Atu 5
5
Anania norĩ wasu'u, Sapiraha me
1Aibâ hã Anania na isisi tinhipti'a ma tô timro Sapiraha me hã iwa'âbâ zô dama wede zahuré. 2Tawamhã ti'ai wa'â hã ma tô sima po'o zahuré, pi'uriwi. Ãhã wamhã, i'rãsutu si ma tô Anania hã ti'â uburé õ nherẽ, Zezusihi zadawa wasu'u'wa norĩ u. 3Taha wamhã, te Pedru tãma tinha, ãne:
— Anania, e marĩ da, ma tô Satanasihi nhimiwada'uri zarina i'manha. Tahawa, ma tô 'Re ihâimana u'âsi mono pẽ'ẽzani ma, asadawa nhipe. Asipti'ai wa'â hã pi'uriwi ma tô asima ipo'o 'wa, aimro me. 4Asipti'a, da te aiwi uipra õ ré hã, ate hã. Duré, da te aiwi uipra wamhã, iwa'âbâ zama ate hã. E marĩ da, ma tô bété wama asadawa nhipe. E wama si ma tô asadawa nhipe. Mare di. 'Re ihâimana u'âsi mono ma zama ma tô asadawa nhipe.
5-6Tawamhã Pedruhu mreme te te wapari wi, ma tô waptãrã ti'ai wa, Anania hã. Waptã'ã wamhã, ma tô dârâ. Tawamhã ipréduptém norĩ hã ma tô sô tiwahutu za'ra, te te siwi ubu da hã. Taha pari, ma tô duré oto siwi ti'â, te te siwi sẽrẽ da. Tawamhã taha wasu'u hã da te wapari za'ra wamhã, aihĩni pese ma tô tãma tapẽ'ẽwara za'ra ni.
7Tawamhã isa'u si, te duré imro hã mo, Zezusihi zadawa wasu'u'wa norĩ u. Timro dâ'âzé te te waihu'u ãna, ãhã wamhã ma te ãzé, 'ri para u hã. 8Sébré wamhã, Pedru te 'mahâ, ãne:
— We ĩma wasu'u na. E niha ma tô asipti'ai wa'wa hã dama iwede 'wa. E tô õhõ na si iwede aba wa'â hã.
Tawamhã asa te tãma wasu'u, ãne:
— Ĩhe, tô õhõ na si iwa'â hã.
9Tawamhã Pedru te tãma tinha, ãne:
— Te asima irosa'rata wasété 'wa, 'Re ihâimana u'âsi mono pẽ'ẽzani hã tô sena iwaihu'u pese zô pibui wa'aba da. E marĩ da, ma bété ãne hã i'manharĩ 'wa. Ma'ãpé, wapari. Aimro nherẽ'wa norĩ hã te we para'rasi za'ra. Ta norĩ hã te za siwi ai'â.
10Tawamhã awa'awi ma tô duré waptãrã, pi'õ hã, Pedruhu papara. Ãhã wamhã, awa'awi ma tô duré dârâ. Ãhã wi, ipréduptém norĩ hã ma tô duré apâ asisi. Taha wamhã, ma tô duré siwi 'madâ, pi'õ idâ hã. Ta hã ma tô duré siwi tisẽ, ab're 're imro zu. 11Tawamhã uburé pese, ma tô tapẽ'ẽwara za'ra ni oto, isazei'wa norĩ, siré 're isi'rã'õtõ mono norĩ hã. Duré iwasu'u hã da te wapari za'ra wamhã, aihĩni ma tô tapahi za'ra ni.
Zezusihi zadawa wasu'u'wa norĩ hã dama iwaihu'u'õ te te dama 're i'manharĩ za'ra mono zé wasu'u
12Tawamhã Zezusihi zadawa wasu'u'wa norĩ hã, marĩ iwẽ hã ahâ na ma tô te te dama 're 'manharĩ za'ra, dama i'manharĩ waihu'u'õ hã. Duré isazei'wa norĩ hã ma tô 're si'rã'õtõ u'âsi aihĩni, Salomahã nhisi na 'ri zahâbâ, da te 're isisi za'ra mono ãma. 13Tawamhã isazei'õ'wa norĩ hã, isazei'wa norĩ me 're hâimana za'ra mono da, te te sima 're rosa'rata za'ra mono nherẽ, pahi za'ra di oto. Tazahã te oto isazei'wa norĩ hã da te 're wẽsãmri za'ra, 're hâimana wẽ za'ra mono wa. 14Tahawa, ma tô da'ahâ uptabi na saze za'ra ni, Wanhib'apito niwĩ 're danomro mono da oto. Aibâ hã ahâ uptabi na ma tô saze za'ra, pi'õ zama. Tahawa, isazei'wa norĩ hã ma tô sina hâ. 15Ãne hã Zezusihi zadawa wasu'u'wa norĩ hã te te dama 're 'manharĩ za'ra mono wa, ma tô ihâzé ré norĩ hã da te 're sa'ra, 'ri nhi'riti wa, 're simi'wara mono da, isa'warizé wa, duré wetenhamri wa. Pedru hã iwa'wai baba za'ra te te ro'razâri wa, i'awã hã te te hâiba upsibi za'ra da, te tame 're simi'wara, te te pese za'ra da. 16Zeruzalẽ 'rata 'ri wa'õtõ mono hawi, ma tô da'ahâ na dasito, Zeruzalẽ u. Ihâzé ré norĩ hã ma tô dasiré 'wasari ni. Duré wa'uburé ré 're ihâimana za'ra mono norĩ zama, ma tô 'wasari ni, dasiré. Tawamhã aihĩni ma tô tapese za'ra ni oto.
Zezusihi zadawa wasu'u'wa norĩ hã dama ipire za'ra norĩ nho're isimasabzé wasu'u
17Tawamhã sasedoti tisiré norĩ nhipai u ipire uptabi hã, duré uburé saduseu norĩ me, ma tô ta Zezusihi zadawa wasu'u'wa norĩ hã ãma sõ'ru za'ra. Tawamhã ma tô sima ãma roti za'ra, niha te te tãma rob'manharĩ za'ra da. 18Tahawa, ma tô dama 'ru za'ra, da te dasiwi waibu da, Zezusihi zadawa wasu'u'wa norĩ hã. Tawamhã dazazéb 're, ma tô dasiwi séme ni. 19Tawamhã bara na hã Wanhib'apito ma, hâiwa ãma romhuri'wa hã ma tô itẽme si'ra za'ra, te te tãma 'ridawa za'ra da. Ta hã te te tãma 'ridawa za'ra wamhã, ma tô sani za'ra, rob u. Ãne te ãhã wamhã tãma nharĩ za'ra:
20— Mo oto ai'aba'réi wa'aba, 'Re ihâimana u'âsi mono nhorõwa 'ri u, 're idanomro mono zép tém na, dama rowasu'u za'ra wa'aba da.
21Tawamhã ãne hã te te wapari za'ra wamhã, bâdâ 'rãiwatobro wi, ma tô asisi, 'Re ihâimana u'âsi mono nhorõwa ãma. 'ri 'wawi wa'ra u. Tame ma tô rowahutu na dama ãma sãna'rata za'ra.
Tawamhã sasedoti tisiré norĩ nhipai u ipire uptabi hã, isiré 're inomro mono norĩ zama ma tô zudeu norĩ ma ipire za'ra norĩ zô da'mazatõ, Zeruzalẽ ãma 're isi'ubumroi mono norĩ zô. Tawamhã ma tô itẽme ubumro uburé. Tawamhã dazazéb u ma tô Zezusihi zadawa wasu'u'wa norĩ zô tihârâ za'ra, da te itẽme simroi mono da. 22Tawamhã 'Re ihâimana u'âsi mono nhorõwa 'madâ'â'wa norĩ hã ma tô sô ai'aba'ré, dazazéb u. Sô sisisi wamhã, 'ri 're baba di. Tahawa, te apâ ai'aba'ré ubana, dama roti'wa norĩ u. 23Itẽme sihutu wamhã, te ãne tãma rowasu'u za'ra:
— Pra. E niha bâ. Dazazé hã, baba di. 'Ridawa nhitop tete uptabi nherẽ, duré dazazé 'madâ'â'wa norĩ hã 'ridawa ãma simasam nherẽ, wa te 'ridawa za'ra wamhã, 'ri 're baba uptabi di. Ni'wai õ di. Robaba na wa sô rob'madâ'â za'ra ni.
24Tawamhã 'Re ihâimana u'âsi mono nhorõwa 'ri 'madâ'â'wa norĩ nhib'apito hã, duré sasedoti ipire norĩ ãne hã te te wapari za'ra wamhã, niha hã te te waihu'u za'ra õ di oto. Tahawa, ma tô sô amrami za'ra, tinhimirosa'rata na, Zezusihi zadawa wasu'u'wa norĩ zô. 25Taha ré, ni'wa hã te wei mo, aibâ hã. Ta hã ma tô tãma rowasu'u za'ra, ãne:
— Ĩwapari pese za'ra wa'aba. Aibâ norĩ hã dazazéb 're, iséme 'wa hã, 'Re ihâimana u'âsi mono nhorõwa ãma, 'ri 'wawi wa'ra 're, te dama rowahutu za'ra.
26Tawamhã 'Re ihâimana u'âsi mono nhorõwa 'ri 'madâ'â'wa norĩ hã ma tô sô ai'aba'ré tinhib'apito norĩ me, apâ te te simroi mono da. Isimroi mono 'wa norĩ hã ẽtẽ na da te hâ za'ra mono õ'umnhasite, ma tô pawasisi ãna te te simro. 27Te te simroi mono wamhã, te tãma nharĩ za'ra, dama roti'wa norĩ nho're simasab da. Tawamhã 'Re ihâimana u'âsi mono ma da'ãma romhuri'wa, tisiré norĩ nhipai u ipire uptabi hã te tãma nharĩ za'ra, Zezusihi zadawa wasu'u'wa norĩ ma, ãne:
28— Wa tô aré aiwi sawi za'ra wa'aba ni, Zezusihi nhimiroti na dama 're rowahutu tõ za'ra wa'aba mono da. Tazahã dama 're wasu'u za'ra wa'aba mono wa, iwasu'u hã ma tô te te ropé 'ri pâ, ãme Zeruzalẽ ãma hã. Tahawa, ma tô da te dasima 're wawasu'u za'ra. Wa norĩ hã, u, Zezusihi wĩrĩ'wa.
29Tawamhã Pedru norĩ hã te asa tãma nharĩ za'ra, tisiré Zezusihi zadawa wasu'u'wa norĩ me:
— 'Re ihâimana u'âsi mono mreme si wa za wa te 're 'madâ'â pese za'ra. Aimawi mreme hã wa te 're 'madâ'â za'ra mono õ di za. 30'Re ihâimana u'âsi mono, wahi'rata norĩ nhib'apito hã ma tô hâiwa'utu Zezusi hã, asadawa para wa'aba, da te dasiwi iwĩrĩ hã. Wedepo'o nhonhi'rãmi na asiwi isasõmri 'wa hã ma tô hâiwa'utu. 31Ta hã ma tô 'Re ihâimana u'âsi mono hã ti'â apâ, isimire niwĩ 're sãmra u'âsi mono da oto, dama pire na 're hâimana mono da, duré tiwaihu'u pese zarina te te 're da'anho'reptui mono da. Tahawa, te za te te 're wapawaptob za'ra, wasiré Izaraéu nhihudu mono bâ, wawasédé hã wa te 're rẽme za'ra mono wa, te te wama 're apari mono da. 32Wa norĩ hã wa tô ãne na hã watõmo na 'madâ'â za'ra ni. Tahawa, wa za wa te dama 're wasu'u u'âsi za'ra. 'Re ihâimana u'âsi mono hã da te 're wapari za'ra mono wamhã, te za Tipẽ'ẽzani hã te te dama 're anhomri. Taha zama te za duré ãne uburé te te dama 're awaihu'u, Zezusihi wasu'uwẽ hã.
33Tawamhã dama roti'wa norĩ hã ãne te te wapari za'ra wamhã, ma tô sada tizahi za'ra. Tahawa, ma tô sima ãma roti za'ra, te te dama 'ru za'ra da, da te dasiwi simro da. 34Tane nherẽ, aibâ iwẽ hã Gamaliéu na isisi hã ma tô hâiwi za. Ta hã farizeu norĩ niwĩ te 're mo, dama iwazé pe hã. 'Re ihâimana u'âsi mono nhimiroti na dama rowahutu'wa, te 're hâimana. Tawamhã ta hã ma tô oto dama 'ru za'ra, Zezusihi zadawa wasu'u'wa norĩ hã da te sani za'ra da, dama ipire norĩ nhiti si'ubumro da, suru na.
35Taha pari, ma tô dama roti'wa norĩ ma tinha, ãne:
— Wasiré Izaraéu nhihudu norĩ, ĩwapari pese za'ra wa'aba, ãma asõpré wa'aba da, aibâ norĩ ãma. E marĩ te za tãma i'manharĩ za'ra wa'wa. Ãma rosa'rata pese za'ra wa'aba. 36Aibâ hã Teudasi na isisi hã duréihã, waihu'u pese newa, ma tô dama ipire na dama siwasu'u. Tawamhã aibâ ahâ na ma tô isiré 're nomro, 400 na ihâiba hã. Tane nherẽ, da te wĩrĩ wamhã, isiré 're inomro mono norĩ hã ma tô te te ropé. Ta hã 're hâimana mono õ di oto. 37Teudasihi uirĩ na si ma tô duré Zuda hã datẽme wi, Galiléa ãma aré 're isãmra mono hã. Romanu norĩ nhib'apito hã dahâiba za'rada hã te te waihu'u da, danhisi mono bâ da te tãma ubumro za'ra ré, ma tô Zuda hã datẽme wi. Tawamhã da'ahâ na ma tô duré isiré 're danomro, Teudasihi ne. Isine, ma tô duré wĩrĩ ni, Zuda hã. Tawamhã isiré 're inomro mono norĩ hã ma tô duré te te ropé. 38-39Tahawa, ãhã na hã wa te hâiba upi za'ra wa'aba tõ, Pedru norĩ hã. Tô'ã. Ta norĩ hã si'uihâ na te te 're rowahutu za'ra mono wamhã, isimirowahutu za'ra hã te za isarina 're si'utõrĩ za'ra. Tazahã 'Re ihâimana u'âsi mono zadawa para te te 're rowahutu za'ra mono wamhã, tiwi uprosi waihu'u za'ra wa'aba õ di za, isimirowahutu za'ra hã. Tahawa, 'Re ihâimana u'âsi mono hã 'wapé za'ra wa'aba õ'umnhasite, te za aibâ norĩ ma iwaprosi waré za'ra wa'wa, si'aba'ré da.
Tawamhã isimiroti na hã ma tô ãma siwi saze. 40Tawamhã Zezusihi zadawa wasu'u'wa norĩ zô ma tô sitẽme tihârâ za'ra apâ. Ma tô dama hâiba 'ru za'ra, taré da te dasiwi hâ za'ra da. Taha pari, ma tô duré sadawa uwati za'ra, te te duré dama 're rowasu'u tõ za'ra mono da, Zezusihi wasu'u na hã. Taha parip si, ma tô tãma rob'ru za'ra, apâ si'aba'ré da. 41Tawamhã ma tô dawi wairé, dama roti'wa norĩ hawi. Da te hâ za'ra nherẽ, to za'ra di, Zezusihi zadawa wasu'u'wa norĩ hã. Isazei'wai wa, Zezusihi ne te te 're robzépata za'ra mono da, 'Re ihâimana u'âsi mono hã te te tãma ipisutu za'ra zém na hã ma tô sina waihu'u za'ra. Tahawa, tãma rowẽ za'ra di. 42Tawamhã awẽ sidâpâsi ma tô te te dama 're rowahutu za'ra, 'Re ihâimana u'âsi mono nhorõwa ãma, 'ri 'wawi wa'ra 're. 'Ri baba, ma tô duré te te dama 're rowasu'u za'ra, Zezusihi wasu'uwẽ na. Zezusi hã tô sena, Danho'reptui'wa da, 'Re ihâimana u'âsi mono te te wama ipisutu na ma tô duré te te dama 're rowasu'u za'ra.
Currently Selected:
Atu 5: xavBP
Tõsta esile
Share
Kopeeri
Want to have your highlights saved across all your devices? Sign up or sign in
© 2011, Wycliffe Bible Translators, Inc.All rights reserved.