Génesis 45
45
Iinpitari Cosi nohuitopisoꞌ
1Yaꞌipi piyapinënpita niꞌtonënquë Cotari nontërinso tonitohuachina, Cosiso co huachi ahuantërinhuëꞌ. Co huachi ahuantatonhuëꞌ, Iquipito nananquë chiníquën nonin: “¡Yaꞌipinquëma pipicoꞌ!” itërin. Napotohuachina, yaꞌipi piyapinënpita pipipi. Iinpitarëáchin nicasoꞌ, nohuitacaiso marëꞌ shaꞌhuirin. 2Shaꞌhuiton Cosisoꞌ, naꞌnëmiatarin huachi. Chiníquën naꞌnërin niꞌton, yaꞌipi iquipitoroꞌsa nitotopi. Huaraon pëinënquë huarëꞌ aꞌnaquënso paꞌsahuatonaꞌ, shaꞌhuitonpi. 3Naporo huarëꞌ Cosisoꞌ, inahuara nanamënaquë iinpita nontërin:
—¡Ca mini Cosico! ¿Nanpiárin iporahuanta tata? itërin. Napotopirinhuëꞌ, iinpitariso paꞌpi tëꞌhuatatonaꞌ, co nanitopihuëꞌ nonacaisoꞌ. 4Tëꞌhuatopirinahuëꞌ, Cosiriso itapon:
—Ama iyaroꞌsa tëꞌhuatocosohuëꞌ, yaꞌcaritocoꞌ, itërin. Naporo huarëꞌ iinpitari yaꞌcaririn. Yaꞌcarihuachinara, itaantarin:
—Ca mini iyaparimaco. ¿Coꞌta iráca nicatonoꞌsa Iquipitoquë huëcasoi paꞌanamaco?
5Napotëramacoso marëꞌ ama canpitaora ninoꞌhuicosohuëꞌ. Co canpitaso yonquipiramahuëꞌ, Yosë chachin aquëchitiirinco. Notohuaroꞌ piyapiꞌsa ananpicaso marëꞌ aquëchitërinco. 6Ipora huarëꞌ iso noꞌpaquë, cato piꞌipi nisarin tanarotopisoꞌ. Aꞌnatërápo piꞌi chachin, pahuanarin. Ina nápo piꞌi shaꞌtopirinahuëntaꞌ, co manta nitërinsoꞌ macaponahuëꞌ. 7Napotëranquëmaso chachin nisarin. Yosëso nipirinhuëꞌ, aquëchitiirinco. Canpitanta shiparima yaꞌhuëtiinquëmaso marëꞌ naporin. Canpita chachintaꞌ, huëhuëpiro ninin quëran nichaꞌëinquëmaso marëꞌ aquëchitiirinco. 8Inapocaso niꞌton, co canpita nohuanton isoporinquë huëꞌnahuëꞌ. Yosë chachin aꞌparinco niꞌton, huëꞌnahuë. Ina nohuanton, huaraon ayonquinaꞌpi nicaꞌhuaso marëꞌ yaꞌconahuë. Yaꞌipi maꞌshanënpita aꞌpaiato, piyapinënpitantaꞌ, camaicaꞌhuaso marëꞌ yaꞌconahuë. Naporahuaton, yaꞌipi Iquipitoquë huaraon yaꞌhuërënamën huaꞌanëntaꞌhuaso marëꞌ acorinco.
9Manóton paantatomaꞌ, tata shaꞌhuitoncoꞌ: “Cosi yaꞌhuëarin, iso pochin nanan aꞌpatiarinquën: ‘Yaꞌipi Iquipito noꞌpaquë huaꞌanëntaꞌhuaso marëꞌ Yosë acorinco. Manóton oꞌmaton, niꞌquimaco. 10Yaꞌipi huiꞌnanpita, shiaꞌhuaroꞌsaꞌ, inapitarë chachin, oꞌmacoꞌ. Pëꞌtahuanëmapita, maꞌshanëmapita, yaꞌipi yaꞌhuëtërinquëmasoꞌ, quiquiimacoꞌ. Oꞌmahuatamaꞌ, Cosin parti acoaranquëmaꞌ. Inapohuatamaꞌ, co aquëya quëranhuëꞌ niniꞌsáparihuaꞌ. 11Naroꞌpa huachi carima cosharo quëtáponquëmaꞌ. Yaꞌipi huëꞌnamaso nápo chachin co manta ichipahuantaranquëmahuëꞌ. Aꞌnatërápo piꞌipi pahuanarin tanaro tahuëriꞌsa naꞌhuëcaso niꞌton, napotápënquëmaꞌ,’ itocoꞌ. 12Iyaꞌhuantaꞌ, canpitantaꞌ, yaꞌipi naporahuësoꞌ, nani natanamaco. 13Chiníquën nanantato Iquipitoquë huaꞌanëntërahuësontaꞌ, nani niꞌnamaꞌ. Yaꞌipi niꞌnamasoꞌ tata shaꞌhuitoncoꞌ. ¡Manóton paantatoma tata macontacoꞌ!” itërin.
14Napotahuaton, iyaꞌhuain iporin. Ina iporin quëran naꞌnërin. Mincamintaꞌ, Cosi iporin quëran naꞌnërin. 15Ina quëran Cosisoꞌ, yaꞌipi iinpita noya nontaton sëꞌquërin. Inapitanta iporahuaton naꞌnërin. Ina piquëran inapitarinta co huachi tëꞌhuatatonahuëꞌ, noya nontopi huachi.
16Huaraon pëinënquëntaꞌ, aꞌnaroáchin nanan nincanin: “Cosi iinpita canquipi,” itopi. Ina natanahuaton, huaraonso catahuarinsopita huaꞌanoꞌsarë chachin noya cancantopi. 17Noya cancantaton huaraonisoꞌ, Cosi itapon:
—Iyaroꞌsa shaꞌhuitëquëꞌ, pëꞌtahuanënaquë trico aꞌmitahuatonaꞌ, Canaan parti panantaꞌinaꞌ. 18Paantatonaꞌ, paꞌpina quëmaꞌinaꞌ. Yaꞌipi quëmopinënpitarë chachin, oꞌmaꞌinaꞌ. Oꞌmahuachinaꞌ, Iquipitoquë noya noya noꞌpaꞌ nininsoꞌ, cari quëtarahuë. Napoaton inapitasoꞌ, iso noꞌpaquë maꞌsha noya noyatërinsopita, caponaꞌ. 19Saꞌinaꞌ, huiꞌninaꞌ, paꞌpinaꞌ, inapita quëmacaiso marëꞌ, camaiquë toronanoꞌsa isëran quëpaꞌinaꞌ. Shaꞌhuitëquë aꞌnaroáchin huëꞌinaꞌ. 20Naporahuaton, ama aquëtë maꞌshanënapita yonquiꞌinasohuëꞌ. Iquipitoquë maꞌsha noya noya nininsopita, inapitari huaꞌanëntaponaꞌ, itëquëꞌ, itërin. 21Napotohuachina, Cacopo huiꞌninpitasoꞌ ina inachachin nipi. Huaraon camaitërinso chachin, Cosiri toronanoꞌsa quëtërin. Naporahuaton cosharo iraquë caracaisontaꞌ, quëtërin. 22Oꞌnanpiracaisontaꞌ, yaꞌipi iinpita ananitëraꞌpiarin. Mincaminso nipirinhuëꞌ, cara pasa coriqui prata quëran nininsoꞌ quëtahuaton, aꞌnatërápo aꞌmocaso quëtërin. 23Paꞌpiontaꞌ, shonca moraquë, noya noya maꞌsha Iquipitoquë yaꞌhuërinsoꞌ, aꞌpatontarin. Naporahuaton shonca moraquë chachin, trico, pan, cosharoꞌ, inapita aꞌpatontarin. Oꞌmahuachina carimacaiso marëꞌ aꞌpatontarin. 24Pacacaiso marëꞌ nontohuachinara, Cosiso iinpita itapon:
—Osharan pacoꞌ. Amana iraquë ninoꞌhuíracosohuëꞌ, itërin. Napotohuachina paꞌpi huachi.
25Inapitasoꞌ, Iquipito quëran pipirahuatonaꞌ, Canaan parti canconpi. Paꞌpina yaꞌhuërinquë chachin canconpi huachi. 26Paꞌpina nontatona shaꞌhuitopi: “¡Cosi nanpiárin tata! ¡Inari yaꞌipi Iquipito noꞌpaꞌ huaꞌanëntërin!” itopi. Ina natanahuaton, Cacoposo paꞌyanënquë tachianantërin. Shaꞌhuitopirinahuëꞌ, co natëtërinhuëꞌ. 27Napoaponahuëꞌ, Cosiri nanan aꞌpatërinso natanin. Ina natanahuaton, toronanoꞌsa quëpamacaiso marëꞌ aꞌpatontarinsontaꞌ, niꞌnin. Naporo huarëꞌ capa cancantomiatërin huachi. 28Capa cancantaton tapon: “¡Tëhuënchachin Cosi nanpiárin! Coꞌhuara chimiantërasocohuëꞌ paꞌmato nimai,” tënin.
Currently Selected:
Génesis 45: cbt
Tõsta esile
Share
Kopeeri
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.