Génesis 46
46
Iquipitoquë paꞌmapisoꞌ
1Cacoposoꞌ yaꞌipi huëntonënë chachin paꞌsarin. Yaꞌipi maꞌshanënpitarëꞌ paꞌsarin. Piirsipaquë canconpachinara, maꞌsha tëparin. Tëparahuaton, paꞌpincoꞌ Yosë chinotërinso chachin chinotërin. 2Naporo tashi Yosëri huaꞌnarëso pochin yaꞌnotërin. Yaꞌnotahuaton, nininën quëran përarin: “Cacopo” itërin. Napotohuachina, inariso itapon:
—Maꞌta Sinioro yaꞌhuarahuë, itërin.
3—Caso Yosëco. Tataparionta chinotërinco. Iquipitoquë paꞌmacaso marëꞌ ama tëꞌhuaquësohuëꞌ. Inaquë shiparinpita naꞌatonaꞌ, panca nacion ocoiaponaꞌ. 4Canta quëmaroꞌco Iquipitoquë, paꞌmarahuë. Naporahuaton ca chachin, ina noꞌpa quëran shiparinpita ocoiarahuë. Inaquë chiminpatan, Cosi nocoarinquën, itërin.
5Ina quëran Cacoposoꞌ, Piirsipa quëran paantarin. Huiꞌninpitari toronanquë aꞌmitopi. Huaraoni quëpamacaiso marëꞌ toronanoꞌsa aꞌpatontarinquë, inapotopi. Saꞌinaꞌ, huiꞌninaꞌ, inapitanta aꞌmitopi. 6-7Cacoposoꞌ, huiꞌninpitarë chachin paꞌsarin. Huiꞌninpitanta saꞌina huiꞌninpitarë chachin paꞌsapi. Yaꞌipi inapitarë chachin paꞌsápatonaꞌ, Iquipito noꞌpaquë huarëꞌ camapi. Yaꞌipi maꞌshanënapitanta Canaan parti yaꞌhuëtopisoꞌ, quiquipi. Pëꞌtahuanënapitantaꞌ, Ohuicaroꞌsaꞌ, ohuacaroꞌsaꞌ, chiporoꞌsaꞌ, inapitanta quiquipi.
8Isopita, Cacopo quëran pipipisopita Iquipitoquë paꞌmapi. Inapita chachin israiroꞌsa itopi antaꞌ: Paninantërinsoꞌ, Nopino. 9Ina huiꞌninpitasoꞌ: Anoco, Huaron, Isron, Caromi, inapita. 10Simion huiꞌninpitantaꞌ, Quimoino, Camin, Ohuato, Caquin, Sohuaro, Saono, inapita. Saonosoꞌ, Canaan sanapiquë huiꞌnahuaninsoꞌ. 11Nihui huiꞌninpitantaꞌ, Coirison, Quiato, Mirari, inapita. 12Cota huiꞌninpitantaꞌ, Iri, Onan, Sira, Parisi, Saro, inapita. Iri, Onan, inapitasoꞌ, Canaan parti chachin chiminpisoꞌ, nani nitotërëhuaꞌ. Parisi huiꞌninpitantaꞌ, Isron, Amoro, inapita. 13Isacaro huiꞌninpitantaꞌ, Toran, Popan, Copo, Simiron, inapita. 14Saporono huiꞌninpitantaꞌ, Siriti, Iron, Cariri, inapita. 15Ina nápo Cacopo huiꞌninpita quëmapiꞌsa Niaquëya yaꞌhuëpi. Sanapinta aꞌnara yaꞌhuëtërin: Tina itërinsoꞌ. Inapitasoꞌ, Patan-aranquë yaꞌhuapon huiꞌnahuaninsopita. Nia quëran pipipisopitasoꞌ, cara shonca cara yaꞌpiꞌ, sanapirë chachin icanpi.
16Caro huiꞌninpitantaꞌ, Sipion, Aqui, Ispon, Soni, Iri, Aroti, Ariri, inapita. 17Asiri huiꞌninpitantaꞌ, Imina, Isopa, Isopi, Piria, inapita. Oshinanta yaꞌhuërin: Sira itopi. Piria huiꞌninpitantaꞌ, Ipiri, Mariquiri, inapita. 18Caro, Asiri, inapitanta Cacopo huiꞌninpita Siripaquëya nipisoꞌ. Ina quëran nipisopitasoꞌ, yaꞌipiya quëran shonca saota yaꞌpiꞌ, icanpi. Siripasoꞌ Napanori Nia catahuacaso marëꞌ nicanarinsoꞌ, nani nitotërëhuaꞌ.
19Naquiranta Cacopo saꞌin chachin ninin. Ina huaꞌhuinpitantaꞌ, Cosi, Mincamin, inapita. 20Cosisoꞌ, Asinaquë huiꞌnahuaninsopita: Manasisi, Iprain, inapita. Inapitasoꞌ, Iquipitoquë nasitopi. Asinantaꞌ, ayonquiantaꞌinquëmaꞌ. Inasoꞌ, Potihuira huiꞌnin. Potihuirantaꞌ, On ninanoquë corto huaꞌan yaꞌconin. 21Mincamin huiꞌninpitantaꞌ, Pira, Piquiri, Asipiri, Quëra, Namano, Iqui, Nosi, Mopimo, Opimo, Arato, inapita. 22Ina nápo Naquira quëran nipisopita yaꞌhuëpi. Shonca catapini yaꞌpi yaꞌipiya quëran icanpi.
23Tanosoꞌ, aꞌnaíchin huiꞌnahuanin: Osimo itërin. 24Nipitari huiꞌninpitantaꞌ: Casiiri, Coni, Quisiri, Sirimo, inapita. 25Tano, Nipitari inapitanta Cacopo huiꞌninpita nipi. Inapitasoꞌ, Piraquëya nipisoꞌ. Ina quëran nipisopitasoꞌ, yaꞌipiya quëran canchisë yaꞌpiꞌ, icanpi. Pirantaꞌ, Napanori Naquira catahuacaso marëꞌ nicanarinsoꞌ, nani nitotërëhuaꞌ. 26-27Iquipitoquë paꞌmapisopita, saota shonca saota yaꞌpi icanpi. Yaꞌipi inapitasoꞌ, Cacopo quëran pipipisopita. Huiꞌninpita saꞌinasoꞌ co pichipihuëꞌ. Cosi huiꞌninpitasoꞌ cato. Inapitasoꞌ inaquë chachin nasitopi. Cacopo, Cosi, inapitarëꞌ canchisë shonca yaꞌpi yaꞌipiya quëran icanpi.
28Coꞌhuara Cosin parti camayátërasoihuëꞌ, Cacoposoꞌ Cota camairin: “Cosi shaꞌhuitëquë huëꞌin, Cosin parti nacapiꞌinco,” itërin. Inaquë Cota paasoꞌ, Cacoposo yaꞌipi huëntonënë chachin Cosinquë camapi huachi. 29Iin cantomarahuaton Cotasoꞌ, paꞌpini nanan aꞌpatërinso shaꞌhuitërin. Shaꞌhuitohuachina Cosisoꞌ, aꞌnaroáchin piyapinënpita camairin toronanën tapacaiso marëꞌ. Inaquë huënsërahuaton, Cotarë chachin paꞌnin. Paꞌsahuaton paꞌpin quënanconpachina, iporin. Iporinquëranchin huaꞌqui naꞌnërárin. 30Naporoꞌ Cacopori, itapon:
—Ayapiranhuëꞌ, quënaantaranquën niꞌton: ¡Iporasoꞌ chiminpatonta noyatapon huachi tënahuë! tënin.
31Paꞌpin nani nontahuaton Cosisoꞌ, yaꞌipi iinpita, quëmopinënpita inapita itapon:
—Huaraon nicapo paꞌsarahuë. Paꞌsahuato itapo: Yaꞌipi quëmopinëhuëpita Canaan parti yaꞌhuëpirinahuëꞌ, yacapainacoso marëꞌ oꞌmapi. 32Ohuacanënapita, ohuicanënapita, yaꞌipi maꞌshanënapita quiquiimapi. Inapitaso pëꞌtahuatonaꞌpiroꞌsaꞌ, itarahuë. 33-34Napotohuato, huaraon përasarinquëmaꞌ. Përatënquëmaꞌ maquësona sacatëramasoꞌ natanpachinquëmaꞌ: “Quiyasoꞌ, shimashonëhuëipita pochachin, ohuica pëꞌtahuanaꞌpiroꞌsacoi,” itocoꞌ. Napohuatamaꞌ, Cosin partiquë yaꞌhuapomaꞌ. Iquipitoroꞌsasoꞌ, ohuica pëꞌtahuanaꞌpiroꞌsarëꞌ, napopináchin yaꞌhuëcaisoꞌ, naꞌin. Napohuatamaꞌ, canpitaráchin inaquë yaꞌhuapomaꞌ, itërin.
Currently Selected:
Génesis 46: cbt
Tõsta esile
Share
Kopeeri
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.