Atu 4
4
Pedru norĩ hã Zuwãhã me dama roti'wa norĩ nho're isima'warazé wasu'u
1Tawamhã Pedru norĩ hã Zuwãhã me, zahadu te te dama rowasu'u zahuré ré, ma tô sasedoti norĩ hã aihutu. 'Re ihâimana u'âsi mono nhorõwa 'ri 'madâ'â'wa norĩ nhib'apito me, saduseu norĩ zama ma tô duré ãhã wamhã aihutu. Saduseu norĩ ta hã apâ dahâiwa'utuzé wasu'u wẽ'õ'wa norĩ. 2Ta norĩ hã ma tô sada ab'ru za'ra, Pedru norĩ zada, apâ 're idahâiwa'utu za'ra mono zém na te te dama rowasu'u zahuré wa. Ãne ma tô dama rowasu'u zahuré: “Dadâ'â nherẽ, te za apâ te te 're da'ahâiwa'utu, 'Re ihâimana u'âsi mono hã, Zezusi te te ihâiwa'utu ne.” Ãne na te te dama rowasu'u zahuré 'ru te, ma tô sada tizahi za'ra. 3Tawamhã ma tô dasiwi mrami zahuré ni. Ãhã wamhã, hâiwahâ pesere wa, ma a'â taré dasiwi za ni, dazazéb 're, awẽpsi da te dasiwi sani zahuré da apâ, iwasété na te te dama rowasu'u zahuré ré ne, da te tãma nharĩ zahuré da. 4Tane nherẽ, da'ahâ na ma tô saze za'ra ni, Zezusihi wasu'uwẽ hã da te iwapari za'ra norĩ hã. Isazei'wa norĩ hã ahâ uptabi di. Aibâ norĩ za'rata si hã 5 miu na ihâiba za'ra na.
5Tawamhã ma tô da'ãma ti'awẽ za'ra. Da'ãma awẽ za'ra wamhã, ma tô si'rã'õtõ, Zeruzalẽ ãma sasedoti ipire norĩ hã. Zudeu norĩ ma, roti'wa norĩ hã ma tô ime si'rã'õtõ, 'Re ihâimana u'âsi mono nhimiroti 'rata na rob'ui'éré na dama rowahutu'wa norĩ me zama. 6Anasi norĩ hã ma tô duré datẽme aimasisi zahuré, Caifasihi me. Anasi hã sasedoti 'Re ihâimana u'âsi mono ma da'ãma romhuri'wa, tisiré norĩ nhipai u ipire uptabi. Duré ni'wam norĩ ma tô dame aimasisi zahuré, Zuwã isisi hã Alesãdrihi me. Anasihi sisãnawã zahuré, ta norĩ hã. Duré Anasihi sisãnawã hâiba amo norĩ hã ma tô isiré ubumro, Zeruzalẽ ãma dama ipire za'ra norĩ hã. 7Tawamhã dama ipire norĩ hã ma tô dama 'ru za'ra, Pedru norĩ hã da te sani zahuré da, Zezusihi zadawa wasu'u'wa norĩ hã, isõ'reb za'ra da te dasiwi simizusi da.
Ãhã wamhã, ma tô sadanharĩ zahuré ni, ãne:
— E niha ma tô bété ãne i'manharĩ 'wa. E 'wa sadawa para, ma bété a norĩ wa'wa ihi'ré hã ipese 'wa.
8-9Tawamhã 'Re ihâimana u'âsi mono pẽ'ẽzani na ma tô Pedru hã aptete, dama pahi tõ da, duré te te tô dama rowasu'u da. Tahawa, te ãne tãma rowasu'u za'ra, dama ipire norĩ ma hã:
— Dama ipire norĩ, ãne te iwazadanharĩ za'ra wa'wa: “E niha, ma tô bété ãne hã i'manharĩ 'wa. E 'wa sadawa para, ma tô bété a norĩ wa'wa hã ihi'ré hã ipese 'wa.” Ãne ma tô iwazadanharĩ za'ra wa'wa. Tahawa, wa za aima rowasu'u za'ra wa'wa. 10Tawamhã a norĩ wa'wa hã te za iwaihu'u pese za'ra wa'wa, aihâiba mono bâ wa'aba. Uburé wasiré Izaraéu nhihudu norĩ zama te za duré waihu'u pese za'ra za. Zezu Cristuhu zadawa para, wa tô pese ni, ihi'ré hã. Zezusi hã Nazaré ãma aré 're isãmra mono hã asiwi wĩrĩ aba da, ma tô dama i'ru za'ra wa'wa. Taha paramhã ma tô dasiwi sasõmri ni, wedepo'o nhonhi'rãmi na. Ãhã wa, ma tô duré dârâ. Dâ'â nherẽ, 'Re ihâimana u'âsi mono, ma tô apâ hâiwa'utu. Taha zadawa para, te aibâ ihi'ré hã ãme za, rowẽ na. Ma tô tipese oto. 11Duréihã ma tô Zezusihi wasu'u na ãma rob'ui'éré siro, 'Re ihâimana u'âsi mono zadawa 'mahârâ'wa hã. Ẽtẽ na ma tô ãma simiré'é, ãne:
“Ẽne hã wẽ nherẽ, ma tô 'ri'wa norĩ hã siwi wẽ'õ za'ra, taré nomro da. Tane nherẽ, te te siwi wẽ'õ nherẽ, taré nomro õ di, ẽne hã. Ni'wa hã ma tô ti'â, 'ri uparizéb da hã, wẽ uptabi wa.”
— A norĩ wa'wa hã ẽtẽ wẽ'õ'wa norĩ ne, te aihâimana za'ra wa'wa. Zezusi hã duré ẽtẽ ne, te tihâiba. 12Danho'reptuzé hã, Zezusihi ãma si te za da te 're sõpẽtẽ za'ra. Ni'wa hã, aimawi hã 'Re ihâimana u'âsi mono te te dama pisutu õ di, ti'ai ãma te te 're ida'anho'reptui mono da hã. Tahawa, Zezusihi si uburé Danho'reptui'wa hã.
13Pedru norĩ hã mreme pahi zahuré õ di. Te te duré datõmo pipa zahuré õ di. Tahawa, zudeu norĩ ma roti'wa norĩ hã ma tô ãma titob'uzu za'ra. Rowahutu'wa da, te te dame 're romnhoré zahuré mono õ nherẽ, mreme pahi zahuré õ di. Tawamhã ma tô ãma tipo're pu'u za'ra oto, Zezusihi siré 're ineb zahuré na, ti'ai ãma 're morĩ ré hã. 14Aibâ ihi'ré hã, Pedru norĩ te te ipese zahuré hã te isiré tizab zahuré, danho're. Tahawa, dama ipire za'ra norĩ hã asa te te tãma nharĩ waihu'u za'ra õ di oto. 15Tawamhã ma tô tãma rob'ru za'ra, dasi'rã'õtõzém hawi pusi da. Pusi za'u si, ma tô ãma sisadawa pibu za'ra, dama roti'wa norĩ hã. 16Ãne te ãma sisadanharĩ za'ra:
— E marĩ, wa za 'manharĩ za'ra ni, aibâ norĩ ma hã. Tô sena, marĩ hã dama i'manharĩ waihu'u'õ hã ma tô 'manharĩ zahuré, danho'a. Ihi'ré hã ma tô pese zahuré. Aihĩni Zeruzalẽ ãma 're idahâimana za'ra mono hã ma tô wapari za'ra ni, ihi'ré wasu'u hã. Tahawa, wa norĩ hã iwasu'u, wa te dawi 're udâ waihu'u za'ra mono õ di za. 17Tane nherẽ, iwasu'u hã daza'rui mono bâ te te ropé tõ da, wa za tãma amhâzépa za'ra ni, te te dama 're rowasu'u zahuré mono tõ da oto, Zezusi 're imorĩzém na hã.
18Tawamhã ma tô sô tihârâ za'ra, apâ itẽmeb za'ra te te sina siri zahuré da. Itẽmeb za'ra zasi wamhã, ma tô sadawa uwati zahuré ni, Zezusihi hâimanazém na te te dama 're rowasu'u zahuré mono tõ da, duré isadawa para te te dama 're rowahutu zahuré mono tõ da. 19-20Tawamhã Pedru norĩ hã te asa tãma nharĩ za'ra, Zuwãhã me:
— E ma hã bété, 'Re ihâimana u'âsi mono ma, iwẽ. E imreme, wa za wapari ni. E aimreme za'ra wa'wa hã, wa za duré bété wapari ni. 'Re ihâimana u'âsi mono mreme si, wa za wapari ni. Ma'ãpé, asima ãma rosa'rata za'ra wa'aba, waihu'u za'ra wa'aba da. Wa norĩ hã wa za wa te dama 're rowasu'u u'âsi za'ra, uburé wa te 're i'madâ'â za'ra mono zém na hã, wa te 're iwapari za'ra mono zém na zama. Wa te dawi 're udâ waihu'u za'ra mono õ di za.
21-22Aibâ ihi'ré hã pese õ ré hã, 40 na ma tô ãma tiwahu. Tahawa, aihĩni 'Re ihâimana u'âsi mono ãma te tawata za'ra ni, aibâ ihi'ré hã morĩ wẽ wa oto. Tahawa, da te dasiwi ahâri da, te te dama 'ru waihu'u za'ra õ di, zudeu norĩ ma roti'wa norĩ hã. Tahawa, te taré duré tãma amhâzépa zahuré ni, Pedru norĩ ma, Zuwãhã me, te te dama rowasu'u zahuré tõ da oto, Zezusihi wasu'u na. Taha parimhã, ma tô duré oto tãma rob'ru zahuré ni, neb zahuré da.
Zezusihi zazei'wa norĩ hã imreme zusizé wasu'u
23Tawamhã Pedru norĩ hã zudeu norĩ ma, ipire za'ra norĩ hawi pusi wamhã, ma tô tineb zahuré, tisiré isazei'wa norĩ u, Zuwãhã me. Tawamhã ma tô tãma rowasu'u za'ra, 'Re ihâimana u'âsi mono ma, da'ãma romhuri'wa ipire norĩ mreme na, duré dama ipire za'ra norĩ mreme na zama. 24Ãne hã da te wapari za'ra wamhã, aihĩni ma tô dasiré ãma tawata za'ra ni, 'Re ihâimana u'âsi mono ãma. Te oto tiwi rowaptẽrẽ za'ra ni, tawamhã ãne:
— 'Re ihâimana u'âsi mono, a hã Wanhib'apito uptabi. A hã Ropoto na'rata 'wa. Uburé, ma tô marĩ hã i'apoto mo, hâiwa hã, duré ti'a hã, duré âporé hã. Uburé iwa 're idanomro mono da hã ma tô duré ipo. 25A hã ma tô Aipẽ'ẽzani na wahi'rada aima romhuri'wa Dawihi zadawa zarina inha, ãne:
“E marĩ wa, zudeu'õ norĩ hã ma tô sada tizahi pese za'ra, daro mono bâ 're ihâimana za'ra mono hã. E marĩ wa, ma tô iprãire na si te te sima 're rowa'õtõ za'ra. 26Roti'wa norĩ hã te sada aimasa. Isadawa para da'uwati'wa norĩ me, ma sada atob za'ra, Wanhib'apito 'Re ihâimana u'âsi mono zada, duré Danho'reptui'wa da, te te ipisutu zada.”
27— Ãhã na, tô sena Zeruzalẽ ãma ma tô tasi'rã'õtõ ni, aima romhuri wẽ 'wa zada, Zezusihi zada, Danho'reptui'wa da ipisutu zada. Erodi norĩ hã ma tô sitẽme ubumro, Põsiu Pilatuhu me. Ta norĩ hã zudeu'õ norĩ me duré Izaraéu nhihudu norĩ me, ma tô sada si'rã'õtõ, te te siwi wĩrĩ da. 28A hã romhâ ré, ãma iropisutuzéb zarina ma tô si'uihâ na ãma siwi uwaimra tô, te te waihu'u za'ra õ nherẽ, Erodi norĩ hã. 29Ãhã na dama ipire za'ra norĩ hã te duré wama amhâzépa za'ra. Wa norĩ hã aima romhuri'wa norĩ. Wei wapawaptob za'ra na, ai'umnhasi sina aimreme hã wa te dama 're wasu'u za'ra mono da, wapahi ãna. 30Zezusihi zadawa para, wa te 're dapese za'ra mono da, wei wapawaptob za'ra na. Zezusi hã aima romhuri wẽ 'wa, taha zadawa para, marĩ iwẽ hã dama i'manharĩ waihu'u'õ hã wa te dama 're 'manharĩ za'ra mono da, wei wapawaptob za'ra na.
31Tawamhã 'Re ihâimana u'âsi mono ma, mreme zusi pari, 'ri ma tô iré tisãsã'ã za'ra. Tawamhã 'Re ihâimana u'âsi mono pẽ'ẽzani na ma tô aptete za'ra, ipẽ'ẽ mono bâ. Pahi ãna, ma tô dama sadawa wasu'u za'ra oto, 'Re ihâimana u'âsi mono hã.
Isazei'wa norĩ hã, sõprum na 're ihâimana za'ra mono zé wasu'u
32Tawamhã isazei'wa norĩ hã uburé, ma tô sisaze za'ra, tinhimirosa'rata za'ra na hã. Ni'wam norĩ hã tinhibro te te sima 're sawi za'ra mono õ di, tite da si. Uburé, ma tô isibrob'õ norĩ udâna te te 're po'o za'ra. 33Mreme prédup sina, ma tô Zezusihi zadawa wasu'u'wa norĩ hã te te dama 're rowasu'u za'ra, Wanhib'apito Zezusi apâ ihâiwa'utuzé wasu'u na. Duré 'Re ihâimana u'âsi mono hã ma tô Zezusihi zazei'wa norĩ ma 're sõprub za'ra, iwẽ na si. 34-35Tawamhã 'ri tede'wa norĩ hã duré ti'a tede'wa norĩ hã ma tô tinhorõwa hã duré tinhipti'a hã te te dama 're wede za'ra, iwa'âbâ zô. Tawamhã iwa'â hã ma tô te te 're sõmri za'ra, Zezusihi zadawa wasu'u'wa norĩ ma. Tawamhã isazei'wai mono bâ marĩ zô tiwi 're iro'wanhi'riti za'ra mono zéb zarina, ma tô te te tãma 're po'o za'ra, Zezusihi zadawa wasu'u'wa norĩ hã. Tahawa, ni'wa hã simarĩ ãna 're hâimana mono õ di oto.
36-37Tawamhã aibâ hã Zuzé na isisi hã ma tô tinhipti'a hã dama wede, iwa'âbâ zô. Roti wẽ 'wa, ta hã. Tahawa, Banabé na ma tô siwi sisi, Zezusihi zadawa wasu'u'wa norĩ hã. (Banabéhé nhisi hã dama rowẽ zani'wa, te wasu'u, isisi hã.) Levihi nhihudu, ta hã. Sipri na rob'ré za'iti nhisi ãma ipotozé hã. Tinhipti'a hã te te dama wede wamhã, iwa'â, ma tô uburé ti'â, Zezusihi zadawa wasu'u'wa norĩ u.
Currently Selected:
Atu 4: xavBP
Tõsta esile
Share
Kopeeri
Want to have your highlights saved across all your devices? Sign up or sign in
© 2011, Wycliffe Bible Translators, Inc.All rights reserved.