Génesis 44
44
Cosi, iinpita tënirinsoꞌ
1Nani caꞌpachinara, oꞌopachinara, Cosiso piyapinën camairin:
—Isopita quëmapiꞌsa costaronënaquë, trico amëntatëquëꞌ. Naporahuaton coriquinëna pahuërëtopisontaꞌ, aꞌnaya aꞌnaya costaronënquë chachin acotaantaquëꞌ. 2Minënëhuë prata quëran nininsontaꞌ, huaꞌhua nininso costaronënquë acotëquëꞌ. Coriquinën, trico marëꞌ pahuërëtërinsoꞌ pirayan acotëquëꞌ, itërin. Napotohuachina, piyapinënsoꞌ ina inachachin ninin.
3Tahuëririnquë piꞌi pipirirahuaso Cosisoꞌ, iinpita nontahuaton aꞌparin. Napohuachina moranënapitarë chachin paꞌpi huachi. 4-5Ninano quëran pipitona iinpitaso co aquëyátërasoihuëꞌ, Cosiso piyapinën itapon:
—Apira quëmapiꞌsa paꞌpisoꞌ, imaquëꞌ. Cantonahuaton napotëquëꞌ: “¿Onpoatonta canpitaso nosoropirinënquëmahuëꞌ, co noyahuëꞌ ninamaꞌ? Prata quëran minë nininsoꞌ, huaꞌanëhuë oꞌoton ninorinso chachin ihuatëramaꞌ. ¡Paꞌpi co noyahuëchi ninama paya!” itëquëꞌ, itërin.
6Cantonahuaton piyapinënsoꞌ Cosiri shaꞌhuitërinso chachin itërin. 7Napotohuachina, inapitariso itaantapi:
—¿Ihuatëramaꞌ, itërancoi ti? ¡Coꞌchi quiyaso onporo tërantaꞌ, inapoꞌitoihuëꞌ! 8¿Coꞌta Canan parti quëran huarëꞌ coriqui costaronëhuëiquë quënanpatoira, quëshiantaranquën pora? ¿Onporahuatoita iporasoꞌ, pratahuë nipon, orohuë nipon, huaꞌanën pëinën quëran ihuachitoihuëꞌ? 9Quiyasoꞌ piyapinënpita pochincoi ninai. Incoi tëranta minë quënapahuatancoi, chimiin. Quiyantaꞌ, piyapinënpita pochin asacatocoi tënai, itopi. 10Napotohuachina, Cosi piyapinënsoꞌ taantarin:
—Noyapaꞌ. Naporama niꞌquëhuarëꞌ, inapochinquëma nipachin. Nipirinhuëꞌ, insosona minë quënaparahuësoíchin, piyapinëhuë nisarin. Aꞌnapitanquëmasoꞌ, co manta onpoaramahuëꞌ, itërin. 11Napotohuachina, aꞌnaya aꞌnaya costaronëna chinohuaratonaꞌ, iꞌshiritapi huachi. 12Iꞌshiritohuachina yonisarin. Paninan nininso costaronën quëran caniaritahuaton, huaꞌhua nininso costaronënquë huarëꞌ, yonirin. Yonípachina, Mincamin costaronënquë quënanin huachi. 13Ina nicatona iinpitasoꞌ, paꞌpi sëtahuatona aꞌmoanpiso oshapi. Napohuachina, aꞌnaya aꞌnaya pëꞌpëtonëna moranënaquë aꞌmitahuatonaꞌ, naquëranchin ninanoquë ayaimantapi.
14Cotasoꞌ, iinpitarë chachin Cosi pëinënquë canconpachina, inaso yaꞌhuëarin quënamantapi. Quënanahuatonaꞌ, isonpi quëran noꞌpaquë huarëꞌ monshorahuatonaꞌ, moshaipi. 15Moshasoiꞌ, Cosiso iinpita itapon:
—¡Coꞌchi canpitaso yonquinahuanoꞌsa pochinhuë ninama paya! ¡Caso chiníquën nanantërahuë niꞌton, nito ninorahuë! itërin. 16Napotohuachina, Cotari itapon:
—¡Tëhuënchachin co onpo aꞌpaniaꞌhuainso nanitëraihuëꞌ! ¡Co naporaihuëꞌ, co taꞌcahuaiso yaꞌhuërinhuëꞌ! Oshahuanaisoꞌ, nani Yosë nitotërin. Maꞌtana yaꞌhuarai. Minënën maninsorë chachin asacatocoi, itopi. 17Napotopirinahuëꞌ, Cosiriso itapon:
—Co napoarinhuëꞌ. Insosona minënëhuë quënapapisoíchin piyapinëhuë nisarin. Aꞌnapitanquëmasoꞌ, tatama yaꞌhuërinquë noya panantacoꞌ. Co insonta maꞌsha onpotarinquëmahuëꞌ, itërin.
Cota, Mincamin yaꞌhuërënamën yaquëparitërinsoꞌ
18Cosi napohuachina, Cotari amasha yaꞌcarirahuaton, itapon:
—Piꞌpiyan sinioro nonchinquën topirahuë. Yonquirahuëso noꞌtëquën shaꞌhuichinquën. Quëmasoꞌ huaraon pochachin chiníquën nanantëran. Napoaton ama noꞌhuitonco anaꞌintaancoso marëhuëꞌ napotaranquën. 19Iꞌhua huëꞌnaiquë, quëmaso natanancoi tatahuëi yaꞌhuëtërincoisoꞌ. Aꞌna iyahuëinta yaꞌhuëtërincoisoꞌ, natanancoi. 20Quiyarinta naporo shaꞌhuitëranquën: “Tatahuëi yaꞌhuëtërincoi, nani máshoya,” itërainquën. Aꞌna iyaꞌhuanta huiꞌnapi yaꞌhuëtërincoisoꞌ, shaꞌhuitërainquën. Inasoꞌ, tatahuëi nani máshoya nisoꞌ huaꞌhuatërin. Naporo chachin shaꞌhuitëranquën tatahuëri naꞌcon nosororinsoꞌ. Ina yoꞌnanquëranchin huaꞌhuatopisopita cato yaꞌhuëpirinahuëꞌ, aꞌnaso ayarin niꞌton, inaíchin quëparitërin. Napoaton nosoromiatërin. 21Naporoꞌ shaꞌhuitërancoi nohuitamaso marëꞌ quëcaꞌhuaisoꞌ. 22Napotohuatancoira, shaꞌhuitërainquën: “Iyaꞌhuasoꞌ, co nanitërinhuëꞌ paꞌpin huëshicasoꞌ. Huëshirin naporini, paꞌpinsoꞌ sëtori tëpaꞌitonhuëꞌ,” itërainquën. 23Napotopiranquënhuëꞌ: “Coꞌsoꞌ iyaꞌhua quëpatamahuëꞌ, co onporonta tahuërëtaranquëmahuëꞌ,” itërancoi.
24Tatahuëitaquë canconpatoira, yaꞌipi quëma napotërancoisoꞌ shaꞌhuitërai.
25-26Huaꞌquimiachin quëran, tatasoꞌ camairincoi: “Paꞌsahuatomaꞌ trico paꞌamantacoꞌ,” itopirincoihuëꞌ, quiyarisoꞌ: “Co nanitëraihuëꞌ. Iyaꞌhua aꞌpaantohuatancoi, naporo huarëꞌ paꞌsarai. Coꞌsoꞌ ina quëpahuatoihuëꞌ, co huaꞌan tahuërëtarincoihuëꞌ,” itërai. 27Napotohuatoira, tatahuëi shaꞌhuitërincoi: “Canpita nitotërama saꞌahuëcoꞌ catoíchin huaꞌhuaninsoꞌ. 28Aꞌnasoꞌ, ayarin. Napoaton naporo quëran huarëꞌ co quënanchinahuëꞌ. Paꞌpiniri caꞌmara tënahuë. 29Iin yaꞌhuërëꞌ quëparamaquëya maꞌsha onpohuachin, canpita tëhuëaramaꞌ. Canpita tëhuënëmaquë caso mashoco sëto tëpaponco huachi,” itërincoi.
30-31Tatahuësoꞌ, iyaꞌhuarëꞌ aꞌnaíchin pochin nipi. Coꞌsoꞌ quiyarëꞌ pantahuachinhuëꞌ, tatahuëso chiminapon. Quiya tëhuënëhuëiquë tata mashoyasoꞌ sëtori tëpapon. 32Coꞌhuara huëꞌshamátërapoihuëꞌ shaꞌhuitërahuë: “Iyaꞌhua aꞌpaantohuatancoi, cari niꞌsarahuë. Maꞌsha onpohuachinsoꞌ, ca anaꞌintoco huachi,” itërahuë. Naporahuaton napotomantarahuë: “Coꞌsoꞌ quëshintahuatënquënhuëꞌ, chiminaquë huarëꞌ naꞌinarahuë,” itërahuë. 33Napoaton nontaranquën natanco topirahuë. Ca iyaꞌhua yaꞌhuërënamën quëma piyapinën quëparichi tënahuë. Inaso iinpitarëꞌ, panantaꞌin. 34Coꞌsoꞌ iyaꞌhua pantahuachinsoꞌ, co caso nanitërahuë tatahuëtaquë, panantaꞌhuasoꞌ. Tatahuë maꞌsha onporinsoꞌ, co yaniꞌnahuëꞌ, itërin.
Currently Selected:
Génesis 44: cbt
Tõsta esile
Share
Kopeeri
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.