẽ, ni'wam norĩ hã zudeu norĩ hã ma tô sada 're hâimana za'ra, imreme te te 're wẽ'õ za'ra mono wa. Ta norĩ hã darob amoi hawi, Zeruzalẽ u 're isihutu mono aré, Sireni na 'ri nho'õmo nhisi hawi, duré Alesãdria na 'ri nho'õmo nhisi hawi, duré Sirisia na danhipti'a nho'õmo nhisi hawi, duré Azia na danhipti'a nho'õmo nhisi hawi. Ta norĩ hã ma tô 're si'rã'õtõ u'âsi, rowahutuzéb u dasi'uihâ na 're idahâimana za'ra mono zém na rowahutuzém nhisi u hã. Tawamhã ta norĩ hã, Estewãhã mreme te te siwi wẽ'õ za'ra wa, te nasi aimawi na tãma nharĩ za'ra. 10Tawamhã 'Re ihâimana u'âsi mono pẽ'ẽzani hã ma tô tite hã rowaihu'u pese zé hã tãma tisõ, Estewãhã ma, mreme waihu'u pese da. Tahawa, aibâ norĩ ma, te te asa tãma ãma wa'rãmi za'ra wamhã, ma tô nasi mreme nhihâri za'ra. 11Tahawa, ta norĩ ma tô ni'wam norĩ hã sada wada'uri za'ra pi'uriwi, Estewã te te siwi wasu'u wasété za'ra da, dama. Rob'uiprazé ma tô tãma sõmri za'ra, sada simasab da. Ãne te taha wamhã tãma nharĩ za'ra:
— Ãne te za Estewã hã dama iwasu'u za'ra wa'wa: “Estewã hã wa tô wapari za'ra ni. Mozési hã te te dama 're wasu'u wasété. 'Re ihâimana u'âsi mono ãma, te te duré 're wasété.” Ãne te za dama iwasu'u wasété za'ra wa'wa, Estewã hã.
12Tahawa, ma tô ãne hã dama wasu'u wasété za'ra, Estewã hã. Duré 'Re ihâimana u'âsi mono nhimiroti 'rata na rob'ui'éré na dama rowahutu'wa norĩ ma zama, duré dama roti'wa norĩ ma zama, ma tô ãne wasu'u wasété za'ra. Aihĩni sada danhiti'rui wairébé da, ma tô ãne dama wasu'u wasété za'ra. Tawamhã ma tô oto sô ai'aba'ré, Estewãhã zô. Tahawa, ma tô siwi ti'â. Te te siwi âri wamhã, ma tô siwi saprõ, zudeu norĩ ma, ipire za'ra norĩ u. 13Tawamhã Estewãhã mreme te te siwi iwẽ'õ za'ra norĩ zô, ma tô sô tihârâ za'ra, taré te te siwi iwasu'u wasété 'wa norĩ zô, Estewã te te tãma wasu'u wasété za'ra da. Ãne te dama ipire za'ra norĩ ma, Estewã hã taré wasu'u za'ra:
— Õ hã aibâ hã, rowasu'u wasédé hã te te sazâri õ di, 'Re ihâimana u'âsi mono nhorõwa 'ri na hã. Duré 'Re ihâimana u'âsi mono nhimiroti wẽ wa'rãmi, ma tô te te dama 're rowasu'u wasété u'âsi. 14Wa norĩ hã wa tô wapari za'ra ni, imreme hã. Zezusi hã Nazaré ãma aré 're isãmra mono hã te za, u, 'ri hã uprosi, 'Re ihâimana u'âsi mono nhorõwa hã. Duré, roti hã Mozési te te aré wama isõmri hã 're iwahâimana za'ra mono zéb da hã te za, u, wawi ãma saprĩ.
15Tawamhã zudeu norĩ ma roti'wa norĩ hã, duré aihĩni isi'ubumrozéb ãma ihâimana za'ra norĩ hã te ãma tinhopré, Estewãhã ubu ãma hã. 'Re ihâimana u'âsi mono ma, hâiwa ãma romhuri'wai ubu ne, Estewãhã ubu hã.
Currently Selected:
Atu 6: xavBP
Tõsta esile
Share
Kopeeri
Want to have your highlights saved across all your devices? Sign up or sign in
© 2011, Wycliffe Bible Translators, Inc.All rights reserved.